ជំទប់ទី២មកពីគណបក្ស សម រង្ស៊ី ឃុំច្រេស ស្រុកចន្ទ្រា ខេត្តស្វាយរៀង កំពុងមានការព្រួយបារម្ភពីសំឡេងសន្លឹកឆ្នោតរបស់ខ្លួន ខ្លាចបាត់សិទ្ធិមិនបានទៅបោះឆ្នោតជ្រើសរើសក្រុមប្រឹក្សាស្រុក ដែលប្រព្រឹត្តទៅនៅខែឧសភា ខាងមុខ។
ក្ដីបារម្ភនេះ ដោយសារសំណុំរឿងរបស់ជំទប់ទី២ ដែលជាប់សង្ស័យលើករណីបាត់ដែកមណ្ឌលសុខភាព ជាង ១០សរសៃ ត្រូវបញ្ជូនដល់តុលាការ។ ប៉ុន្តែ អធិការស្រុកបញ្ជាក់ថា ការបញ្ជូនសំណុំរឿងរបស់ជំទប់ទី២ដល់តុលាការ ពុំមានការពាក់ព័ន្ធផ្នែកនយោបាយនោះទេ។
ជំទប់ទី២មកពីគណបក្ស សម រង្ស៊ី ចាត់ទុកថា សំណុំរឿងប្ដឹងលោកនោះហាក់មានភាពអយុត្តិធម៌ និងមួលបង្កាច់ ដោយសារសម្លឹងឃើញលោកជាមន្ត្រីរបស់គណបក្សប្រឆាំងមួយរូប ដែលមានសិទ្ធិក្នុងការបោះឆ្នោតជ្រើសរើសក្រុមប្រឹក្សាស្រុកនាពេលខាងមុខ។
ជំទប់ទី២ឃុំច្រេស លោក ឯក សារិន ថ្លែងបញ្ជាក់នៅថ្ងៃទី១៩ មីនា ដោយចាត់ទុកការចោទប្រកាន់មកលើរូបលោក ថាជាជនសង្ស័យពាក់ព័ន្ធករណីបាត់ដែកទំហំ ១៦លី ប្រមាណជាង ១០សរសៃ ដែលដោះស្រាយមិនចេញ ហើយបញ្ជូនសំណុំរឿងទៅដល់តុលាការថាជារឿងនយោបាយ។
លោក ឯក សារិន បញ្ជាក់ថា លោកគ្មានគោលបំណងយកដែកដែលបាត់នោះមកធ្វើជាសម្បត្តិផ្ទាល់ខ្លួនដូចការចោទប្រកាន់ឡើយ៖ «បាទ! ក្រែងលោគេធ្វើមិនឲ្យយើងបោះឆ្នោតបានថ្ងៃខាងមុខហ្នឹង ហើយឬក៏គេឲ្យតុលាការអី។ អានេះវាអំណាចលើគេ ដើម្បីឲ្យតុលាការរកឃើញកំហុសខុសឆ្គងឲ្យយើងជាប់ពន្ធនាគារអី ឬក៏ដល់ពេលជិតថ្ងៃបោះឆ្នោត គេហៅយើងឃុំអីនាយអាយ ឲ្យយើងបោះឆ្នោតមិនបាន។ វាបាត់មួយសំឡេងៗគឺវាមួយកៅអីហើយ»។
ឆ្លើយតបនឹងបញ្ហានេះ អធិការស្រុកចន្ទ្រា លោក សូរ ស៊ីថន មានប្រសាសន៍ថា សំណុំរឿងរបស់ជំទប់ទី២នេះ ពុំមានការពាក់ព័ន្ធនឹងរឿងផ្នែកនយោបាយនោះទេ។ ហើយការបញ្ជូនសំណុំរឿងទៅតុលាការ ធ្វើឡើងដោយផ្អែកទៅលើវត្ថុតាង មានដែកទំហំ ១៦លីមួយសរសៃ និងបំពង់ទីប ២ដើម ដែលសមត្ថកិច្ចប្រទះឃើញនៅខាងក្រោយផ្ទះរបស់ជនសង្ស័យ។
