ភ្លើងឆេះតូបលក់កាបូប លក់ស្រោមដៃ និងស្រោមជើងរបស់អាជីវករខ្មែរនៅផ្សាររ៉ុងក្លឿ ស្រុកអារញ្ញ ខេត្តស្រះកែវ ប្រទេសថៃ ចំនួន ២តូប កាលពីម៉ោង ៩ និង ១៥នាទី ព្រឹកថ្ងៃទី៥ ខែមករា ឆ្នាំ២០១៧។
ប្រធានស្ដីទីក្រុមការងារទំនាក់ទំនងព្រំដែនកម្ពុជា-ថៃ ប្រចាំច្រកទ្វារអន្តរជាតិប៉ោយប៉ែត ខេត្តបន្ទាយមានជ័យ លោក តុល សំរឹទ្ធ មានប្រសាសន៍ដោយសន្និដ្ឋានជាជំហានដំបូងថា មូលហេតុដែលភ្លើងឆេះគឺសង្ស័យបណ្ដាលមកពីទុស្សេចរន្តអគ្គិសនី៖ «អ្នកលក់គាត់មិនចាប់អារម្មណ៍ ដោយជួនកាលគាត់តចរន្តអគ្គិសនីដោយខ្លួនឯងខុស ព្រោះកន្លែងនោះពុំមានអ្នកដាំបាយ និងចម្អិនអាហារដែលបង្កឲ្យភ្លើងឆេះនោះទេ។ តែការឆេះនេះមានរយៈពេលខ្លីដោយសារអ្នកលក់ដូរផ្អើលឆោឡោ ហើយសមត្ថកិច្ចថៃ ទៅពន្លត់បានវិញ»។
លោកបន្ថែមថា សមត្ថកិច្ចថៃ បានពន្លត់ភ្លើងរលត់អស់ទៅវិញនៅព្រឹកថ្ងៃទី៥ដដែល ប៉ុន្តែពុំទាន់ដឹងថា ភ្លើងឆេះខូចខាតទ្រព្យសម្បត្តិអស់ប៉ុន្មាននៅឡើយ។ ចំណែកពលរដ្ឋពុំមានគ្រោះថ្នាក់ ឬរងរបួសស្នាមដោយសារភ្លើងឆេះនោះទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។