ក្រុមប្រឹក្សា​សង្កាត់​ចោមចៅ​បដិសេធ​បណ្ដឹង​រឿង​ជនជាតិ​វៀតណាម​មាន​ឈ្មោះ​បោះឆ្នោត

0:00 / 0:00

មន្ត្រី​គណបក្ស​សង្គ្រោះ​ជាតិ នៅ​សង្កាត់​ចោមចៅ ខណ្ឌ​ពោធិ៍សែនជ័យ រាជធានី​ភ្នំពេញ ចោទ​ក្រុមប្រឹក្សា​សង្កាត់​ចោមចៅ ដែល​ភាគច្រើន​ជា​មន្ត្រី​គណបក្ស​ប្រជាជន​កម្ពុជា ថា​ដោះស្រាយ​បណ្ដឹង​ពួក​គេ​ទាក់ទង​ជនជាតិ​វៀតណាម មាន​ឈ្មោះ​ក្នុង​បញ្ជី​បោះឆ្នោត​មិន​ត្រឹមត្រូវ។

ការ​ចោទ​ប្រកាន់​នេះ ក្រោយ​ពី​ក្រុមប្រឹក្សា​ឃុំ-សង្កាត់​សម្រេច​បដិសេធ​បណ្ដឹង​មន្ត្រី​បក្ស​ប្រឆាំង ដែល​រក​ឃើញ​ថា​មាន​ជនជាតិ​វៀតណាម បាន​ចុះ​ឈ្មោះ​បោះឆ្នោត​ក្នុង​មូលដ្ឋាន​នេះ។ ប៉ុន្តែ​មន្ត្រី​ក្រុមប្រឹក្សា​សង្កាត់​មក​ពី​គណបក្ស​កាន់​អំណាច​ថា ពួក​គេ​បាន​ធ្វើ​តាម​នីតិវិធី​របស់​គណៈកម្មាធិការ​ជាតិ​រៀបចំ​ការ​បោះឆ្នោត (គ.ជ.ប)។

មន្ត្រី​បក្ស​ប្រឆាំង​អះអាង​ថា ពួក​គេ​មិន​អាច​ទទួល​យក​បាន​ឡើយ​ចំពោះ​ដំណោះស្រាយ​របស់​ក្រុមប្រឹក្សា​សង្កាត់​ចោមចៅ នៅ​ពេល​នេះ។

មន្ត្រី​បក្ស​ប្រឆាំង លោក សរ ណាល់ ថ្លែង​ប្រាប់​អាស៊ីសេរី​នៅ​ថ្ងៃ​ទី​៩ មករា ថា កាល​ពី​ថ្ងៃ​ទី​៦ មករា លោក​បាន​ដាក់​បណ្ដឹង​ទៅ​កាន់​ក្រុមប្រឹក្សា​សង្កាត់​ចោមចៅ ដើម្បី​ដោះស្រាយ​បញ្ហា​ជនជាតិ​វៀតណាម ចំនួន ១០​នាក់​ដែល​មាន​ឈ្មោះ​ក្នុង​បញ្ជី​បោះឆ្នោត​ក្រុមប្រឹក្សា​ឃុំ-សង្កាត់ ដែល គ.ជ.ប កំពុង​បិទ​ផ្សាយ​ចាប់​ពី​ថ្ងៃ​ទី​៣ ដល់​ថ្ងៃ​ទី​១៤ មករា។

លោក សរ ណាល់ ឲ្យ​ដឹង​ថា លុះ​ដល់​ថ្ងៃ​ទី​៩ មករា ក្រុមប្រឹក្សា​សង្កាត់​ចោមចៅ បាន​ប្រជុំ​គ្នា​ដោះស្រាយ​បណ្ដឹង​នេះ​ដោយ​មាន​សមាជិក​ទាំងអស់​ចំនួន ១១​នាក់ ក្នុង​នោះ​បក្ស​កាន់​អំណាច​មាន​សមាសភាព ៨​នាក់ និង​បក្ស​ប្រឆាំង​ចំនួន ៣​នាក់។ លោក​ថា ទីបំផុត​សមាជិក​ក្រុមប្រឹក្សា​សង្កាត់​ចោមចៅ ដែល​ភាគច្រើន​មក​ពី​បក្ស​កាន់​អំណាច​នេះ បាន​សម្រេច​ដោយ​លើក​ដៃ​បដិសេធ​បណ្ដឹង​នេះ។

