បក្សប្រឆាំងសាទរចំពោះការប្រកាសលុបបម្រាមមិនឲ្យលោក សម រង្ស៊ី ចូលស្រុក
2017.06.14
លោក សម រង្ស៊ី អតីតប្រធានគណបក្សសង្គ្រោះជាតិ ផ្ដល់បទសម្ភាសន៍ដល់អាស៊ីសេរី កាលពីថ្ងៃទី១៣ ខែមិថុនា ឆ្នាំ២០១៧។ RFA
Photo: RFA
អ្នកវិភាគលើកឡើងថា ការណ៍ដែលរដ្ឋាភិបាលសម្រេចលុបចោលបម្រាមមិនឲ្យលោក សម រង្ស៊ី វិលចូលស្រុកវិញ គឺជារឿងវិជ្ជមានមួយសម្រាប់លោក សម រង្ស៊ី និងគណបក្សសង្គ្រោះជាតិ ប្រសិនរដ្ឋាភិបាលពិតជាមានឆន្ទៈចង់បង្រួបបង្រួមជាតិមែននោះ។ ប៉ុន្តែអ្នកវិភាគក៏មើលឃើញពីភាពយកឈ្នះចាញ់គ្នារវាងលោកនាយករដ្ឋមន្ត្រី ហ៊ុន សែន និងលោក សម រង្ស៊ី ទៅវិញទេ ព្រោះថា ការចេញលិខិតលុបចោលការហាមឃាត់ក្រុមហ៊ុនអាកាសចរណ៍ដឹកលោក សម រង្ស៊ី វិលចូលស្រុកវិញនេះ គឺរដ្ឋាភិបាលធ្វើឡើងភ្លាមៗ ក្រោយពីលោក សម រង្ស៊ី ប្រកាសថា លោកនឹងវិលចូលស្រុក ទោះបីជាជាប់គុកក៏ដោយ ឲ្យតែរដ្ឋាភិបាលលុបបម្រាមនេះចេញ។
គណបក្សសង្គ្រោះជាតិ អបអរសាទរចំពោះរដ្ឋាភិបាលដែលបានចេញលិខិតលុបចោលបម្រាមកាលពីឆ្នាំ២០១៦ មិនឲ្យលោក សម រង្ស៊ី អតីតប្រធានគណបក្សសង្គ្រោះជាតិ វិលចូលស្រុកវិញ។
អ្នកនាំពាក្យគណបក្សសង្គ្រោះជាតិ លោក យឹម សុវណ្ណ បានប្រកាសអបអរសាទរភ្លាមៗ នៅថ្ងៃទី១៤ ខែមិថុនា ក្រោយពេលរដ្ឋាភិបាលបានសម្រេចលុបចោលលិខិតលេខ ១៥១ ចុះថ្ងៃទី១២ ខែតុលា ឆ្នាំ២០១៦ ហាមមិនឲ្យក្រុមហ៊ុនអាកាសចរណ៍ទាំងអស់ដឹកលោក សម រង្ស៊ី វិលចូលស្រុកវិញ។ លោក យឹម សុវណ្ណ អះអាងថា ការសម្រេចរបស់រដ្ឋាភិបាលនេះ គឺជាសញ្ញាវិជ្ជមានមួយសម្រាប់គណបក្សសង្គ្រោះជាតិ។
ទោះបីជាយ៉ាងនេះក្ដី លោក យឹម សុវណ្ណ មិនធ្វើអត្ថាធិប្បាយអ្វីច្រើនក្រៅពីនេះទេ ដូចជាថា តើគណបក្សសង្គ្រោះជាតិ មានចរចាអ្វីពីក្រោយខ្នងជាមួយរដ្ឋាភិបាលចំពោះករណី លោក សម រង្ស៊ី ហើយថា តើលោក សម រង្ស៊ី នឹងវិលចូលស្រុកវិញនៅពេលណាជាដើម៖ «សុំជូនតែប៉ុណ្ណឹងសិន កុំអាលគិតដល់រឿងផ្សេងទៀត សុំមើលស្ថានការណ៍សិន ឥឡូវនេះស្ថានការណ៍វាវិវត្តន៍ទៅមុខហើយ ទុកឲ្យថ្នាក់ដឹកនាំគណបក្សនយោបាយគេធ្វើការសិន កុំតែឃើញចេញលិខិតប៉ុណ្ណឹងនាំសួរពីនេះសួរពីនោះ»។
