ក្រុមប្រឹក្សាធម្មនុញ្ញ បានចេញលិខិតបន្ទាន់មួយ នៅថ្ងៃទី២៦ ខែសីហា ឆ្នាំ២០១៣ បង្គាប់ឲ្យគណៈកម្មាធិការជាតិរៀបចំការបោះឆ្នោត (គ.ជ.ប) បើកកញ្ចប់សុវត្ថិភាព "ក" មួយចំនួននៅមណ្ឌលខេត្តបាត់ដំបង ក្រុងបាត់ដំបង ដើម្បីផ្ទៀងផ្ទាត់សំឡេងឆ្នោត។
ការបើកកញ្ចប់សុវត្ថិភាព "ក" នេះ នឹងធ្វើឡើងនៅទីស្ដីការគណៈកម្មាធិការជាតិរៀបចំការបោះឆ្នោត នៅថ្ងៃពុធ ទី២៨ ខែសីហា វេលាម៉ោង ៨ព្រឹក ដែលមានការចូលរួមពីតំណាងក្រុមប្រឹក្សាធម្មនុញ្ញ។
កាលពីថ្ងៃទី២៥ ខែសីហា ឆ្នាំ២០១៣ គ.ជ.ប បានបើកកញ្ចប់សុវត្ថិភាព "ក" ចំនួន ១៣ការិយាល័យបោះឆ្នោត នៅក្នុងឃុំមួយ នាខេត្តក្រចេះ។ កញ្ចប់សុវត្ថិភាពទាំង ១៣ នោះ ត្រូវគេរកឃើញថាមានភាពមិនប្រក្រតីជាច្រើន។
កញ្ចប់សុវត្ថិភាព "ក" ជាកញ្ចប់ដែលដាក់ឯកសារដើមជាច្រើនមកពីការិយាល័យបោះឆ្នោត រួមមានទម្រង់ ១១០១ កំណត់ហេតុនៃការបោះឆ្នោត ទម្រង់ ១១០២ កំណត់ហេតុនៃការរាប់សន្លឹកឆ្នោតទម្រង់ ១១០៤ ក្រដាសលទ្ធផលបឋមនៃការបោះឆ្នោត និងការរាប់សន្លឹកឆ្នោត និងទម្រង់ ១១០៨ ជាតារាងរាប់សន្លឹកឆ្នោត ព្រមទាំងឯកសារមួយចំនួនទៀត ដូចជាបញ្ជីបោះឆ្នោតដែលត្រូវបានប្រើក្នុងថ្ងៃបោះឆ្នោត ត្រាសម្ងាត់ សន្លឹកឆ្នោតខូច សន្លឹកឆ្នោតមិនបានប្រើ និងគល់បញ្ជីសន្លឹកឆ្នោតដែលបានប្រើ សន្លឹកឆ្នោតបានការ សន្លឹកឆ្នោតមិនបានការ និងផ្ទាំងក្រដាសធំសម្រាប់កត់ត្រាសំឡេងឆ្នោតជាដើម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។