អតីតមេដឹកនាំគណបក្សសង្គ្រោះជាតិ លោក សម រង្ស៊ី បេ្តជ្ញាចិត្តវិលត្រឡប់ទៅប្រទេសកម្ពុជា ដើម្បីប្រកួតប្រជែងតំណែងនាយករដ្ឋមន្ត្រីជាមួយនឹងលោក ហ៊ុន សែន ប្រធានគណបក្សប្រជាជនកម្ពុជា នៅក្នុងការបោះឆ្នោតជាតិ ឆ្នាំ២០១៨ ខាងមុខ។
លោក សម រង្ស៊ី ស្នើឲ្យលោកនាយករដ្ឋមន្ត្រី ហ៊ុន សែន ដកបទបញ្ជាទាំងឡាយដែលហាមលក់សំបុត្រយន្តហោះឲ្យលោកក្នុងការធ្វើដំណើរទៅកាន់ប្រទេសកម្ពុជា ដើម្បីចូលរួមប្រកួតប្រជែងការបោះឆ្នោតសកលឆ្នាំ២០១៨។
លោក សម រង្ស៊ី បានថ្លែងនៅក្នុងវេទិកាអ្នកស្តាប់វិទ្យុអាស៊ីសេរី កាលពីយប់ថ្ងៃអង្គារ ទី១៣ មិថុនា ថា ដើម្បីឲ្យការបោះឆ្នោតជាតិនៅពេលខាងមុខប្រព្រឹត្តទៅដោយសេរីភាព ត្រឹមត្រូវ និងស្មើភាពគ្នាទៅបាន លុះត្រាតែរដ្ឋាភិបាលបើកទ្វារឲ្យលោកចូលប្រទេសដើម្បីប្រកួតប្រជែងគ្នាតាមលក្ខណៈប្រជាធិបតេយ្យ៖ «ដូច្នេះអត់មានក្រុមហ៊ុនយន្តហោះណាហ៊ានដឹករូបខ្ញុំទេ ពីព្រោះលោក ហ៊ុន សែន បានគំរាមថា ប្រសិនបើក្រុមហ៊ុនយន្តហោះណាហ៊ានដឹករូបខ្ញុំមកដល់ទឹកដីប្រទេសកម្ពុជា គឺបិទទ្វារមិនអោយអ្នកធ្វើដំណើរចេញពីយន្តហោះ»។
រហូតមកទល់ពេលនេះ លោក សម រង្ស៊ី នៅជាប់បណ្ដឹងតាមផ្លូវតុលាការដែលគ្រប់គ្រងដោយរបបរបស់លោក ហ៊ុន សែន ច្រើនរាប់មិនអស់រហូតដល់នាំឲ្យមានការដាក់បទបញ្ជាតឹងរ៉ឹងដល់រាល់ក្រុមហ៊ុនអាកាសចរណ៍ ឬក្រុមហ៊ុនទេសចរណ៍ទាំងឡាយមិនឲ្យលក់សំបុត្រយន្តហោះដល់លោកថែមទៀត។
លោក សម រង្ស៊ី អះអាងថា លោកមិនខ្លាចជាប់គុកនោះទេ ប្រសិនបើលោក ហ៊ុន សែន បើកច្រកឲ្យលោកចូលស្រុកវិញ។ លោកបន្តថា លោក ហ៊ុន សែន បើកច្រកពេលណាគឺលោកនឹងធ្វើដំណើរទៅកម្ពុជា ពេលនោះ៖ «គ្មាននរណាគេហ៊ានទទួលស្គាល់រដ្ឋាភិបាលលោក ហ៊ុន សែន ទេ ប្រសិនបើលោក ហ៊ុន សែន គាត់ឈ្នះឆ្នោតតែម្នាក់គាត់ដោយគ្មានគូប្រកួតនោះ ហើយគូប្រកួតតែមួយដែលអាចតតាំងជាមួយគាត់ បានគឺ សម រង្ស៊ី ហើយ សម រង្ស៊ី ដែលតំណាងអោយគណបក្សសង្គ្រោះជាតិ ពេលនោះ នឹងត្រូវវិលត្រឡប់ទៅកម្ពុជា វិញ អោយទាន់ពេលវេលា»។
លោក សម រង្ស៊ី បានលាលែងពីតំណែងកាលពីថ្ងៃទី១១ កុម្ភៈ ក្រោយពីសភាដែលមានសំឡេងភាគច្រើនពីខាងគណបក្សកាន់អំណាចធ្វើវិសោធនកម្មច្បាប់ស្ដីពីគណបក្សនយោបាយហាមមិនអោយអ្នកនយោបាយទាំងឡាយណាដែលមានទោសអាចធ្វើជាប្រធានគណបក្ស ឬអនុប្រធានបក្សគណបក្ស។
ដោយមើលឃើញពីហានិភ័យដែលគណបក្សសង្គ្រោះជាតិ អាចត្រូវក្រសួងមហាផ្ទៃ រំលាយដោយសារការធ្វើវិសោធនកម្មច្បាប់ស្ដីពីគណបក្សនយោបាយនេះហើយ លោក សម រង្ស៊ី បានលាចេញពីគណបក្សសង្គ្រោះជាតិ ដើម្បីអាចឲ្យគណបក្សសង្គ្រោះជាតិ មានដង្ហើមក្នុងការបន្តគោលនយោបាយរបស់ខ្លួនសម្រាប់ការបោះឆ្នោតឃុំ-សង្កាត់ អាណត្តិទីបួនបាន។
លោក សម រង្ស៊ី បញ្ជាក់ថា តួនាទីរបស់លោកក្នុងគណបក្សនៅពេលលោកមានវត្តមាននៅកម្ពុជា មិនសំខាន់នោះទេអ្វីដែលសំខាន់ គឺគណបក្សអាចជ្រើសរើសមនុស្សម្នាក់ដែលអាចតតាំងជាមួយលោក ហ៊ុន សែន ក្នុងការប្រកួតប្រជែងតំណែងជានាយករដ្ឋមន្ត្រីបាន៖ «មិនសំខាន់ខ្ញុំ លោក កឹម សុខា ឬមួយនរណានោះទេ អោយតែគណបក្សឯកភាពគ្នាដោយមានការគាំទ្រពីប្រជារាស្ត្រថា យើងជ្រើសរើសបេក្ខជននាយករដ្ឋមន្ត្រីមួយដើម្បីតតាំងជាមួយលោក ហ៊ុន សែន»។
លោក សម រង្ស៊ី ក៏បានអំពាវនាវដល់គណបក្សតូចតាចទាំងអស់ រួមទាំងមន្ត្រីសំខាន់ៗរបស់គណបក្សប្រជាជនកម្ពុជា ផង ឲ្យចូលរួមគ្នាជាធ្លុងមួយជាមួយគណបក្សសង្គ្រោះជាតិ សំរាប់ប្រកួតប្រជែងការបោះឆ្នោត ឆ្នាំ២០១៨ ខាងមុខ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។