សមាជិកក្រុមយុវជនសន្តិភាព លោក មួង សូនី ឲ្យដឹងនៅថ្ងៃទី៥ ខែកញ្ញា ថា ក្រុមយុវជនប្រមាណពី ៣០ ទៅ ៤០នាក់ ត្រៀមផ្កាម្លិះ និងផ្កាឈូក ៥០០ទង ចែកជូនទាហានជាលើកដំបូងនៅសួនច្បារក្ដាន់ពីរ ក្បែរក្រសួងការពារជាតិ៖ «យើងធ្វើមានរាំច្រៀង ច្រៀងបទចំរៀងសន្តិភាព ហើយមានសន្ទរកថាស្ដែងចេញពីទឹកចិត្តយុវជន ដើម្បីសន្តិភាព ហើយនិងចែកផ្កាដល់បងៗកងទ័ពទាហាន ក្នុងគោលបំណងដើម្បីឲ្យពួកគាត់យល់ឃើញថា អំពើហិង្សារវាងខ្មែរ និងខ្មែរ គួរតែបញ្ឈប់ ការតស៊ូបាតុកម្ម ការទាមទាររកយុត្តិធម៌របស់ប្រជាពលរដ្ឋខ្មែរ ដើម្បីទាមទារសិទ្ធិសេរីភាពជូនប្រទេសជាតិទាំងមូល អ្វីដែលយើងចង់បង្ហាញឲ្យប៉ូលិសទាហានឲ្យគាត់មានទឹកចិត្តស្រឡាញ់ពួកយើង ឲ្យគាត់យល់ថា យើងជាជនជាតិខ្មែរតែមួយ»។
យុវជនដើម្បីសន្តិភាព ក៏មានបំណងចែកផ្កាដល់ក្រុមបាតុករនៅព្រឹកថ្ងៃទី៧ ខែកញ្ញា ដែលចូលរួមធ្វើបាតុកម្មនៅទីលានប្រជាធិបតេយ្យដែរ ដើម្បីស្នើសុំឲ្យក្រុមបាតុករទាំងនោះធ្វើបាតុកម្មដោយអហិង្សា។
គម្រោងចែកផ្កាដូចគ្នានេះ សមត្ថកិច្ចធ្លាប់បានចាប់ខ្លួនយុវជន ៤នាក់ និងបញ្ជូនទៅតុលាការភ្លាមៗ ក្រោមបទចោទប្រកាន់ពីបទញុះញង់ឲ្យមានហិង្សាប្រដាប់អាវុធ ផ្ដួលរំលំរដ្ឋាភិបាល តាមមាត្រា៤៩៥ នៃក្រមព្រហ្មទណ្ឌ នៅគ្រាដែលយុវជនទាំងនោះមានបំណងចែកផ្កាកុលាបឲ្យដល់កងកម្លាំងប្រដាប់អាវុធ ក្នុងន័យសុំសន្តិភាព៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។