ពលរដ្ឋជនជាតិដើមភាគតិចឃុំប៉ាតេ ស្រុកអូរយ៉ាដាវ ខេត្តរតនគិរី ជាង ៤០ភាគរយដែលគ្រប់អាយុបោះឆ្នោតហើយនៅមិនទាន់មកចុះឈ្មោះបោះឆ្នោត គ្រាដែលគណៈកម្មការជាតិរៀបចំការបោះឆ្នោត (គ.ជ.ប) បានធ្វើបច្ចុប្បន្នភាពបញ្ជីឈ្មោះបោះឆ្នោតសម្រាប់ឆ្នាំ២០១៧។
ជិតមួយសប្ដាហ៍បន្ទាប់ពីក្រុមការងារចុះឈ្មោះបោះឆ្នោត បានផ្សព្វផ្សាយឲ្យប្រជាពលរដ្ឋគ្រប់អាយុឲ្យមកចុះឈ្មោះបោះឆ្នោត មានពលរដ្ឋ ៤នាក់ប៉ុណ្ណោះ ដែលបានមកចុះឈ្មោះបោះឆ្នោតនៅឃុំប៉ាតេ។
ឃុំប៉ាតេ ឋិតនៅចម្ងាយជាង ៦០គីឡូម៉ែត្រពីក្រុងបានលុង ខេត្តរតនគិរី។ ឃុំនេះមានពលរដ្ឋជនជាតិដើមភាគតិចរស់នៅជាង ៩០ភាគរយ រស់នៅភូមិចំនួន ៤ គឺភូមិគងយុ គងធំ ផ្អរ និងភូមិប្លង់។ ស្ថិតិរបស់អាជ្ញាធរឃុំឲ្យដឹងថា ពលរដ្ឋគ្រប់អាយុចុះឈ្មោះបោះឆ្នោតមាន ១.៣៣៤នាក់ ក្នុងនោះអ្នកមានឈ្មោះក្នុងបញ្ជីបោះឆ្នោតមានចំនួន ៩៧៣នាក់ គឺមានអ្នកគ្រប់អាយុចុះឈ្មោះជាង ៤០ភាគរយទៀតមិនទាន់មកចុះឈ្មោះបោះឆ្នោត។
ប្រធានក្រុមចុះឈ្មោះបោះឆ្នោតឃុំប៉ាតេ អ្នកស្រី កែវ ចិន្តា បញ្ជាក់ថា ក្រុមការងារចុះឈ្មោះបោះឆ្នោតបានផ្សព្វផ្សាយឲ្យប្រជាពលរដ្ឋមកចុះឈ្មោះបោះឆ្នោតតាមរយៈចងបដានៅមុខសាលាឃុំ និងតាមភូមិនីមួយៗ ហើយអាជ្ញាធរភូមិបានចុះណែនាំពលរដ្ឋនៅតាមលំនៅឋានឲ្យទៅចុះឈ្មោះបោះឆ្នោត ក៏ប៉ុន្តែពលរដ្ឋហាក់មិនចាប់អារម្មណ៍រឿងនេះទេ ដោយពួកគាត់ខ្លះនាំក្រុមគ្រួសារទៅធ្វើស្រែចម្ការដោយមិនខ្វល់ខ្វាយចំពោះការចុះឈ្មោះបោះឆ្នោតនេះទេ។
អ្នកស្រីកត់សំគាល់ថា ការយល់ដឹងរបស់ពលរដ្ឋជនជាតិដើមភាគតិចមានកម្រិតទាប ហេតុនេះក្រុមការងារបោះឆ្នោតរំពឹងថា ក្រុមការងារចុះឈ្មោះបោះឆ្នោតនឹងជំរុញឲ្យអាជ្ញាធរភូមិផ្សព្វផ្សាយបញ្ហានេះដល់ពលរដ្ឋបន្ថែមទៀត ជាពិសេសក្រុមការងារនឹងចុះទៅដល់ភូមិដើម្បីចុះឈ្មោះពលរដ្ឋដល់លំនៅឋានក្រោយ ២០ថ្ងៃនៃយុទ្ធនាការចុះឈ្មោះនៅសាលាឃុំ៖ «ខាងខ្ញុំផ្សព្វផ្សាយមេភូមិ មេឃុំ បដាខ្ញុំបិតតាមភូមិ តាមឃុំ តាមការិយាល័យ សាលារៀន តាមទីប្រជុំជន។ ប្រជុំមេភូមិ ខ្ញុំស្នើឲ្យគាត់ប្រាប់ប្រជាជនក្នុងភូមិ ប្រជាពលរដ្ឋអត់ចង់មកចុះឈ្មោះផង ក្រែងចុះនៅសាលាគាត់ខ្ជិលមក ពេលពួកខ្ញុំទៅចុះតាមភូមិគាត់នឹងមកចុះគ្រប់គ្នាអ៊ីចឹងណា!»។
គ.ជ.ប បានរៀបចំធ្វើបច្ចុប្បន្នភាពបញ្ជីឈ្មោះបោះឆ្នោតសម្រាប់ឆ្នាំ២០១៧ មានរយៈពេល ៧០ថ្ងៃចាប់ពីថ្ងៃទី១ ខែកញ្ញា រហូតដល់ថ្ងៃទី១០ ខែតុលា ឆ្នាំ២០១៧។
