មន្ត្រីសម្ព័ន្ធសហជីពចលនាកម្មករ ២រូប ត្រូវបានអាជ្ញាធរប៉ូលិសនៅក្រុងបាវិត ខេត្តស្វាយរៀង កោះហៅទៅបំភ្លឺរឿងដឹកនាំកម្មករធ្វើកូដកម្មមានវិវាទជាមួយមន្ត្រីរោងចក្រនៅតំបន់សេដ្ឋកិច្ចពិសេស នៅក្រុងបាវិត នៅព្រឹកថ្ងៃទី២៨ មេសា។ ប៉ុន្តែអាជ្ញាធរមិនបានសាកសួរអ្វីមន្ត្រីសហជីពនៅឡើយទេ ដោយសារក្រុមកម្មករលើកគ្នាប្រមាណ ១ពាន់នាក់មកគាំទ្រមន្ត្រីសហជីពនៅមុខសាលាក្រុង។
មន្ត្រីសម្ព័ន្ធសហជីពចលនាកម្មករចាត់ទុកការកោះហៅទៅស្រាយបំភ្លឺរបស់អាជ្ញាធរប៉ូលិសក្រុងបាវិត នេះ ថាជារឿងអយុត្តិធម៌ បំភិតបំភ័យលើមន្ត្រីសហជីព ដើម្បីរារាំងមិនឲ្យចូលរួមដឹកនាំកម្មករធ្វើកូដកម្ម តវ៉ាអត្ថប្រយោជន៍ការងារក្នុងរោងចក្រ។
មន្ត្រីសម្ព័ន្ធសហជីពចលនាកម្មករទាំង ២រូប ដែលអាជ្ញាធរកោះហៅ រួមមាន លោក ជា ឧត្ដម និងលោក ស៊ិន ចិត្ត អ្នកទាំងត្រូវបានអាជ្ញាធរកោះហៅក្នុងរឿងទំនាស់ជាមួយមន្ត្រីរោងចក្រនាពេលធ្វើកូដកម្ម កាលពីថ្ងៃទី២៦ មេសា កន្លងទៅ។
មន្ត្រីសម្ព័ន្ធសហជីពចលនាកម្មករ ដែលចូលទៅបំភ្លឺតាមការកោះហៅរបស់អាជ្ញាធរម្នាក់ គឺ ជា ឧត្ដម ថ្លែងនៅថ្ងៃទី២៨ មេសា ថា អាជ្ញាធរប៉ូលិសក្រុងបាវិត កោះហៅរូបលោកទៅបំភ្លឺ ដោយពុំមានកំហុសអ្វីទាល់តែសោះ។ លោកជាឧត្ដមបញ្ជាក់ថា លោកបានចូលខ្លួនទៅបំភ្លឺតាមការកោះហៅរបស់អាជ្ញាធរ នៅសាលាក្រុងបាវិត ប៉ុន្តែអាជ្ញាធរបែរជាមិនបានចេញមកសាកសួរអ្វីលើរូបលោកទាំង ២នាក់ទេ គឺគ្រាន់តែបញ្ជាក់ថា ជាប់រវល់ហើយពន្យារពេលការសាកសួរពេលក្រោយទៅវិញ។
លោកថាអាជ្ញាធរពន្យារសាកសួរនេះ ដោយសារឃើញមានក្រុមប្រមាណ ១ពាន់នាក់ ប្រដាប់ដោយគ្រឿងបំពងសំឡេងផង បានអមដំណើរធ្វើជាសាក្សីលើរូបលោកដល់សាលាក្រុង។ លោកថា អាជ្ញាធរមានគម្រោងបញ្ជូនសំណុំរឿងក្នុងទំនាស់របស់លោកទាំង ២នាក់ ទៅដោះស្រាយនៅតុលាការនាពេលខាងមុខ។
លោក ជា ឧត្ដម៖ «ខ្ញុំបន្តិចកោះហៅទៅហើយពុំមានការជជែក មានការដោះស្រាយ ប៉ុន្តែទៅជារុញសំណុំរឿងទៅតុលាការអីអ៊ីចឹង។ អត់មានបញ្ហាធំដុំហ្នឹងកោះហៅទៅផង ព្រោះអីគ្រាន់តែថាធម្មតាភាគីខាងរោងចក្រនិងភាគីខាងសហជីពតែងប្រឈមមុខគ្នា។ ជាក់ស្ដែងខាងរោងចក្រហ្នឹងមានកាយវិការមិនសមមកលើយើងអ៊ីចឹងទៅ ដូចជាសកម្មភាពខ្ញុំជាដើម គាត់ទាត់ខ្ញុំ ហើយគាត់ប្ដឹងខ្ញុំទៀត»។
