មេដឹកនាំគណបក្សសង្គ្រោះជាតិ ប្រកាសចរចាជាមួយថ្នាក់ដឹកនាំកំពូលគណបក្សប្រជាជនកម្ពុជា។ ការបញ្ជាក់ជំហរបែបនេះ ធ្វើឡើងដោយប្រធានគណបក្សសង្គ្រោះជាតិ លោក សម រង្ស៉ី នៅក្នុងសេចក្តីថ្លែងការណ៍ទៅកាន់សកម្មជន និងអ្នកគាំទ្ររាប់ពាន់នាក់ ដែលចូលរួមស្វាគមន៍ដំណើរវិលត្រឡប់មកវិញរបស់លោក នាព្រឹកថ្ងៃទី១៩ ខែកក្កដា។
មេដឹកនាំគណបក្សសង្គ្រោះជាតិ បញ្ជាក់ថា របៀបវារៈនៃកិច្ចចរចានោះ រួមមាន ការដោះលែងអ្នកតំណាងរាស្ត្រ និងសកម្មជនដែលកំពុងជាប់គុក សេរីភាពក្នុងការបញ្ចេញមតិតាមរយៈការបើកទីលានប្រជាធិបតេយ្យឡើងវិញ និងការកែទម្រង់ការបោះឆ្នោត។
លោក សម រង្ស៉ី មានប្រសាសន៍ថា មានតែការចរចារវាងថ្នាក់ដឹកនាំកំពូលនៃគណបក្សទាំងពីរទេ ទើបធ្វើអោយបញ្ហាជាប់គាំងនយោបាយអាចដោះស្រាយបាន។ លោកបន្តថា រដ្ឋាភិបាល លោក ហ៊ុន សែន ត្រូវធ្វើជាចាំបាច់ គឺជាការដោះលែងអ្នកទាំង ៨នាក់ ដែលរដ្ឋាភិបាលបានចាប់ដាក់គុកក្នុងសប្ដាហ៍នេះ៖ «ដោះលែងជាបន្ទាន់ ដើម្បីរកដំណោះស្រាយរួម ត្រូវតែជួបជុំគ្នាជួបជជែកគ្នារកដំណោះស្រាយឲ្យបានឆាប់បំផុតជាដំណោះស្រាយរួម ដើម្បីស្វែងរកការផ្សះផ្សាជាតិ»។
ចំណែក លោក កឹម សុខា វិញថ្លែងថ្កោលទោសករណីចាប់ខ្លួនអ្នកតំណាងរាស្ត្របក្សប្រឆាំង ថាជាអំពើខុសច្បាប់ ហើយលោកក៏ព្រមានថា គណបក្សសង្គ្រោះជាតិ នឹងមិនអាចនៅស្ងៀមបានឡើយ៖ «តំណាងរាស្ត្រយើងទាំងអស់គ្នាដែលជាប់ពន្ធនាគារទាំងអស់ អត់មានខុសអីបន្តិចទេ ដូច្នេះយើងមិនអាចទ្រាំបានទេណាបងប្អូន»។
ឆ្លើយតបនឹងបញ្ហានេះ មន្ត្រីជាន់ខ្ពស់គណបក្សសង្គ្រោះជាតិ លោក ជាម យៀប មានប្រសាសន៍ថា គណបក្សប្រជាជនកម្ពុជា មិនដែលបិទទ្វារចរចាទេ។ លោកបន្តថា ចំពោះរឿងរ៉ាវចាប់ខ្លួនអ្នកនយោបាយគណបក្សសង្គ្រោះជាតិ វិញ រដ្ឋាភិបាល ឬរដ្ឋសភា មិនអាចលូកដៃបានឡើយ៖ «ឯកឧត្តម សម រង្ស៉ី គាត់មានឆន្ទៈបែបនេះ គណបក្សប្រជាជនកម្ពុជា ស្វាគមន៍។ ហើយបើមានការព្រមព្រៀងគ្នា ឯកឧត្តម សម រង្ស៉ី អាចស្នើទៅកាន់សម្ដេច ហ៊ុន សែន ទៅ នោះអាចដោះស្រាយបានហើយ»។
បន្ទាប់ពី លោក សម រង្ស៉ី ត្រឡប់មកដល់វិញ គណបក្សសង្គ្រោះជាតិ ចេញសេចក្តីប្រកាសព័ត៌មានមួយបញ្ជាក់ថា គណបក្សប្រឆាំងនឹងរៀបចំពិធីបួងសួងតាមបែបព្រះពុទ្ធសាសនានៅរៀងរាល់ល្ងាច ចាប់ពីថ្ងៃទី១៩ ខែកក្កដា តទៅ។ ពិធីបួងសួងនោះ នឹងប្រព្រឹត្តទៅនៅស្នាក់ការគណបក្សរាជធានីខេត្តនៅទូទាំងប្រទេស រហូតដល់មានការដោះលែងអ្នកនយោបាយទាំង ៨នាក់។