ទីស្ដីការគណៈរដ្ឋមន្ត្រីបានចេញលិខិតមួយច្បាប់នៅថ្ងៃទី១៤ ខែមិថុនា ដែលចុះហត្ថលេខាដោយលោក តឹករ៉េត សំរេច រដ្ឋលេខាធិការនៃទីស្ដីការគណៈរដ្ឋមន្ត្រី លុបចោលលិខិតលេខ១៥១ ដែលជាចំណាររបស់លោកនាយករដ្ឋមន្ត្រី ហ៊ុន សែន បញ្ជាឲ្យអគ្គនាយកដ្ឋានអន្តោប្រវេសន៍ បង្ការ ទប់ស្កាត់ទុកជាមុន ដោយមិនអនុញ្ញាតឲ្យក្រុមហ៊ុនអាកាសចរណ៍ណាមួយដឹកលោក សម រង្ស៊ី វិលចូលស្រុកវិញ ដោយអាជ្ញាធរមានសមត្ថកិច្ចមិនបានដឹងជាមុននោះ។
អ្នកនាំពាក្យគណបក្សប្រជាជនកម្ពុជា លោក សុខ ឥសាន បន្ថែមថា រដ្ឋាភិបាលលុបបម្រាមលេខ១៥១ នេះ គឺរដ្ឋាភិបាលពិតជាចង់ដឹងថា តើលោក សម រង្ស៊ី ហ៊ានវិលចូលស្រុកវិញដូចលោក សម រង្ស៊ី ហ៊ានប្រកាសនៅក្នុងនាទីវេទិកាអ្នកស្ដាប់វិទ្យុអាស៊ីសេរី កាលពីយប់ថ្ងៃទី១៣ ខែមិថុនា ដែរ ឬយ៉ាងណា?
លោក សុខ ឥសាន បញ្ជាក់ថា ពេលនេះគណបក្សប្រជាជនកម្ពុជា មិនទាន់និយាយពីរឿងចរចា ឬមិនចរចាអ្វីទេ៖ «សម រង្ស៊ី និយាយក្នុងអាស៊ីសេរី យប់មិញ (១៣ មិថុនា) ជាមួយ ជុន ច័ន្ទបុត្រ អ្នកណាក៏ឮដែរថា គាត់មិនខ្លាចទេ ដូច្នេះលោកអាចមកបាន កប៉ាល់ហោះណាក៏លោកអាចមកវិញបានដែរ ដូច្នេះសូមអញ្ជើញមក...»។
ការប្រកាសរបស់រដ្ឋាភិបាលលុបចោលបម្រាមនេះវិញ គឺធ្វើឡើងមួយថ្ងៃបន្ទាប់ពីលោក សម រង្ស៊ី ប្រកាសថា លោកនឹងវិលចូលកម្ពុជា វិញ នៅឆ្នាំ២០១៨។
លោក សម រង្ស៊ី បានថ្លែងនៅក្នុងវេទិកាអ្នកស្ដាប់វិទ្យុអាស៊ីសេរី កាលពីយប់ថ្ងៃអង្គារ ទី១៣ ខែមិថុនា ថា លោកប្ដេជ្ញាចិត្តវិលត្រឡប់ទៅប្រទេសកម្ពុជា ដើម្បីប្រកួតប្រជែងតំណែងនាយករដ្ឋមន្ត្រីជាមួយនឹងលោក ហ៊ុន សែន ប្រធានគណបក្សប្រជាជនកម្ពុជា នៅក្នុងការបោះឆ្នោតជាតិ ឆ្នាំ២០១៨ ខាងមុខ។
លោក សម រង្ស៊ី ស្នើឲ្យលោកនាយករដ្ឋមន្ត្រី ហ៊ុន សែន ដកបទបញ្ជាទាំងឡាយដែលហាមលក់សំបុត្រយន្តហោះឲ្យលោកសម្រាប់ធ្វើដំណើរទៅកាន់ប្រទេសកម្ពុជា៖ «អ្វីក៏ខ្ញុំហ៊ានធ្វើ ព្រមធ្វើ ខ្ញុំសុខចិត្តជាប់គុក ខ្ញុំសុខចិត្តស្លាប់ ខ្ញុំសុខចិត្តវិលវិញឲ្យតែជាតិបានរស់។ ក៏ប៉ុន្តែសូមធានាឲ្យជាតិបានរស់ ពលរដ្ឋបានសុខ អំណាចផ្ដាច់ការឈប់ធ្វើបាបប្រជាពលរដ្ឋ»។
