កិច្ចប្រជុំរបស់គណៈកម្មការប្រឹក្សាការងារ ដែលមានត្រីភាគីចូលរួម មកពីខាងរដ្ឋាភិបាល សហជីពតំណាងថៅកែរោងចក្រ សហជីពតំណាងកម្មករនិយោជិក និងសហជីពដែលអះអាងថាស្វែងរកផលប្រយោជន៍ជូនកម្មករ ស្ដីពីប្រាក់ឈ្នួលអប្បបរមា លើវិស័យវាយនភណ្ឌរោងចក្រកាត់ដេរ បន្តខ្វែងគំនិតគ្នា។
ខាងស្ថាប័នជំនាញរបស់រដ្ឋាភិបាល និង សហជីពដែលមានទំនោរគាំទ្ររដ្ឋាភិបាល ដែលតំណាងឲ្យកម្មករ និង តំណាងឲ្យនិយោជកសម្រេចយកខែ មករា ឆ្នាំ២០១៥ ជាថ្ងៃចូលជាធរមាន នៃការកំណត់ប្រាក់ឈ្នួលឲ្យកម្មករនិយោជិក។ ប៉ុន្តែសហជីពដែលសកម្មក្នុងការតវ៉ា រឿងប្រាក់ឈ្នួលរបស់កម្មករវិញ ជំទាស់លើសេចក្ដីសម្រេចនេះ។
ក្រោយពីកិច្ចប្រជុំបានបិទបញ្ចប់ នៅព្រឹកថ្ងៃទី ៣០ មិថុនា ភាគីទាំងពីរដែលម្ខាងគាំទ្រ ជំហររដ្ឋាភិបាល ដែលស្របទៅនិងស្មារតីរដ្ឋាភិបាលដែរនោះ បានសម្រេចកំណត់ប្រាក់ខែគោល ក្នុងវិស័យកាត់ដេរ យកថ្ងៃទី១ ដើមឆ្នាំ២០១៥ ក្នុងការអនុវត្តដំឡើងប្រាក់ខែគោល ចំណែកម្ខាងទៀតតែងអះអាងថា គាំទ្រផលប្រយោជន៍ឲ្យភាគីកម្មករវិញ ចាត់ទុកថា វាជាការមិនអាចទទួលយកបានឡើយ ដែលបញ្ហាដ៏ចម្រូងចម្រាស ក្នុងឆ្នាំ២០១៤ មិនទាន់ត្រូវបានបិទបញ្ចប់ និង មិនទាន់ទាំងបានដោះស្រាយអស់ផង បែរជាត្រូវលើកយកបញ្ហាដ៏ស្មុគស្មាញទាំងនេះ ពន្យារដល់ឆ្នាំ២០១៥ទៅវិញនោះ។
ភាគីទាំងសង្ខាង បានផ្ដល់បទសម្ភាសន៍មុនក្រោយគ្នាម្នាក់ម្ដង បន្ទាប់ពីកិច្ចប្រជុំបិទទ្វារ បានបិទបញ្ចប់នៅទីស្ដីការក្រសួងការងារ និងបណ្ដុះបណ្ដាលវិជ្ជាជីវៈ នាព្រឹកថ្ងៃទី ៣០ មិថុនា។
លោក អាត់ ធន់ ប្រធានសម្ព័ន្ធសហជីពប្រជាធិបតេយ្យកម្មករកាត់ដេរកម្ពុជា ហៅកាត់ថា ស៊ីខាវឌូ ( CCAWDU) ដែលជាសមាជិកនៃគណៈកម្មការប្រឹក្សាការងារដែរនោះ ឲ្យដឹងក្រោយកិច្ចប្រជុំថា វាមិនគួរលើកយកបញ្ហាដ៏សំខាន់ រឿងប្រាក់ខែរបស់កម្មករនេះ ទៅដោះស្រាយនៅឆ្នាំ២០១៥ទៅវិញ។លោកចាត់ទុកថា ការពិតភាពចម្រូងចម្រាស ដែលកើតឡើងតាំងពីដើមឆ្នាំ ២០១៤ រឿងប្រាក់ខែនេះ គណៈកម្មការប្រឹក្សាការងារ គប្បីដោះស្រាយបញ្ចប់ឲ្យហើយ ក្នុងឆ្នាំនេះតែម្ដង មិនគួរលើកពេលទៅឆ្នាំក្រោយឡើយ។ចំណែក កិច្ចការឆ្នាំ២០១៥ គួរចាំភារកិច្ចថ្មីវិញល្អជាជាង៖ « នៅក្នុងលទ្ធផលសម្រេចនេះ ខ្ញុំគិតថាសម្រាប់ឆ្នាំ២០១៥ទៅគឺយើងអត់បញ្ហាទេ។ ប៉ុន្តែយើងចង់ឲ្យមានការជជែកនៅឆ្នាំ២០១៤នេះ ដើម្បីបញ្ចប់រឿង » ។
ក្រោយពីកិច្ចប្រជុំ លើកទីមួយរបស់គណៈកម្មការប្រឹក្សាការងារ កាលពីថ្ងៃទី ១៦ មិថុនា រកសំឡេងឯកច្ឆន្ទ មិនបានសម្រេចនោះ ទើបកិច្ចប្រជុំជាថ្មីទៀតនៅពេលនេះ ភាគីទាំងអស់សម្រេចបោះឆ្នោតសម្ងាត់វិញម្ដង។ក្រុមប្រឹក្សាការងារមានសមាជិក ២៨ នាក់ ប៉ុន្តែ អវត្តមាន ៥ នាក់កិច្ចប្រជុំលើកនេះ។ ជាលទ្ធផលលើកនេះអ្នកបោះឆ្នោតមាន២៣ នាក់ ហើយលទ្ធផល គឺ២០ សំឡេងគាំទ្រ កំណត់កាលបរិច្ឆេទ យកថ្ងៃទី ១ ខែ មករា ឆ្នាំ២០១៥ ជាថ្ងៃកំណត់ប្រាក់ឈ្នួលកម្មករនិយោជិក។ ចំណែក ៣សំឡេងប្រឆាំង ការអូសបន្លាយទុកដោះស្រាយដល់ដើមឆ្នាំ២០១៥។
លោក អ៊ិត សំហេង រដ្ឋមន្ត្រីក្រសួងការងារ និង បណ្ដុះបណ្ដាលវិជ្ជាជីវៈ ឲ្យដឹងក្រោយកិច្ចប្រជុំបិទបញ្ចប់ថា ថ្វីបើបរិយាការនៃកិច្ចប្រជុំបិទទ្វារ មានពេលខ្លះភាគីទាំងសង្ខាងការពារជំហររៀងៗខ្លួន តែជារួមកិច្ចប្រជុំនេះ បានសម្រេចតាមទិសដៅ ក្នុងផលប្រយោជន៍រួម៖ « ធម្មតាទេគឺជជែកគ្នា វាមានលក្ខណៈស្ថាបនា។ធម្មតាជំហរភាគីមួយៗការពារផលប្រយោជន៍ ការពារជំហររៀងខ្លួន។ជជែកទៅក៏វាមានការតឹងតែងខ្លះ ក៏មានការធូរស្រាលខ្លះ។ជារឿងធម្មតាហើយគឺនៅក្នុងប្រពៃណីគឺនៅក្នុងការប្រជុំរបស់គណៈកម្មការប្រឹក្សាការងារ » ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។