ទោះជាបែបណាក៏ដោយ គណបក្សសង្គ្រោះជាតិ មិនទាន់បញ្ជាក់ជំហរបែបណា បើសិនជាគណបក្សប្រជាជនកម្ពុជា មិនព្រមចរចានោះទេ។ លោក សម រង្ស៉ី ស្នើឲ្យអ្នកកាសែតកុំសួរសំណួរដែលផ្ដើមដោយពាក្យបើសិន។
តំណាងរាស្ត្រគណបក្សសង្គ្រោះជាតិ ៧នាក់ និងមន្ត្រីកិច្ចការសាធារណៈម្នាក់ ត្រូវបានអាជ្ញាធររដ្ឋាភិបាលចាប់ខ្លួនជាបន្តបន្ទាប់ ចាប់តាំងពីកើតមានអំពើហិង្សារវាងសន្តិសុខសាលាខណ្ឌដូនពេញ និងសកម្មជនអ្នកគាំទ្រ កាលពីថ្ងៃទី១៥ ខែកក្កដា។ តុលាការដែលមិនទាន់ចាត់ការលើសំណុំរឿង ដែលសន្តិសុខវាយអ្នកកាសែតជាយូរខែមកហើយនោះ តែពេលនេះបែរជាចាត់ការលើបណ្ដឹងរបស់សន្តិសុខវិញម្តង។ សាលាដំបូងរាជធានីភ្នំពេញ សម្រេចចោទប្រកាន់អ្នកទាំង ៨នាក់ ក្នុងបទឧក្រិដ្ឋនានាដែលមានទម្ងន់ទោសរហូតដល់ជាង ៣០ឆ្នាំទៀតផង។
សកម្មភាពអ្នកគាំទ្រការត្រឡប់មកវិញរបស់ លោក សម រង្ស៊ី
ដោយ ឡេង ម៉ាលី
អ្នកគាំទ្រ និងសមាជិកគណបក្សសង្គ្រោះជាតិ ប្រមាណជាង ១ម៉ឺននាក់ នៅព្រឹកថ្ងៃទី១៩ កក្កដា បាននាំគ្នាចេញទៅទទួលស្វាគមន៍ការមកដល់របស់ លោក សម រង្ស៊ី និងហែហមលោកពីព្រលានយន្តហោះអន្តរជាតិភ្នំពេញ រហូតដល់ទីស្នាក់ការកណ្ដាលគណបក្សសង្គ្រោះជាតិ នៅតាមបណ្ដោយផ្លូវជាតិលេខ២ ក្នុងសង្កាត់ចាក់អង្រែលើ រាជធានីភ្នំពេញ។
ការហែហមដោយដំណើរយឺតៗ ដែលចាប់តាំងពីម៉ោង ៩ព្រឹកដល់ម៉ោង ១រសៀល មានសភាពអ៊ឹកធឹកណែនផ្លូវម្ខាង អមដោយស្នូរទះដៃជ័យឃោសពីអ្នកគាំទ្រ។
នៅចំណុចខ្លះនៅតាមផ្លូវពីព្រលានយន្តហោះអន្តរជាតិភ្នំពេញ ដូចជា នៅហួសវិមានសន្តិភាព និងខាងលិចផ្សារថ្មី ផ្លូវសហព័ន្ធរុស្ស៊ី ត្រូវកកស្ទះទាំងស្រុងប្រហែលកន្លះម៉ោង នៅពេលដែល លោក សម រង្ស៊ី ថ្លែងការណ៍ទៅកាន់សាធារណជន និងអ្នកគាំទ្រគណបក្សសង្គ្រោះជាតិ នៅទីនោះ។
អ្នកដែលមកហែហមដំណើរមកដល់របស់ លោក សម រង្ស៊ី សុទ្ធតែថ្លែងថា ពួកគាត់ចង់ចូលរួមក្នុងពិធីនេះ ដើម្បីលើកទឹកចិត្តដល់មេដឹកនាំគណបក្សសង្គ្រោះជាតិ ដើម្បីទាមទារឱ្យដោះលែងមន្ត្រីបក្សសង្គ្រោះជាតិ ដែលរដ្ឋាភិបាលចាប់ឃុំឃាំងនោះមកវិញ។
អ្នកគាំទ្រមកពីខេត្តពោធិ៍សាត់ មួយរូប លោក ប៉ូយ យីម ថ្លែងថា លោកមកចូលរួម គឺលោកចង់ឱ្យប្រធានបក្សរបស់លោកចរចាដោះលែងអ្នកជាប់ឃុំឱ្យបានឆាប់៖ «ការដែលខ្ញុំមកនេះ ទីមួយអបអរសាទរលោកប្រធាននិវត្តមកកម្ពុជា។ ទីពីរ ចង់ជំរុញឱ្យលោកប្រធានមានទឹកចិត្តដោះស្រាយចរចាជាមួយគណបក្សកាន់អំណាច ឈានទៅដល់ការដោះលែងតំណាងរាស្ត្រដែលគេចាប់ខ្លួនដោយអយុត្តិធម៌នោះ តាមនីតិវិធី និងស្របច្បាប់។ បើសិនជាគ្មានការដោះលែងទេ ចំពោះខ្ញុំផ្ទាល់ ក៏ដូចជាអ្នកនៅជិតខាងខ្ញុំដែរ គឺមិនសុខចិត្តដាច់ខាត។ ត្រូវតែលុះលះតវ៉ា និងជំរុញទឹកចិត្តទាំងអស់គ្នា ដើម្បីមកទាមទារឱ្យមានការដោះលែងឱ្យទាល់តែបាន។ បើសិនជាមានការបង្ក្រាប អត់ខ្លាច»។
