អនុប្រធានគណបក្សសង្គ្រោះជាតិ អះអាងថា មន្ត្រី និងសកម្មជនបក្សរបស់ខ្លួនកំពុងជាប់ឃុំក្នុងពន្ធនាគារព្រៃស សង្ឃឹមថា ពួកគាត់នឹងទទួលបានយុត្តិធម៌ក្រោយការបោះឆ្នោតឆ្នាំ២០១៧ និង២០១៨។ រីឯបក្សកាន់អំណាចតបថា ករណីមន្ត្រីបក្សប្រឆាំងជាប់ឃុំ គឺដោយសារពួកគេធ្វើខុសនឹងច្បាប់ ហើយសូមកុំសង្ឃឹមរឿងឈ្នះឆ្នោតច្រើនពេក។
ថ្លែងនៅពីមុខផ្លូវចូលពន្ធនាគារព្រៃស បន្ទាប់ពីបានចូលសួរសុខទុក្ខសកម្មជន និងមន្ត្រីបក្សប្រមាណ ១៦នាក់ នៅព្រឹកថ្ងៃទី១៩ ខែមេសា អ្នកស្រី មូរ សុខហួរ បានពាំនាំសម្ដីរបស់សកម្មជន និងមន្ត្រីរបស់ខ្លួនដែលអ្នកខ្លះជាប់ឃុំឃាំងជាង ២ឆ្នាំរួចទៅហើយនោះថា ពួកគេនៅតែមានស្មារតីរឹងមាំ និងអាចស៊ូទ្រាំជាប់ក្នុងគុកបាន ប៉ុន្តែស្នើឲ្យថ្នាក់ដឹកនាំបក្ស និងមន្ត្រីទាំងអស់ចេះសាមគ្គីគ្នា ដើម្បីឈានទៅរកការជោគជ័យ ឬការផ្លាស់ប្ដូរជាវិជ្ជមានមួយតាមរយៈការបោះឆ្នោតក្រុមប្រឹក្សាឃុំ-សង្កាត់ នៅថ្ងៃទី៤ ខែមិថុនា ឆ្នាំ២០១៧ និងការបោះឆ្នោតជាតិឆ្នាំ២០១៨៖ « គាត់និយាយថា កុំយករឿងរបស់គាត់ទៅដោះដូរក្នុងរឿងនយោបាយ គឺគាត់សង្ឃឹមទៅលើអ្នកបោះឆ្នោត ហើយគាត់ផ្តល់សាជាថ្មីម្តងទៀត។ សូមឲ្យបងប្អូនជនរួមជាតិដែលមានឈ្មោះបោះឆ្នោត ទៅចូលរួមបោះឆ្នោតកុំបីខាន ប្រសិនបើចង់ឲ្យមានយុត្តិធម៌សម្រាប់ពួកគាត់ » ។
ទោះយ៉ាងណាក្តី អ្នកស្រី មូរ សុខហួរ អះអាងថា គណបក្សសង្គ្រោះជាតិ នៅតែរក្សាវប្បធម៌សន្ទនាជាមួយគណបក្សកាន់អំណាចជានិច្ច ដើម្បីឈានទៅរកដំណោះស្រាយផ្សេងៗ ប៉ុន្តែរហូតមកដល់ពេលនេះ នៅមិនទាន់មានភ្លើងខៀវណាមួយពីបក្សកាន់អំណាចឡើយ។
អ្នកនាំពាក្យគណបក្សប្រជាជនកម្ពុជា លោក សុខ ឥសាន មានប្រសាសន៍ថា ការដែលមន្ត្រី និងសកម្មជនបក្សប្រឆាំងកំពុងជាប់ឃុំ និយាយថា កុំយកខ្លួនពួកគាត់ធ្វើជាថ្នូរនយោបាយនោះ មានន័យថា ពួកគាត់យល់ថា ករណីរបស់ពួកគាត់គឺជារឿងផ្លូវច្បាប់ មិនមែនជារឿងនយោបាយ ដូច្នេះមិនអាចអោយគណបក្សទាំងពីរអង្គុយចរចាដោះស្រាយសំណុំរឿងនេះបានទេ។
