មន្ត្រីសង្គមស៊ីវិល និងអាជ្ញាធរខេត្តព្រះសីហនុ បានឲ្យដឹងថា ថ្ងៃដំបូងនៃដំណើរការចុះបញ្ជីឈ្មោះអ្នកបោះឆ្នោតឆ្នាំ២០១៦ នៅថ្ងៃទី១ ខែកញ្ញា មានដំណើរមិនទាន់រលូនទេ ដោយការបើកការិយាល័យចុះឈ្មោះខ្លះបើកទ្វារយឺត និងអវត្តមានមន្ត្រីទទួលបន្ទុកការងារចុះឈ្មោះ ជាដើម ប៉ុន្តែសមត្ថកិច្ចអះអាងថា មិនមានបញ្ហាអសន្តិសុខកើតឡើងនាំឲ្យរំខានដល់ដំណើរការចុះបញ្ជីឈ្មោះបោះឆ្នោតនោះទេ។
មន្ត្រីសង្កេតការណ៍ចុះឈ្មោះបោះឆ្នោតរបស់គណៈកម្មាធិការដើម្បីការបោះឆ្នោតដោយសេរី និងយុត្តិធម៌នៅកម្ពុជា ហៅកាត់ថា ខុមហ្វ្រែល (COMFREL) និងជាអ្នកសម្របសម្រួលសមាគមអាដហុក (ADHOC)ប្រចាំខេត្តព្រះសីហនុ អ្នកស្រី ជៀប សុធារី បានឲ្យដឹងថា ការងារចុះបញ្ជីឈ្មោះអ្នកបោះឆ្នោតឆ្នាំ២០១៦ នៅថ្ងៃដំបូងនាសាលាសង្កាត់លេខ៣ មិនទាន់មានដំណើរការល្អទេ ដោយមន្ត្រីទទួលបន្ទុកការងារចុះឈ្មោះបើកការិយាល័យយឺតយ៉ាវ និងមន្ត្រីដែលទទួលបន្ទុកចុះឈ្មោះបោះឆ្នោតមួយចំនួនបានអវត្តមាន ជាដើម។
អ្នកស្រី ជៀប សុធារី ឲ្យដឹងថា ប្រជាពលរដ្ឋបានអង្គុយរង់ចាំរយៈពេលយូរនៅតាមការិយាល័យមួយចំនួន៖ « នៅក្នុងការិយាល័យចុះឈ្មោះបោះឆ្នោតសង្កាត់លេខ៣ បានបើកការិយាល័យចុះឈ្មោះយឺតរហូតដល់ម៉ោង ៨ ទើបការិយាល័យបើកទ្វារដំណើរការ ក្នុងនោះក៏អវត្តមានអនុប្រធាន និងជំនួយការរបស់ប្រធាន ហើយស្មៀនមិនបានបង្ហាញវត្តមានឲ្យស្របតាមការតម្រូវរបស់ស្ថាប័ន គ . ជ . ប នោះទេ »។
ប្រជាពលរដ្ឋមួយចំនួនដែលបានទៅចុះឈ្មោះនៅតាមការិយាល័យមួយចំនួនក្នុងក្រុងព្រះសីហនុ មានសង្កាត់លេខ៣ និងសង្កាត់លេខ៤ ជាដើម បានរអ៊ូរទាំថាមានការយឺតយ៉ាវក្នុងការអង្គុយសំកុករង់ចាំចុះឈ្មោះបោះឆ្នោតឆ្នាំ២០១៦ នេះ ប៉ុន្តែបានអះអាងថា ពួកគេបានអត់ធ្មត់ក្នុងការរង់ចាំចុះឈ្មោះនេះ ដើម្បីឈានដល់មានសិទ្ធិបោះឆ្នោតនាឆ្នាំខាងមុខ។
ភាពយឺតយ៉ាវនេះ ត្រូវភ្នាក់ងារសង្កេតការណ៍របស់អង្គការក្រៅរដ្ឋាភិបាល និងភ្នាក់ងារសង្កេតការណ៍គណបក្សនយោបាយមួយចំនួនប្រចាំខេត្តព្រះសីហនុ យល់ថា ថ្ងៃដំបូងរៀបចំមិនទាន់បានរលូន ព្រោះការងារចុះបញ្ជីឈ្មោះបោះឆ្នោតឆ្នាំនេះខុសពីឆ្នាំមុនៗ។
ប្រធានគណៈកម្មាធិការប្រតិបត្តិគណបក្សសង្គ្រោះជាតិ ប្រចាំខេត្តព្រះសីហនុ លោក សុខ សាវ៉ាត បានកត់សម្គាល់ថា នៅថ្ងៃដំបូងនៃការចុះឈ្មោះបោះឆ្នោតថ្មីឆ្នាំ២០១៦ នេះ គឺមានបញ្ហាបន្តិចបន្តួចកើតឡើង ដោយមានប្រធានភូមិមួយចំនួនបានទៅអង្គុយក្នុងការិយាល័យចុះឈ្មោះ ដែលខុសពីនីតិវិធីរបស់គណៈកម្មាធិការជាតិរៀបចំការបោះឆ្នោត (គ.ជ.ប) បានកំណត់។ លោកអំពាវនាវដល់អ្នកពាក់ព័ន្ធការងារចុះឈ្មោះបោះឆ្នោត ត្រូវគោរព និងអនុវត្តតួនាទីឲ្យស្របតាមច្បាប់បោះឆ្នោត ឬ គ.ជ.ប បានដាក់ចេញ៖ « មន្ត្រីអ្នកជាប់ពាក់ព័ន្ធទទួលខុសត្រូវការចុះឈ្មោះបោះឆ្នោតទាំងអស់នៅថ្នាក់មូលដ្ឋាន មានឃុំ សង្កាត់ ជាដើម ត្រូវគោរពការងារ ឬតួនាទីឲ្យស្របតាមច្បាប់បោះឆ្នោតឲ្យបានទាំងអស់គ្នា »។