លោក សរ ណាល់ សង្កត់​ធ្ងន់​ថា ការ​សម្រេច​បែប​នេះ ខាង​លោក​មិន​អាច​ទទួល​យក​បាន​ឡើយ។ លោក​ថា ដើម្បី​ឲ្យ​មាន​តម្លាភាព គឺ​ត្រូវ​កោះ​ហៅ​ជនជាតិ​វៀតណាម ទាំង ១០​នាក់​នោះ​មក​និយាយ​ត​ទល់​បង្ហាញ​នូវ​ឯកសារ ឬ​ភស្តុតាង​នានា​ដែល​បញ្ជាក់​ថា ពួក​គេ​មាន​សញ្ជាតិ​ខ្មែរ​ពិត​ប្រាកដ ដូចជា​មាន​ព្រះរាជក្រឹត្យ​ពី​ព្រះមហាក្សត្រ​ជាដើម៖ « ខ្ញុំ​ដាក់​ពាក្យ​បណ្ដឹង​ហ្នឹង​ស្នើសុំ​ឲ្យ​លុប​ឈ្មោះ​ចេញ​បញ្ជី​បោះឆ្នោត ព្រោះ​ខ្ញុំ​ស្គាល់​ ច្បាស់ ហើយ​រាល់​នីតិវិធី​ដែល​ប្ដឹង​នេះ គឺ​ខាង​សង្កាត់​អត់​ហៅ​ចុង​បណ្ដឹង​មក​ទេ ហើយ​ខ្ញុំ​ ទាមទារ​ឲ្យ ​ខាង​សង្កាត់​ហៅ​ចុង​បណ្ដឹង​មក ខាង​សង្កាត់​គេ​អត់​ហៅ​ទេ គេ​ថា​នីតិវិធី គ . . ប អត់​មាន ដាក់​ពាក្យ ​បណ្ដឹង​ ត្រូវ​តែ ​ហៅ​ចុង​បណ្ដឹង​ មក​ហើយ បើ​ មិន​មាន ​ចុង​បណ្ដឹង ខ្ញុំ​ចោទ​គេ​ថា​វៀតណាម ខុស​វា​ម៉េច​ទៅ ? ឧទាហរណ៍​បើ​ព្រម​លុប​មែន វា​មិន​ខុស​ បាត់​ទៅ​ហើយ។ អ៊ីចឹង​ត្រូវ​តែ​ហៅ​ ចុង​បណ្ដឹង​មក​តស៊ូ​ជាមួយ​ខ្ញុំ »

លោក សរ ណាល់ បញ្ជាក់​ថា តាម​ពិត មន្ត្រី​បក្ស​ប្រឆាំង​បាន​តវ៉ា​រឿង​ជនជាតិ​វៀតណាម ទាំង ១០​នាក់​នេះ​តាំង​ពី​អំឡុង​ពេល​នៃ​ការ​ចុះ​ឈ្មោះ​បោះឆ្នោត​ម្ល៉េះ ប៉ុន្តែ​អាជ្ញាធរ​អះអាង​ថា ឲ្យ​ក្រុម​លោក​រង់ចាំ​ដាក់​ពាក្យ​បណ្ដឹង​តាម​នីតិវិធី​នៅ​ពេល គ.ជ.ប បិទ​ផ្សាយ​បញ្ជី​ឈ្មោះ។

ឆ្លើយតប​ចំពោះ​បញ្ហា​នេះ ចៅ​សង្កាត់​រង​សង្កាត់​ចោមចៅ មក​ពី​បក្ស​កាន់​អំណាច លោក វ៉ា សារ៉ង មាន​ប្រសាសន៍​ថា នីតិវិធី​មិន​តម្រូវ​ឲ្យ​អាជ្ញាធរ​កោះ​ហៅ​ចុង​បណ្ដឹង​ដែល​មន្ត្រី​បក្ស​ប្រឆាំង​ថា​ជា​ជនជាតិ​វៀតណាម នោះ មក​តតាំង​ជាមួយ​ដើម​បណ្ដឹង​ឡើយ។ លោក វ៉ា សារ៉ង អះអាង​ថា ការ​សម្រេច​នេះ​មិន​មែន​ជា​ការ​សម្រេច​ចុង​ក្រោយ​នោះ​ទេ។ លោក​ថា បើ​មន្ត្រី​បក្ស​ប្រឆាំង​មិន​អាច​ទទួល​យក​បាន ពួក​គេ​អាច​ប្ដឹង​ត​ទៅ គ.ជ.ប និង​ក្រុមប្រឹក្សាធម្មនុញ្ញ​បន្ថែម​ទៀត៖ « ខ្ញុំ​ជម្រាប​ថា នីតិវិធី​ដោះស្រាយ​នីតិកម្ម​ថ្នាក់​ក្រុមប្រឹក្សា​មាន​រយៈពេល​តែ ៣​ថ្ងៃ​ទេ ហើយ​មាន​សិទ្ធិ​តែ​រក្សា​សិទ្ធិ និង​បដិសេធ ​បណ្ដឹង បើ​នីតិវិធី​គេ​ឲ្យ​តែ​ ដើម​បណ្ដឹង ​ជាមួយ​ក្រុមប្រឹក្សា​ទេ បើ​សិន​ជា​យក​ចុង​បណ្ដឹង​មក​ជជែក​គ្នា វា​អត់​មាន​ពេល​ទេ។ នីតិវិធី​វា​អត់​មាន ហើយ​គាត់​ចង់​ថា​ការ​ដោះស្រាយ​ទំនាស់​វា​ទាល់​តែ​ហៅ​ដើម​បណ្ដឹង និង​ចុង​បណ្ដឹង​មក។ ការ​ណែនាំ វា​អត់ ​ទាន់​មាន​ត្រង់​ហ្នឹង »

