សាលារាជធានីភ្នំពេញ នៅរសៀលថ្ងៃទី១ មិថុនា បានយល់ព្រមឲ្យគណបក្សសង្គ្រោះជាតិ ហែក្បួនឃោសនារកសំឡេងឆ្នោតថ្ងៃចុងក្រោយ នៅថ្ងៃទី២ មិថុនា។ ការព្រមព្រៀងគ្នានេះ គឺផ្អែកលើគម្រោងតម្រាយផ្លូវថ្មីរបស់គណបក្សសង្គ្រោះជាតិ។
មន្ត្រីគណបក្សសង្គ្រោះជាតិ ឲ្យដឹងថា កិច្ចប្រជុំជាមួយមន្ត្រីសាលារាជធានីភ្នំពេញ និងមន្ត្រីគណៈកម្មការរៀបចំការបោះឆ្នោតគ្រប់ខណ្ឌនៃរាជធានីភ្នំពេញ បានព្រមព្រៀងគ្នាលើចំណុច៣ គឺទី១ ព្រមលើទីតាំងជួបជុំគ្នានៅវត្តពោធិយារាម ហៅវត្តចាស់ សង្កាត់ជ្រោយចង្វារ ទី២ លើតម្រាយផ្លូវសម្រាប់ហែក្បួន និងទី៣ លើការការពារសន្តិសុខសុវត្ថិភាពតាមដងផ្លូវដែលនឹងត្រូវហែក្បួន។
ប្រធានក្រុមការងារគណបក្សសង្គ្រោះជាតិ ប្រចាំរាជធានីភ្នំពេញ លោក ហូរ វ៉ាន់ បញ្ជាក់បន្ថែមថា ការព្រមព្រៀងគ្នានេះ នឹងធ្វើឲ្យកម្មវិធីជួបជុំ និងការហែក្បួនគណបក្សលោក ពេញលេញតាមផ្លូវច្បាប់៖ « ពីម៉ោង ៧ព្រឹករហូតដល់ម៉ោង ២រសៀល គឺយើងនៅជួបជុំគ្នា មានប្រគំភ្លេង មានបទអន្តរាគមន៍ មានវាគ្មិនជាច្រើនសំខាន់ៗ មានលោកប្រធានគណបក្សសង្គ្រោះជាតិ កឹម សុខា ចូលរួមដែរ នៅវត្តចាស់។ ម៉ោង ២ យើងនឹងចេញហែក្បួនតាមតម្រាយផ្លូវដែលយើងជម្រាបអម្បាញ់មិញ។ នេះជាកម្មវិធីដែលប្រជុំនេះមាន ៣ចំណុច ដូចខ្ញុំបានជម្រាប។ ក្បួនដែលជួបជុំហ្នឹង គឺត្រូវឲ្យមូលគ្នាត្រឹមម៉ោង ៩ព្រឹក ព្រោះកាលណាលើសម៉ោង ៩ ក្បួនគណបក្សប្រជាជន អាចនឹងបិទផ្លូវមួយចំនួន ហើយឲ្យពួកយើងពិបាកចូល » ។
លោកបញ្ជាក់ថា ការហែក្បួន គឺចាប់ពីទីតាំងជួបជុំនៅមុខវត្តពោធិយារាម ហៅវត្តចាស់ កាត់តាមអង់តែនទួលគោក ផ្លូវ២៧១ ទួលទំពូង ហើយនឹងទៅបញ្ចប់នៅផ្លូវ៦០ម៉ែត្រក្នុងសង្កាត់ចាក់អង្រែលើ ដែលឋិតនៅមិនឆ្ងាយប៉ុន្មានពីទីស្នាក់ការគណបក្សនេះ។
កិច្ចប្រជុំរវាងមន្ត្រីគណបក្សសង្គ្រោះជាតិ និងអភិបាលរងសាលារាជធានីភ្នំពេញ រួមទាំងមន្ត្រីគណៈកម្មការរៀបចំការបោះឆ្នោតគ្រប់ខណ្ឌនៃរាជធានីភ្នំពេញ នៅរសៀលថ្ងៃទី១ មិថុនា គឺជាកិច្ចប្រឹងប្រែងដើម្បីបញ្ចៀសការប្រឈមមុខគ្នារវាងគណបក្សសង្គ្រោះជាតិ និងគណបក្សប្រជាជនកម្ពុជា និងកាត់បន្ថយការកកស្ទះចរាចរណ៍របស់ពលរដ្ឋនៅផ្លូវព្រះមុនីវង្ស។ ហេតុផលនេះ ធ្វើឲ្យគណបក្សសង្គ្រោះជាតិ លះបង់ការប្រើប្រាស់ទីលានប្រជាធិបតេយ្យ និងផ្លូវព្រះមុនីវង្ស ពីតម្រាយផ្លូវដើមរបស់ខ្លួន។
