ប្រធានគណបក្សសង្គ្រោះជាតិ លោក សម រង្ស៊ី ដែលកំពុងបំពេញទស្សកិច្ចនៅសហរដ្ឋអាមេរិក អំពាវនាវឲ្យអ្នកនយោបាយវិលមករកវប្បធម៌សន្ទនាវិញ ដើម្បីរួមគ្នាដោះស្រាយស្ថានការណ៍នយោបាយឲ្យវិលទៅរកភាពដើមវិញ។
គណបក្សកាន់អំណាចនៅតែបង្ហាញជំហរគាំទ្រវប្បធម៌សន្ទនានេះ ប៉ុន្តែទាមទារឲ្យដៃគូរបស់ខ្លួនត្រូវមានភាពស្មោះត្រង់ជាមុនសិន និងមិនត្រូវយកបញ្ហាបុគ្គលផ្ទាល់ខ្លួនមកឡូកឡំក្នុងរឿងនយោបាយនោះឡើយ។
ការអំពាវនាវរបស់គណបក្សប្រឆាំង ចង់ឲ្យមានដំណោះស្រាយនយោបាយដែលគណបក្សនេះចាត់ទុកថា កំពុងមានសភាពតានតឹងខ្លាំងនោះ ហាក់មិនមានការចាប់អារម្មរណ៍ពីគណបក្សកាន់អំណាចឡើយ។
លោកនាយករដ្ឋមន្ត្រី ហ៊ុន សែន តាមរយៈមន្ត្រីជំនិតរបស់លោកបានប្រាប់ទៅសារព័ត៌មានក្នុងស្រុកកាលពីថ្ងៃទី១៥ មិថុនា ថា លោកគ្មានពេល និងមិនមានការចាំបាច់និយាយជាមួយទណ្ឌិតដែលកំពុងរត់គេចខ្លួននៅក្រៅប្រទេសនោះទេ។ លោកថ្លែងទៀតថា លោកមិនបានស្កប់ស្កល់ទៅនឹងលិខិតមួយសន្លឹករបស់លោក សម រង្ស៊ី ដែលសរសេរទៅលោកកាលពីពេលថី្មៗនេះនោះដែរ។
លោក សម រង្ស៊ី ប្រធានគណបក្សសង្គ្រោះជាតិ បានបញ្ជាក់ក្នុងនាទីវេទិកាអ្នកស្តាប់របស់វិទ្យុអាស៊ីសេរី ពីរដ្ឋធានីវ៉ាស៊ីនតោន កាលពីថ្ងៃពុធ ទី១៥ មិថុនា ថា លិខិតរបស់លោកនោះមិនទាន់មានការឆ្លើយតបជាផ្លូវការពីលោក ហ៊ុន សែន យ៉ាងណានៅឡើយទេ ហើយលោកក៏មិនចាំបាច់ ឬខ្វល់ចំពោះការឆ្លើយ ឬមិនឆ្លើយតបនោះដែរ។
លោក សម រង្ស៊ី បានសរសេរលិខិតទៅលោក ហ៊ុន សែន កាលពីថ្ងៃទី១៤ ខែមិថុនា ដោយបានចូលរួមរំលែកការឈឺចាប់ជាមួយគ្រួសាររបស់លោក ហ៊ុន សែន ហើយថ្កោលទោសចំពោះទង្វើអសីលធម៌ទាំងឡាយណាដែលធ្វើឲ្យប៉ះពាល់ដល់កិត្តិយស និងសេចក្ដីថ្លៃថ្នូរនៃគ្រួសារលោកនាយករដ្ឋមន្ត្រី។
ទោះបីជាយ៉ាងណាក្ដី លោក សម រង្ស៊ី ប្រកាសថា លោកនឹងមិនដាក់លក្ខខណ្ឌដល់ដៃគូនយោបាយរបស់លោកទេ ដើម្បីឲ្យវប្បធម៌សន្ទនាចាប់ផ្ដើមដំណើរការឡើងវិញ។ លោកថា មានតែវប្បធម៌ជជែកគ្នានេះទេដែលអាចដោះស្រាយបញ្ហាបាន និងមានតម្លៃសម្រាប់ប្រជាពលរដ្ឋខ្មែរ៖ «ដូច្នេះគណបក្សសង្គ្រោះជាតិត្រៀមខ្លួនជានិច្ច