រហូតមកដល់ពេលនេះ អតីតប្រធានគណបក្សសង្គ្រោះជាតិ លោក សម រង្ស៊ី កំពុងជាប់បណ្ដឹងសរុបនៅក្នុងតុលាការកម្ពុជា ចំនួន ៧ករណី បណ្ដឹងទាំងនោះរួមមាន បណ្ដឹងបរិហារកេរ្តិ៍លោក ហោ ណាំហុង ឧបនាយករដ្ឋមន្ត្រី ជាសាធារណៈ និងញុះញង់ឲ្យមានការរើសអើង។ បណ្ដឹងពីបទបរិហារកេរ្តិ៍ លោក ហេង សំរិន។ បណ្ដឹងបរិហារកេរ្តិ៍ពាក់ព័ន្ធការចោទប្រកាន់ថា លោក ហ៊ុន សែន បានទិញចំនួនឡៃ (Like) ហ្វេសប៊ុក (Facebook) ពីបរទេស និងបណ្ដឹងផ្សេងៗទៀត។
ទោះបីជាយ៉ាងណាក៏ដោយ អតីតឧបនាយករដ្ឋមន្ត្រី លោកព្រឹទ្ធាចារ្យ លឺ ឡាយស្រេង ដែលជាអតីតមន្ត្រីជាន់ខ្ពស់គណបក្សហ៊្វុនស៊ិនប៉ិច និងជាអ្នកនយោបាយជើងចាស់ផងនោះ មានប្រសាសន៍ថា លោកនាយករដ្ឋមន្ត្រី ហ៊ុន សែន ល្មមរកដំណោះស្រាយមួយសមស្របដើម្បីបង្រួបបង្រួមគ្នារវាងមេដឹកនាំគណបក្សប្រឆាំង និងបក្សកាន់អំណាចហើយ។
លោកបញ្ជាក់ថា ការយកឈ្នះចាញ់គ្នាគ្មានអ្វីចំណេញដល់សង្គមជាតិទេ ដោយលោកបានប្រៀបធៀបថា ប្រទេសកម្ពុជា បច្ចុប្បន្នដកដង្ហើមតាមអុកស៊ីហ្សែន ពោលគឺការដឹកនាំពឹងលើកម្ចី និងជំនួយបរទេស៖ «ដល់ពេលវេលាខ្មែរហ្នឹងរៀនចប់ហើយ ល្មមឆ្អែតហើយ ល្មមឯករាជ្យហើយ ខ្មែរហ្នឹងមិនមែនស្រុកឯករាជ្យឯណា? ដើរតែពឹងគេ ដើរតែសុំគេ»។
អ្នកឃ្លាំមើលផ្នែកអភិវឌ្ឍន៍សង្គម លោកបណ្ឌិត មាស នី មានប្រសាសន៍ថា ការចេញលិខិតឲ្យលោក សម រង្ស៊ី វិលចូលស្រុកវិញបាននេះ អាចជាល្បែងនយោបាយមួយថ្មីមួយទៀតរបស់រដ្ឋាភិបាលដើម្បីដេញជើងលោក សម រង្ស៊ី ដែលប្រកាសថា លោកសុខចិត្តជាប់គុកបើសិនជារដ្ឋាភិបាលលុបចោលបម្រាមចេញ។ បញ្ហានេះ បើសិនជាលោក សម រង្ស៊ី មិនវិលចូលស្រុកដូចលោកប្រកាសទេ ប្រជាប្រិយភាពរបស់លោកកាន់តែធ្លាក់ចុះ៖ «ខ្ញុំមើលទៅវាអាចមានប្រយោជន៍ទាំងសងខាង។ ទី១ បក្សប្រជាជនកម្ពុជា អាចកាត់បន្ថយការរិះគន់ ពីព្រោះគេមើលឃើញថា គណបក្សប្រជាជនកម្ពុជា ជាអ្នកធ្វើបាបឯកឧត្តម សម រង្ស៊ី ក្នុងការប្រកួតប្រជែងការបោះឆ្នោត»។