មន្ត្រីនាំពាក្យសាលារាជធានីភ្នំពេញ លោក ម៉េត មាសភក្ដី បញ្ជាក់ថា ភាគីមន្ត្រីសាលារាជធានីភ្នំពេញ និងមន្ត្រីគណបក្សសង្គ្រោះជាតិ ពិតជាបានព្រមព្រៀងគ្នាលើចំណុចទាំង៣ ដែលលោក ហូរ វ៉ាន់ លើកឡើង។ លោកឲ្យដឹងដែរថា ថ្ងៃបិទយុទ្ធនាការឃោសនាចុងក្រោយនៅថ្ងៃទី២ មិថុនា មានតែគណបក្សពីរទេ ដែលហែក្បួនធំនៅរាជធានីភ្នំពេញ៖ « យើងមានតែគណបក្សធំពីរ គឺគណបក្សសង្គ្រោះជាតិ ហើយនិងគណបក្សប្រជាជនកម្ពុជា។ ក្រៅពីហ្នឹងអត់មានគណបក្សណាដាក់ការហែក្បួនធំអ៊ីចឹងទេ » ។
គណបក្សប្រជាជនកម្ពុជា បានប្រកាសថា នៅថ្ងៃបិទយុទ្ធនាការឃោសនាចុងក្រោយ គឺថ្ងៃទី២ មិថុនា គណបក្សប្រជាជនកម្ពុជា នឹងហែក្បួនឃោសនាធំ ដែលមានមនុស្សជាង ១៥ម៉ឺននាក់ចូលរួម។ ក្បួនហែធំនេះ នឹងចាប់ផ្ដើមពីផ្លូវ៦០ម៉ែត្រទាំងមូល ក្បាលក្បួននៅក្នុងសង្កាត់ចាក់អង្រែលើ កាត់តាមផ្លូវព្រះមុនីវង្ស ឡើងទៅផ្លូវអង់តែនទួលគោក បន្តរហូតទៅរង្វង់មូលចោមចៅ ដែលជាចំណុចរំសាយ។ ក្បួនធំរបស់គណបក្សប្រជាជនកម្ពុជា នឹងដឹកនាំដោយលោកនាយករដ្ឋមន្ត្រី ហ៊ុន សែន ដែលជាប្រធានគណបក្សប្រជាជនកម្ពុជា។
ដើម្បីចៀសវាងការប៉ះទង្គិចគ្នា លោក ហូរ វ៉ាន់ អំពាវនាវដល់អ្នកចូលរួមហែក្បួនគណបក្សលោក កុំឲ្យបង្កហេតុសូម្បីការតបតពាក្យសម្ដី៖ « ផ្ទៃក្នុងក្បួនគណបក្សសង្គ្រោះជាតិ ទទួលខុសត្រូវក្បួនរបស់យើង។ បើអ្នកណាមកឆ្វេចឆ្វាច ឬមិនត្រឹមត្រូវក្នុងក្បួនរបស់យើង គឺយើងមានសិទ្ធិអន្តរាគមន៍ទៅកម្លាំងប្រដាប់អាវុធដើម្បីដកចេញ។ ទីពីរ ចំពោះបាតុភាពខាងក្រៅក្បួន អាជ្ញាធររាជធានីភ្នំពេញ គឺជាអ្នកទទួលខុសត្រូវ ហើយរាល់មានបាតុភាពជួបជាមួយក្បួនបក្សដទៃ ត្រូវឲ្យមានអត់ធ្មត់គ្នាទៅវិញទៅមក។ កុំស្រែកជេរគ្នា កុំចាក់ភ្លេងឲ្យកាន់តែឮ ដើម្បីឲ្យប៉ះទង្គិចគ្នា។ គឺយើងបន្ថយសំឡេង ហើយកុំដៀមដាមគ្នា គឺប្រកាន់នូវអហិង្សា។ នេះដែលយើងឯកភាពគ្នាប៉ុណ្ណេះ ដើម្បីឲ្យក្បួនរបស់យើងប្រព្រឹត្តទៅដោយរលូន » ។
ការហែក្បួនទ្រង់ទ្រាយធំរបស់គណបក្សសង្គ្រោះជាតិ ដែលដឹកនាំដោយលោក កឹម សុខា ត្រូវបានគណបក្សសង្គ្រោះជាតិ ប្រកាសថានឹងមានអ្នកចូលរួម ៥ម៉ឺននាក់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។