ប្រធានគណបក្សសង្គ្រោះជាតិ ចោទថា ការប្រើអំពើហិង្សាមកលើតំណាងរាស្ត្រគណបក្សសង្គ្រោះជាតិ ពីររូបនោះ គឺជាក្រុមបាតុកររបស់គណបក្សប្រជាជនកម្ពុជា។ ចំណែកមន្ត្រីជាន់ខ្ពស់គណបក្សប្រជាជនកម្ពុជា វិញបដិសេធថា អំពើហិង្សានោះ មិនពាក់ព័ន្ធនឹងគណបក្សប្រជាជនកម្ពុជា ឡើយ។
អ្នកនាំពាក្យគណបក្សសង្គ្រោះជាតិ លោក យឹម សុវណ្ណ មានប្រសាសន៍ថា គណបក្សសង្គ្រោះជាតិ នឹងដាក់ពាក្យប្ដឹងចំពោះករណីប្រើអំពើហិង្សាលើតំណាងរាស្ត្រគណបក្សសង្គ្រោះជាតិ នៅខ្លោងទ្វាររដ្ឋសភា នៅថ្ងៃទី២៦ តុលា៖ «ខ្ញុំជឿថា ក្រសួងមានសមត្ថកិច្ចមិនពិបាករកភស្តុតាងនោះទេ ពីព្រោះថាកាមេរ៉ានៅរដ្ឋសភា និងនៅស្ថានទូតអូស្ត្រាលី ក៏គេថតបានដែរ»។
គណបក្សសង្គ្រោះជាតិ អំពាវនាវដល់អាជ្ញាធរមានសមត្ថកិច្ច ឲ្យចាត់វិធានការជាបន្ទាន់ចំពោះហិង្សានោះ ដើម្បីស្រាវជ្រាវ និងចាប់ខ្លួនអ្នកដែលបានប្រព្រឹត្តអំពើហិង្សាមកផ្ដន្ទាទោសតាមច្បាប់។
ភ្លាមៗក្រោយពេលផ្ទុះអំពើហិង្សាលើអ្នកតំណាងរាស្ត្រពីសំណាក់បាតុករនោះ គណបក្សសង្គ្រោះជាតិ បានថ្កោលទោសចំពោះអំពើហិង្សានេះ ដោយចាត់ទុកថា ជាអំពើឃោរឃៅ ព្រៃផ្សៃ ហើយរំលោភសិទ្ធិមនុស្សយ៉ាងធ្ងន់ធ្ងរ និងរំលោភបំពានលើអភ័យឯកសិទ្ធិសភារបស់តំណាងរាស្ត្រ។
លោក គង់ សភា តំណាងរាស្ត្រគណបក្សសង្គ្រោះជាតិ ដែលត្រូវបានពួកបាតុករទាញចេញពីក្នុងរថយន្ត វាយបាក់ខ្ទង់ច្រមុះ ទាត់ចំក្បាលយ៉ាងខ្លាំង និងចង្កេះផង។ លោកនិយាយថា បាតុករដែលវាយលោកនោះ ទំនងជាមន្ត្រីប៉ូលិស ឬទាហាន។ លោកបន្តថា ដំបូងមានបាតុករម្នាក់ដើរមកឈរនៅខាងមុខឡានរបស់លោក ស្របពេលនោះ តៃកុងឡានបានបន្ថយល្បឿន ភ្លាមៗក៏មានបាតុករជាច្រើននាក់ផ្សេងទៀត ស្ទុះមកបើកទ្វារឡាន ហើយទាញលោកចេញពីឡាន និងវាយគាត់យ៉ាងខ្លាំង និងគ្មានការអន្តរាគមន៍ពីមន្ត្រីប៉ូលិសនៅជិតនោះទេ៖ «បានមកចាប់ហែកហោប៉ៅ ហើយបាត់លុយ ៣០០ដុល្លារ បាត់អត្តសញ្ញាណប័ណ្ណ ប័ណ្ណអភ័យឯកសិទ្ធិ កាតអេ.ធី.អិម (ATM) និងរបស់ផ្សេងទៀត ហើយទូរស័ព្ទខ្ញុំក៏ត្រូវគេយកដែរ មានស្បែកជើងម៉ៃហ្វក់ ប្រហែលជាគាត់ជាទាហាន ឬមន្ត្រីប៉ូលិសដែលគាត់ពាក់ស្បែកជើងម៉ៃហ្វក់ ហើយប្រហែលមានស្នាប់ដៃវាយមកលើមុខរបស់ខ្ញុំ។ ខ្ញុំរត់ឡើងលើឡានហើយ ប៉ុន្តែគេទាញពីឡានមកវិញប្រហែលបីដង ក្រោយមកតៃកុងឡានខ្ញុំគាត់ចាប់ខ្ញុំចូលឡាន។ គេវាយខ្ញុំឆ្អែតហើយ បានគេរត់ទៅវាយឯកឧត្តម ញ៉យ ចំរើន ហើយគេស្រែកថាគ្នាវានៅខាងក្រោយម្នាក់ទៀត»។
