កងទ័ពមួកខៀវកម្ពុជា និងសាច់ញាតិពួកគេព្រួយបារម្ភពីការឆ្លងជំងឺអ៊ីបូឡា (Ebola) ខណៈដែលរាជរដ្ឋាភិបាលបញ្ជូនទៅថែរក្សាសន្តិភាពទៅសាធារណរដ្ឋអាហ្រ្វិកកណ្តាល (Central Africa Republic)។ ការព្រួយបារម្ភនេះ គឺស្របពេលបណ្តាប្រទេសក្នុងទ្វីបអាហ្វ្រិក កំពុងផ្ទុះឡើងនៃជំងឺអេបូឡា។
បើទោះមុនពេលចេញដំណើរពីប្រទេសកម្ពុជា កងទ័ពយោធាកម្ពុជា ពាក់មួកខៀវក្នុងនាមកងរក្សាសន្តិភាពពិភពលោកនៃអង្គការសហប្រជាជាតិ បានរៀនពីវិធីបង្ការខ្លួនខ្លះៗ ពីជំងឺអ៊ីបូឡាក្តី ប៉ុន្តែក្រុមយោធានៅតែបង្ហាញការព្រួយបារម្ភ និងបានលើកឡើងថា ពួកគេបានរៀនតិចតួចនៅឡើយ។
ពលបាលឯកកងអនុសេនាធំវិស្វកម្មសំណង់លេខ៩៤៥ លោក នុត ថន មានប្រសាសន៍ថា លោកបានរៀនក្នុងរយៈពេលមួយថ្ងៃប៉ុណ្ណោះពីវិធីបង្ការជំងឺអ៊ីបូឡា។ កងទ័ពមួកខៀវរបស់កម្ពុជា ដែលធ្លាប់ទៅបំពេញការងារនៅប្រទេសលីបង់ (Lebanon) បន្តថា អ្វីដែលលោកព្រួយបារម្ភក្នុងការបំពេញការងារលើកនេះ គឺខ្លាចឆ្លងជំងឺអ៊ីបូឡា៖«ដូចថាក្នុងប្រទេស យើងអត់ទាន់ដឹងថាមានបញ្ហាអីផង! ចំណេះដឹងរៀនបានប្រហែលមួយថ្ងៃ។ គេបង្រៀនពីនេះហើយ ប្រហែលទៅដល់នោះ មេថ្នាក់ដឹកនាំគាត់បានប្រាប់ គាត់ជាថ្នាក់ដឹកនាំម្នាក់ គាត់ត្រូវតែដើរមើលកូនចៅរបស់គាត់»។
លោកឲ្យដឹងបន្តថា កងកម្លាំងដែលត្រូវទៅបំពេញបេសកម្មនៅប្រទេសអាហ្រ្វិកកណ្តាល ទាំងអស់ចំនួន ២១៦នាក់ ក្នុងនោះមានស្រ្តីចំនួន ៩នាក់។ បេសកកម្មនៅពេលនេះ ដើម្បីស្ថាបនាកសាងហេដ្ឋារចនាសម្ព័ន្ធរាវមីន និងបុកអណ្តូងជាដើម។ ពិធីជូនដំណើរនៅថ្ងៃទី២២ ខែតុលា ដោយមានការចូលរួមពីរដ្ឋមន្រ្តីក្រសួងការពារជាតិ មន្រ្តីរដ្ឋាភិបាល តំណាងអង្គការសហប្រជាជាតិ និងសាច់ញាតិរបស់យោធា។
«សំឡេងភ្លេងត្រែ»
ចាប់តាំងពីឆ្នាំ២០០៦ រហូតពេលបច្ចុប្បន្ន រាជរដ្ឋាភិបាលកម្ពុជា បានបញ្ជូនកងទ័ពរក្សាសន្តិភាពក្រោមឆ័ត្រអង្គការសហប្រជាជាតិបានចំនួន ១៤លើក ស្មើនឹងជាងពីរពាន់នាក់។
មេបញ្ជាការកងសំណង់បញ្ឈរទី២ កញ្ញា ជួង កញ្ញាសុជាតា បានសម្ដែងការព្រួយបារម្ភចំពោះជំងឺអ៊ីបូឡា ដោយសារគេយល់ថា ជំងឺនេះកាចសាហាវនិងពិបាកព្យាបាល។ ប៉ុន្តែកញ្ញារំពឹងថា ការរស់នៅស្អាត មានអានាម័យ និងមិនប៉ះពាល់ផ្ទាល់អ្នកជំងឺអ៊ីបូឡា ឬប្រភពចំឡងជំងឺ គឺមិនធ្វើឲ្យកញ្ញាឆ្លងជំងឺនេះ។ ទោះយ៉ាងណាក្តីកញ្ញា ជួង កញ្ញាសុជាតា អះអាងថា កញ្ញាមិនរាថយចំពោះបេសកម្មនេះទេ ព្រោះនេះជាកិត្តិយសរបស់កម្ពុជា ក្នុងឆាកអន្តរជាតិ៖«តាមដែលខ្ញុំបានរៀន ជំងឺអ៊ីបូឡា គឺឆ្លងតាមរយៈសត្វ សត្វប្រចៀវ សត្វអី។ យើងកុំប៉ះពាល់របស់ដែលយើងថា ប៉ះពាល់សត្វព្រៃ បរិភោគសត្វព្រៃ និយាយរួមយើងអនាម័យជាប់ជានិច្ច ប៉ុន្តែពួកយើងបានត្រៀមខ្លួនហើយអស់ហើយ»។
