អគ្គស្នងការនគរបាលជាតិ ក្រសួងមហាផ្ទៃ និងអភិបាលខេត្តព្រះសីហនុ បានលើកទឹកចិត្តដល់ស្នងការនគរបាលខេត្តទើបប្រកាសតែងតាំងថ្មី នៅព្រឹកថ្ងៃច័ន្ទ ទី៦ ខែមេសា ឲ្យបន្តសហការជាមួយកម្លាំងសមត្ថកិច្ចពាក់ព័ន្ធដទៃទៀត បើកយុទ្ធនាការបង្ក្រាបបទល្មើសចោរលួច ឆក់ ប្លន់ ឬគ្រឿងញៀន ដើម្បីរក្សាសន្តិសុខសុវត្ថិភាពជូនពលរដ្ឋ ភ្ញៀវទេសចរ និងអ្នកវិនិយោគទុន។
ប្រជាពលរដ្ឋ និងមន្ត្រីសង្គមស៊ីវិលខេត្តព្រះសីហនុ មានជំនឿថា វត្តមានលោកស្នងការនគរបាលខេត្តព្រះសីហនុថ្មី នឹងជួយទប់ស្កាត់បទល្មើសផ្សេងៗ ដែលកំពុងកើតមានធ្ងន់ធ្ងរ នាខេត្តជាប់មាត់សមុទ្រមួយនេះនៅថ្ងៃអនាគត។
លោក នេត សាវឿន អគ្គស្នងការនគរបាលជាតិនៃក្រសួងមហាផ្ទៃ បានប្រកាសតែងតាំងលោក ជួន ណារិន ជាស្នងការនគរបាលខេត្តព្រះសីហនុថ្មី ជំនួសលោក ស៊ាង កុសល ដែលត្រូវប្តូរតួនាទីទៅជាអនុប្រធាននាយកដ្ឋានទេសចរណ៍ ក្រសួងមហាផ្ទៃវិញ កាលពីព្រឹកថ្ងៃទី៦ ខែមេសា នាសាលប្រជុំខេត្តព្រះសីហនុ។ លោកបានសង្កត់ធ្ងន់ឲ្យកម្លាំងសមត្ថកិច្ចខេត្តនេះ ត្រូវសហការបង្ក្រាប ឬទប់ស្កាត់បទល្មើសផ្សេងៗ ដោយការទទួលខុសត្រូវខ្ពស់។
លោកបន្តថា បទល្មើសចោរឆក់ ប្លន់ ល្បែងស៊ីសងគ្រប់ប្រភេទ និងគ្រឿងញៀនជាដើម ត្រូវតែលុបបំបាត់នៅខេត្តទេសចរណ៍មួយនេះ ដើម្បីជាការទាក់ទាញភ្ញៀវទេសចរ និងអ្នកវិនិយោគទុនឲ្យចូលមកកម្ពុជា៖ «សូមឲ្យសមាជិកគ្រប់ស្ថាប័នទាំងអស់ដែលបានចូលរួមក្នុងពិធីនេះ ជួយធ្វើជាសាក្សី និងទទួលស្គាល់លោក ជួន ណារិន ជាស្នងការនគរបាលខេត្តព្រះសីហនុថ្មី ដើម្បីសហការបន្តបង្ក្រាបបទល្មើសផ្សេងៗឲ្យបានជោគជ័យ និងរក្សាបរិស្ថានសន្តិភាព សន្តិសុខ ស្ថិរភាពសង្គមឲ្យបានល្អ»។
ចំណែកលោក ឈិត សុខុន អភិបាលខេត្តព្រះសីហនុ ក៏បានស្នើ និងលើកទឹកចិត្តលោក ជួន ណារិន ស្នងការនគរបាលខេត្តព្រះសីហនុថ្មី ត្រូវបន្តអនុវត្តគោលនយោបាយភូមិឃុំមានសុវត្ថិភាពរបស់ប្រមុខដឹកនាំបានដាក់ចេញទាំង ៩ចំណុចឲ្យមានប្រសិទ្ធភាព។
