លោកនាយករដ្ឋមន្ត្រី ហ៊ុន សែន នៅថ្ងៃទី២៧ ខែមីនា មានប្រសាសន៍ថា តម្លៃប្រើប្រាស់អគ្គិសនីនៅខេត្តពោធិ៍សាត់ និងខេត្តមួយចំនួនទៀតដែលបណ្ដាញវារីអគ្គិសនីស្ទឹងអាតៃ ទៅដល់ អាចនឹងធ្លាក់ចុះនៅប្រហែល ១ពាន់រៀលក្នុង១គីឡូវ៉ាត់ម៉ោង ខណៈដែលកន្លែងខ្លះមានតម្លៃរហូតដល់ ២ពាន់ ទៅ ៣ពាន់រៀល ក្នុង១គីឡូវ៉ាត់ម៉ោង នៅពេលបច្ចុប្បន្ន។
ការថ្លែងនេះ ធ្វើឡើងនៅក្នុងពិធីសម្ពោធដាក់ឲ្យដំណើរការវារីអគ្គិសនីស្ទឹងអាតៃ របស់ក្រុមហ៊ុនចិន មួយឈ្មោះ ឆាណា ដាថាំង ខបផូរ៉េសិន (China Datang Corporation) នៅខេត្តពោធិ៍សាត់ មានកម្លាំង ១២០មេហ្គាវ៉ាត់។
លោកនាយករដ្ឋមន្ត្រី ហ៊ុន សែន បានជំរុញឲ្យមានការតភ្ជាប់ចរន្តអគ្គិសនីនេះទៅកាន់តំបន់ដែលពលរដ្ឋកំពុងប្រើប្រាស់ថាមពលអគ្គិសនីផលិតដោយក្រុមហ៊ុនឯកជន ក្នុងគោលបំណងឲ្យតម្លៃអគ្គិសនីនៅតំបន់ទាំងនោះមានការធ្លាក់ចុះ បើទោះបីជាវាមិនទាន់បានតាមបំណងដែលប្រជាពលរដ្ឋចង់បាន។
ស្ថានីយផលិតអគ្គិសនីស្ទឹងអាតៃ មានលទ្ធភាពផលិតថាមពលបាន ១២០មេហ្គាវ៉ាត់ ដែលមានខ្សែបញ្ជូនអគ្គិសនីចម្ងាយ ១៧៥គីឡូម៉ែត្រ ពីអនុស្ថានីយអូរសោម មកកាន់អនុស្ថានីយពោធិ៍សាត់។ អនុស្ថានីយនេះ នឹងតភ្ជាប់បណ្ដាញបញ្ជូនអគ្គិសនី ២៣០គីឡូវ៉ុល ទៅភ្នំពេញ កំពង់ឆ្នាំង ពោធិ៍សាត់ និងបាត់ដំបង ចម្ងាយ ៣០២គីឡូម៉ែត្រ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។