រដ្ឋមន្ត្រីក្រសួងធម្មការ និងកិច្ចការសាសនាអះអាងថា ស្ថាប័នជំនាញរបស់រដ្ឋមួយនេះ នឹងបញ្ឈប់រាល់សកម្មភាពរបស់ម្ចាស់វិនិយោគ ណាហ្គាវើល (Naga World) ហើយស្នើឲ្យមានការសាងសង់ឲ្យដូចរចនាបថដើមឡើងវិញក្នុងពេលឆាប់ៗនេះ។
ការបញ្ជាក់ជំហរជាថ្មីឡើងវិញនៅពេលនេះរបស់រដ្ឋមន្ត្រីក្រសួងធម្មការ និងកិច្ចការសាសនា ធ្វើឡើងក្រោយពីមានការដេញដោលអស់ពេលជាច្រើនម៉ោងនៅវិមានរដ្ឋសភា ដោយក្រុមតំណាងរាស្ត្រមកពីគណបក្សសង្គ្រោះជាតិ និងបន្ទាប់ពីមានការតវ៉ាប្រឆាំងជាច្រើនលើកច្រើនសារបស់ប្រជាពលរដ្ឋ ព្រមទាំងព្រះសង្ឃក្នុងពេលកន្លងទៅនេះ។
លោក មិន ឃិន រដ្ឋមន្ត្រីក្រសួងធម្មការ និងសាសនា ឲ្យដឹងនៅថ្ងៃទី៩ ខែតុលា ថា លោកនឹងស្នើឲ្យម្ចាស់ក្រុមហ៊ុន ណាហ្គាវើល ផ្អាកសកម្មភាពគ្រប់យ៉ាង និងស្នើឲ្យសាងសង់ឡើងវិញប៉ះប៉ូវការខូចខាត ដូចជារបងជាដើមនៅបរិវេណវិទ្យាស្ថានពុទ្ធសាសនបណ្ឌិត្យ។ ទោះជាបែបណា លោកនៅមិនទាន់ប្រាកដនៅឡើយទេថា តើពេលពេលវេលាសមស្របណាមួយដែលថាអាចរុះរើបាននោះ ប៉ុន្តែលោកអះអាងថា នឹងត្រូវអនុវត្តក្នុងពេលឆាប់ៗនេះ៖ «ចំពោះពុទ្ធសាសនបណ្ឌិត្យនេះ យើងឥតមានជួលឥតមានលក់ដូរ ឬអភិវឌ្ឍអ្វីទេ ហើយការរើនៅពេលណា យើងកំពុងតែទំនាក់ទំនងនីតិវិធីដើម្បីធ្វើយ៉ាងណា ឲ្យគេរើឲ្យបានឆាប់កាលណាល្អកាលហ្នឹង»។
មូលហេតុដែលនាំឲ្យក្រសួងធម្មការ និងកិច្ចការសាសនា ចាត់វិធានការដោយបន្ទាន់នេះ នៅបន្ទាប់ពីមានប្រតិកម្មពីប្រជាពលរដ្ឋ រួមទាំងព្រះសង្ឃផងជាហូរហែក្នុងពេលកន្លងទៅ។ ក៏ប៉ុន្តែ រឿងសំខាន់ដែលនាំឲ្យស្ថាប័នរដ្ឋមួយនេះសម្រេចចិត្តថានឹងឲ្យក្រុមហ៊ុនណាហ្គាវើលផ្អាកសកម្មភាពភ្លាមៗនៅពេលនេះ គឺក្រោយពីតំណាងរាស្ត្រគណបក្សសង្គ្រោះជាតិ ស្នើឲ្យមានការបកស្រាយចំពោះមូលហេតុដែលនាំឲ្យដីនៅពុទ្ធសាសនបណ្ឌិត្យ ស្ថិតក្រោមការហ៊ុមព័ទ្ធពីបនល្បែងណាហ្គាវើលទៅវិញ។
