សកម្មភាពចាប់ខ្លួននេះ កើតឡើងបន្ទាប់ពីមានជម្លោះនៅក្នុងវត្តវិហារ ដែលមានការដាក់ធុងបាស ហើយស្លាកសញ្ញាបក្សក៏ត្រូវបានរហែកនៅយប់បន្ទាប់។ អាជ្ញាធរឃុំស្វាយពោធិ៍ យល់ថា ការចាប់ខ្លួននោះ គឺជារឿងមិនត្រឹមត្រូវនោះទេ ពីព្រោះការចោទប្រកាន់នោះមិនមានភស្តុតាងច្បាស់លាស់នោះឡើយ។
សកម្មភាពមួយចំនួនដែលទាក់ទងនឹងការបំផ្លាញសម្ភារៈរបស់បក្សនយោបាយ ហាក់ដូចជាមានភាពស្ងប់ស្ងាត់បន្តិច បន្ទាប់ពីការបោះឆ្នោតត្រូវបានបញ្ចប់។ ប៉ុន្តែ ទោះជាយ៉ាងណាក្តី ក៏នៅមានសកម្មភាពមួយចំនួន ដែលបានកើតឡើងដដែល ពិសេសសកម្មភាពបំផ្លាញស្លាកសញ្ញាបក្សនយោបាយជាដើម។
ប្រជាពលរដ្ឋរស់នៅឃុំស្វាយពោធិ៍ ស្រុកស្រីសន្ធរ ខេត្តកំពង់ចាម ដែលជាសមាជិកគណបក្សសង្គ្រោះជាតិ ពីរនាក់ឪពុក និងកូនប្រុស ត្រូវបានសមត្ថកិច្ចចាប់ខ្លួនបញ្ជូនមកពន្ធនាគារខេត្ត បន្ទាប់ពីមានការចោទប្រកាន់ថា បានធ្វើសកម្មភាពបំផ្លាញស្លាកសញ្ញាគណបក្សប្រជាជនកម្ពុជា កាលពីយប់ថ្ងៃទី១ តុលា។
ប្រជាពលរដ្ឋរស់នៅភូមិជីប៉ោ ឃុំស្វាយពោធិ៍ ស្រុកស្រីសន្ធរ លោក ឈុំ ផន ដែលត្រូវជាបងប្រុសជនរងគ្រោះ បានឱ្យដឹងថា ជនរងគ្រោះមានចំនួនពីរនាក់ ដែលត្រូវជាឪពុក និងកូន។ ឪពុកឈ្មោះ ស៊ាន ប៊ុនលី មានអាយុ ៤២ឆ្នាំ និងកូនប្រុសឈ្មោះ ប៊ុនលី ប៊ុនលាង ត្រូវបានសមត្ថកិច្ចឃុំស្វាយពោធិ៍ ចាប់បញ្ជូនខ្លួនមកពន្ធនាគារខេត្ត ពីបទបំផ្លាញស្លាកសញ្ញាគណបក្សប្រជាជនកម្ពុជា កាលពីយប់ថ្ងៃទី១ តុលា។
លោកបន្តថា ការចាប់ខ្លួនប្អូនប្រុស និងក្មួយរបស់លោកនេះ បន្ទាប់មានការចោទប្រកាន់ពីសំណាក់មេភូមិវិហារ និងមេប៉ុស្តិ៍ឃុំស្វាយពោធិ៍ ថាពួកគេបានបំផ្លាញស្លាកសញ្ញាគណបក្សប្រជាជនកម្ពុជា នៅក្នុងភូមិវិហារ។ លោកបន្តថា ការចោទប្រកាន់នេះ គឺវាជារឿងមិនត្រឹមត្រូវនោះទេ ពីព្រោះប្អូន និងក្មួយរបស់លោកមិនប្រព្រឹត្តដូចការចោទនោះទេ៖ «ខ្ញុំគិតឃើញថា បើរឿងគណបក្សហ្នឹងវាមិនត្រឹមត្រូវទេ។ វាអត់បានវ៉ៃមែន បើគ្រាន់ថាមិនដឹងជាអ្នកណាវ៉ៃទេណា ជាក្រុមជាពួកណា? ប៉ុន្តែ រឿងចោទប្រកាន់ថាវាវ៉ៃស្លាកហ្នឹង មិនមែនទេ! ពីព្រោះសំដៅលើរឿងវាខឹងថាគេកាប់កូនវាតែប៉ុណ្ណឹងទេ»។
