ប្រជាពលរដ្ឋ អង្គការសង្គមស៊ីវិល និងមន្ត្រីរាជការមួយចំនួននៅខេត្តបាត់ដំបង លើកឡើងស្រដៀងគ្នាថា ពួកគាត់សោកស្ដាយយ៉ាងខ្លាំងក្រោយពីទទួលដំណឹងថា សមត្ថកិច្ចចាប់ខ្លួនប្រធានគណបក្សសង្គ្រោះជាតិ លោក កឹម សុខា បញ្ជូនទៅពន្ធនាគារកាលពីយប់រំលងអធ្រាត្រចូលថ្ងៃទី៣ កញ្ញា។ ពួកគាត់មានមតិថា ការចាប់ខ្លួននេះ គឺនាំឲ្យប្រជាធិបតេយ្យនៅកម្ពុជា ដើរថយក្រោយ និងធ្វើឲ្យប៉ះពាល់ដល់ការបោះឆ្នោតជ្រើសតាំងតំណាងរាស្ត្រនៅឆ្នាំ២០១៨ ប្រព្រឹត្តទៅមិនយុត្តិធម៌។
ទាំងពលរដ្ឋអង្គការសង្គមស៊ីវិល និងមន្ត្រីរាជការនៅខេត្តបាត់ដំបង កំពុងបារម្ភអំពីស្ថានការណ៍នយោបាយបច្ចុប្បន្ន ថាជាសញ្ញាមួយគ្រោះថ្នាក់ ព្រោះការបោះឆ្នោតនៅពេលខាងមុខដោយមិនមានមេដឹកនាំគណបក្សប្រឆាំង។
មន្ត្រីសម្របសម្រួលសមាគមការពារសិទ្ធិមនុស្សអាដហុក (ADHOC) ខេត្តបាត់ដំបង លោក យិន ម៉េងលី លើកឡើងថា ការចាប់ខ្លួនប្រធានគណបក្សសង្គ្រោះជាតិ លោក កឹម សុខា គឺជារឿងមិនត្រឹមត្រូវឡើយ ព្រោះលោក កឹម សុខា សមាជិកសភាតំណាងរាស្ត្រមានអភ័យឯកសិទ្ធិដែលធានាដោយរដ្ឋធម្មនុញ្ញ៖ « ព្រោះបញ្ហានេះវាលែងទៅជាបទល្មើសជាក់ស្ដែងហើយ ទោះបីមានបង្ហោះថ្មីៗនេះក៏ដោយ ដូច្នេះមន្ត្រីពាក់ព័ន្ធត្រូវការលើបញ្ហានេះឲ្យបានល្អិតល្អន់ ដើម្បីកុំឲ្យមានការចោទប្រកាន់ ព្រោះបើសិនជាមានការចន្លោះប្រហោងធ្វើឲ្យពាក់ព័ន្ធនយោបាយ។ ករណីបើមិនមែនជាបទល្មើសជាក់ស្ដែង មិនត្រូវចាប់ខ្លួនដោយមានអភ័យឯកសិទ្ធិនោះទេ »។
ចំណែកមន្ត្រីសម្របសម្រួលអង្គការលីកាដូ (LICADHO) ខេត្តបាត់ដំបង លោក ហេង សាយហុង មានប្រសាសន៍ថា លោកសោកស្ដាយយ៉ាងខ្លាំងនៅពេលដឹងថា លោក កឹម សុខា ត្រូវបានសមត្ថកិច្ចចាប់ខ្លួនបញ្ជូនទៅពន្ធនាគារទាំងយប់នោះ។ លោកលើកឡើងថា ការចាប់ខ្លួនមេបក្សប្រឆាំងនេះ គឺជាការគំរាមកំហែងមួយដល់ការបញ្ចេញមតិរបស់ប្រជាពលរដ្ឋ និងអង្គការសង្គមស៊ីវិលនៅកម្ពុជា ធ្វើឲ្យកាន់តែរួញខ្លី និងមិនហ៊ានបញ្ចេញមតិ៖ « ក្នុងចិត្តខ្ញុំគិតថា បើពិនិត្យទៅលើផ្លូវច្បាប់ទៅយើងឃើញថា ហាក់ដូចជាមានការព្រួយបារម្ភ និងរន្ធត់ចិត្តដែរ ព្រោះហេតុផលនៃការចាប់ខ្លួននេះ មើលឃើញថាមានមន្ទិលច្រើន។ ម្យ៉ាងទៀត ខ្ញុំសោកស្ដាយទៅលើការអនុវត្តច្បាប់ក្នុងរឿងនេះ »។