លោករំពឹងថា ស្នងការថ្មីខេត្តព្រះសីហនុ នឹងយកបទពិសោធន៍ និងស្នាដៃរបស់លោកមកអនុវត្តបង្ក្រាបបទល្មើសនានា ក្នុងខេត្តព្រះសីហនុ ដោយការទទួលខុសត្រូវខ្ពស់៖ «ត្រូវខិតខំឲ្យមានសកម្មភាពក្លៀវក្លា ដើម្បីលើកម្ពស់ការងារឲ្យកាន់តែប្រសើរថែមទៀត សំដៅកាត់បន្ថយអត្រាបទល្មើសឲ្យធ្លាក់ចុះមកកម្រិតទាបបំផុត ដែលធ្វើឲ្យប្រជាពលរដ្ឋ និងភ្ញៀវទេសចរជាតិអន្តរជាតិ ទុកចិត្តមកលើកម្លាំងសមត្ថកិច្ច ព្រោះថា ខេត្តព្រះសីហនុ គឺជាតំបន់ទេសចរណ៍ដ៏មានសក្ដានុពលរបស់កម្ពុជា បន្ទាប់ពីរាជធានីភ្នំពេញ និងខេត្តសៀមរាប»។
កាលពីថ្ងៃទី១ ខែមេសា លោកឧបនាយករដ្ឋមន្ត្រី ស ខេង រដ្ឋមន្ត្រីក្រសួងមហាផ្ទៃ នៅក្នុងពិធីបិទសន្និបាតបូកសរុបការងាររបស់អាជ្ញាធរជាតិប្រយុទ្ធប្រឆាំងគ្រឿងញៀន នាទីស្ដីការក្រសួង លោកបានស្តីបន្ទោសចំៗ ទៅអភិបាលខេត្ត និងស្នងការនគរបាលខេត្តព្រះសីហនុ ចំពោះការកើតមានបទល្មើសចោរ ឆក់ ប្លន់ បានបង្កអសន្តិសុខដល់ប្រជាពលរដ្ឋ ពិសេសភ្ញៀវទេសចរធ្ងន់ធ្ងរ។ លោកថា ការបណ្ដោយឲ្យមានបទល្មើសទាំងនេះ បាននាំឲ្យប៉ះពាល់ដល់កេរ្តិ៍ឈ្មោះប្រទេសកម្ពុជា ជាពិសេសបានប៉ះពាល់ដល់ចំនួនភ្ញៀវទេសចរ និងអ្នកវិនិយោគទុនបរទេសចូលមកកម្ពុជា នៅថ្ងៃអនាគត។ សារព្រមាននេះ បានឈានដល់ដកតំណែង លោក ស៊ាង កុសល ចេញពីស្នងការនគរបាលខេត្តព្រះសីហនុ ឲ្យទៅកាន់តួនាទីផ្សេង និងបានប្រកាសប្ដូរភារកិច្ចនៅព្រឹកថ្ងៃច័ន្ទ ទី៦ ខែមេសា។
ក្រោយពីបានទទួលការតែងតាំង លោក ជួន ណារិន ស្នងការនគរបាលខេត្តព្រះសីហនុថ្មី បានឡើងប្ដេជ្ញានៅចំពោះមុខលោក នេត សាវឿន លោក ឈិត សុខុន និងមន្ត្រីពាក់ព័ន្ធក្រសួងមហាផ្ទៃ ព្រមទាំងមន្ត្រីស្ថាប័នពាក់ព័ន្ធខេត្តព្រះសីហនុ ព្រឹកថ្ងៃទី៦ ខែមេសា ថា នឹងយកបទពិសោធន៍ ឬជំនាញ ដែលលោកមានទាំងប៉ុន្មានឈានដល់បង្ក្រាបបទល្មើសផ្សេងៗ ដែលកើតមានក្នុងខេត្តទេសចរណ៍មួយនេះឲ្យថយចុះ ឬឈានដល់លុបបំបាត់។
