បន្ទាប់ពីជំនួបចរចារវាងថ្នាក់ដឹកនាំកំពូលនៃគណបក្សប្រជាជនកម្ពុជា និងគណបក្សសង្គ្រោះជាតិ បានទទួលលទ្ធផលថា ពួកគេនឹងធ្វើការរួមគ្នាដើម្បីប្រយោជន៍ជាតិ និងព្រៀមព្រៀងគ្នាលើខ្លឹមសារមួយចំនួនមកនោះ មានមតិពីសាធារណជនខុសៗគ្នា។ ទន្ទឹមនឹងគ្នានោះពួកគេខ្លះក៏បានដាក់ក្ដីរំពឹង និងសំណូមពរដល់មេបក្សទាំងពីរនៅពេលដែលចាប់ផ្ដើមចាប់ដៃគ្នាធ្វើការដោះស្រាយបញ្ហាជូនពលរដ្ឋ។
សូមលោកអ្នកនាងស្ដាប់មតិរបស់ពលរដ្ឋដែលអ្នករាយការណ៍របស់យើងពីបណ្ដាខេត្តមួយចំនួនជួបសម្ភាសន៍ និងរាយការណ៍ដោយអ្នកស្រី ខែ សុណង ដូចតទៅ៖
អត្ថបទទស្សនៈរបស់ពលរដ្ឋនៅសៀមរាប
ប្រជាពលរដ្ឋខ្លះនៅខេត្តសៀមរាប ដែលជាតំបន់ទេសចរណ៍ដ៏ល្បីល្បាញ ក៏ធ្លាប់ចូលរួមធ្វើបាតុកម្មយ៉ាងសកម្មជាមួយគណបក្សសង្គ្រោះជាតិ នៅពេលដែលនយោបាយជាប់គាំងក្រោយពីការបោះឆ្នោតជ្រើសរើសតំណាងរាស្ត្រអាណត្តិទី៥ ដោយបេក្ខជនតំណាងរាស្ត្រជាប់ឆ្នោតរបស់គណបក្សប្រឆាំងមិនព្រមចូលរួមប្រជុំសភាជិត១ឆ្នាំមកនោះ។
ក៏ប៉ុន្តែ នៅពេលដឹងថា គណបក្សសង្គ្រោះជាតិ បានព្រមព្រៀងជាមួយគណបក្សប្រជាជនកម្ពុជា ដើម្បីចូលរួមក្នុងស្ថាប័ននីតិប្បញ្ញត្តិហើយនោះ គឺម្ចាស់ឆ្នោតខ្លះបានសម្ដែងការយល់ឃើញផ្សេងៗពីគ្នា។
ពីរថ្ងៃបន្ទាប់ពីគណបក្សសង្គ្រោះជាតិ សម្រេចចិត្តបញ្ឈប់ការដឹកនាំធ្វើបាតុកម្មនៅទីក្រុងភ្នំពេញ និងតាមបណ្ដាខេត្តមួយចំនួន ហើយសុខចិត្តចូលស្បថយកអភ័យឯកសិទ្ធិតំណាងរាស្ត្រនៅក្នុងសភាមក គឺប្រជាពលរដ្ឋជាម្ចាស់ឆ្នោតខ្លះ បានសម្ដែងការត្រេកអរ និងខ្លះទៀតសម្ដែងការអាក់អន់ចិត្ត។
អ្នកខ្លះយល់ថា គណបក្សសង្គ្រោះជាតិ ដែលសុខចិត្តចូលរួមនៅក្នុងស្ថាប័ននីតិប្បញ្ញត្តិពេលនេះ គឺជារឿងត្រឹមត្រូវ ក៏ប៉ុន្តែខ្លះទៀតចាត់ទុកថា ជារឿងកំសាក។