រីឯប្រជាពលរដ្ឋនៅខេត្តបាត់ដំបង ខ្លះភ័យខ្លាច និងមិនហ៊ានបញ្ចេញមតិជុំវិញការចាប់ខ្លួននេះឲ្យបានទូលំទូលាយនោះទេ។ ទោះជាយ៉ាងណា ពួកគាត់មានមតិសោកស្ដាយពីការចាប់ខ្លួននេះ និងសំណូមពរឲ្យរដ្ឋាភិបាលដោះស្រាយបញ្ហានេះដោយសន្តិវិធី ដើម្បីឲ្យការបោះឆ្នោតជ្រើសតាំងតំណាងរាស្ត្រនៅពេលខាងមុខ ប្រព្រឹត្តទៅដោយតម្លាភាព៖« ខ្ញុំចង់បានសិទ្ធិសេរីភាពស្មើគ្នា មិនឲ្យមានការគំរាមកំហែងមកលើគ្នា មានយុត្តិធម៌ដូចការបោះឆ្នោតកាលពីឆ្នាំ១៩៩៣ ដែលគ្មានបក្សណាគំរាមកំហែងមកលើបក្សណាមួយនេះទេ។ ករណីនេះ គណបក្សទាំងពីររួមគ្នាដោះស្រាយតាមផ្លូវច្បាប់ ហើយបើរកឃើញថាគ្មានកំហុសទេ សមត្ថកិច្ចត្រូវដោះលែងគាត់ឲ្យមានសិទ្ធិសេរីភាពឡើងវិញ។ ខ្ញុំជាប្រជាជន ខ្ញុំមិនហ៊ាននិយាយថាយ៉ាងម៉េចទេ គ្រាន់តែថារឿងនេះទុកឲ្យថ្នាក់ដឹកនាំជាអ្នកដោះស្រាយទៅ »។
ចំណែកឯគ្រូបង្រៀននៅខេត្តបាត់ដំបង មួយចំនួន មិនពេញចិត្តនឹងការចាប់ខ្លួនមេបក្សប្រឆាំងនេះទេ ដោយពួកគាត់លើកឡើងថា ការចាប់ខ្លួននេះធ្វើឡើងខុសច្បាប់ ព្រោះលោក កឹម សុខា មានអភ័យឯកសិទ្ធិក្នុងនាមជាតំណាងរាស្ត្រ ដែលកំណត់ដោយរដ្ឋធម្មនុញ្ញ៖« ខ្ញុំមិនអស់ចិត្តត្រង់ថា បើសិនចាប់ខ្លួន វាត្រូវមានដីកាពីតុលាការ ហើយដល់ពេលមកចាប់ខ្លួនដោយគ្មានដីកាដូច្នេះ ខ្ញុំមើលទៅដូចមិនត្រូវទេ។ លទ្ធិប្រជាធិបតេយ្យត្រូវមានគណបក្សច្រើនដើម្បីប្រកួតប្រជែងគ្នាអំឡុងពេលបោះឆ្នោត ហើយបើគ្មានបក្សប្រឆាំង ក៏គ្មានការរីកចម្រើនដែរ។ ខ្ញុំមានការបារម្ភព្រោះថាបើអត់បក្សប្រឆាំង គឺប្រទេសជាតិចាត់ទុកចូលក្នុងជារបបកុម្មុយនិស្តហើយ »។
លោក កឹម សុខា ត្រូវបានសមត្ថកិច្ចចាប់ខ្លួនដោយគ្មានដីកាពីតុលាការកាលពីយប់រំលងអធ្រាត្រចូលថ្ងៃទី៣ កញ្ញា នៅផ្ទះរបស់លោកក្នុងក្រុងភ្នំពេញ ដោយចោទប្រកាន់មានទោសក្បត់ជាតិ។ ការចាប់ខ្លួនក្រោយពេលសារព័ត៌មានហ្វ្រែសញូវ (Fresh News) ដែលគេដឹងថាជាសារព័ត៌មានគាំទ្ររដ្ឋាភិបាល បានផ្សព្វផ្សាយវីដេអូឃ្លីបរយៈពេលជាង ១៣នាទី ដែលវីដេអូនេះទទួលបានពីម្ចាស់ហ្វេសប៊ុកឈ្មោះកូនខ្មែរ ដែលសារព័ត៌មានមួយនេះអះអាងថាជារបស់លោក កឹម សុខា។
ទាំងមតិរបស់មន្ត្រីរាជការ ប្រជាពលរដ្ឋ និងអង្គការសង្គមស៊ីវិលនេះ បានបង្ហាញឲ្យឃើញថា ការចាប់មេបក្សប្រឆាំងនេះ នឹងធ្វើឲ្យប៉ះពាល់ដល់លទ្ធិប្រជាធិបតេយ្យនៅកម្ពុជា ព្រោះធ្វើឲ្យពលរដ្ឋមានការភ័យខ្លាច និងមិនអាចជ្រើសរើសមេដឹកនាំតាមឆន្ទៈរបស់ខ្លួន។ ទន្ទឹមគ្នានេះ នៅពេលមេដឹកនាំគណបក្សជាប់ឆ្នោតទាំងពីរមិនចុះសម្រុងនឹងគ្នាបែបនេះ គឺធ្វើឲ្យប៉ះពាល់យ៉ាងខ្លាំងដល់ការអភិវឌ្ឍប្រទេសជាតិ ធ្វើឲ្យមានការរីកចម្រើនយឺត ជីវភាពរបស់ប្រជាពលរដ្ឋកាន់តែក្រីក្រ ហើយពួកគាត់ធ្វើចំណាកស្រុកកាន់តែច្រើន ព្រោះគ្មានទីផ្សារសម្រាប់លក់កសិផលរបស់ពួកគាត់ ចំណែកអ្នកវិនិយោគទុនធំៗមិនហ៊ានចូលមកដាក់ទុនវិនិយោគនៅកម្ពុជា ជាដើម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។