ទន្ទឹមគ្នានេះ លោក សុខ ឥសាន ចំអកថា មន្ត្រី និងសកម្មជនបក្សប្រឆាំង កំពុងតែសង្ឃឹម និងចម្លងវប្បធម៌ពីលោក សម រង្ស៊ី ដែលទន្ទេញរត់មាត់ថា នឹងឈ្នះឆ្នោត ហើយមានការផ្លាស់ប្ដូរតាំងពីជាង ២០ឆ្នាំមុនមក ប៉ុន្តែទីបំផុតទៅមិនអាចទៅរួចឡើយ៖ « មានក្រឡាអីឈ្នះ ពីមុនមកសមាគមអ្នកប្រជាធិបតេយ្យ ម៉ម សូណង់ដូ គាត់ជួយបោះជាង ១លាននាក់ គណបក្សរបស់លោក សួន សេរីរដ្ឋា នៅអាមេរិក ជួយបោះមួយគំនរ ហើយឥឡូវនេះ គេចេញអស់ទៅហើយនោះ រហូតដល់ផ្ទៃក្នុងរបស់គណបក្សសង្គ្រោះជាតិ ឡាក់ សុភាព ទៅបង្កើតបក្សថ្មី។ សួរថា តើកម្លាំងនៅប្រមូលផ្តុំទេ ? កម្លាំងប្រមូលផ្តុំបានត្រឹមត្រែ ៥៥កៅអី ចុះឥឡូវគេចេញអស់ហើយ ? ខ្ញុំយល់ថា បាន ១០កៅអីគ្រាន់បើហើយលើកនេះ » ។
ជនជាប់ឃុំទាំង ១៦នាក់ របស់គណបក្សប្រឆាំងនោះរួមមាន អតីតសមាជិកព្រឹទ្ធសភា លោក ហុង សុខហួរ សមាជិករដ្ឋសភា លោក អ៊ុំ សំអាន អតីតមន្ត្រីជាន់ខ្ពស់គណបក្សសង្គ្រោះជាតិ លោក មាជ សុវណ្ណារ៉ា និងសកម្មជនគណបក្សសង្គ្រោះជាតិ មួយចំនួនទៀត។
អ្នកជំនាញផ្នែកវិទ្យាសាស្ត្រនយោបាយ លោក សូ ចន្ថា មានប្រសាសន៍ថា និន្នាការនៃការផ្លាស់ប្ដូរក្នុងពេលបច្ចុប្បន្ននេះ គឺមានភាគរយច្រើន ដោយសារពលរដ្ឋចង់ឲ្យកម្ពុជា មានដំណើរកាអភិវឌ្ឍប្រកបដោយភាពវិជ្ជមានច្រើនជាងនេះ ដូច្នេះប្រសិនបើមានការបោះឆ្នោតដោយត្រឹមត្រូវ និងយុត្តិធម៌នោះ គឺគណបក្សប្រឆាំងមានសង្ឃឹមឈ្នះឆ្នោតច្រើន៖ « មិនមានការគំរាមកំហែង មិនមានការទិញសន្លឹកឆ្នោត មិនមានការបង្ខិតបង្ខំដោយរូបភាពនានា ចឹងពលរដ្ឋអាចសម្រេចជោគវាសនារបស់ខ្លួនតាមអ្វីដែលពួកគាត់ចង់បាន។ ចំពោះតុលាការនៅពេលដែលមានការផ្លាស់ប្ដូរជាវិជ្ជមាន មានន័យថា តំណាងរបស់ពួកគាត់ត្រូវបានជ្រើសរើសដោយស្របតាមឆន្ទៈ នៅពេលនោះហើយ តុលាការនឹងមិនឋិតនៅក្រោមឥទ្ធិពលនយោបាយ ឬក្រោមគណបក្សណាមួយទេ » ។
ការឃុំឃាំងសកម្មជនបក្សប្រឆាំង និងមន្ត្រីសង្គមស៊ីវិល ត្រូវបានសហគមន៍អន្តរជាតិមើលឃើញថា ជាការធ្វើទុក្ខបុកម្នេញដែលមានចេតនានយោបាយ ហើយកន្លងទៅតែងទាមទារឲ្យមានការដោះលែង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។