ការិយាល័យបោះឆ្នោតមួយចំនួននៅខេត្តកំពង់ឆ្នាំង រូតរះរៀបចំតុកៅអី និងសម្ភារៈចូលការិយាល័យឲ្យបានរួចរាល់តាំងយប់ថ្ងៃទី៣ ខែមិថុនា ដើម្បីដំណើរការបោះឆ្នោតនៅព្រឹកថ្ងៃទី៤ ខែមិថុនា។
កម្លាំងគណៈកម្មការឃុំ-សង្កាត់ រៀបចំការបោះឆ្នោតអមដោយកម្លាំងនគរបាលចន្លោះពី ២ ទៅ ៣នាក់ ក្នុងមួយការិយាល័យ កំពុងប្រញាប់ប្រញាល់បិទខណ្ឌប័ណ្ណ និងចងកៅស៊ូតង់បាំងបន្ទប់បោះឆ្នោត។
ប្រធានគណៈកម្មការសង្កាត់រៀបចំការបោះឆ្នោតម្នាក់ ដែលថ្លែងក្នុងលក្ខខណ្ឌសុំមិនបញ្ចេញឈ្មោះ និងសំឡេង ឲ្យដឹងថា នៅក្នុងការិយាល័យបោះឆ្នោតចំនួនបីដែលលោកគ្រប់គ្រង ត្រូវបញ្ចប់រៀបចំតុ កៅអី និងបំពាក់ភ្លើងអំពូលឲ្យបានរួចរាល់នៅត្រឹមយប់ថ្ងៃទី៣ ខែមិថុនា ដើម្បីដល់ព្រឹកថ្ងៃទី៤ ដែលជាថ្ងៃបោះឆ្នោតជ្រើសរើសក្រុមប្រឹក្សាឃុំ-សង្កាត់ ដំណើរការទៅបានដោយរលូន ពុំមានបញ្ហាខ្វះខាតសម្ភារៈអ្វីទាំងអស់។
ប្រធានលេខាធិការដ្ឋាននៃគណៈកម្មការរៀបចំការបោះឆ្នោតខេត្តកំពង់ឆ្នាំង អ្នកស្រី នួន ចាន់នី ថ្លែងថា គ្រប់ការិយាល័យបោះឆ្នោតទាំង ៧៨១ ការិយាល័យក្នុងខេត្ត បានទទួលឯកសារ និងសម្ភារៈបោះឆ្នោតគ្រប់ចំនួនដែល គ.ជ.ប បានផ្ដល់។ គណៈកម្មការឃុំ-សង្កាត់រៀបចំការបោះឆ្នោតភាគច្រើនបានរៀបចំទីតាំងការិយាល័យរបស់ខ្លួនរួចរាល់ហើយ ដើម្បីដំណើរការបោះឆ្នោត៖ «សម្ភារៈអីគេបានត្រួតពិនិត្យតាំងពីពេលព្រឹកនៅពេលដែល CEC យកទៅប្រគល់ជូន ឬគេទៅយកពីទីស្នាក់ការ CEC ដែលបានបិទឡាំងប្រគល់ជូនឲ្យគេហ្នឹង គឺគេបានផ្ទៀងផ្ទាត់នៅពេលព្រឹកហ្នឹងហើយ។ បើសិនជាមានការខ្វះខាតអី គឺគេនឹងតេ (ទូរស័ព្ទ) មកប្រាប់ PEC ហើយ តែអត់មានបានទទួលព័ត៌មានអ្វីទាំងអស់ អ៊ីចឹងបានន័យថា សម្ភារៈបានគ្រប់គ្រាន់អស់ហើយ»។
អ្នកស្រីបញ្ជាក់ថា នៅតាមការិយាល័យមានកម្លាំងនគរបាលយាមកាមកន្លែងដាក់សន្លឹកឆ្នោត និងទុកសម្ភារៈបោះឆ្នោត ប៉ុន្តែនៅកន្លែងខ្លះពុំមានដោយទីតាំងដាក់ខ្លះនៅជិតគ្នា និងមានសុវត្ថិភាព។
ការបោះឆ្នោតជ្រើសរើសក្រុមប្រឹក្សាឃុំ-សង្កាត់ អាណត្តិទី៤ ចាប់ផ្ដើមពីម៉ោង ៧ព្រឹក រហូតដល់ម៉ោង ៣រសៀល ថ្ងៃទី៤ ខែមិថុនា។ នៅខេត្តកំពង់ឆ្នាំង មានការិយាល័យសរុប ៧៨១ ការិយាល័យ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។