ប្រធានភូមិប្លង់ លោក រម៉ាម ម៉ច ទទួលស្គាល់ថា អ្នកភូមិរវល់ធ្វើស្រែចម្ការ ជាពិសេសគ្រួសារខ្លះរស់នៅខ្ទមចម្ការយូរថ្ងៃទើបវិលត្រឡប់ចូលភូមិ ហេតុនេះដំណើរការផ្សព្វផ្សាយឲ្យពលរដ្ឋទៅចុះឈ្មោះបោះឆ្នោតជួបបញ្ហាលំបាក។ លោកថា អាជ្ញាធរភូមិនៅតែបន្តផ្សព្វផ្សាយតាមផ្ទះឲ្យពលរដ្ឋដែលគ្រប់អាយុ ហើយមិនទាន់ចុះឈ្មោះបោះឆ្នោត ឲ្យមកចុះឈ្មោះបោះឆ្នោតតាមកាលវិភាគកំណត់៖ «ខ្លះដេកនៅចម្ការអ្នកណាទៅតាមនៅភ្នំនោះចាំគេមកខ្ញុំទៅប្រាប់ទៀត ត្រកូលចារ៉ាយ ពិបាកណាស់មិនដូចខ្មែរទេ ជួនកាលគេដេកមួយយប់ពីរយប់នៅចម្ការគេធ្លាប់ប្រពៃណីគេហើយ»។
ក្នុងចំណោមភូមិទាំង៤ ក្នុងឃុំប៉ាតេ ភូមិគងធំ មានប្រជាពលរដ្ឋគ្រប់អាយុជាង ២០០នាក់ ក្នុងចំណោមពលរដ្ឋ ៦០០នាក់ ដែលគ្រប់អាយុ ហើយមិនទាន់បានទៅចុះឈ្មោះបោះឆ្នោត តាំងពីយុទ្ធនាការបោះឆ្នោតក្រុមប្រឹក្សាឃុំ-សង្កាត់ អាណត្តិទី៤។
តំណាងយុវជនឃុំប៉ាតេ លោក សេវ យ៊ូហាន អះអាងថា ក្រុមយុវជនគ្រប់អាយុមួយចំនួនមិនបានយកចិត្តទុកដាក់ចុះឈ្មោះបោះឆ្នោតទេ ដោយគាត់គិតថា ជារឿងមិនបានការ។ លោកថា នេះជាការយល់ដឹងមិនត្រឹមត្រូវរបស់យុវជនខ្លះចំពោះកាតព្វកិច្ចបោះឆ្នោតរបស់ពលរដ្ឋដែលត្រូវចូលរួមជ្រើសរើសតំណាងរាស្ត្រសម្រាប់ការពារផលប្រយោជន៍ពលរដ្ឋ៖ «ពេលទៅបោះឆ្នោតគេអត់គិតពីប្រទេសជាតិទេ គេមិនខ្វល់ពីការបោះឆ្នោត ខ្ញុំប្រាប់គេ គេមិនស្ដាប់ ពេលប្រជុំតាមភូមិក៏ខ្ញុំប្រាប់ដែរ»។
លេខាធិការដ្ឋានរៀបចំការបោះឆ្នោតខេត្តរតនគិរី ប៉ាន់ប្រមាណថា មានពលរដ្ឋរដ្ឋគ្រប់អាយុចុះឈ្មោះបោះឆ្នោតជាង ៤.៥០០នាក់ទៀត មិនទាន់បានចុះឈ្មោះបោះឆ្នោតនៅឡើយ ខណៈដែលការរៀបចំបោះឆ្នោតជាតិជ្រើសរើសតំណាងរាស្ត្រអាណត្តិទី៥ នឹងប្រព្រឹត្តទៅនៅខែកក្កដា ឆ្នាំ២០១៨។
ប្រធានលេខាធិការដ្ឋានរៀបចំការបោះឆ្នោតខេត្តរតនគិរី លោក ប៉ែន ឈុនឌី កត់សំគាល់ថា ដំណើរការចុះឈ្មោះបោះឆ្នោតបានប្រព្រឹត្តទៅជាធម្មតា គ្មានបាតុភាពអ្វីរំខាននោះទេ។ លោកបន្តថា ការចុះឈ្មោះបោះឆ្នោតនៅសល់ជាងពីរខែទៀត។ ហេតុនេះលោកអំពាវនាវឲ្យពលរដ្ឋដែលមិនទាន់ចុះឈ្មោះឲ្យប្រញាប់មកចុះឈ្មោះនៅតាមការិយាល័យចុះឈ្មោះបោះឆ្នោតឃុំ-សង្កាត់ ឬនៅតាមភូមិដែលពលរដ្ឋរស់នៅក្រោយពេល ២០ថ្ងៃ នៃយុទ្ធនាការចុះឈ្មោះនៅតាមឃុំ-សង្កាត់៖ «ប្រជាពលរដ្ឋដែលគ្រប់អាយុបោះឆ្នោតណា! ត្រូវអញ្ជើញមកចុះឈ្មោះបោះឆ្នោតឲ្យបានគ្រប់គ្នានៅខេត្តរតនគិរី ដើម្បីចូលរួមបោះឆ្នោតជ្រើសរើសតំណាងរាស្ត្រឆ្នាំ២០១៨ ខាងមុខនេះ»។
រយៈពេល ៦ថ្ងៃនៃយុទ្ធនាការចុះឈ្មោះបោះឆ្នោត ចាប់ពីថ្ងៃទី១ កញ្ញា មក មានពលរដ្ឋជាង ៥០០នាក់ បានមកចុះឈ្មោះបោះឆ្នោតនៅតាមការិយាល័យចុះឈ្មោះឆ្នោតតាមឃុំ-សង្កាត់ក្នុងខេត្តរតនគិរី៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។