ឆ្លើយតបនឹងបញ្ហានេះ អធិការក្រុងបាវិត លោក កែវ គង់ មានប្រសាសន៍បញ្ជាក់ថា ការកោះហៅមន្ត្រីសម្ព័ន្ធសហជីពចលនាកម្មករទាំង ២រូបមកសាកសួរធ្វើឡើងតាមពាក្យបណ្ដឹងរបស់ប្រជាពលរដ្ឋដែលប្ដឹងមកអាជ្ញាធរឲ្យដោះស្រាយដោយចោទប្រកាន់ពីបទបរិហារកេរ្តិ៍គឺពុំមែនជារឿងទំនាស់មិនឲ្យធ្វើកូដកម្មទេ។ លោកថា អាជ្ញាធរក៏ពុំមានគម្រោងបញ្ជូនសំណុំរឿងទៅតុលាការដូចការលើកឡើងរបស់មន្ត្រីសហជីពឡើយ។
លោក កែវ គង់៖ «បណ្ដឹងបរិហារកេរ្តិ៍ប្រជាពលរដ្ឋដាក់បណ្ដឹងមកខ្ញុំហ្នឹងណាស់! ដល់ឥឡូវខ្ញុំវារវល់ពេក មិនទាន់បានកោះហៅ មិនទាន់បានជួបសួរនាំទេ ហើយកម្មកររោងចក្រគ្រប់រោងចក្រគេបាតុកម្ម អ៊ីចឹងពន្យារពេលសិន ហើយអ្នកណានិយាយអ្នកហ្នឹងទទួលទៅ ខ្ញុំមិនទាន់បានធ្វើស្អីបន្តិចទេ»។
មន្ត្រីសម្របសម្រួលអង្គការលីកាដូ (Licadho) ប្រចាំខេត្តស្វាយរៀង ដែលបានអង្កេតរឿងនេះ លោក នុត ប៊ូពិណារ័ត្ន បញ្ជាក់ថា អាជ្ញាធរកោះហៅមន្ត្រីសហជីព ទាំង ២រូប ទៅសាកសួរ ក្នុងគោលបំណងរារាំងមិនឲ្យដឹកនាំកម្មករធ្វើកូដកម្មទាមទារអត្ថប្រយោជន៍ការងារជាមួយរោងចក្រ គឺពុំមែនជាការកោះហៅទៅសាកសួរ ក្នុងរឿងទំនាស់បរិហារកេរ្តិ៍ ដូចការលើកឡើងរបស់អាជ្ញាធរប៉ូលិសឡើយ។
លោក នុត ប៊ូពិណារ័ត្ន៖ «ហេតុផលដែលគេថាមានអ្នកប្ដឹងពាក់ព័ន្ធបរិហារកេរ្តិ៍បរអីហ្នឹងជាអាជ្ញាធរហេតុផលដែលអាជ្ញាធរអះអាង ប៉ុន្តែការពិតដែលយើងដឹងគឺមិនមែនទេ គឺជារឿងមួយគេអាចចោទសហជីពហ្នឹងថា ជាអ្នកញុះញង់ ឬជាអ្នកដឹកនាំឲ្យមានការធ្វើកូដកម្ម។ អ៊ីចឹងរឿងនេះជារឿងមួយដែលគេដាក់បន្ទុកទៅលើសហជីពហ្នឹងតែម្ដង តែងតែថាសហជីពហ្នឹងជាអ្នកញុះញង់កម្មករអីហ្នឹង។អ៊ីចឹងក្នុងនាមសង្គមស៊ីវិលនេះ មិនមែនជារឿងពិតទេ មិនមែនជាថាមានអ្នកប្ដឹងទេ ជារឿងមួយគេធ្វើឲ្យមានការភិតភ័យទៅដល់សហជីពហ្នឹង កុំឲ្យថ្ងៃក្រោយហ៊ានធ្វើសកម្មភាពអីផ្ដេសផ្ដាសទៀត»។
មន្ត្រីសម្ពន្ធសហជីពចលនាកម្មករកាលពីមុខបុណ្យចូលឆ្នាំកន្លងទៅពួកគេធ្លាប់ធ្វើសកម្មភាពដើរចែកខិត្តប័ណ្ណអំពាវនាវកម្មករឲ្យចូលរួមធ្វើកូដកម្មសុំឲ្យដោះលែងអ្នកដែលជាប់ឃុំ ២១នាក់នៅពន្ធនាគារត្រពាំងផ្លុង ខេត្តកំពង់ចាម និងសុំដំឡើងប្រាក់ខែគោល ១៦០ដុល្លាររបស់កម្មករ ហើយចាប់តាំងពីពេលនោះមក អាជ្ញាធរក៏បានដាក់កម្លាំងតាមដានរំខានសកម្មភាពរបស់ពួកគេជាបន្តបន្ទាប់រហូតមក៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។