សមត្ថកិច្ចខណ្ឌ៧មករា ចាប់ខ្លួនមនុស្ស ២នាក់ ក្នុងពេលអតីតអ្នកបើកបររថយន្តឱ្យក្រុមហ៊ុនរថយន្តក្រុងកាពីតូល តវ៉ាឲ្យថៅកែក្រុមហ៊ុនចរចា និងយកពួកគាត់ចូលធ្វើការវិញ នៅព្រឹកថ្ងៃទី៦ ខែកុម្ភៈ។ ការចាប់ខ្លួនបន្ទាប់ពីក្រុមអ្នកតវ៉ាប៉ះទង្គិចជាមួយសមាគមអ្នករត់រ៉ឺម៉កកង់បី ដែលប្រើដំបងឈើ បំពង់ទីប និងដុំថ្ម បណ្ដាលឲ្យមនុស្សជាង ១០នាក់រងរបួសធ្ងន់ស្រាល។
ក្រុមអ្នករត់រ៉ឺម៉កកង់បី ដែលគេស្គាល់ថា សមាគមរួបរួមដើម្បីអភិវឌ្ឍន៍កម្ពុជា ដែលក្នុងដៃមានកាន់ដំបងឈើ បំពង់ទីប ម្នាក់ៗមានវិទ្យុទាក់ទង និងពាក់មួកសុវត្ថិភាពផង បានវាយប្រតប់គ្នា និងដណ្ដើមបដាជាមួយក្រុមអតីតអ្នកបើកបររថយន្តឱ្យក្រុមហ៊ុនកាពីតូល នៅខាងមុខក្រុមហ៊ុន ជិតផ្សារអូរឫស្សី ក្នុងសង្កាត់បឹងព្រលិត ខណ្ឌ៧មករា។
បន្ទាប់ពីវាយតប់គ្នាមួយប្រាវ កម្លាំងសមត្ថកិច្ចដែលមានទាំងខែល និងដំបងឆក់ បានព្យាយាមរុញច្រានឲ្យអ្នកតវ៉ាជាអតីតអ្នកបើករថយន្តក្រុងអោយដើរចេញពីកន្លងតវ៉ា។
អតីតអ្នកបើករថយន្តក្រុងមួយរូប លោក ថេត វុទ្ធី ដែលមានរបួសត្រង់ក្បាល ចោទថា ក្រុមហ៊ុនកាពីតូល បានជួលក្រុមអ្នករត់រ៉ឺម៉កកង់បីវាយបំបែកហ្វូងអ្នកតវ៉ា៖ «ទោះត្រូវវាយដំច្រំធាក់យ៉ាងម៉េចក៏ដោយ ព្រោះនេះជាឆន្ទៈរបស់ពួកខ្ញុំដែលទទួលរងការកៀបសង្កត់ជិះជាន់មកលើពួកខ្ញុំជាច្រើនឆ្នាំមកហើយ។ លោកថៅកែកាពីតូល នោះគាត់ប្រើពួកខ្ញុំធ្វើការថ្ងៃអាទិត្យ ថ្ងៃបុណ្យ មិនមានពេលឈប់សម្រាក មិនមានបំណាច់ឆ្នាំមិនមានកាត ប.ស.ស ទៅព្យាបាលជំងឺ»។
អតីតអ្នកបើករថយន្តក្រុងមួយរូបទៀត គឺលោក ប៉ិល វឿន ថ្លែងថា ពួកគាត់ទាំង ៤៥នាក់ដែលក្រុមហ៊ុនបានបញ្ឈប់ស្នើឲ្យក្រុមហ៊ុនយកចូលធ្វើការវិញ ទៅតាមសេចក្ដីបង្គាប់របស់ស្ថាប័នពាក់ព័ន្ធ ប៉ុន្តែក្រុមហ៊ុនមិនអនុវត្តតាម ហើយបែរជាដាក់ពាក្យប្ដឹងពួកគាត់ទៅតុលាការទៀតផង៖ «សូម្បីសម្ដេចគាត់និយាយថា ក្រុមហ៊ុនមួយមានសហជីពមួយក៏ក្រុមហ៊ុនមិនអនុវត្តតាម។ សូម្បីតែសាលារាជធានីភ្នំពេញ ដាក់បញ្ជាឲ្យក្រុមហ៊ុនយកពួកខ្ញុំ ៤៥នាក់ ចូលធ្វើការវិញ ថៅកែក្រុមហ៊ុនបាននិយាយប្រាប់ប៉ូលិសថា គេមិនយកទេ មនុស្សទាស់គ្នា ហើយយកមកធ្វើការម៉េចកើត។ គាត់ចោទខ្ញុំគ្រប់ច្រកល្ហក»។
ឆ្លើយតបទៅនឹងការចោទប្រកាន់នេះ ជំនួយការអគ្គនាយកក្រុមហ៊ុនកាពីតូល លោក ភូ កុកវ៉ាន់ ថ្លែងថា អ្វីដែលអតីតអ្នកបើករថយន្តលើកឡើងគឺជាការមួលបង្កាច់ទាំងស្រុង។ លោកថា ក្រុមហ៊ុនបានប្ដឹងពួកគាត់ពីបទរំលោភកិច្ចសន្យាការងារជាមួយក្រុមហ៊ុន រំលោភបទបញ្ជាផ្ទៃក្នុងដែលបានលួចកិបកេងទ្រព្យសម្បត្តិក្រុមហ៊ុន និងរំលោភច្បាប់ការងារ។
