សមត្ថកិច្ចកម្ពុជា នៅថ្ងៃទី៣ កក្កដា បន្តបិទច្រករបៀងព្រំដែនជាប់ប្រទេសថៃ មួយរយៈចាប់ពីខេត្តបាត់ដំបង និងខេត្តបន្ទាយមានជ័យ ដើម្បីទប់ស្កាត់មិនឲ្យពលរដ្ឋឆ្លងដែនខុសច្បាប់ទៅធ្វើការនៅប្រទេសថៃ តទៅទៀត ខណៈថៃ កំពុងតែចាប់បញ្ជូនពលករខ្មែរមិនស្របច្បាប់មកកម្ពុជា វិញនោះ។
អង្គការសង្គមស៊ីវិលលើកឡើងថា ប្រសិនបើសមត្ថកិច្ចបិទច្រករយៈពេលយូរ នឹងប៉ះពាល់ដល់ពលរដ្ឋរស់នៅតាមព្រំដែន។
ចាប់តាំងពីសមត្ថកិច្ចបិទច្រករបៀងនៅព្រំដែនថៃ ភ្លាម នៅតាមតំបន់ខ្លះក្នុងខេត្តបន្ទាយមានជ័យ មានសភាពស្ងប់ស្ងាត់ពុំសូវមានមនុស្សធ្វើដំណើរឆ្លងកាត់ឡើយ។
មន្ត្រីច្រករបៀងព្រំដែនទំនប់ដាច់ ឃុំអូរបីជាន់ ស្រុកអូរជ្រៅ លោក រ័ត្ន វាសនា មានប្រសាសន៍ខណៈលោកប្រចាំការនៅមាត់ច្រក នៅព្រឹកថ្ងៃទី៣ កក្កដា ថា មេបញ្ជាការទាហានភូមិភាគទី៥ បញ្ជាឲ្យបិទច្រករបៀងព្រំដែនក្នុងខេត្តបាត់ដំបង និងខេត្តបន្ទាយមានជ័យ ចាប់ពីថ្ងៃទី១ កក្កដា មក ចំណែកច្រកអន្តរជាតិដំណើរការជាធម្មតា។ លោកអះអាងថា មូលហេតុដែលបិទច្រកនេះ ដើម្បីការពារកុំឲ្យពលករឆ្លងដែនទៅធ្វើការនៅប្រទេសថៃ ដោយខុសច្បាប់៖ « បិទទាំងចេញ ទាំងចូលតែម្ដង មិនអាចឆ្លងកាត់បានទេ គឺអ្នកដែលត្រឡប់មកពីធ្វើការប្រទេសថៃ អាចចូលបាន តែទៅមិនបានទេ។ ទំនិញទាំងរបស់ខ្មែរ និងរបស់ថៃ ក៏មិនអាចចេញចូលបានដែរ ហើយពលរដ្ឋដើរទៅទិញទំនិញក្នុងដីថៃ ក៏មិនបានដែរ »។
ចំណែកពលរដ្ឋរស់នៅឃុំអូរបីជាន់ ជាប់ព្រំដែនថៃ លោក លឿម ណូ ថ្លែងនៅខាងមុខច្រកអូរបីជាន់ ថា ចាប់តាំងពីសមត្ថកិច្ចបិទច្រកមក មិនសូវមានមនុស្សឆ្លងកាត់ទៅប្រទេសថៃ តាមច្រកមួយនេះដូចមុនទេ។ លោកអះអាងថា ចាប់តាំងពីបិទច្រកមក ពុំទាន់ប៉ះពាល់ធំដុំដល់ពលរដ្ឋរស់នៅតាមព្រំដែននៅឡើយទេ៖ « ខ្ញុំចង់ឲ្យគេបើកឆាប់ៗ មិនចង់ឲ្យគេបិទយូរ ព្រោះជាកន្លែងធ្លាប់រកស៊ី ហើយយើងអាចចូលទិញរបស់របរក្នុងទឹកដីថៃ បាន។ ដល់គេបិទច្រកអស់ វាលំបាក »។
ទោះជាយ៉ាងណា មន្ត្រីសម្របសម្រួលសមាគមការពារសិទ្ធិមនុស្សអាដហុក (ADHOC) ខេត្តបន្ទាយមានជ័យ លោក ស៊ុំ ច័ន្ទគា មានប្រសាសន៍ថា ថ្វីបើរយៈពេលខ្លីពុំមានប៉ះពាល់ធ្ងន់ធ្ងរដល់ពលរដ្ឋក្ដី ប៉ុន្តែប្រសិនបើសមត្ថកិច្ចបិទច្រករយៈពេលយូរ នឹងធ្វើឲ្យប៉ះពាល់ដល់ការរកប្រាក់ចំណូលរបស់ពលរដ្ឋរស់នៅតាមព្រំដែន ព្រោះពលរដ្ឋដែលក្រីក្រមិនអាចឆ្លងទៅធ្វើការវិលល្ងាចនៅប្រទេសថៃ បានដូចមុន៖ « យើងគួរតែបើកឲ្យពលរដ្ឋដែលទៅធ្វើការងារប្រទេសថៃ វិលល្ងាចជាធម្មតា ព្រោះវាជាឆ្នាំងបាយរបស់ពួកគាត់។ ចំពោះអ្នកដែលនាំពលករឆ្លងកាត់ទៅធ្វើការខុសច្បាប់ សមត្ថកិច្ចត្រូវតែហាមឃាត់កុំឲ្យពួកគាត់ចូលទៅថៃ »។
អាស៊ីសេរី ពុំអាចទាក់ទងមេបញ្ជាការទាហានភូមិភាគទី៥ ដើម្បីសុំអត្ថាធិប្បាយបន្ថែមជុំវិញពីការបិទច្រកព្រំដែនបានទេនៅថ្ងៃទី៣ កក្កដា។
ទោះជាយ៉ាងណា មន្ត្រីច្រកទំនប់ដាច់ អះអាងថា ការបិទច្រករបៀងនេះមិនអនុញ្ញាតទាំងពលរដ្ឋខ្មែរ និងថៃ ឆ្លងកាត់បានទេ។ ចំណែករយៈពេលបិទច្រក មន្ត្រីច្រករូបនេះបន្ថែមថា មិនទាន់កំណត់ថ្ងៃច្បាស់លាស់ថានឹងបើកឲ្យដំណើរការវិញនៅពេលណានៅឡើយ។
ទន្ទឹមគ្នានេះ សមត្ថកិច្ចថៃ ក៏បន្តបញ្ជូនពលករត្រឡប់មកកម្ពុជា តាមច្រកព្រំដែនអន្តរជាតិប៉ោយប៉ែត មិនទាន់ឈប់នៅឡើយ ហើយពលករខ្លះត្រូវចំណាយប្រាក់ធ្វើដំណើរចាប់ពី ៨០០ ទៅជាង ១ពាន់បាត ឬប្រហែលជាង ១២ម៉ឺនរៀលក្នុងម្នាក់ ដើម្បីត្រឡប់មកដល់កម្ពុជា។ ពួកគាត់អះអាងថា ចំណាយប្រាក់ច្រើននៅស្រុកអារញ្ញ ជាប់ព្រំដែនកម្ពុជា អស់ម្នាក់ចន្លោះពី ៣០០ ទៅ ៦០០បាត ឬប្រហែល ៧ម៉ឺនរៀលក្នុងម្នាក់ ឲ្យទៅសមត្ថកិច្ចថៃ និងមានមនុស្សនិយាយភាសាខ្មែរប្រចាំនៅស្រុកអារញ្ញ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។