អនាគតមេឃុំស្រកថ្មី ស្រុកកំពង់សៀម ខេត្តកំពង់ចាម មកពីគណបក្សប្រឆាំង គឺអ្នកស្រី ស្រេង សុខឃឿន ប្រពន្ធលោក ស៊ាង ចែត បញ្ជាក់ថា នឹងបម្រើការងារជូនពលរដ្ឋឱ្យបានល្អ មិនពុករលួយ មិនរើសអើងគណបក្សនយោបាយជាដើម។ ការបញ្ជាក់ដូច្នេះ បន្ទាប់ពីលទ្ធផលបោះឆ្នោតបណ្ដោះអាសន្ននៅក្នុងឃុំនេះ គឺគណបក្សសង្គ្រោះជាតិឈ្នះ ហើយឈានទៅដឹកនាំឃុំនៅអាណត្តិទី៤នេះ។
អនាគតមេឃុំស្ត្រីថ្មី របស់គណបក្សប្រឆាំងនៅឃុំស្រក ប្រកាន់ជំហរថា នឹងខិតខំបម្រើប្រជាពលរដ្ឋឱ្យអស់ពីចិត្តពីថ្លើម។ ក្រៅពីនេះ អ្នកស្រីប្ដេជ្ញាប្រកាន់គោលការណ៍មិនពុករលួយ និងគិតគូរប្រយោជន៍ប្រជាពលរដ្ឋនៅមូលដ្ឋានជាធំ។ ការងារដែលអ្នកស្រីត្រូវដឹកនាំឃុំក្នុងការអភិវឌ្ឍ និងបម្រើពលរដ្ឋនោះ ដូចជាការងារបម្រើសេវាសាធារណៈ ការបញ្ជាក់លិខិតស្នាមផ្សេងៗ និងការដោះស្រាយវិវាទនៅក្នុងភូមិឃុំជាដើម។
និយាយដោយសម្ដីមួយៗ ទឹកមុខស្រស់ បេក្ខជនលេខរៀងទី១ មកពីគណបក្សសង្គ្រោះជាតិ និងជាអនាគតមេឃុំស្រក អ្នកស្រី ស្រេង សុខឃឿន មានប្រសាសន៍ថា អ្នកស្រីរីករាយចំពោះលទ្ធផលឆ្នោតបណ្ដោះអាសន្នកាលពីថ្ងៃទី៤ មិថុនា ដោយប្រជាពលរដ្ឋបានបោះឆ្នោតគាំទ្ររហូតទទួលបានជោគជ័យ។ អ្នកស្រីថា នឹងបំពេញការងារជាមេឃុំថ្មីឱ្យល្អប្រសើរដូចប្ដីរបស់ខ្លួន គឺលោក ស៊ាង ចែត ដែលជាអតីតមេឃុំអាណត្តិទី៣ ដោយមិនពុករលួយ មិនរើសអើង និងមិនរត់ចោលប្រជាពលរដ្ឋរបស់ខ្លួនឡើយ បើទោះបីជាមានបញ្ហាប្រឈមយ៉ាងណាក្ដី៖ «ប្ដេជ្ញាបម្រើប្រជាពលរដ្ឋគ្រប់ពេលគ្រប់ម៉ោង មិនថាថ្ងៃសៅរ៍ ឬថ្ងៃអាទិត្យ មិនថាបក្សនេះ ឬបក្សនោះ»។
អ្នកស្រី ស្រេង សុខឃឿន មានវ័យ ៤៣ឆ្នាំ រស់នៅក្នុងត្រកូលកសិករនៅភូមិល្ពាក ឃុំស្រក ស្រុកកំពង់សៀម។ កាលពីវ័យជំទង់ ដោយសារគ្រួសារមានជីវភាពលំបាក ទើបអ្នកស្រីសម្រេចបោះបង់ការសិក្សានៅថ្នាក់អនុវិទ្យាល័យ នាទសវត្សរ៍ ឆ្នាំ១៩៨០។ ក្រោយមកអ្នកស្រីបានរៀបការជាមួយលោក ស៊ាង ចែត នៅឆ្នាំ១៩៨៩ ហើយបច្ចុប្បន្នពួកគាត់មានកូនចំនួន ៥នាក់ សុទ្ធតែប្រុស។
អនាគតមេឃុំស្ត្រីរូបនេះត្រូវបានខាងគណបក្សរៀបចំដាក់ជាបេក្ខនារីលេខរៀងទី១ នៅឃុំស្រក ជំនួសស្វាមី ពីព្រោះប្ដីអ្នកស្រីត្រូវបានខកខានក្នុងការចុះឈ្មោះ និងឈរឈ្មោះបោះឆ្នោតក្រុមប្រឹក្សាឃុំ-សង្កាត់នៅអាណត្តិទី៤ ដោយសារជាប់ពន្ធនាគារ ពាក់ព័ន្ធរឿងអាស្រូវស្នេហាដែលគេសង្ស័យថា របស់ប្រធានគណបក្សសង្គ្រោះជាតិ លោក កឹម សុខា និងអ្នកនាង ខុម ចាន់តារាទី ហៅស្រីមុំ ទាក់ទិនរឿងប្រាក់ប្រមាណ ២លានរៀល បម្រុងប្រគល់ឱ្យក្រុមគ្រួសារនាង ស្រីមុំ ហើយត្រូវបានតុលាការចោទប្រកាន់ថា បានសមគំនិតសូកប៉ាន់សាក្សី។