អាជីវករម្នាក់ដែលកំពុងអង្គុយផឹកកាហ្វេពេលព្រឹកនៅហាងតូចមួយជាប់ចិញ្ចើមផ្លូវជាតិលេខ៦ ក្នុងទីរួមខេត្តសៀមរាប មានប្រសាសន៍ថា លោកកំពុងមានការព្រួយបារម្ភខ្លាចក្រែងគណបក្សសង្គ្រោះជាតិ ដែលសុខចិត្តចូលរួមក្នុងសភានោះ គឺចាញ់បោកគណបក្សប្រជាជនកម្ពុជា ដូចកាលគណបក្សហ៊្វុនស៊ិនប៉ិច ពីមុនទៀត។ ក៏ប៉ុន្តែ លោកយល់ថា លោកគាំទ្រឱ្យគណបក្សសង្គ្រោះជាតិ ចូលរួមក្នុងសភាដូច្នេះ៖ «ចិត្តខ្ញុំចង់ឱ្យចូល! បើចូល យើងអាចទៅតតាំងនៅក្នុងសភា ដើម្បីកុំឱ្យនយោបាយជាប់គាំងយូរពេក។ ការចូលនេះ តាមគំនិតខ្ញុំ ប្រហែលអាចដោះស្រាយតំណាងរាស្ត្រដែលគេចាប់យកទៅដាក់ពន្ធនាគារហ្នឹងឱ្យរួចមួយគ្រាៗសិន»។
ចំណែកអ្នករត់ម៉ូតូឌុបម្នាក់ទៀត គឺលោក ឆាយ សីហា មានប្រសាសន៍ថា បើទោះបីបេក្ខជនតំណាងរាស្ត្រជាប់ឆ្នោត និងសកម្មជនចំនួន ៨នាក់ របស់គណបក្សសង្គ្រោះជាតិ ត្រូវរដ្ឋាភិបាលរបស់ លោក ហ៊ុន សែន ចាប់ដាក់ពន្ធនាគារក៏ដោយ ក៏មេដឹកនាំគណបក្សសង្គ្រោះជាតិ មិនគួរជ្រើសយកផ្លូវចូលរួមក្នុងសភាទេ គួរតែហ៊ានលះបង់ ហើយធ្វើបាតុកម្មប្រឆាំង លោក ហ៊ុន សែន តទៅទៀត៖ «ដូចជាវាអន់ពេក ព្រោះថាពីមុនមក យើងធ្លាប់តែប្រទូសរ៉ាយ ឬក៏ធ្វើអីមួយ។ ឥឡូវដល់គេចូលសភាអ៊ីចឹង វាជារឿងរបស់អ្នកធំទេ តែគ្រាន់តែពួកខ្ញុំម៉ូតូឌុបសុំឱ្យជួយមើលផង ថាតើរាល់ថ្ងៃស្រុកខ្មែរយើង ពូជសាសន៍ពីក្រៅចូលមកច្រើន ហើយមុខរបរអ្វីក៏គ្មានដែរ។ ឥឡូវម៉ូតូឌុបសង្ឃឹមអ្វី?»។
ទោះយ៉ាងណា បុរសអ្នករត់រ៉ឺម៉កកង់៣ ដឹកភ្ញៀវទេសចរម្នាក់ទៀត ដែលកំពុងអង្គុយរង់ចាំម៉ូយ ឈ្មោះ ចៅ ប៉ូលីន មានប្រសាសន៍ថា គាត់សប្បាយចិត្តចំពោះគណបក្សសង្គ្រោះជាតិ ដែលសុខចិត្តចូលក្នុងសភានេះ ក៏ប៉ុន្តែលោករំលឹកឱ្យគណបក្សទាំងពីរដែលមានអាសនៈក្នុងសភា ត្រូវកុំភ្លេចការសន្យាកាលពីពេលឃោសនាបោះឆ្នោតកន្លងទៅ៖ «ជួយអភិវឌ្ឍទាំងអស់គ្នាទៅ ដូចខ្ញុំរត់ទុកទុកអ៊ីចឹង គឺទី១បញ្ហាថ្លៃសាំង ទី២ ការទាក់ទាញភ្ញៀវទេសចរមកលេងស្រុកយើងឱ្យបានច្រើន។ ពេលដែលឈ្លោះទាស់ទែងគ្នា ដូចជាមានបាតុកម្មអ៊ីចឹង ភ្ញៀវទេសចរក៏គេមានចិត្តមួយអត់ចង់មកស្រុកយើង ហើយអ្នកវិនិយោគទុនក៏គេអត់ហ៊ានមកស្រុកយើងដែរ»៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។