សាលាដំបូងរាជធានីភ្នំពេញ នៅរសៀលថ្ងៃទី១ ខែមេសា ផ្ដន្ទាទោសព្រះសង្ឃខ្មែរក្រោម ២អង្គ ឲ្យជាប់ពន្ធនាគារពី ៣ខែ ដល់ ២ឆ្នាំ ពីបទគំរាមសម្លាប់ និងរក្សាសារធាតុញៀន។ អង្គការសមាគមខ្មែរកម្ពុជាក្រោមនៅកម្ពុជា ចាត់ទុកការផ្ដន្ទាទោសព្រះសង្ឃខ្មែរក្រោម ២អង្គពេលនេះ ថាជារឿងអយុត្តិធម៌សម្រាប់ខ្មែរក្រោម។
ព្រះសង្ឃខ្មែរក្រោម ២អង្គដែលត្រូវបានតុលាការកាត់ទោសឲ្យជាប់ពន្ធនាគារពេលនេះ មានព្រះនាម ដាវ ទេព្យ និង ជា វណ្ណដា។ ពួកគាត់ត្រូវបានសមត្ថកិច្ចចាប់ព្រះកាយកាលពីខែសីហា ឆ្នាំ២០១៥ ហើយត្រូវបានតុលាការបើកសវនាការជំនុំជម្រះកាលពីថ្ងៃទី២២ ខែមីនា ដោយចោទពីបទគំរាមសម្លាប់ ការរក្សាទុកសារធាតុញៀន និងការប្រើប្រាស់ឯកសារសាធារណៈក្លែង។
ទោះជាយ៉ាងណាក៏ដោយ ក្នុងពេលប្រកាសសាលក្រម ចៅក្រមជំនុំជម្រះ លោក អ៊ឹម វណ្ណៈ ប្រកាសថា ព្រះតេជព្រះគុណ ជា វណ្ណដា ត្រូវបានតុលាការទម្លាក់បទចោទចំនួន២ គឺបទគំរាមសម្លាប់ និងរក្សាសារធាតុញៀន។ ចំណែកបទប្រើប្រាស់ឯកសារសាធារណៈក្លែង ត្រូវបានតុលាការកែប្រែទៅជាបទស្លៀកដណ្ដប់បែបព្រះពុទ្ធសាសនាដោយគ្មានសិទ្ធិ ហើយត្រូវផ្ដន្ទាទោសដាក់ពន្ធនាគារចំនួន ៣ខែ។ ដូច្នេះបានន័យថា ព្រះអង្គនឹងត្រូវបានដោះលែង ដោយសារព្រះអង្គត្រូវបានឃុំខ្លួនរយៈពេល ៧ខែហើយ គិតចាប់តាំងពីខែសីហា ឆ្នាំ២០១៥ មក។
សម្រាប់ព្រះតេជព្រះគុណ ដាវ ទេព្យ ព្រះអង្គត្រូវបានផ្ដន្ទាទោសជាប់ពន្ធនាគាររយៈពេល ២ឆ្នាំ ពីបទគំរាមសម្លាប់ និងរក្សាសារធាតុញៀន។ ចំណែកបទប្រើប្រាស់ឯកសារសាធារណៈក្លែង ត្រូវបានតុលាការទម្លាក់ចោល។
ព្រះតេជព្រះគុណ ដាវ ទេព្យ ចាត់ទុកការសម្រេចរបស់តុលាការ ថាជាអំពើអយុត្តិធម៌សម្រាប់ព្រះអង្គ។ ព្រះអង្គថា នេះគ្រាន់តែជាល្បិចស្វាស៊ីបាយលាបមាត់ពពែដើម្បីទម្លាក់កំហុសលើព្រះអង្គ។ ព្រះអង្គបានស្រែកនៅពេលសមត្ថកិច្ចបណ្ដើរឡើងឡានដឹកយកទៅកាន់ពន្ធនាគារថា វាជាអយុត្តិធម៌សម្រាប់ព្រះសង្ឃខ្មែរក្រោម៖ «អយុត្តិធម៌សម្រាប់ព្រះសង្ឃខ្មែរកម្ពុជាក្រោមណាស់ ការចាប់ខ្លួននយោបាយ អយុត្តិធម៌ គេចង់ធ្វើបាបព្រះសង្ឃខ្មែរកម្ពុជាក្រោម ទម្លាក់កំហុសដើម្បីចាប់ខ្លួន»។
ចំណែកព្រះតេជព្រះគុណ ជា វណ្ណដា ដែលត្រូវបានតុលាការកាត់ឲ្យជាប់គុកចំនួន ៣ខែ នៅពេលចេញពីតុលាការ មិនបានស្រែកដូចកាលពេលមុនៗឡើយ។
ឪពុកព្រះតេជព្រះគុណ ជា វណ្ណដា គឺលោក តាំង ជា ដែលទើបឡើងមកពីខេត្តឃ្លាំង ដែនដីកម្ពុជាក្រោម ដើម្បីរង់ចាំស្ដាប់លទ្ធផលសវនាការកូនប្រុស សម្ដែងភាពរីករាយពេលដឹងថា កូនប្រុសនឹងត្រូវដោះលែង។