ចាប់ផ្ដើមជជែកគ្នាដោយគោរពគ្នាទៅវិញទៅមក មិនដាក់លក្ខខណ្ឌទេ លក្ខខណ្ឌពេលវេលា លក្ខខណ្ឌទីកន្លែង និងប្រធានបទអីជាដើម។ ប្រធានបទយើងត្រូវជ្រើសប្រធានបទណាដែលស្របនឹងស្ថានការណ៍បច្ចុប្បន្ន ដែលឆ្លុះបញ្ចាំងស្ថានភាពតានតឹងធ្ងន់ធ្ងរគួរឲ្យព្រួយបារម្ភ…»។
ការបញ្ជាក់ជំហជាថ្មីនេះ ធ្វើឡើងក្នុងនាទីវេទិកាអ្នកស្តាប់របស់វិទ្យុអាស៊ីសេរី ពីរដ្ឋធានីវ៉ាស៊ីនតោន កាលពីថ្ងៃពុធ ទី១៥ មិថុនា។
លោក សម រង្ស៊ី បន្តទៀតថា អ្នកអង្កេតការណ៍អន្តជាតិព្រួយបារម្ភចំពោះស្ថានការណ៍នៅកម្ពុជា ដែលកំពុងស្ថិតក្នុងស្ថានភាពធ្ងន់ធ្ងរ និងឈានទៅរកគ្រោះមហន្តរាយដល់ប្រទេសជាតិ និងប្រជាពលរដ្ឋ។ លោកថា ករណីនេះចាំបាច់ត្រូវតែអ្នកនយោបាយ និងអ្នកពាក់ព័ន្ធជួបចរចាគ្នាឡើងវិញ ដោយតម្កល់ផលប្រយោជន៍ជាតិជាធំ ធ្វើយ៉ាងឲ្យសភាពការណ៍នោះបានធូរស្រាលឡើងវិញ។
ទាក់ទងករណីនេះដែរ ថ្មីៗនេះ លោកនាយករដ្ឋមន្ត្រី បានប្រកាសថា ការចរចា ឬការដោះស្រាយបញ្ហាអ្វីមួយរបស់អ្នកនយោបាយនៅពេលនេះ ត្រូវតែធ្វើឡើងតាមច្រករដ្ឋសភា ហើយអ្នកតំណាងរាស្ត្រត្រូវតែមកធ្វើការដោះស្រាយបញ្ហាទាំងឡាយនៅរដ្ឋសភា។
ជុំវិញបញ្ហានេះ លោក សម រង្ស៊ី បង្ហាញជំហរថា ការដែលអ្នកតំណាងរាស្ត្រគណបក្សសង្គ្រោះជាតិ អាចវិលចូលទៅប្រជុំសភាវិញបាន លុះត្រាណាមានការដោះស្រាយជាកញ្ចប់ជាមុនសិន ក្នុងនោះត្រូវមានការទម្លាក់ចោល ការចោទប្រកាន់ និងដោះលែងសកម្មជនសិទ្ធិមុនស្ស គណបក្សនយោបាយដែលកំពុងជាប់ឃុំ ធានាដល់ការគោរព និងឲ្យតម្លៃពិតប្រាកដដល់អភ័យឯកសិទ្ធិសភារបស់អ្នកតំណាងរាស្ត្រ ដោយគ្មានការគំរាមកំហែង៖ «យើងអត់ទៅលេងសើចនៅក្នុងសភាបែបហ្នឹងទេ យើងចង់ឲ្យគោរពគោលការណ៍លទ្ធិប្រជាធិបតេយ្យសេរីពហុបក្ស។ ឥឡូវប្រជាធិបតេយ្យកន្លែងណា សេរីកន្លែងណា ផ្តាច់ការទាំងស្រុង សិទ្ធិសេរីភាពត្រូវគេជាន់ឈ្លី ពហុបក្សកន្លែងណា បក្សតែមួយកាន់អំណាច ហើយតំណាងរាស្ត្រមិនអាចធ្វើការបានទេ គេចង់ចាប់ទៅដាក់គុកពេលណាបានតាមចិត្ត និយាយស្តីអីបន្តិចគេឲ្យតុលាការចាត់ការ តើតំណាងរាស្ត្រក្នុងសភាពបែបហ្នឹងធ្វើការបានយ៉ាងម៉េច…? រក្សាសន្តិសុខខ្លួនឯងមិនបានផង គ្រាន់តែនិយាយការពារផលប្រយោជន៍ជាតិ ប្រជាពលរដ្ឋត្រូវគេចាប់ដាក់គុក តើឲ្យយើងចូលសភាក្នុងសភាពការណ៍យ៉ាងហ្នឹងបែបម៉េច…?»។