លោក ជួន ណារិន ក៏បានប្រកាសដល់កម្លាំងសមត្ថកិច្ចពាក់ព័ន្ធឲ្យចូលរួមសហការជាមួយកម្លាំងនគរបាលរបស់លោក ជាពិសេសប្រជាពលរដ្ឋត្រូវចូលរួមផ្ដល់ព័ត៌មានពីសកម្មភាពបទល្មើសនានា មកសមត្ថកិច្ច ដើម្បីឈានដល់បង្ក្រាបឲ្យមានប្រសិទ្ធភាព៖ «ប្ដេជ្ញាសហការជាមួយកងកម្លាំងគ្រប់ជាន់ថ្នាក់ស្រាវជ្រាវបង្ក្រាបទប់ស្កាត់បទល្មើស ដែលបានកើតឡើងនៅក្នុងភូមិសាស្ត្រខេត្តព្រះសីហនុ ឲ្យបានទាន់ពេលវេលាដើម្បីធានាឲ្យមានសន្តិសុខសុវត្ថិភាពជូនដល់ប្រជាពលរដ្ឋអ្នកវិនិយោគទុន និងភ្ញៀវទេសចរឲ្យបានល្អប្រសើរ។ ប្តេជ្ញាយកអស់កម្លាំងកាយចិត្ត គំនិត ប្រាជ្ញា ដើម្បីបម្រើប្រជាពលរដ្ឋ និងមិនធ្វើអ្វីនាំឲ្យប៉ះពាល់ដល់ផលប្រយោជន៍ប្រជាពលរដ្ឋនោះទេ»។
ការប្ដេជ្ញានេះ ធ្វើឲ្យមន្ត្រីសង្គមស៊ីវិល និងប្រជាពលរដ្ឋខេត្តព្រះសីហនុ អបអរសាទរ និងសង្ឃឹមថា លោកស្នងការថ្មី អាចផ្ដល់សុវត្ថិភាព សន្តិសុខល្អ ដល់ការរស់នៅ។
មន្ត្រីសម្របសម្រួលអង្គការលីកាដូ ខេត្តព្រះសីហនុ លោក ប៊ួន ណារិទ្ធ មានក្តីរំពឹងថា បទល្មើសផ្សេងៗមានដូចជាបទល្មើសចោរ ឆក់ ប្លន់ បនពេស្យាចារ បទល្មើសល្បែងភ្នាល់បាល់ កន្ទុយលេខ ពិសេសបទល្មើសគ្រឿងញៀន នឹងអាចទប់ស្កាត់មានប្រសិទ្ធភាព៖ «ខ្ញុំសង្ឃឹមថា លោក ជួន ណារិន ស្នងការនគរបាលខេត្តព្រះសីហនុថ្មី នឹងមានទំនាក់ទំនងល្អជាមួយប្រជាពលរដ្ឋសហគមន៍រងគ្រោះដីធ្លី និងសង្គមស៊ីវិលនានា ដោយផ្ដល់ឱកាសឲ្យពួកយើងទាំងអស់គ្នា បានជួបទំនាក់ទំនង ឬក៏ពិភាក្សាគ្នាលើកឡើងអំពីបញ្ហាសន្តិសុខសណ្ដាប់ធ្នាប់នៅក្នុងខេត្តព្រះសីហនុ»។
ដូចគ្នាដែរ ប្រជាពលរដ្ឋមានលំនៅឋាន នាខេត្តព្រះសីហនុ ក៏បានស្នើឲ្យលោក ជួន ណារិន ស្នងការនគរបាលខេត្តព្រះសីហនុថ្មី ត្រូវបើកយុទ្ធនាការបង្ក្រាបបនពេស្យាចារជ្រកក្រោមស្លាកម៉ាស្សាកោសជប់ទីតាំងចាក់កន្ទុយលេខ ទីតាំងចាក់ភ្នាល់បាល់ជ្រកក្រោមស្លាកហាងកាហ្វេ ឬអ៊ិនណឺណិត និងបទល្មើសគ្រឿងញៀនជាដើម ដែលកំពុងធ្វើសកម្មភាពអនាធិបតេយ្យនាខេត្តនេះឲ្យបានជាស្ថាពរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។