បើទោះជាយល់ថា ការចាប់ខ្លួនកូនប្រុសលោកមានភាពអយុត្តិធម៌តាំងពីដំបូងក្តី ប៉ុន្តែបុរសខ្មែរក្រោមវ័យជាង ៦០ឆ្នាំរូបនេះថ្លែងថា លោកសុខចិត្តទទួលយក ព្រោះលោកថា បើទោះបីជានៅតតាំងតទៅទៀត ក៏លោកមិនសង្ឃឹមថា ឈ្នះគេនោះដែរ៖ «មិនដឹងធ្វើម៉េចទេ សុំឲ្យតែរួចខ្លួន កូនខ្ញុំបានសុខបានហើយ កុំឲ្យគេធ្វើបាបតទៅទៀត។ ឥឡូវបើចង់ទាមទារក៏មិនដឹងទៅទាមទារឯណាដែរ ជាអ្នកស្រែដឹងច្បាប់ដឹងទម្លាប់អី មានដឹងអីណា តាមតែគេថា បើគេឲ្យជាប់ក៏មិនដឹងថាម៉េចដែរ គ្មានអ្នកតវ៉ា មិនចេះដឹង មិនដឹងទៅតវ៉ាឯណា?»។
ការប្រកាសសាលក្រមរបស់តុលាការធ្វើឡើងដោយមិនមានវត្តមានរបស់មេធាវីការពារក្តីជនជាប់ចោទ លោក ហម ស៊ុនរិទ្ធិ ឡើយ។ ប៉ុន្តែលោកឲ្យដឹងតាមទូរស័ព្ទថា ការសម្រេចនេះជារឿងអយុត្តិធម៌។
កន្លងមកសង្គមស៊ីវិលបានរិះគន់ទៅលើចំណាត់ការរបស់សមត្ថកិច្ច និងតុលាការចំពោះករណីព្រះសង្ឃទាំង ២អង្គ។ ពួកគេថា វត្ថុតាងដែលតុលាការយកមកដាក់បន្ទុក មិនអាចយកធ្វើជាមូលដ្ឋានច្បាប់បានឡើយ ដោយហេតុថា ក្នុងពេលសមត្ថកិច្ចស្វែងរកវត្ថុតាង ព្រះសង្ឃទាំង ២អង្គមិនឋិតនៅកន្លែងឡើយ ហើយក្រោយមកត្រូវបានសមត្ថកិច្ចចាប់បង្ខំឲ្យផ្តិតមេដៃទទួលស្គាល់វត្ថុតាងទៅវិញ។ លើសពីនេះ យុវជនដែលជាដើមបណ្ដឹងប្ដឹងពួកគាត់ពីបទគំរាមសម្លាប់ ក៏ត្រូវសមត្ថកិច្ចបង្ខំឲ្យផ្ដិតមេដៃលើពាក្យបណ្ដឹង ហើយក្រោយមក យុវជនរូបនោះថែមទាំងបានដកពាក្យបណ្ដឹងវិញទៀតផង។
ប្រធានលេខាធិការដ្ឋានអង្គការ-សមាគមខ្មែរកម្ពុជាក្រោមប្រចាំកម្ពុជា លោក តាំង សារៈ ថ្លែងចាត់ទុកការសម្រេចរបស់តុលាការនេះ ថាជាការបំបាក់ស្មារតីព្រះសង្ឃខ្មែរក្រោមទូទៅ៖ «ខ្ញុំមើលឃើញថា ការចាប់ព្រះកាយលោកក្តី ការកាត់ទោសលោកក្តី គឺអយុត្តិធម៌ក្រៃលែង ហើយនេះជាការគំរាមកំហែងដល់ស្មារតី ដើម្បីកុំឲ្យព្រះសង្ឃខ្មែរក្រោមធ្វើការតវ៉ាលើបញ្ហាអ្វីមួយនៅពេលអនាគត»។
ចាប់តាំងពីចុងឆ្នាំ២០១៤ មក មានព្រះសង្ឃខ្មែរក្រោមចំនួន ៥អង្គហើយ ត្រូវបានសមត្ថកិច្ចខ្មែរចាប់ខ្លួន ក្នុងនោះមានអតីតព្រះសង្ឃ សឺន ហាយ ឃិន វណ្ណៈ សាន កុសល ព្រមទាំងព្រះសង្ឃ ដាវ ទេព្យ និង ជា វណ្ណដា នៅពេលនេះ។ ពួកគេត្រូវបានតុលាការចោទប្រកាន់ពីបទប្រើប្រាស់ឯកសារសាធារណៈក្លែង បទប្រឆាំងអ្នករាជការសាធារណៈ បទចូលរួមសមាគមទុច្ចរិត បទគំរាមសម្លាប់ និងការរក្សាសារធាតុញៀន។ ប៉ុន្តែមកទល់ពេលនេះ មានតែព្រះសង្ឃ ព្រះនាម ដាវ ទេព្យ និង ជា វណ្ណដា ដែលកំពុងជាប់ពន្ធនាគារ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។