លោកនាយករដ្ឋមន្ត្រី ហ៊ុន សែន គ្រោងនឹងជួបជាមួយអ្នកសារព័ត៌មានជាង ១.០០០នាក់ នៅរសៀលថ្ងៃសៅរ៍ ទី១៤ ខែមករា ក្នុងគោលបំណងបានស្គាល់ ស្ដាប់ និងចែករំលែកបទពិសោធន៍រវាងអ្នកសារព័ត៌មាន និងរដ្ឋាភិបាល។ បើទោះយ៉ាងនេះក្ដី ចំពោះសារព័ត៌មានមួយចំនួនដែលរដ្ឋាភិបាលចាត់ទុកថា មិនរណបខ្លួននោះ មិនត្រូវបានអញ្ជើញឲ្យចូលរួមទេ ក្រោមហេតុផលថា មិនបានស្នើសុំ និងហេតុផលផ្សេងទៀត។
នេះជាព្រឹត្តិការណ៍ប្រវត្តិសាស្ត្ររវាងនាយករដ្ឋមន្ត្រី និងអ្នកសារព័ត៌មាន តាំងពីលោក ហ៊ុន សែន ឡើងកាន់តំណែងជាប្រមុខរដ្ឋាភិបាលកម្ពុជា អស់ជាង ៣ទសវត្សមកហើយ។
លោក ផុស សុវណ្ណ អគ្គនាយកនៃនាយកដ្ឋានព័ត៌មាន និងសោតទស្សន៍នៃក្រសួងព័ត៌មាន មានប្រសាសន៍ថា អ្នកសារព័ត៌មាន មន្ត្រីព័ត៌មាន ក៏ដូចជាមន្ត្រីនាំពាក្យជាង ១.០០០នាក់ គ្រោងនឹងចូលរួមក្នុងជំនួបនោះ នៅសណ្ឋាគារសុខា ក្រុងភ្នំពេញ។ លោកបន្តថា ជំនួបដ៏ធំនេះ ធ្វើឡើងក្នុងគោលបំណងស្វែងយល់ពីគ្នាអោយបានស៊ីជម្រៅរវាងអ្នកសារព័ត៌មាន និងអ្នកនាំពាក្យ ជាមួយរដ្ឋាភិបាលទាំងមូល ដោយជៀសវាងការសាចទឹកដាក់គ្នា ឬការលើកឡើងថា អ្នកសារព័ត៌មានពិបាកក្នុងការទទួលព័ត៌មានពីខាងរដ្ឋាភិបាល៖ «ចែករំលែកបទពិសោធន៍អោយគ្នាទៅវិញទៅមក ថាអ្នកសារព័ត៌មានចង់បានអី យើងចង់បានអី ហើយអ្នកនាំពាក្យគាត់ចង់បានអីពីអ្នកសារព័ត៌មានវិញ ធ្វើម៉េចប្រាស្រ័យទាក់ទងគ្នា អោយឈប់មានការខ្លាចរអានឹងគ្នា អោយឆ្លើយឆ្លង ផ្ដល់ព័ត៌មានគ្នាទៅវិញទៅមកជាមួយគ្នា»។
នៅក្នុងជំនួបដ៏កម្រនេះ ត្រូវបានលោក ផុស សុវណ្ណ អះអាងថា រដ្ឋាភិបាលរំពឹងទុកថា នឹងរៀបចំកម្មវិធីជំនួបបែបនេះជារៀងរាល់មួយឆ្នាំម្ដង ចាប់ពីឆ្នាំ២០១៧ នេះតទៅ។
និពន្ធនាយកនៃវិទ្យុវាយោ កញ្ញា យ៉ាន់ លីណា ដែលជាអ្នកចូលរួមម្នាក់ក្នុងជំនួបនៅថ្ងៃ១៤ ខែមករា បានអោយដឹងថា នេះជារឿងមួយល្អសម្រាប់ការផ្ដល់ឱកាសដល់អ្នកសារព័ត៌មាន និងប្រមុខរដ្ឋាភិបាលបានជួបជជែកគ្នា ប៉ុន្តែវាក៏មិនមែនជារឿងចម្លែកនោះដែរ ព្រោះបណ្ដាប្រទេសជាច្រើនក៏បានធ្វើបែបនេះរួចមកហើយ គឺគ្រាន់តែវាថ្មីថ្មោងសម្រាប់កម្ពុជា ប៉ុណ្ណោះ។