គ.ជ.ប បាន​បិទ​ផ្សាយ​បញ្ជី​ឈ្មោះ​ដំបូង រួម​នឹង​បញ្ជី​ឈ្មោះ​អ្នក​ដែល​នឹង​ត្រូវ​លុប​ចេញ​ពី​បញ្ជី​បោះឆ្នោត​តាំង​ថ្ងៃ​ទី​៣ មករា។

គ.ជ.ប ពន្យល់​ថា ការ​ប្ដឹង​តវ៉ា ឬ​ប្ដឹង​ជំទាស់​ត្រូវ​ធ្វើ​ទៅ​ក្រុមប្រឹក្សា​ឃុំ-សង្កាត់​ក្នុង​រយៈពេល ១០​ថ្ងៃ​យ៉ាង​យូរ បន្ទាប់​ពី​ថ្ងៃ​បិទ​ផ្សាយ​បញ្ជី​បោះឆ្នោត​ដំបូង​ចាប់​ពី​ថ្ងៃ​ទី​៤ រហូត​ដល់​ថ្ងៃ​ទី​១៤ ខែ​មករា ឆ្នាំ​២០១៧ ដែល​ជា​កាលបរិច្ឆេទ​ចុង​ក្រោយ។ ក្នុង​ករណី​អ្នក​ប្ដឹង​តវ៉ា ឬ​អ្នក​ប្ដឹង​ជំទាស់ មិន​ពេញ​ចិត្ត​ទៅ​នឹង​សេចក្តី​សម្រេច​របស់​ក្រុមប្រឹក្សា​ឃុំ-សង្កាត់ ពួក​គេ​អាច​ប្ដឹង​ទៅ គ.ជ.ប និង​ក្រុមប្រឹក្សា​ធម្មនុញ្ញ​តាម​ច្បាប់​កំណត់។

អាស៊ីសេរី មិន​ទាន់​អាច​ទាក់ទង​អ្នក​នាំ​ពាក្យ គ.ជ.ប លោក ហង្ស ពុទ្ធា ដើម្បី​សុំ​ការ​បំភ្លឺ​ចំពោះ​ករណី​នេះ​បាន​ទេ​នៅ​ថ្ងៃ​ទី​៩ មករា។

កន្លង​ទៅ បក្ស​ប្រឆាំង​រក​ឃើញ​ថា មាន​ជនជាតិ​វៀតណាម ប្រមាណ ៥​ពាន់​នាក់​នៅ​ក្នុង​បញ្ជី​បោះឆ្នោត​ថ្មី។ មន្ត្រី​គណបក្ស​សង្គ្រោះ​ជាតិ ធ្លាប់​អះអាង​ថា នឹង​ប្ដឹង​ជំទាស់​ទៅ​នឹង​ជនជាតិ​វៀតណាម ទាំងអស់​នោះ ព្រោះ​បក្ស​ប្រឆាំង​ថា ពួក​គេ​គ្មាន​លក្ខខណ្ឌ​គ្រប់គ្រាន់​អាច​ចុះ​ឈ្មោះ​បោះឆ្នោត ប៉ុន្តែ​បែរ​ជា​មាន​ឈ្មោះ​ក្នុង​បញ្ជី​បោះឆ្នោត។ បក្ស​ប្រឆាំង​ថា ក្នុង​ចំណោម​ជនជាតិ​វៀតណាម ប្រមាណ ៥​ពាន់​នាក់​នោះ នៅ​ភ្នំពេញ​ប្រមាណ ៣.០០០​នាក់ និង​ខេត្ត​ស្វាយរៀង ជិត ៩០០​នាក់ និង​ខេត្ត​ផ្សេងៗ​ទៀត។

ដោយឡែក គ.ជ.ប វិញ​ប្រកាស​ថា ខ្លួន​បាន​លុប​ឈ្មោះ​ដែល​ខុស​ប្រក្រតី​ជាង ៨​ពាន់​នាក់​ចេញ​ពី​បញ្ជី​ឈ្មោះ​បោះឆ្នោត​ថ្មី៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖

ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។