លោក ញ៉ែម បុញ្ញឫទ្ធិ តំណាងរាស្ត្រគណបក្សសង្គ្រោះជាតិ និងជាប្រធានគណៈកម្មការទី៧នៃរដ្ឋសភា និយាយក្រោយកិច្ចប្រជុំបានបិទបញ្ចប់ថា លោកនឹងតាមឃ្លាំមើលរឿងនេះបន្តទៀត ហើយនឹងជួយជ្រោមជ្រែងគ្រប់បែបយ៉ាង ដើម្បីជំរុញឲ្យការអនុវត្តនេះមានប្រសិទ្ធភាព៖ «យើងមានគម្រោងនឹងចុះទៅលើផ្ទាល់ ហើយនឹងមានស្នើសុំជួយទៅខាងក្រសួងធម្មការ បន្ថែមទៀត ដើម្បីឲ្យមានកញ្ចប់ថវិកាគ្រប់គ្រាន់ ដើម្បីឲ្យការរៀបចំក្រសួងធម្មការ ជាពិសេសវិទ្យាស្ថានពុទ្ធសាសនបណ្ឌិត្យហ្នឹងឲ្យមានការរីកចម្រើន ហើយថែរក្សាគុណតម្លៃជាប្រវត្តិសាស្ត្រ»។
ការប្រើពេលជាង ៤ម៉ោងនៅវិមានរដ្ឋសភា ដើម្បីដេញដោលពាក់ព័ន្ធថាដីនៅវិទ្យាស្ថានពុទ្ធសាសនបណ្ឌិត្យ ត្រូវបានក្រសួងធម្មការ និងកិច្ចការសាសនា ប្រគល់ឲ្យបនល្បែងណាហ្គាវើល អភិវឌ្ឍនោះ ត្រូវបាន លោក មិន ឃិន បដិសេធ។ រដ្ឋមន្ត្រីក្រសួងធម្មការ រូបនេះអះអាងម្ដងហើយម្ដងទៀតថា ស្ថាប័នរបស់រដ្ឋមិនបានជួល ឬផ្ដល់ការវិនិយោគឲ្យណាហ្គាវើលទេ ក៏ប៉ុន្តែមានកិច្ចសន្យាផ្ដល់ទីកន្លែងដើម្បីឲ្យក្រុមហ៊ុននេះហ៊ុមព័ទ្ធរបងនៅបរិវេណពុទ្ធសាសនបណ្ឌិត្យ ដើម្បីអាចឲ្យណាហ្គាវើលដំណើរការធ្វើផ្សារក្រោមដីប៉ុណ្ណោះ។
ទោះជាបែបណា ការសួរដេញដោលកាលពីរសៀលថ្ងៃទី៩ ខែតុលា ធ្វើឡើងដោយបិទទ្វារ និងហាក់ប្រុងប្រយ័ត្នសម្បើមណាស់។ ក្រុមអ្នកកាសែតមិនត្រូវបានអនុញ្ញាតឲ្យស្ដាប់ឡើយ។
វិទ្យុអាស៊ីសេរី ពុំអាចស្នើសុំការបំភ្លឺជុំវិញរឿងនេះពីម្ចាស់ណាហ្គាវើលបានទេ នៅថ្ងៃទី៩ ខែតុលា។
បើទោះជាបែបណា លោក មិន ឃិន មិនបានឆ្លើយតបទាល់តែសោះថា តើការចំណាយលុយដើម្បីធ្វើរបងឡើងវិញ និងអ្វីៗគ្រប់យ៉ាងដែលបានខូចខាតនោះ ជាបន្ទុករបស់រដ្ឋ ឬជាការទទួលខុសត្រូវរបស់ណាហ្គាវើលឡើយ ដោយលោកជំរុញអ្នកកាសែតឲ្យទៅសួរអ្នកនាំពាក្យវិញ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។