លោកថា ការតវ៉ាគឺជាការរៀបចំទុកដោយមានពីសហភាពការងារកម្ពុជា៖ «ពួកគាត់បានយកជនពាលនៅខាងក្រៅ ដែលមិនមែនជាអតីតអ្នកបើកបរក្រុមហ៊ុន។ ម្សិលមិញក៏ដូចគ្នា គឺមកពីរោងចក្រផ្សេងៗមានទាំងស្រីទាំងប្រុស ថ្ងៃនេះក៏ដូចគ្នា គឺគាត់បានកាក់ឡានរបស់ក្រុមហ៊ុន។ យើងមានភស្តុតាងយើងមានវីដេអូច្បាស់លាស់។ ពួកគាត់បានប្រើដុំថ្មគប់មកលើសមត្ថកិច្ចទៀត។ យើងបានប្ដឹងទៅសាលាដំបូងរាជធានីភ្នំពេញ ដើម្បីចាត់វិធានការរំលាយកិច្ចសន្យាជាមួយគាត់ និងប្ដឹងទាមទារសំណងពីពួកគាត់ដែលពួកគាត់ធ្វើឲ្យខូចខាតដល់ទ្រព្យ សម្បត្តិរបស់ក្រុមហ៊ុន និងសេវាកម្មដែលមានការជឿទុកចិត្តពីភ្ញៀវកន្លងមក»។
ក្នុងពេលតវ៉ានោះ អតីតអ្នកបើករថយន្តក្រុងម្នាក់ ឈ្មោះ ណន វណ្ណា និងសមាជិកសមាគមកម្មករ និងសេដ្ឋកិច្ចក្រៅប្រព័ន្ធកម្ពុជា លោក រស់ ស៊ីថៃ ត្រូវកម្លាំងសមត្ថកិច្ចចាប់ខ្លួនបញ្ជូនទៅអធិការខណ្ឌ៧មករា។ ក្នុងពេលប៉ះទង្គិចបង្កឲ្យអតីតអ្នកបើករថយន្តក្រុង ១៣នាក់រងរបួស ក្នុងនោះ ២នាក់របួសធ្ងន់ដោយបែកក្បាល និងបែកភ្នែក និងសមត្ថកិច្ចម្នាក់ក៏រងរបួសដែរ។
អតីតអ្នកបើកបររថយន្តឱ្យក្រុមហ៊ុនរថយន្តក្រុងកាពីតូល ជាង ៤០នាក់ និងមន្ត្រីសហជីពស៊ីខៅឌូ រួមទាំងមន្ត្រីសមាគមកម្មករ និងសេដ្ឋកិច្ចក្រៅប្រព័ន្ធកម្ពុជា នៅព្រឹកថ្ងៃទី៦ កុម្ភៈ បាននាំគ្នាបន្តការតវ៉ារបស់ខ្លួនខាងមុខក្រុមហ៊ុន ជិតផ្សារអូរឫស្សី ដោយឈរកាន់បដា រារាំងរថយន្តដឹកភ្ញៀវនិងស្រែកអំពាវនាវដល់សាធារណជនឱ្យផ្អាកប្រើប្រាស់សេវា ឬជិះរថយន្តក្រុងរបស់ក្រុមហ៊ុនកាពីតូល។
ទាក់ទងទៅនឹងការចាប់ខ្លួនមនុស្ស មន្ត្រីអធិការខណ្ឌ៧មករា លោក នេត ស៊ីថេត បដិសេធមិនអត្ថាធិប្បាយដោយថា ជាប់រវល់។
មន្ត្រីឃ្លាំមើលសិទ្ធិមនុស្សនៃអង្គការលីកាដូ លោក អំ សំអាត ថ្លែងថា នេះមិនមែនជាលើកទី១នៅពេលអតីតអ្នកបើកឡានក្រុងតវ៉ា ហើយមានភាគីទី៣ បង្កឲ្យផ្ទុះអំពើហិង្សា។ លោកថា នេះជាទិដ្ឋភាពមួយដែលកងកម្លាំងបណ្ដោយឲ្យកើតអំពើហិង្សាដើម្បីយកលេសបង្ក្រាប និងចាប់ខ្លួនក្រុមអតីតអ្នកបើករថយន្តក្រុង៕
សូមស្ដាប់បទសម្ភាសន៍របស់អ្នកយកព័ត៌មាននៃវិទ្យុអាស៊ីសេរី អ្នកស្រី ខែ សុណង ជាមួយនឹងមន្ត្រីឃ្លាំមើលសិទ្ធិមនុស្សនៃអង្គការលីកាដូ លោក អំ សំអាត ទាក់ទងនឹងបាតុកម្មនេះបន្ថែមដូចតទៅ៖
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។