ទណ្ឌិតពី ៧០០ ទៅ ៨០០នាក់ នឹងត្រូវស្នើឲ្យលើកលែង និងបន្ធូរបន្ថយទោសក្នុងពិធីបុណ្យចូលឆ្នាំ និងពិធីបុណ្យវិសាខបូជា។ សង្គមស៊ីវិល និងគណបក្សប្រឆាំងស្នើទៅរដ្ឋាភិបាលឲ្យពិនិត្យដោយតម្លាភាព និងយុត្តិធម៌ ព្រោះពួកគេថា ការលើកលែងនិងបន្ធូរបន្ថយទោស អាចមានពាក់ព័ន្ធនឹងអំពើពុករលួយ។
អ្នកនាំពាក្យពន្ធនាគារ លោក នុត សាវនា ឲ្យវិទ្យុអាស៊ីសេរី ដឹងនៅថ្ងៃទី៨ ខែមេសា ថា ការលើកលែង និងបន្ធូរបន្ថយទោសឆ្នាំនេះ គឺមានការរឹតបន្តឹងខ្លាំង ហើយត្រូវពិនិត្យម្ដងមួយករណីៗ ដែលលទ្ធផលនឹងត្រូវដឹងក្រោយបុណ្យចូលឆ្នាំថ្មី។ លោកថា មកទល់ពេលនេះ សំណើនេះស្ថិតក្នុងដៃលេខាធិការដ្ឋាននៃគណៈកម្មាធិការលើកលែង និងបន្ធូរបន្ថយទោសដែលមានចូលរួមជាអន្តរក្រសួង៖ «ខ្ញុំគិតថា មិនអាចចេញមុនចូលឆ្នាំទេ ព្រោះយើងពិនិត្យលើករណីមួយមើល មិនមែនថា យោងលើចំនួន ឬប្រភេទទេ»។
លោកមិនទាន់ឲ្យដឹងថា តើទណ្ឌិតប្រភេទណា ឬជាសកម្មជនបក្សប្រឆាំងនោះទេ ដែលមានឈ្មោះនៅក្នុងបញ្ជីនៃសំណើលើកលែងទោស ឬបន្ធូរបន្ថយទោស។ ប៉ុន្តែលោកថា អ្នកទោសប្រព្រឹត្តបទល្មើសធ្ងន់ៗ មិនត្រូវបានបញ្ចូលទៅក្នុងបញ្ជីឈ្មោះនៃការជ្រើសរើសទេ។
ក្នុងមួយឆ្នាំៗ គេសង្កេតឃើញថា ការលើកលែងទោស និងបន្ធូរបន្ថយទោសនេះ ៣លើក គឺពិធីបុណ្យចូលឆ្នាំថ្មីប្រពៃណីជាតិ ពិធីបុណ្យវិសាខបូជា និងពិធីបុណ្យអុំទូក។ ទណ្ឌិតអនុវត្តទោសចំនួន ២ភាគ៣ អាចនឹងត្រូវលើកលែងទោស។ ចំណែកទណ្ឌិតបានអនុវត្តទោស ១ ភាគ ៣ គឺនឹងត្រូវបន្ធូរបន្ថយទោស ប្រសិនគេរកឃើញថា អ្នកទាំងនោះបានកែខ្លួនតាមរយៈការកែប្រែឥរិយាបថបានត្រឹមត្រូវនៅក្នុងពន្ធនាគារ។
មន្ត្រីជាន់ខ្ពស់នៃអង្គការសិទ្ធិមនុស្សលីកាដូ (LICADHO) លោក អំ សំអាត និយាយថា ចំនួនទណ្ឌិតដែលត្រូវលើកលែងទោស និងបន្ធូរបន្ថយទោសនេះ មិនខុសពីតួលេខដូចឆ្នាំមុនៗទេ ព្រោះពេលមុនក្នុងមួយដង ឬមួយកម្មវិធីបុណ្យ ចំនួនទណ្ឌិតមានប្រមាណជាង ៤០០ ទៅ ៥០០នាក់។ មន្ត្រីសង្គមស៊ីវិលរូបនេះមិនទាន់ជឿជាក់ថា ការលើកលែង ឬបន្ធូរបន្ថយទោសឆ្នាំនេះមានតម្លាភាព ឬយុត្តិធម៌នោះទេ៖ «មិនទាន់ជឿជាក់លើការពិនិត្យនេះ បើទោះជាករណីចោរប្លន់ពាក់ព័ន្ធករណីធំៗក្ដី ដែលលោកនាយករដ្ឋមន្ត្រីហាមមិនឲ្យដោះលែងអ្នកប្រព្រឹត្តករណីទាំងនោះ ក្ដី»។
កាលពេលថ្មីៗនេះ លោកនាយករដ្ឋមន្ត្រី ហ៊ុន សែន ចេញមុខរិះគន់ការដោះលែងទណ្ឌិតថា ជនល្មើសដែលសមត្ថកិច្ចចាប់ខ្លួនបានមានមុខដដែលៗ ចាប់ពីពេលនេះមក ឃើញក្រសួងយុត្តិធម៌ បើកកិច្ចប្រជុំជាមួយព្រះរាជអាជ្ញាទូទាំងប្រទេស និងអ្នកពាក់ព័ន្ធ។
អ្នកនាំពាក្យគណបក្សសង្គ្រោះជាតិ លោក យឹម សុវណ្ណ ចង់ឃើញរដ្ឋាភិបាលដោះលែងអ្នកទោសមនសិការ ឬអ្នកទោសនយោបាយ និងទោសដែលមានបញ្ហាដីធ្លី ឬក៏សកម្មជនសិទ្ធិមនុស្ស។ លោក យឹម សុវណ្ណ ក៏ដូចសង្គមស៊ីវិលដែរ ស្នើឲ្យការលើកលែង ឬបន្ធូរបន្ថយទោស ឈរលើទិដ្ឋភាពជាក់ស្ដែង គ្មានការសូកប៉ាន់ និងប្រកាន់បក្សពួក៖ «អ្នកទោសមនសិការ គឺជាជនស្លូតត្រង់ គ្រាន់តែគាត់មានទស្សនៈផ្ទុយពីរដ្ឋាភិបាល អ៊ីចឹងហើយគាត់គួរតែត្រូវបានដោះលែងដើម្បីអាចទទួលបានសិទ្ធិ សេរីភាព»។
លោក អំ សំអាត យល់ថា ដើម្បីឲ្យការលើកលែង ឬបន្ធូរបន្ថយទោសមានតម្លាភាព គឺត្រូវបើកចំហឲ្យមានការចូលរួមពីភាគីនានា រួមទាំងសង្គមស៊ីវិល និងសាធារណជនបានដឹងទូលំទូលាយ។ លោក អំ សំអាត ថាជារៀងរាល់ឆ្នាំ អង្គការលីកាដូ តែទទួលបានព័ត៌មានពីទណ្ឌិតថា ពួកគេមានលក្ខខណ្ឌត្រូវលើកលែងទោស ប៉ុន្តែពួកគេគ្មានឈ្មោះក្នុងបញ្ជីលើកលែង ឬបន្ធូរបន្ថយទោសទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។