រយៈពេលជាង ៧ខែ ដែលលោក ស៊ាង ចែត ជាប់ឃុំ អ្នកស្រី ស្រេង សុខឃឿន ត្រូវដើរតួនាទីជាប្ដីផង និងជាប្រពន្ធផងនៅក្នុងគ្រួសារ។ មិនតែប៉ុណ្ណោះ អ្នកស្រីត្រូវមើលថែឪពុកម្ដាយចាស់ៗ នៅក្នុងបន្ទុក ហើយត្រូវបែងចែកការងារដើម្បីរកចំណូលជួយគ្រួសារ និងផ្គត់ផ្គង់ប្ដីដែលជាប់គុកពេលនោះផង។
ក្រោយពេលប្ដីអ្នកស្រីត្រូវបានព្រះមហាក្សត្រព្រះរាជទានលើកលែងទោសកាលពីដើមខែធ្នូ ឆ្នាំ២០១៦ គ្រួសារគាត់បានប្រសើរឡើងវិញ ហើយលោក ស៊ាង ចែត ក៏បានចូលបម្រើការងារជូនពលរដ្ឋដូចដើមវិញដែរ។
ពលរដ្ឋនៅភូមិល្ពាក មួយរូប លោក ហែម ស៊ាងប៊ុនណារី រីករាយក្រោយពេលលទ្ធផលបោះឆ្នោតកាលពីថ្ងៃទី៤ មិថុនា នៅឃុំរបស់លោក គឺគណបក្សសង្គ្រោះជាតិឈ្នះ ហើយប្រពន្ធលោក ស៊ាង ចែត នឹងដឹកនាំជាមេឃុំនោះ។ លោកបន្តថា ការបោះឆ្នោតគឺមានសារសំខាន់ណាស់ ដើម្បីជ្រើសរើសមនុស្សដែលខ្លួនពេញចិត្តសម្រាប់ដឹកនាំមូលដ្ឋានឱ្យរីកចម្រើន និងដោះស្រាយបញ្ហាប្រឈមនានារបស់ពលរដ្ឋ៖ «នេះជាលទ្ធផលដែលពួកយើងអាចទទួលយកបាន ហើយប្រជាពលរដ្ឋច្រើនប្រហែលជាដូចខ្ញុំដែរ គឺគាត់សប្បាយចិត្តរីករាយណាស់ដែលឃើញលទ្ធផលគណបក្សសង្គ្រោះជាតិ ឈ្នះដូច្នេះ។ ការដឹកនាំរបស់គាត់កន្លងមក គឺជាលទ្ធផលប្រជាជនយើងទាំងអស់គ្នាទទួលយកបាន»។
លទ្ធផលបោះឆ្នោតបណ្ដោះអាសន្នកាលពីថ្ងៃទី៤ មិថុនា គឺគណបក្សសង្គ្រោះជាតិឈ្នះ លើគណបក្សប្រជាជនកម្ពុជា ជិត ៤០០សំឡេង ហើយពលរដ្ឋដែលមិនបានចូលរួមបោះឆ្នោតគឺមានជាង ៤០០នាក់ទៀត។
មិនខុសគ្នានេះ ពលរដ្ឋមួយរូបទៀត អ្នកស្រី កែវ ស៊ឹម បញ្ជាក់ថា គាត់បោះឆ្នោតជ្រើសរើសគណបក្សនយោបាយដែលមានមន្ត្រីចិត្តស មិនមែនចិត្តខ្មៅ ហើយអ្នកស្រីមិនខ្លាចឡើយចំពោះការគំរាមរឿងសង្គ្រាមកន្លងមក។ អ្នកស្រីចង់ឱ្យមេឃុំថ្មី ជួយអភិវឌ្ឍន៍នៅក្នុងមូលដ្ឋានឱ្យរីកចម្រើន និងជួយដោះស្រាយបញ្ហាប្រឈមមួយចំនួនផង៖ «ជួយបម្រើនៅក្នុងភូមិឃុំឱ្យបានរីកចម្រើន ដូចជាស្រូវអង្ករឱ្យបានឡើងថ្លៃ ហើយសាំងជីឱ្យចុះថ្លៃ»។
ឃុំស្រក មានភូមិចំនួន៤ មានពលរដ្ឋជាង ៧ពាន់នាក់ គិតជាគ្រួសារប្រមាណ ២ពាន់គ្រួសារ។ ប្រជាពលរដ្ឋនៅឃុំនេះ ស្ទើរតែទាំងអស់ជាកសិករ ធ្វើស្រែនិងចម្ការ។
