អគ្គលេខាធិការរដ្ឋសភា នឹងបញ្ជូនសេចក្តីព្រាងវិសោធនកម្មច្បាប់ស្ដីពីគណបក្សនយោបាយឲ្យទៅគណៈកម្មាធិការអចិន្ត្រៃយ៍រដ្ឋសភា ពិនិត្យមើលនៅពេលដែលច្បាប់នេះត្រូវបានក្រុមអ្នកជំនាញពិនិត្យមើលរួចរាល់ និងបញ្ជូនមកកាន់រដ្ឋសភា។
អ្នកនាំពាក្យរដ្ឋសភា លោក ឡេង ប៉េងឡុង និងជាអគ្គលេខាធិការរដ្ឋសភា បញ្ជាក់ក្នុងសន្និសីទសារព័ត៌មាននៅរដ្ឋសភា នៅព្រឹកថ្ងៃទី៣ កក្កដា ថា ក្រុមអ្នកច្បាប់ដែលមានទាំងតំណាងរាស្ត្រគណបក្សកាន់អំណាចផងនោះ នឹងបញ្ជូនសេចក្តីព្រាងវិសោធនកម្មច្បាប់ស្ដីពីគណបក្សនយោបាយឲ្យរដ្ឋសភាក្នុងពេលឆាប់ៗនេះ៖ « អ្នកច្បាប់ហ្នឹងវាមានរួមទាំងតំណាងរាស្ត្ររបស់គណបក្សប្រជាជនហ្នឹងផង អ្នកច្បាប់របស់គណបក្សប្រជាជនហ្នឹង ចឹងគេកំពុងធ្វើ ហើយនឹងបញ្ជូនមកក្នុងពេលឆាប់ៗហ្នឹង។ ដល់ប្រជុំមក យើងនឹងប្រជុំគណៈកម្មការអចិន្ត្រៃយ៍សេចក្តីស្នើច្បាប់ហ្នឹង។ ការងារនយោបាយ ខ្ញុំមិនធ្វើអត្ថាធិប្បាយទេ ប៉ុន្តែគណបក្សកាន់អំណាចបើកាលណាលោកយល់ថាគួរតែមានច្បាប់អីចាំបាច់ដើម្បីបម្រើជាតិ ជារឿងធម្មតា ជារឿងត្រឹមត្រូវ ជារឿងប្រជាធិបតេយ្យ » ។
ការធ្វើវិសោធនកម្មច្បាប់បោះឆ្នោតនេះ គឺធ្វើឡើងទាំងតក់ក្រហល់ ក្រោយពេលលោកនាយករដ្ឋមន្ត្រី ហ៊ុន សែន បានប្រកាសឲ្យក្រុមតំណាងរាស្ត្ររបស់លោកទាំងអស់ នាំគ្នាពិនិត្យមើលច្បាប់ស្ដីពីគណបក្សនយោបាយជាថ្មីម្ដងទៀត ដើម្បីធ្វើវិសោធនកម្មច្បាប់នេះ ដោយកំណត់កុំឲ្យទណ្ឌិតអាចលូកលាន់ក្នុងកិច្ចការគណបក្សនយោបាយតទៅទៀត។ ថ្វីត្បិតតែការប្រកាសរបស់លោក ហ៊ុន សែន កាលពីថ្ងៃទី២៨ មិថុនា មិនចំឈ្មោះជាទណ្ឌិតរូបណាក្ដី ក៏ប៉ុន្តែគេគ្រប់គ្នាដឹងថា ការស្នើកែច្បាប់ គឺលោកនាយករដ្ឋមន្ត្រី ហ៊ុន សែន សំដៅទៅរកអតីតប្រធានគណបក្សសង្គ្រោះជាតិ លោក សម រង្ស៊ី ដែលកំពុងជាប់ពាក្យបណ្ដឹងជាច្រើនស្ទើររាប់មិនអស់នៅក្នុងតុលាការខ្មែរ។
ច្បាប់ស្ដីពីគណបក្សនយោបាយនេះ បានធ្វើវិសោធនកម្មម្ដងរួចហើយកាលពីខែកុម្ភៈ ឆ្នាំ២០១៧។ កាលនោះ សមាជិករដ្ឋសភាគណបក្សប្រជាជនកម្ពុជា នាំគ្នាកែប្រែច្បាប់នេះ និងនាំគ្នាប្រជុំអនុម័តទាំងប្រញាប់ប្រញាល់ ក្រោយពេលលោកនាយករដ្ឋមន្ត្រី ហ៊ុន សែន ប្រកាសចង់កែប្រែច្បាប់នេះកុំឲ្យទណ្ឌិតមានសិទ្ធិធ្វើជាប្រធាន អនុប្រធាន ឬសមាជិកគណៈកម្មការរបស់គណបក្សនយោបាយ ដែលកាលពីធ្វើវិសោធនកម្មលើកទី១ នោះ ក៏ត្រូវបានគេមើលឃើញថា ជាការារាំងមិនឲ្យលោក សម រង្ស៊ី ធ្វើជាប្រធានគណបក្សដែរ។
ការធ្វើវិសោធនកម្មច្បាប់បោះឆ្នោតម្ដងជាពីរដងនេះ រងការរិះគន់ថា ធ្វើឲ្យលទ្ធិប្រជាធិបតេយ្យនៅកម្ពុជា ដើរថយក្រោយ ឬដើម្បីបំបិទសិទ្ធិអ្នកនយោបាយ។ យ៉ាងណាក៏ដោយ លោក ឡេង ប៉េងឡុង ពន្យល់ហេតុផលថា ក្នុងសង្គមប្រជាធិបតេយ្យ អ្នកដែលឈ្នះឆ្នោតមានសិទ្ធិធ្វើអ្វីតាមចិត្តនឹកឃើញបាន ដើម្បីជាភាពចាំបាច់របស់សង្គម ហើយអ្នកដែលមិនពេញចិត្ត ចាំពេលឈ្នះឆ្នោតមានសិទ្ធិលុបចោលវិញបាន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។