លោកថា ជំទប់ទី២ដែលជាជនសង្ស័យ បានឆ្លើយបដិសេធពុំទទួលយកតាមការចោទប្រកាន់ ទើបសម្រេចចិត្តបញ្ជូនសំណុំរឿងនេះទៅតុលាការ ដើម្បីដោះស្រាយតាមផ្លូវច្បាប់៖ «បាទ! ចេះរឿងគាត់ហ្នឹង គាត់បដិសេធថាគាត់អត់បានប្រព្រឹត្ត ប៉ុន្តែដល់សម្ភារៈដែលយើងរកឃើញនៅក្នុងរបងរបស់គាត់។ ដល់មានអាស្នាមអីអូសកាត់អូសអីហ្នឹង គឺកាត់ផ្ទះគាត់ហ្នឹងតែហ្មងបាទ! ដល់ទៅ គាត់ថាមិនបានប្រព្រឹត្តទេ។ ដល់អ៊ីចឹង រឿងអត់ចប់ បញ្ជូនឡើងមកស្នងការមក ស្នងការក៏គាត់បញ្ជូនឡើងមកតុលាការទៀត។ ខ្ញុំអត់ដឹងដែរ ព្រោះអីខ្ញុំបញ្ជូនបានត្រឹមតែស្នងការ ការិយាល័យជំនាញគេបាទ!»។
ទាក់ទងបញ្ហានេះ មន្ត្រីសម្របសម្រួលអង្គការលីកាដូ (Licadho) ប្រចាំខេត្តស្វាយរៀង ដែលជាអ្នកតាមដានលើសំណុំរឿងនេះ លោក នុត ប៊ូពិណារ័ត្ន មានប្រសាសន៍បញ្ជាក់ថា ការចោទប្រកាន់របស់អាជ្ញាធរមកលើជំទប់ទី២ ថាជារឿងមិនត្រឹមត្រូវឡើយ ព្រោះបញ្ហានេះបើជាជនសង្ស័យមែននោះ គេមិនអាចយកដែកទៅដាក់នៅលើដីរបស់ខ្លួនឲ្យគេឃើញបានឡើយ។
លោក នុត ប៊ូពិណារ័ត្ន គូសបញ្ជាក់ថា បញ្ហានេះ គឺជារឿងនយោបាយទៅវិញទេ ព្រោះជនសង្ស័យជាជំទប់ទី២ ដែលជាសំឡេងឆ្នោតរបស់គណបក្សប្រឆាំង៖ «មិនមានចំណុចណាមួយបញ្ជាក់ថា ឯក សារិន គាត់អ្នកយកដែកហ្នឹងទៅទុកនៅភូមិក្រោយភូមិគាត់អ៊ីចឹងសោះ។ បើគាត់មានមែនក៏គាត់មិនដែលទៅទុកនឹងផ្ទះភូមិខ្លួនឯងអ៊ីចឹងទេណាស់! ហើយយើងពិនិត្យជាក់ស្ដែង ខ្ញុំថានេះជាមួយពាក់ព័ន្ធរឿងនិន្នាការនយោបាយ ពាក់ព័ន្ធការរើសអើងនយោបាយ។ ប្រសិនជា លោក ឯក សារិន ហ្នឹងមិនមែនជាក្រុមប្រឹក្សាឃុំរបស់កូតាគណបក្ស សម រង្ស៊ី ទេ ខ្ញុំថារឿងនេះក៏មិនមានការចោទប្រកាន់រហូតមកដល់ពេលនេះដែរ»។
ដែកទំហំ ១៦លីចំនួនជាង ១០សរសៃ និងគ្រឿងសំណង់ សម្រាប់សាងសង់មណ្ឌលសុខភាពឃុំច្រេស ស្រុកចន្ទ្រា ត្រូវចោរលួចកាលពីខែតុលា ឆ្នាំ២០១៣។ ក្នុងនោះ ដែកមួយចំនួនត្រូវអាជ្ញាធរប្រទះឃើញនៅខាងក្រោយផ្ទះរបស់ជំទប់ទី២។ ក្រោយមក ជំទប់ទី២ ត្រូវបានអាជ្ញាធរប៉ូលិសកោះហៅទៅសាកសួរ និងទម្លាក់ការចោទប្រកាន់ថា ជាជនសង្ស័យក្នុងសំណុំរឿងនេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។