ទាក់ទិនព្រឹត្តិការណ៍នេះដែរ លោកឧត្តមសេនីយ៍ទោ ជួន ណារិន្ទ ស្នងការនគរបាលខេត្តព្រះសីហនុ មានប្រសាសន៍ថា កម្លាំងជំនាញរបស់លោកបានដាក់ពង្រាយរង់ចាំការពារសន្តិសុខជូនប្រជាពលរដ្ឋទៅចុះឈ្មោះបោះឆ្នោត នៅគ្រប់ការិយាល័យបោះឆ្នោតទូទាំងខេត្តព្រះសីហនុ។ លោកថា ថ្ងៃដំបូងនៃការចុះឈ្មោះនេះមានសន្តិសុខ និងសុវត្ថិភាពល្អជាធម្មតា។ ឆ្លៀតឱកាសនេះ លោក ជួន ណារិន្ទ បានអំពាវនាវដល់ប្រជាពលរដ្ឋគ្រប់អាយុបោះឆ្នោតនៅទូទាំងប្រទេស ពិសេសប្រជាពលរដ្ឋគ្រប់អាយុបោះឆ្នោត ឬមានសិទ្ធិបោះឆ្នោតនៅខេត្តព្រះសីហនុ ត្រូវទៅចុះបញ្ជីឈ្មោះបោះឆ្នោតឲ្យបានទាំងអស់គ្នា៖ « សូមឲ្យប្រជាពលរដ្ឋគ្រប់អាយុបោះឆ្នោត ឬមានសិទ្ធិបោះឆ្នោត សូមអញ្ជើញទៅចុះឈ្មោះបោះឆ្នោតឲ្យបានទាំងអស់គ្នា ដើម្បីសម្ដែងឲ្យអន្តរជាតិមើលឃើញថា ប្រជាពលរដ្ឋខ្មែរមានឆន្ទៈ ឬបានស្ម័គ្រចិត្តទៅចុះឈ្មោះបោះឆ្នោតដោយមានសន្តិភាពពេញលេញល្អ។ ហើយក្នុងនាមខ្ញុំជាកងកម្លាំងប្រដាប់អាវុធ សូមធានាចូលរួមការពារសន្តិសុខសុវត្ថិភាពជូនបងប្អូនប្រជាពលរដ្ឋគ្រប់ពេលវេលា »។
ប្រធានលេខាធិការដ្ឋានរៀបចំការបោះឆ្នោតខេត្តព្រះសីហនុ លោក ហួត ផុន មានប្រសាសន៍ថា នៅថ្ងៃចុះឈ្មោះបោះឆ្នោតដំបូងនេះ មិនមានបញ្ហាខុសប្រក្រតីធំដុំកើតឡើងទេ ប៉ុន្តែទទួលស្គាល់ថា មានបញ្ហាបច្ចេកទេសផ្នែកការីកុំព្យូទ័រខ្លះនៅតាមការិយាល័យមួយចំនួនក្នុងចំណោមការិយាល័យចុះឈ្មោះទាំង ២៧ការិយាល័យនៅទូទៅខេត្តព្រះសីហនុ។ លោក ហួត ផុន ប៉ាន់ប្រមាណថា ខេត្តជាប់ឆ្នេរសមុទ្រមួយនេះអាចមានអ្នកមានសិទ្ធិបោះឆ្នោត ឬគ្រប់អាយុចុះឈ្មោះបោះឆ្នោតប្រមាណ ១៣ម៉ឺននាក់។
គណៈកម្មាធិការជាតិរៀបចំការបោះឆ្នោត (គ.ជ.ប) ការរៀបចំបញ្ជីបោះឆ្នោតថ្មីឆ្នាំ២០១៦ មានរយៈពេល ៩០ថ្ងៃ គឺចាប់ពីថ្ងៃទី១ ខែកញ្ញា ដល់ថ្ងៃទី២៩ ខែវិច្ឆិកា។ បញ្ជីឈ្មោះបោះឆ្នោតថ្មីនេះនឹងត្រូវប្រើប្រាស់សម្រាប់បម្រើឲ្យការបោះឆ្នោតជ្រើសរើសសមាជិកក្រុមប្រឹក្សាឃុំ-សង្កាត់នៅក្នុងឆ្នាំ២០១៧ និងបោះឆ្នោតជ្រើសតាំងតំណាងរាស្ត្រនៅឆ្នាំ២០១៨។
ការចុះឈ្មោះបោះឆ្នោតនេះ គ.ជ.ប បានប៉ាន់ប្រមាណថា ចំនួនអ្នកគ្រប់អាយុបោះឆ្នោតឆ្នាំ២០១៦ នេះ អាចមានចំនួនសរុបជាង ១០លាននាក់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។