អ្នកតំណាងរាស្ត្រគណបក្សសង្គ្រោះជាតិ ពហិការមិនចូលប្រជុំសភាមួយរយៈ ក្រោយពីមានការប៉ុនប៉ងដកអភ័យឯកសិទ្ធិតំណាងរាស្ត្រ និងការគំរាមចាប់ខ្លួនប្រធានស្ដីទីគណបក្ស លោក កឹម សុខា ជាដើម។
អ្នកវិភាគបញ្ហាសង្គម លោក កែម ឡី មើលឃើញថា ស្ថានការណ៍វិវឌ្ឍន៍ចុងក្រោយនៃនយោបាយក្នុងប្រទេសកម្ពុជា និងតាមរយៈការឆ្លងឆ្លើយរបស់មេដឹកនាំនយោបាយទាំងពីរ គឺគណបក្សប្រជាជនកម្ពុជា និងគណបក្សសង្គ្រោះជាតិ នឹងអាចរកច្រកចេញបានតាមរយៈការចរចា ប៉ុន្តែដំណោះស្រាយនយោបាយនោះ អាចធ្វើឡើងជារបៀបអ្នករកស៊ី អង្ករកំប៉ុង ដែលមិនធានាដល់ការផ្សះផ្សាជាតិបានយូរអង្វែង ឬចំណេញពលរដ្ឋម្ចាស់ឆ្នោតនោះទេ៖ «វាគ្រាន់តែជាដំណោះស្រាយមួយគែៗ មួយកំប៉ុងៗ អាហ្នឹងកន្លងមក ហើយរឿងហ្នឹងវាអាចកើតឡើងបន្តទៅមុខទៀតនៅមុនការបោះឆ្នោត»។
អ្នកនាំពាក្យគណបក្សប្រជាជន លោក សុខ ឥសាន មានប្រសាសន៍ថា នឹងមិនមានការចរចាណាមួយកើតឡើងនោះទេ បើសិនជាគណបក្សប្រឆាំងនៅតែយកបញ្ហាបុគ្គលមកឡូកឡំជាមួយបញ្ហានយោបាយប្រទេសជាតិ និងមិនស្មោះត្រង់ និងមិនគោរពតាមការសន្យាក្នុងកិច្ចព្រមព្រៀងក្នុងវប្បធម៌សន្ទនាកន្លងនោះ៖ «ចង់ដោះស្រាយ អនុវត្តវប្បធម៌សន្ទនាឡើងវិញបានទាល់តែអ្នកល្មើសច្បាប់ទាំងឡាយអនុវត្តតាមផ្លូវច្បាប់ឲ្យរួចរាល់ជាមុនសិន បានគណប្រជាជនពិនិត្យលទ្ធភាពតទៅមុខទៀតថា តើគួរតែមានវប្បធម៌សន្ទនាបន្តទៀត ឬក៏យ៉ាងណា…? ហើយសូមបញ្ជាក់ថា គណបក្សប្រជាជនមិនដែលបិទទ្វារវប្បធម៌សន្ទនាទេ…»។
មេដឹកនាំគណបក្សប្រឆាំង លោក សម រង្ស៊ី ដែលកំពុងរស់នៅនិរទេសខ្លួនក្រៅប្រទេសប្រកាសថា ខ្លួននឹងវិលចូលស្រុកវិញនៅមុនការបោះឆ្នោត ឆ្នាំ២០១៧ និងឆ្នាំ២០១៨ ខាងមុខនេះ បើទោះបីជាមានដំណោះស្រាយនយោបាយ ឬមិនមានក៏ដោយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។