កម្មករកម្មការិនីធ្វើការរោងចក្រផលិតស្បែកជើងឈ្មោះ អ៊ែរ៉ូសហ្វ សាំមីត ហ្វូតវែរ (Aerosoft Summit Foot Wear) នៅស្រុកសំពៅលូន ខេត្តបាត់ដំបង ប្រមាណ ២៥០នាក់ មិនបានចូលធ្វើការងារចំនួន ១៩ថ្ងៃហើយ គិតត្រឹមថ្ងៃទី១៩ កក្កដា បន្ទាប់ពីពួកគេតវ៉ាឲ្យក្រុមហ៊ុនគោរពលក្ខខណ្ឌការងារចំនួន ១០ចំណុច។
លក្ខខណ្ឌការងារសំខាន់ដែលកម្មករកម្មការិនីទាមទារមានដូចជា ទាមទារប្រាក់ថ្លៃធ្វើដំណើរ ៧ដុល្លារអាមេរិកក្នុងមួយខែ ប្រាក់បន្ថែមធ្វើការងារទៀងទាត់មួយខែ ១០ដុល្លារ ប្រាក់បន្ថែមធ្វើការងារឈប់សម្រាកថៃបុណ្យ។ កម្មករស្នើឲ្យក្រុមហ៊ុនផ្ដល់សិទ្ធិសុំច្បាប់ឈប់សម្រាកនៅពេលមានធុរៈ និងស្នើឲ្យក្រុមហ៊ុនបញ្ចូលកម្មករពេញសិទ្ធិ បន្ទាប់ពីពួកគេធ្វើការងារបាន ៣ខែ ជាដើម។
តំណាងកម្មការិនីរោងចក្រផលិតស្បែកជើង អ៊ែរ៉ូសហ្វ សាំមីត ហ្វូតវែរ លោកស្រី សេង សុធា ឲ្យដឹងនៅថ្ងៃទី១៩ កក្កដា ថា ថៅកែរោងចក្រនេះមិនគោរពលក្ខខណ្ឌការងារតាមច្បាប់ទេ។ លោកស្រីអះអាងថា ពួកគាត់ទទួលបានប្រាក់ខែតិចតួច ហើយខំប្រឹងធ្វើការងារទៀងទាត់រាល់ថ្ងៃ មិនហ៊ានឈប់សម្រាកឡើយ ក៏ប៉ុន្តែខាងក្រុមហ៊ុននេះពុំបានផ្ដល់ប្រាក់លើកទឹកចិត្តដល់ពួកគាត់នោះទេ។ ជាងនេះទៀត ខាងក្រុមហ៊ុនក៏ពុំបានផ្ដល់ប្រាក់ថ្លៃធ្វើដំណើរប្រចាំខែជូនកម្មករម្នាក់ ១០ដុល្លារដែរ។
លោកស្រីបញ្ជាក់ថា ពួកគាត់បានតវ៉ាឲ្យថៅកែរោងចក្រនេះដោះស្រាយជាបន្តបន្ទាប់ ដោយពុំបានចូលធ្វើការងារតាំងពីថ្ងៃទី១ កក្កដា មក៖ « ដល់ពេលយើងចេញមកតវ៉ា ក្រុមហ៊ុនអត់ព្រមទទួលស្គាល់ឲ្យពួកខ្ញុំធ្វើការ ៣ខែពេញសិទ្ធិទេ ដោយឲ្យពួកខ្ញុំធ្វើកិច្ចសន្យាធ្វើការងារ ៣ខែទៀតទើបបានពេញសិទ្ធិ »។
វិទ្យុអាស៊ីសេរី ពុំអាចទាក់ទងតំណាងរោងចក្រផលិតស្បែកជើង អ៊ែរ៉ូសហ្វ សាំមីត ហ្វូតវែរ ដើម្បីសុំអត្ថាធិប្បាយជុំវិញបញ្ហានេះបានទេនៅថ្ងៃទី១៩ កក្កដា។
ប៉ុន្តែមន្ត្រីនៃមន្ទីរការងារ និងបណ្ដុះបណ្ដាលវិជ្ជាជីវៈខេត្តបាត់ដំបង លោក ឡឹក ផល្លា មានប្រសាសន៍ថា គណៈកម្មការអាជ្ញាកណ្ដាលកំពុងដំណើរនីតិវិធីផ្លូវច្បាប់ ដើម្បីពិនិត្យ និងដោះស្រាយលើការងារនេះ ក៏ប៉ុន្តែលោកពុំដឹងថា លទ្ធផលនៃការសម្រេចរបស់គណៈកម្មការអាជ្ញាកណ្ដាល នឹងចេញពេលណានៅឡើយ៖ « ប្រហែលមិនយូរទេ ព្រោះអីរឿងនេះបានកើតឡើងយូរដែរហើយ។ ម្យ៉ាងទៀតសំណុំរឿងទើបមកដល់ដៃគណៈកម្មការអាជ្ញាកណ្ដាលនៅថ្ងៃទី៨ ទេ។ អ៊ីចឹងរឿងនេះគេកំពុងតែដុតដៃដុតជើងឲ្យវាចេញក្នុងពេលឆាប់ៗ »។
ទោះបីជាយ៉ាងនេះក្ដី ប្រធានស្ដីទីសហព័ន្ធសហជីពសំឡេងកម្មករកម្ពុជា លោក ហុង ណាំហោ បញ្ជាក់ថា ថៅកែរោងចក្រនេះតែងកេងចំណេញកម្លាំងពលកម្មពីក្រុមកម្មករ ធ្វើឲ្យពួកគេជួបការលំបាកមិនអាចទ្រាំបាន ក៏នាំគ្នាតវ៉ាតែម្ដង។ លោកបញ្ជាក់ថា អាជ្ញាធរពាក់ព័ន្ធបន្ទាប់ពីកម្មករតវ៉ាហើយ កន្លងមកបានត្រឹមតែកោះប្រជុំជាមួយភាគីរោងចក្រ ដោយមិនមានដំណោះស្រាយជូនកម្មករនោះឡើយ៖ « ឃើញថាក្រុមហ៊ុននេះអត់គោរពច្បាប់នៅកម្ពុជា ហើយគាត់ក៏មិនខ្វល់ពីការរស់នៅរបស់កម្មករដែរ ព្រោះបើគាត់ចេះគិតគូរ គាត់នឹងដោះស្រាយឲ្យក្រុមកម្មករបាត់ទៅហើយ »។
រោងចក្រនេះមានទីតាំងស្ថិតនៅឃុំតាស្ដា ស្រុកសំពៅលូន ខេត្តបាត់ដំបង និងមានកម្មករធ្វើការសរុបប្រមាណ ៣០០នាក់ ក្នុងនោះកម្មករមិនទាន់ពេញសិទ្ធិប្រហែល ១៥០នាក់ ក្នុងចំណោមនោះ មានកម្មករខ្លះធ្វើការបាន ៣ខែ និងខ្លះទៀតចូលធ្វើការចាប់ពី ៤ខែឡើងទៅ។ ក្រុមកម្មករបញ្ជាក់ថា ប្រសិនបើភាគីក្រុមហ៊ុនពុំបានដោះស្រាយតាមការទាមទារពួកគាត់ទេ នោះពួកគាត់នឹងប្រមូលផ្ដុំគ្នាតវ៉ាមុខរោងចក្របន្តទៀត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។