អ្នកគាំទ្រវ័យជាង ៦០ឆ្នាំម្នាក់នៅរាជធានីភ្នំពេញ គឺលោកស្រី ស៊ិន ធី ថ្លែងនៅក្នុងពេលហែនោះថា ទោះបីជារដ្ឋាភិបាលធ្លាប់ប្រើកម្លាំងសន្តិសុខបង្ក្រាបក្ដី ក៏លោកស្រីមិនខ្លាចដែរ៖ «ខ្ញុំអត់ខ្លាច អត់មានសេចក្ដីតក់ស្លុត។ មកចិត្តឯង អត់មាននរណាជួល គ្មានអ្នកណាបង្ខំចិត្ត គឺមកដោយចិត្តឯង។ ចង់បានប្រធានខ្ញុំមកវិញ ដែលគេចាប់យកទៅដាក់នៅព្រៃស ដែលគាត់អត់មានកំហុសអីផង។ ចាប់គាត់អត់មានហេតុផល។ អ៊ីចឹងខ្ញុំស្ដាយស្រណោះគាត់ គឺត្រូវតាមសុំគាត់មកវិញ»។
សកម្មជនវ័យចំណាស់មួយរូបទៀត គឺលោក គិត ឈាង មានប្រសាសន៍ថា លោកចង់តាមមើលគោលជំហររបស់មេដឹកនាំគណបក្សសង្គ្រោះជាតិ៖ «ខ្ញុំមកនេះ ពីព្រោះខ្ញុំឈឺចាប់ចំពោះរដ្ឋាភិបាល។ លោក ហ៊ុន សែន គាត់ជាខ្មែរដែរ តែគាត់ធ្វើមិនមែនដើម្បីផលប្រយោជន៍ខ្មែរ។ គាត់ធ្វើដើម្បីផលប្រយោជន៍បរទេស ជាពិសេសការរំលោភយកដីធ្លីប្រជារាស្ត្រ តុលាការមិនយុត្តិធម៌។ អ៊ីចឹងហើយបានជាខ្ញុំមកនេះ គឺខ្ញុំបានជាខ្ញុំមកនេះ គឺខ្ញុំសំណូមពរឱ្យដោះលែងតំណាងរាស្ត្រ ដែលគាត់គ្មានកំហុសអី។ ប៉ុន្តែខ្ញុំចង់តាមដានមើលថា បើសិន លោក សម រង្ស៊ី ធ្វើរដ្ឋាភិបាលជាមួយ លោក ហ៊ុន សែន គឺខ្ញុំអត់គាំទ្រ ខ្ញុំឈប់គាំទ្រ ព្រោះខ្ញុំយល់ឃើញថា ដូចគណបក្សហ៊្វុនស៊ិនប៉ិច អ៊ីចឹង កាលចូលជាមួយ លោក ហ៊ុន សែន គឺមិនមានន័យអីទាំងអស់។ ប្រជារាស្ត្រខ្មែរសង្ឃឹមលើគាត់ តែបើគាត់ធ្វើដូចហ៊្វុនស៊ិនប៉ិច ទៀត ប្រជារាស្ត្រខ្មែរគាត់អត់គាំទ្រទេ»។
ទោះជាយ៉ាងណាក្ដី យើងសង្កេតឃើញថា ការហែក្បួន លោក សម រង្ស៊ី ពីព្រលានយន្តហោះអន្តរជាតិភ្នំពេញ រហូតដល់ទីស្នាក់ការកណ្ដាលគណបក្សសង្គ្រោះជាតិ នៅសង្កាត់ចាក់អង្រែលើ មិនមានការរារាំងដោយកម្លាំងសន្តិសុខ ឬកម្លាំងនគរបាលប្រឆាំងបាតុកម្មដូចមុនៗទេ សូម្បីតែការដាក់ពង្រាយកម្លាំងទាំងនោះនៅតាមដងផ្លូវ ក៏មិនឃើញមានដែរ គឺមានតែនគរបាលចរាចរណ៍ប៉ុណ្ណោះ។
ការហែក្បួនបានកកស្ទះម្ដងទៀតនៅទីស្នាក់ការកណ្ដាលគណបក្សសង្គ្រោះជាតិ នៅសង្កាត់ចាក់អង្រែលើ ក្នុងពេលដែល លោក សម រង្ស៊ី និងលោក កឹម សុខា ថ្លែងការណ៍ទៅកាន់អ្នកគាំទ្រ។ បន្ទាប់កកស្ទះជិតកន្លះម៉ោង អ្នកគាំទ្របានរំសាយវិញ នៅក្រោយសេចក្ដីថ្លែងការណ៍ លោក សម រង្ស៊ី និងលោក កឹម សុខា បានបញ្ចប់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។