ថ្នាក់ដឹកនាំសហជីព អំពាវនាវឲ្យកម្មករ កម្មការិនីដែលមានសិទ្ធិ និងគ្រប់អាយុបោះឆ្នោតទាំងអស់ ត្រៀមលក្ខណៈទៅចុះឈ្មោះបោះឆ្នោត។ ទន្ទឹមគ្នានេះ ថ្នាក់ដឹកនាំសហជីពក៏ស្នើឲ្យក្រសួងការងារជួយសម្រួលដល់កម្មករ កម្មការិនីក្នុងការចុះឈ្មោះបោះឆ្នោត ដែលចាប់ផ្ដើមពីថ្ងៃទី១ ខែកញ្ញា រហូតដល់ថ្ងៃទី២៩ ខែវិច្ឆិកា។
ប្រធានសហភាពការងារកម្ពុជា លោក អាត់ ធន់ លើកឡើងថា បញ្ហាប្រឈមរបស់កម្មករនៅអំឡុងពេលចុះឈ្មោះបោះឆ្នោតកន្លងមក កម្មករតែងជួបឧបសគ្គមួយចំនួន ដូចជាពិបាកសុំច្បាប់។ លោកចង់ឃើញក្រសួងការងារជំរុញទៅភាគីថៅកែ និងនិយោជកអនុញ្ញាតច្បាប់ជូនកម្មករទៅចុះឈ្មោះបោះឆ្នោត៖ «ខ្ញុំឃើញឧបសគ្គមួយដែរ ប្រសិនបើកម្មករគាត់ចងទៅចុះឈ្មោះបោះឆ្នោត ក៏ពិបាកដែរ ព្រោះកាលមុនគេឲ្យច្បាប់តែឥឡូវគេមិនតម្រូវឲ្យច្បាប់ ព្រោះកម្មករអាចចុះឈ្មោះបោះឆ្នោតនៅកន្លែងណាក៏បានដែរ អ៊ីចឹងយើងស្នើទៅក្រសួងការងារត្រូវជួយអន្តរាគមន៍ពីបញ្ហានេះ ទោះបីជាចុះនៅកន្លែងគាត់ស្នាក់នៅផ្ទាល់ ឬក៏ទីកំណើតគាត់»។
ឆ្លើយតបនឹងការស្នើសុំនេះ រដ្ឋមន្ត្រីក្រសួងការងារ លោក អ៊ិត សំហេង មានប្រសាសន៍ថា កន្លងមកក្រសួងតែងតែអំពាវនាវទៅកម្មករឲ្យទៅចុះឈ្មោះបោះឆ្នោត។ ចំណែកឯ ពាក់ព័ន្ធច្បាប់ ឬវិធានការយ៉ាងណាចំពោះភាគីរោងចក្រ ក្រសួងការងារ នឹងធ្វើទៅតាមច្បាប់ ឬការជូនដំណឹងពីគណៈកម្មាធិការរៀបចំការបោះឆ្នោត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។