អ្នកផ្តួចផ្តើមយុទ្ធនាការថ្ងៃច័ន្ទពណ៌ខ្មៅ និងជានាយកប្រតិបត្តិមជ្ឈមណ្ឌលកម្ពុជាដើម្បីប្រព័ន្ធផ្សព្វផ្សាយឯករាជ្យ លោក ប៉ា ងួនទៀង ចាត់ទុកការគំរាមប្រើកងកម្លាំងប្រដាប់អាវុធដើម្បីបង្ក្រាបក្រុមអង្គការសង្គមស៊ីវិល និងពលរដ្ឋដែលធ្វើយុទ្ធនាការថ្ងៃច័ន្ទពណ៌ខ្មៅ គឺជាការអសមត្ថភាពរបស់រដ្ឋាភិបាលក្នុងការដោះស្រាយបញ្ហាជាតិ។
កាលពីថ្ងៃទី៣ ខែវិច្ឆិកា កន្លងទៅ លោកនាយករដ្ឋមន្ត្រី ហ៊ុន សែន បានប្រកាសសាជាថ្មីម្ដងទៀតឱ្យកងកម្លាំងប្រដាប់អាវុធទាំងអស់ ធានាដាច់ខាតមិនឱ្យមានបដិវត្តន៍ពណ៌កើតឡើងនៅកម្ពុជា ដែលលោកយល់ថា អាចបំផ្លាញនូវសេចក្ដីសុខ និងសន្តិភាពរបស់ប្រទេស។ លោកក៏បានដាក់បញ្ជាឱ្យក្រុមកងកម្លាំងទាំងនោះការពាររាជរដ្ឋាភិបាលស្របច្បាប់របស់លោកផងដែរ។
លោក ប៉ា ងួនទៀង ដែលកំពុងមានវត្តមាននៅសហរដ្ឋអាមេរិក មានប្រសាសន៍ប្រាប់អាស៊ីសេរី កាលពីថ្ងៃទី៤ ខែវិច្ឆិកា ថា ការប្រើប្រាស់អំពើហិង្សា និងឥទ្ធិពលតុលាការដើម្បីបង្ក្រាបបក្សប្រឆាំង អង្គការសង្គមស៊ីវិល និងសកម្មជនបង្ហាញថា រដ្ឋាភិបាលដែលដឹកនាំដោយគណបក្សប្រជាជនកម្ពុជា កំពុងព្រួយបារម្ភខ្លាចបាត់បង់អំណាច។
លោកមានប្រសាសន៍បន្ថែមដូច្នេះ៖ «ចំពោះខ្ញុំ ខ្ញុំថា ប្រហែលជាដល់ដំណាក់កាលចុងក្រោយនៃការផ្លាស់ប្ដូរ ព្រោះធម្មតាការឈានរកចំណុចរបត់ណាមួយ វាតែងតែមានការប្រទូស្តគ្នា ហើយវាតែងតែមានការប្រឈមច្រើន។ ខ្ញុំវិភាគរឿងហ្នឹង ហេតុដូចម្ដេចបានជារដ្ឋាភិបាលអត់មានលទ្ធភាពក្នុងការកែទម្រង់ការដឹកនាំរបស់ខ្លួន ដើម្បីកាត់បន្ថយការរំលោភសិទ្ធិមនុស្ស ដើម្បីគោរពប្រព័ន្ធយុត្តិធម៌ ហើយរដ្ឋាភិបាលត្រូវបានគេចោទប្រកាន់ថា គាំទ្រទង្វើរំលោភសិទ្ធិមនុស្សទាំងអស់ហ្នឹង។ ខ្ញុំមើលទៅប្រហែលជាគណបក្សប្រជាជនកម្ពុជា ឬរដ្ឋាភិបាលខ្លួនឯងហ្នឹង អត់មានជំនឿលើសមត្ថភាពខ្លួនក្នុងការធ្វើកំណែទម្រង់ខ្លួនឯងដើម្បីទាក់ទាញបេះដូង និងការគាំទ្ររបស់ប្រជាពលរដ្ឋ»។
ស្ថាបនិកយុទ្ធនាការថ្ងៃច័ន្ទពណ៌ខ្មៅរូបនេះ រិះគន់ថា មានតែមនុស្សល្ងង់ខ្លៅ និងទាល់ច្រកតែប៉ុណ្ណោះដែលប្រើអំពើហិង្សាដើម្បីដោះស្រាយបញ្ហា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។