សមត្ថកិច្ចរាជធានីភ្នំពេញ បានធ្វើសន្និសីទសារព័ត៌មានមួយនៅរសៀលថ្ងៃទី១០ ខែកក្កដា នេះប្រាប់សារព័ត៌មានថា ជនសង្ស័យដែលសមត្ថកិច្ចចាប់ខ្លួនបាននោះឈ្មោះ ជួប សម្លាប់ គឺអ្នកបាញ់សម្លាប់លោក កែម ឡី អ្នកវិភាគនយោបាយពិតប្រាកដមែន។
ស្នងការនគរបាលរាជធានីភ្នំពេញ លោក ជួន សុវណ្ណ ឲ្យដឹងថា ក្រុមសមត្ថកិច្ចបានចាប់ខ្លួនជនសង្ស័យបានដោយដេញប្រផាប់ចាប់ប្រភីងពីកន្លែងកើតហេតុនៅក្នុងហាងលក់ទំនិញនៃស្ថានីយប្រេងសាំងកាល់តិច នៅស្តុបបូកគោ ខណ្ឌចំការមន រាជធានីភ្នំពេញ ហើយត្រូវចាប់ខ្លួនបាននៅផ្លូវសុធារស សង្កាត់ទន្លេបាសាក់ ជិតវត្តស្វាយពពែ។
សមត្ថកិច្ចក្រុងភ្នំពេញ នឹងបញ្ជូនខ្លួនជនសង្ស័យទៅតុលាការនៅថ្ងៃទី១១ ខែកក្កដា ហើយនៅយប់នេះ ជនសង្ស័យត្រូវឃុំខ្លួនបណ្ដោះអាសន្ននៅស្នងការដ្ឋាននគរបាលរាជធានីភ្នំពេញ។ ស្នងការប៉ូលិសក្រុងភ្នំពេញ លោក ជួន សុវណ្ណ សម្ដែងការសោកស្ដាយចំពោះករណីនេះ។
ស្នងការនគរបាលរាជធានីភ្នំពេញ លោក ជួន សុវណ្ណ ប្រាប់ថា បន្ទាប់ពីជនសង្ស័យបាញ់សម្លាប់លោក កែម ឡី គេរត់ទាំងដៃកាន់អាវុធ។ លោកថា ដោយសារពលរដ្ឋស្រែកសុំឲ្យជួយៗ ធ្វើឲ្យសមត្ថកិច្ចដែលឈរជើងនៅកែងភ្លើងស្តុបបូកគោក្បែរកន្លែងកើតហេតុ អន្តរាគមន៍ភ្លាមៗរហូតសមត្ថកិច្ចបំផ្ទុះអាវុធពីរគ្រាប់ ដើម្បីបង្អាក់ដំណើរជនសង្ស័យ ប៉ុន្តែគេនៅតែបន្តរត់គេចខ្លួន៖ « តាមរយៈកម្លាំងល្បាតយើងឃើញថា ប្រសិទ្ធភាពយើងអាចចាប់ជនល្មើសបាននៅផ្លូវសុធារស សង្កាត់ទន្លេបាសាក់ ជិតវត្តស្វាយពពែ។ យើងពិនិត្យឃើញថា ទាំងការនៅកន្លែងកើតហេតុ បន្ទាប់ពីកោសល្យវិច័យទាំងវត្ថុតាងដែលបានរឹបអូសពីជនល្មើស បញ្ជាក់ថា ជនសង្ស័យនេះ គឺជាឃាតកសម្លាប់លោកបណ្ឌិត កែម ឡី»។
លោកបន្តថា ជនសង្ស័យមានប្រើកាំភ្លើងខ្លីម៉ាកជីឡុក និងមានគ្រាប់កាំភ្លើងមួយចំនួន។ លោកស្នងការបដិសេធធ្វើអត្ថាធិប្បាយព័ត៌មានលម្អិតទាក់ទងការស៊ើបអង្កេតដំណើររឿងនេះ។ លោកថា សមត្ថកិច្ចនឹងស្រាវជ្រាវបន្តទៀតវែកមុខអ្នកនៅពីក្រោយ ឬអ្នកពាក់ព័ន្ធ ឬក៏បក្ខពួករបស់ជនសង្ស័យ៖ « ដូចខ្ញុំបានបញ្ជាក់អំបាញ់មិញចឹង គឺកិច្ចការងារនេះ ខ្ញុំសុំអធ្យាស្រ័យបំផុតចំពោះបណ្ដាញសារព័ត៌មានយើង ព្រោះជំនាញរបស់សមត្ថកិច្ចមិនអនុញ្ញាតឲ្យរាយការណ៍អំពីចម្លើយដែលជាពន្លឺនៃការស៊ើបអង្កេតទេ » ។
នៅក្នុងសន្និសីទកាសែតដែលមានរយៈពេលជាង ១០នាទី ស្នងការនគរបាលរាជធានីភ្នំពេញ លោក ជួន សុវណ្ណ មិនប្រាប់លម្អិតទាក់ទងចម្លើយពីជនសង្ស័យនៅឡើយទេ សូម្បីតែឈ្មោះពិត ទីលំនៅឋាន អាយុ មូលហេតុនៃការបាញ់សម្លាប់ ក៏មិនទាន់ឲ្យដឹងនៅឡើយដែរ៖ « តាមរយៈចម្លើយសារភាព យើងមានពន្លឺជាច្រើនដែលយើងឈានទៅដល់កិច្ចការស្រាវជ្រាវនេះ»។
ទោះយ៉ាងណាក្តី លោកស្នងការប្រាប់ថា ឃាតកបាញ់លោក កែម ឡី ចំនួន ២គ្រាប់ ចំក្បាល និងចំដើមដៃធ្លាយដល់ក្រោមដោះ ហើយសមត្ថកិច្ចធ្វើការវះកាត់យកបានក្បាលគ្រាប់មួយ។ លោកថា ឃាតកនៅចម្ងាយពីរជំហានពីលោក កែម ឡី នៅពេលគេបាញ់សម្លាប់។
លោក ជួន សុវណ្ណ មិនទាន់បញ្ជាក់ពីមូលហេតុដែលឃាតកបាញ់សម្លាប់លោក កែម ឡី នៅឡើយទេ ប៉ុន្តែវីដេអូដែលបែកធ្លាយពីអ្នកប្រើប្រាស់បណ្ដាញសង្គមទាក់ទងចម្លើយសារភាពរបស់ជនសង្ស័យប្រាប់ថា មូលហេតុដែលបាញ់សម្លាប់លោក កែម ឡី ព្រោះលោក កែម ឡី ជំពាក់លុយលោកមួយឆ្នាំមកហើយមិនសង៖ «គាត់ជំពាក់លុយមួយឆ្នាំហើយមិនបានសងទេ ហើយកុហកទៀត ថាយកទៅជួយស្រុកទេស ជួយប្រជាជន អត់ឃើញជួយទេ។ ខ្ញុំទិញកាំភ្លើងមកពីថៃ»។
លោក ជួន សុវណ្ណ ថាភស្តុតាងទាំងអស់អាចដាក់បន្ទុកទៅលើជនសង្ស័យ ដើម្បីអាចធ្វើឲ្យសមត្ថកិច្ចបន្តស្រាវជ្រាវទៅមុខបាន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។