នៅក្នុងជីវិតនយោបាយរបស់លោក សម រង្ស៊ី និងលោក ហ៊ុន សែន ម្ដងក្លាយជាមិត្ត ម្ដងក្លាយជាសត្រូវភ្លាមៗ ទាំងអ្នកវិភាគ និងពលរដ្ឋពិបាកនឹងតាមទាន់ស្ថានការណ៍វិវត្តន៍របស់មេដឹកនាំទាំងពីរ។ កាលពីឆ្នាំ២០១៤ ក្រោយពេលវិបត្តិជាប់គាំងនយោបាយដោះស្រាយបញ្ចប់ លោក សម រង្ស៊ី និងលោក ហ៊ុន សែន កសាងទំនាក់ទំនងស្អិតល្មួតនឹងគ្នា និងថែមទាំងបណ្ដើរគ្នាចូលរួមកម្មវិធីអង្គរសង្ក្រាន្តនៅខែត្រសៀមរាប ទៀតផង។ ទំនាក់ទំនងនេះមិនបានយូរប៉ុន្មាន លោក ហ៊ុន សែន ក៏ចាប់ផ្ដើមកសាងពាក្យបណ្ដឹងជាបន្តបន្ទាប់ប្រឆាំងនឹងលោក សម រង្ស៊ី វិញ។ ក្រៅពីនេះទៀត លោក ហ៊ុន សែន ថែមទាំងប្រកាសកាត់ដៃលោកចោល បើសិនជាលោកចុះហត្ថលេខាស្នើសុំព្រះរាជទានទោសដល់លោក សម រង្ស៊ី ពីព្រះមហាក្សត្រជាដើម។
ទោះបីជាបែបនេះក្ដី អ្នកវិភាគលើកឡើងថា អ្នកនយោបាយគូបដិបក្ខទាំងពីរល្មមដល់ពេលបញ្ចប់ជម្លោះនេះ នៅគ្រាពលរដ្ឋកំពុងតែជួបប្រទះបញ្ហាលំបាកសព្វបែបយ៉ាងនៅក្នុងសង្គម និងបញ្ចប់នូវវប្បធម៌សងសឹកគ្នា ដោយអ្នកវិភាគជំរុញឲ្យលោក ហ៊ុន សែន យកគំរូតាមមេដឹកនាំយោធាមីយ៉ាន់ម៉ា ឬភូមា ដែលសុខចិត្តប្រគល់អំណាចឲ្យបក្សប្រឆាំងដោយសន្តិវិធី ក្រោយពេលចាញ់ឆ្នោតនោះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- ពលរដ្ឋនៅតំបន់បឹងតាមោក ចោទប្រកាន់អាជ្ញាធរខណ្ឌព្រែកព្នៅថា ប្រើអំពើហិង្សា
- វៀតណាមព្រមានថា ព្រែកជីកហ្វូណនតេជោអាចជួយសម្រួលវត្តមានយោធាចិនក្នុងទឹកដីកម្ពុជាកាន់តែជ្រៅ
- ពលរដ្ឋខ្មែរ-អូស្ត្រាលីម្នាក់ ដែលរិះគន់រដ្ឋាភិបាលកម្ពុជា រងការវាយដំពីជនមិនស្គាល់មុខមួយក្រុម ពេលទៅលេងស្រុកខ្មែរ
- ក្រសួងដែនដីបានហៅអតិថិជនបុរីពិភពថ្មីទៅពិភាក្សា ដើម្បីរកដំណោះស្រាយ
- ការប្រារព្ធពិធីបុណ្យចូលឆ្នាំថ្មី នៅតាមតំបន់មួយចំនួននៅស្រុកសុរិន្ទ
អត្ថបទពេញនិយម
នយោបាយ
- អាជ្ញាធរក្រុងភ្នំពេញមិនអនុញ្ញាតឱ្យបក្សកម្លាំងជាតិធ្វើបាតុកម្ម នៅទីលានប្រជាធិបតេយ្យ
- មន្ត្រីរដ្ឋាភិបាលអះអាងថា ការជីកព្រែកហ្វូណនជាសិទ្ធិអធិបតេយ្យរបស់កម្ពុជា គ្មានការចាំបាច់បំភ្លឺគ្រប់រឿងដល់វៀតណាមទេ
- លោក ហ៊ុន ម៉ាណែត ថ្លែងការពារគម្រោងព្រែកជីកហ្វូណនតេជោ ក្រោយពេលវៀតណាមរិះគន់
- តើកម្ពុជាអាចជម្នះសាងសង់ព្រែកជីកហ្វូណនតេជោបានដែរឬទេ?
- លោក ហ៊ុន សែន បដិសេធការចោទរបស់វៀតណាម ដែលថា ព្រែកជីកហ្វូណនសម្រាប់សម្រួលវត្តមានយោធាចិន