អ្នកស្រី ជ័យ សុផាន់ណា ដែលមកជូនដំណើរកូននិយាយថា អ្នកស្រីមានការព្រួយបារម្ភចំពោះសុវត្ថិភាពសុខភាពកូនអ្នកស្រីក្នុងពេលបំពេញបេសកម្មនៅប្រទេសអាហ្រ្វិកនោះដែរ ជាពិសេសគឺខ្លាចឆ្លងជំងឺអ៊ីបូឡា។ អ្នកស្រី ជ័យ សុផាន់ណា បានស្នើមន្រ្តីថ្នាក់លើ ជាពិសេសអង្គការសហប្រជាជាតិ គិតគូរពីសុវត្តិភាពកូនអ្នកស្រី៖ «ព្រួយចេះតែព្រួយហើយ ប៉ុន្តែទៅដល់នោះគេមិនឲ្យយើងស្លាប់ទេ គេនឹងមានថែទាំងឲ្យយើង។ អ៊ីចឹងគេការពារ គេមើលថែទាំយើងឲ្យដិតដល់ គេមិនទុកឲ្យនៅឯកោទេ»។
ថ្លែងនៅក្នុងពិធីជូនដំណើរនៅមូលដ្ឋានទ័ពជើងអាកាស លោកឧបនាយករដ្ឋមន្រ្តី រដ្ឋមន្រ្តីក្រសួងការពារជាតិ នាយឧត្តមសេនីយ៍ ទៀ បាញ់ សុំឲ្យក្រុមយោធាទាំងអស់មានការប្រុងប្រយ័ត្នចំពោះជំងឺអ៊ីបូឡា។ លោកថា គេនៅមិនទាន់មានរបាយការណ៍ណាមួយរកឃើញថា ប្រទេសអាហ្រ្វិកកណ្តាល មានជំងឺអ៊ីបូឡា នៅឡើយទេ។
មេបញ្ជាការកងវិស្វកម្មលេខ៩៤៥ វរសេនីយ៍ឯក ខាំ សេរីរិទ្ធ ដែលដឹកនាំកងទ័ពកម្ពុជា ទៅបំពេញបេសកម្មមានប្រសាសន៍ថា លោកព្រួយបារម្ភខ្លះទាក់ទងនឹងជំងឺអ៊ីបូឡា។ ទោះបែបនេះក្តី លោកវរសេនីយ៍ឯក ខាំ សេរីរិទ្ធ ឲ្យដឹងទៀតថា អង្គការសហប្រជាជាតិ មានពេទ្យពិនិត្យសុខភាពរៀងរាល់ ២សប្តាហ៍ម្តង។ មួយវិញទៀត ទ័ពកម្ពុជា ដែលបំពេញបេសកម្ម ក៏បានបំពាក់ឧបករណ៍អនាមយ និងការថែរក្សាសុខភាពផ្ទាល់ខ្លួនដែលជាវិធីបង្ការខ្លួនពីជំងឺអ៊ីបូឡា៖ «ខ្ញុំនៅបារម្ភ ប៉ុន្តែខ្ញុំជឿថា មិនអាចកើតមានអីបានទេអាហ្នឹង»។
កន្លងមកកងទ័ពមួកខៀវកម្ពុជា ក៏ធ្លាប់បាត់បង់ជីវិតក្នុងពេលបំពេញបេសកកម្មនៅក្រៅប្រទេស រួមមានការពុលអាហារជាដើម។ ចំនួនអ្នក ស្លាប់ដោយសារឆ្លងមេរោគអ៊ីបូឡា កើនជាង ៤.៤០០នាក់នៅលើពិភពលោក រួមមានប្រទេសស៊ូដង់ (Sudan) ស៊ូដង់ខាងត្បូង (South Sudan) សាធារណរដ្ឋអាហ្វ្រិកកណ្តាល លីបង់ ស៊ីរី (Syria) និងម៉ាលី (Mali)។ ចំនួនអ្នកដែលឆ្លងថ្មីទៀតក៏កាន់តែកើនឡើងផងដែរ ជាពិសេសនៅក្នុងប្រទេសដែលរងការវាយប្រហារខ្លាំងបំផុតដោយមេរោគអ៊ីបូឡា ដូចជានៅប្រទេសលីបេរីយ៉ា (Liberia) សេរ៉ាឡេអូន (Sierra Leone) និងហ្គីណេ (Guinea)។
ព័ត៌មានចុងក្រោយ ៖
ព័ត៌មានចុងក្រោយដែលវិទ្យុអាស៊ីសេរី ទទួលបានពីលោក វ៉ា ចក ពលបាលទោនៃកងអនុសេនាធំវិស្វកម្មសំណង់លេខ ៩៤៥ ដែលត្រូវចេញដំណើរពីប្រទេសកម្ពុជា ទៅសាធារណរដ្ឋអាហ្វ្រិកកណ្តាល នៅថ្ងៃទី២២ ខែតុលា នេះ ឲ្យដឹងថា ដំណើរហោះហើរនេះត្រូវផ្អាកវិញ ប៉ុន្តែលោកមិនប្រាប់ពីមូលហេតុទេ។
វិទ្យុអាស៊ីសេរី មិនអាចសុំការបំភ្លឺពីលោក ឈុំ សុជាត អ្នកនាំពាក្យក្រសួងការពារជាតិ និងមន្រ្តីទាក់ទងផ្សេងទៀតនៃក្រសួងការពារជាតិ បានទេនៅរាត្រីថ្ងៃទី២២ តុលា នេះ។ ទោះយ៉ាងណាក្តី លោក វ៉ា ចក បានឲ្យដឹងទៀតថា ប្រហែលជា ២សប្តាហ៍ទៀត ទើបកងទ័ពមួកខៀវធ្វើដំណើរទៅកាន់សាធារណរដ្ឋអាហ្រ្វិកកណ្តាល៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។