សមាជិករដ្ឋសភា មកពីតំណាងរាស្ត្រគណបក្សសង្គ្រោះជាតិ ម្នាក់ទៀត គឺលោក ញ៉យ ចំរើន ក៏ត្រូវបាតុករមួយក្រុមវាយដំលើរូបលោកយ៉ាងខ្លាំង និងបណ្ដាលឲ្យសន្លប់ភ្លាមៗនៅនឹងកន្លែងមុខរដ្ឋសភា។
ការប្រើអំពើហិង្សានេះ ប្រធានគណបក្សសង្គ្រោះជាតិ លោក សម រង្ស៊ី សរសេរតាមរយៈបណ្ដាញទំនាក់ទំនងសង្គមហ្វេសប៊ុក (Facebook) ថា អំពើហិង្សានេះ គឺធ្វើដោយក្រុមបាតុកររបស់គណបក្សប្រជាជនកម្ពុជា។ លោក សម រង្ស៊ី ចាត់ទុកករណីនេះ ជាអំពើហិង្សាដ៏ឃោរឃៅ និងព្រៃផ្សៃបំផុត។
ឆ្លើយតបនឹងការចោទប្រកាន់នេះ អ្នកនាំពាក្យគណបក្សប្រជាជនកម្ពុជា លោក សុខ ឥសាន និយាយថា បាតុករទាំងនោះមិនមែនជាការរៀបចំរបស់គណបក្សប្រជាជនកម្ពុជា នោះទេ។ លោកបន្ថែមថា បាតុករទាំងនោះមានគ្នាចម្រុះ គឺមកពីគណបក្សប្រជាជនកម្ពុជា និងគណបក្សសង្គ្រោះជាតិ៖ «វាអាចធ្វើឡើងដើម្បីអុកឡុកហ្នឹងណា គេធ្វើឡើងដោយអហិង្សាទេ ប៉ុន្តែជនឱកាសនិយមហ្នឹង វាធ្វើម៉េចឲ្យពីគោលបំណង និងខុសពីសំណូមពរដែលចង់បាន»។
ទាក់ទងនឹងករណីបាតុកម្មដោយហិង្សានេះដែរ ស្ថានទូតសហរដ្ឋអាមេរិកប្រចាំកម្ពុជា ស្នើសុំឲ្យអាជ្ញាធរធ្វើការស៊ើបអង្កេតឲ្យបានពេញលេញ និងប្រកបដោយតម្លាភាព ទៅលើការវាយដំលើអ្នកតំណាងរាស្ត្រគណបក្សប្រឆាំងទាំងពីរនេះ ដើម្បីរក្សារបៀបរៀបរយនៅរដ្ឋសភា និងដើម្បីធានាសុវត្ថិភាពរបស់អ្នកនយោបាយពីគ្រប់គណបក្សទាំងអស់។
ចំណែកអ្នកនាំពាក្យសាលាក្រុងភ្នំពេញ លោក ឡុង ឌីម៉ង់ និយាយថា ក្រុមបាតុករដែលធ្វើបាតុកម្ម និងប្រើអំពើហិង្សាលើតំណាងរាស្ត្រគណបក្សសង្គ្រោះជាតិ នេះ មិនបានដាក់ពាក្យស្នើសុំធ្វើបាតុកម្មមកសាលាក្រុងភ្នំពេញនោះទេ។
ទោះបីជាយ៉ាងណាក៏ដោយ ក្រុមអង្គការសិទ្ធិមនុស្ស និងគណបក្សសង្គ្រោះជាតិ អំពាវនាវដល់អាជ្ញាធរមានសមត្ថកិច្ច ឲ្យចាត់វិធានការជាបន្ទាន់ ដើម្បីស្រាវជ្រាវ និងចាប់ខ្លួនអ្នកដែលបានប្រព្រឹត្តអំពើហិង្សាមកផ្ដន្ទាទោសតាមច្បាប់៕
ទាក់ទងនឹងការធ្វើបាតុកម្មដោយប្រើហិង្សាលើអ្នកតំណាងរាស្ត្រគណបក្សសង្គ្រោះជាតិ ពីរនាក់ នៅមុខរដ្ឋសភា សូមស្ដាប់ លោក ម៉ម មុនីរតន៍ ដែលបានតាមដានផ្ទាល់ពីសកម្មភាពនៃបាតុកម្មនេះ រៀបរាប់ព័ត៌មានបន្ថែមដូចតទៅ៖
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។