វិទ្យុអាស៊ីសេរី មិនអាចទំនាក់ទំនងមេភូមិវិហារ លោក សួង សៀម និងមេប៉ុស្តិ៍ឃុំស្វាយពោធិ៍ លោក ចាន់ សុផល ដើម្បីសុំការបកស្រាយបានទេ នៅថ្ងៃទី៧ តុលា។
ប៉ុន្តែ ទោះជាយ៉ាងណាក៏ដោយ ករណីចោទប្រកាន់នេះត្រូវបានមេឃុំស្វាយពោធិ៍ លោក ផេង គុង បានមានប្រសាសន៍ថា វាជារឿងដែលមិនត្រឹមត្រូវនោះទេ ពីព្រោះវាគ្មានភស្តុតាងច្បាស់លាស់ក្នុងការដាក់បន្ទុកទៅជនរងគ្រោះនោះឡើយ៖ «គឺថាខ្ញុំពិបាកដែរ! អត់មានដីកា អត់មានអីទេ គឺថាតាមអំពើចិត្តហ្មង ពួកអស់ហ្នឹង! បានខ្ញុំនឹកដូចខឹងដែរ។ បាទ! គ្រាន់តែប៉ុណ្ណឹង អាហេតុផលមិនទាន់ដឹងថាវ៉ៃកាប់អត់មានមនុស្ស អត់ដឹងមុខមនុស្ស ហើយអារហែកហ្នឹងក៏អត់ដឹងមុខមនុស្សយ៉ាងម៉េចៗ ស្រាប់តែគេបញ្ជូនទៅបាត់ទៅ»។
លោកបន្តថា ការធ្វើបទចោទប្រកាន់ទៅលើរូប លោក ស៊ាន ប៊ុនលី និងកូនប្រុសរបស់លោកនោះ គឺជាការធ្វើឡើងដោយមេភូមិវិហារ និងមេប៉ុស្តិ៍ឃុំស្វាយពោធិ៍ ដែលគ្មានការសហការជាមួយថ្នាក់ឃុំនោះទេ ដែលលោកបញ្ជាក់ថា ទង្វើនេះ គឺជាការរំលោភលើដែនសមត្ថកិច្ចរបស់លោកទាំងស្រុងតែម្តង៖ «អត់មានត្រឹមត្រូវទេ ទី១ គឺខ្ញុំជាមេឃុំស្វាយពោធិ៍ ដូចជាវាគោះពេកតែម្តង! ដូចជាធ្វើមានសិទ្ធិរំលោភចាប់បញ្ជូន ហើយបាននិយាយជាក្រោយ! បានមកប្រាប់ខ្ញុំជាក្រោយ បានមកប្រាប់ក្រុមប្រឹក្សាខ្ញុំជាក្រោយ។ ដល់អ៊ីចឹង ខ្ញុំមិនដឹងទេបាទ! បាទ! គ្មានសហការអីទេបាទៗ ចាន់ សុផល និងលោក សួង សៀម មេភូមិវិហារ ហ្នឹង»។
មកដល់ថ្ងៃទី៧ តុលា លោក ឈុំ ផន ដែលជាបងប្រុសជនរងគ្រោះ បានប្រមូលស្នាមមេដៃរបស់អ្នកភូមិបានប្រមាណជាង ៣០០ ដែលសុទ្ធជាស្នាមមេដៃបញ្ជាក់ថា ប្អូនប្រុស និងក្មួយប្រុសរបស់លោកមិនបានប្រព្រឹត្តដូចការចោទប្រកាន់នោះទេ។ លោកបន្តថា ចំពោះសំណុំរឿងនៃការចោទប្រកាន់នេះ ខាងលោកក៏បានប្រគល់ឱ្យខាងស្រុករួចហើយ ហើយលោកនឹងអាចប្រគល់សំណុំរឿងនេះទៅឱ្យខេត្តនៅថ្ងៃទី៨ តុលា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។