លោក សម រង្ស៊ី ប្រកាសបែបនេះនៅក្នុងពេលដែលលោកបានចុះទៅជួបប្រជាពលរដ្ឋនៅក្នុងផ្សារ និងវត្តស្ទឹងមានជ័យ នៅព្រឹកថ្ងៃព្រហស្បតិ៍ ទី៥ ខែកញ្ញា ឆ្នាំ២០១៣៖ «អញ្ញើញមកកាន់តែច្រើន ជោគជ័យរបស់យើងកាន់តែធំ។ អ្នកណាខ្លះចូលរួមបាតុកម្មអហិង្សាលើកដៃមើល? ទាំងអស់គ្នាៗៗ»។
ក្នុងចំណោមអ្នកគាំទ្រប្រមាណជាង ១០០នាក់នោះ ក៏ឃើញមានព្រះសង្ឃច្រើនអង្គចូលរួមស្វាគមន៍ លោក សម រង្ស៊ី នៅក្នុងវត្តស្ទឹងមានជ័យ។
វត្តស្ទឹងមានជ័យ គឺជាទីដែលធ្លាប់កើតមានអំពើហិង្សាមួយរវាងពលរដ្ឋ និងព្រះសង្ឃ ជាមួយកងកម្លាំងសមត្ថកិច្ចរក្សាសន្តិសុខក្នុងពេលបោះឆ្នោតកាលពីថ្ងៃទី២៨ ខែកក្កដា ដែលកើតចេញពីការបាត់ឈ្មោះអ្នកបោះឆ្នោត និងការសង្ស័យថា មានជនជាតិវៀតណាម មានសិទ្ធិបោះឆ្នោត។ ក្នុងពេលនោះដែរ ឡាន ២គ្រឿង របស់កងរាជអាវុធហត្ថត្រូវដុតបំផ្លាញនៅនឹងមុខវត្តនោះ៕