ប្ដីអ្នកស្រី ស្រេង សុខឃឿន គឺលោក ស៊ាង ចែត មានប្រសាសន៍ថា លោកនឹងជួយសហការពន្យល់កិច្ចការដល់ប្រពន្ធទាំងផ្លូវច្បាប់ និងបច្ចេកទេសចំពោះការងាររដ្ឋបាលមួយចំនួន។ លោក ស៊ាង ចែត ក៏មានក្តីបារម្ភខ្លះដែរ ពីព្រោះប្រពន្ធលោកនៅមិនទាន់មានបទពិសោធន៍គ្រប់គ្រាន់លើការងារទាំងនោះ ហើយក៏មិនទាន់យល់ដឹងពីនីតិវិធីរដ្ឋបាលគ្រប់គ្រងឃុំរបស់ខ្លួនឡើយ។ យ៉ាងនេះក្តី លោកសង្ឃឹមថា ប្រពន្ធរបស់លោកនឹងបំពេញការងារជូនពលរដ្ឋបានល្អ ប្រសិនបើមានការចូលរួមសហការពីសំណាក់សមាជិកក្រុមប្រឹក្សាឃុំទាំងអស់៖ «ខ្ញុំនឹងជួយបង្រៀនគាត់ទៅនឹងបញ្ហាផ្លូវច្បាប់ ប្រសិនបើករណីណាដែលគាត់នឹងមកពិភាក្សាគ្នាអីហ្នឹង គេមិនទាន់ឱ្យគាត់ស៊ីញ៉េ ឬក្រុមប្រឹក្សាឃុំមិនទាន់អី ពិភាក្សាគ្នាទៅឱ្យរលូនទៅ ខ្ញុំគិតថា គាត់ធ្វើបានល្អហើយ»។
កាលពីពេលបោះឆ្នោតក្រុមប្រឹក្សាឃុំអាណត្តិទី៣ ឆ្នាំ២០១២ ក្នុងចំណោមឃុំចំនួន ១៥ នៅស្រុកកំពង់សៀម គឺគណបក្សប្រជាជនកម្ពុជា ឈ្នះដឹកនាំឃុំចំនួន ១៤ឃុំ ហើយគណបក្ស សម រង្ស៊ី ពេលនោះឈ្នះបានតែឃុំស្រក មួយប៉ុណ្ណោះ។
ចំណែកការបោះឆ្នោតក្រុមប្រឹក្សាឃុំអាណត្តិទី៤ វិញ គឺគណបក្សសង្គ្រោះជាតិ ឈ្នះការបោះឆ្នោតនឹងដឹកនាំឃុំបានចំនួន៩ ហើយគណបក្សកាន់អំណាចឈ្នះបានចំនួន ៥ឃុំប៉ុណ្ណោះ។
លេខាធិការប្រតិបត្តិគណបក្សសង្គ្រោះជាតិ ខេត្តកំពង់ចាម លោក ថាន សុរិទ្ធ អះអាងថា ខាងគណបក្សនឹងជួយជ្រោមជ្រែងការងារ និងណែនាំដល់មន្ត្រីឃុំរបស់ខ្លួនដែលជាប់ឆ្នោតដឹកនាំឃុំថ្មី ដើម្បីការអភិវឌ្ឍនៅក្នុងមូលដ្ឋានរបស់ពួកគាត់ឱ្យរីកចម្រើន៖ «ជាធម្មតាគោលការណ៍របស់គណបក្សគឺយើងមានរួចទៅហើយ គាំទ្រមេឃុំ មិនថាជាស្ត្រី ឬបុរសទេ។ ប៉ុន្តែសំដៅសំខាន់បំផុតគឺស្ត្រីហ្នឹង»។
លោកបញ្ជាក់ថា ប្រសិនបើលោក ស៊ាង ចែត នៅតែមានបំណងចង់ដឹកនាំឃុំនៅថ្នាក់មូលដ្ឋានរបស់ខ្លួនខាងគណបក្សនឹងរៀបចំបញ្ជីថ្មី ដើម្បីដាក់បញ្ចូលគាត់វិញ នៅពេលដែលលោក ស៊ាង ចែត មានឈ្មោះក្នុងបញ្ជីបោះឆ្នោតជាផ្លូវការ។ ប៉ុន្តែប្រសិនបើគាត់គិតថា ប្រពន្ធអាចដឹកនាំ ឬធ្វើការងារឃុំបាន លោក ស៊ាង ចែត ក៏អាចសម្រេចរកតំណែងថ្មីនៅក្នុងគណបក្ស ហើយគណបក្សនឹងសម្រេចតាមការយល់ឃើញរបស់គាត់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។