កញ្ញា យ៉ាន់ លីណា សង្ឃឹមថា បើអាចនាងនឹងស្នើលោកនាយករដ្ឋមន្ត្រី ហ៊ុន សែន អោយពិចារណាពីការផ្ដល់ឱកាសសម្រាប់អ្នកសារព័ត៌មានក្នុងការណាត់សម្ភាសន៍ជាបុគ្គល ពីបញ្ហាជីវិតឯកជនរបស់លោក ឬក៏ថា តើលោក ហ៊ុន សែន ធ្លាប់គិតថា លោកនឹងលាលែងពីតំណែងនាយករដ្ឋមន្ត្រីប៉ុន្មានដងដែរ តាំងពីឡើងកាន់អំណាចជាង ៣០ឆ្នាំមកនេះ៖ «នៅក្នុងកាលៈទេសៈមួយដែលខ្ញុំអាចនឹងមានឱកាស ខ្ញុំនឹងមិនយកពេលហ្នឹងទៅសួសំណួរទៅកាន់គាត់ទេ ក៏ប៉ុន្តែខ្ញុំនឹងសុំអោយលោកពិចារណាទៅលើការបើកអោយមានកិច្ចសម្ភាសន៍ផ្ទាល់ជាមួយនាយករដ្ឋមន្ត្រីពីការងារ ក៏ដូចជាជីវិតឯកជន ជាពិសេសនៅពេលដែលលោកមានងារជានាយករដ្ឋមន្ត្រី តើពិបាកអ្វីខ្លះដែលលោកបានជួប»។
យ៉ាងណាមិញ បើទោះបីជាមានការអះអាងពីអគ្គនាយកនៃនាយកដ្ឋានព័ត៌មាន និងសោតទស្សន៍ លោក ផុស សុវណ្ណ ថា អ្នកសារព័ត៌មានស្ទើរតែគ្រប់ស្ថាប័នត្រូវបានអញ្ជើញអោយចូលរួម ប៉ុន្តែសារព័ត៌មានមួយចំនួនដែលរិះគន់រដ្ឋាភិបាលមិនត្រូវបានអញ្ជើញអោយចូលរួមនោះទេ ដូចជាវិទ្យុសំឡេងប្រជាធិបតេយ្យ (VOD) វិទ្យុសំឡេងសហរដ្ឋអាមេរិក (VOA) និងវិទ្យុអាស៊ីសេរី (RFA) ជាដើម។
នាយកប្រតិបត្តិមជ្ឈមណ្ឌលកម្ពុជា ដើម្បីប្រព័ន្ធផ្សព្វផ្សាយឯករាជ្យ (CCIM) និងជានិពន្ធនាយកនៃវិទ្យុសំឡេងប្រជាធិបតេយ្យ លោក ប៉ា ងួនទៀង បានលើកឡើងថា ប្រសិនបើលោកនាយករដ្ឋមន្ត្រីពិតជាចង់ដឹងពីវិស័យសារព័ត៌មានមែននោះ គឺគួរតែអនុញ្ញាតអោយមានការចូលរួមចម្រុះពីគ្រប់ស្ថាប័ន ជាជាងជួបតែអ្នកគាំទ្រ ព្រោះនេះអាចនឹងបង្ហាញរូបភាពថា លោក ហ៊ុន សែន មិនដើរតួនាទីជានាយករដ្ឋមន្ត្រីសម្រាប់កម្ពុជា ទេ តែគ្រាន់តែសម្រាប់ក្រុម ឬបក្សរបស់លោកប៉ុណ្ណោះ៖ «ជួបពិភាក្សាពីវិស័យសារព័ត៌មាន យើងគួរបើកចំហ ជួបជាទូទៅគ្រប់ក្រុម ដើម្បីដឹងព័ត៌មានចម្រុះ ដឹងទស្សនចម្រុះ ជាជាងជួបតែអ្នកគាំទ្រស្រាប់ អាហ្នឹងវាអត់មានអីចំណេញទេ វាបង្ហាញនូវរូបភាពមួយថា គាត់អត់ធ្វើនាយករដ្ឋមន្ត្រីសម្រាប់មនុស្សគ្រប់ក្រុមនៅក្នុងសង្គមទេ»។
ជុំវិញជំនួបរវាងអ្នកសារព័ត៌មាន និងនាយករដ្ឋមន្ត្រីនេះ លោក ប៉ា ងួនទៀង រំពឹងថា បើលោកមានឱកាសជួបនឹងលោកនាយករដ្ឋមន្ត្រី លោកនឹងស្នើអោយលោក ហ៊ុន សែន ធានាពីសេរីភាព និងសុវត្ថិភាពរបស់អ្នកសារព័ត៌មាននៅកម្ពុជា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។