ប្រតិបត្តិករបម្រើវិស័យទេសចរណ៍នាខេត្តព្រះសីហនុ បានអះអាងថា បច្ចុប្បន្ននេះគេសង្កេតឃើញអ្នកវិនិយោគទុនជនជាតិចិន និងភ្ញៀវទេសចរចិន បង្ហាញវត្តមានច្រើនគួរឲ្យកត់សម្គាល់នាមូលដ្ឋាននេះ។ អ្នកវិនិយោគទុនចិន ភាគច្រើនហ៊ានជួលសំណង់អគារធំៗឲ្យតម្លៃខ្ពស់ រៀបចំធ្វើផ្ទះសំណាក់ សណ្ឋាគារ កាស៊ីណូ និងក្លឹបកម្សាន្តធំៗបើកធ្វើអាជីវកម្ម។
ប្រតិបត្តិករមួយចំនួននាខេត្តព្រះសីហនុ ឲ្យដឹងថា ភាគច្រើននៃអ្នកវិនិយោគទុនចិន ដែលចូលមកដល់មូលដ្ឋានខេត្តទេសចរណ៍មួយនេះ ពួកគេបានចាប់យកជំនួញលើវិស័យឧស្សាហកម្ម រោងចក្រ សណ្ឋាគារ កាស៊ីណូ ក្លឹបកម្សាន្ត និងភោជនីយដ្ឋាន ជាដើម។ ភ្ញៀវទេសចរចិន ដែលធ្វើដំណើរមកខេត្តព្រះសីហនុ ជាអតិថិជនគាំទ្រការធ្វើជំនួញរបស់ពួកគេទាំងនោះ។
អ្នកប្រកបអាជីវកម្មជួលសំណង់អគារ ឬលក់អចលនទ្រព្យមួយចំនួន ឲ្យដឹងថា អ្នកវិនិយោគជនជាតិចិន បានស្វែងរកជួលសំណង់អគារធំៗ មានផ្ទះសំណាក់ សណ្ឋាគារប្រណិតៗ និងក្លឹបកម្សាន្តនានាក្នុងតម្លៃខ្ពស់សម្រាប់ការស្នាក់នៅ និងធ្វើអាជីវកម្មសណ្ឋាគារ និងកាស៊ីណូ ជាដើម។ ហើយថ្មីៗនេះ អ្នកវិនិយោគទុនជនជាតិចិន ទាំងនោះ បានបន្តជួលក្លឹបខារ៉ាអូខេកំពុងបើកដំណើរការរាល់ថ្ងៃ ដើម្បីកែច្នៃធ្វើជាកាស៊ីណូ សណ្ឋាគារ និងក្លឹបកម្សាន្តតាមស្តង់ដារប្រទេសចិន ជំនួសវិញ។
រាល់ថ្ងៃនេះ ទោះយប់ ឬថ្ងៃ ឃើញមានភ្ញៀវជនជាតិចិន តែងបានបង្ហាញវត្តមានច្រើនកុះករនៅតាមផ្លូវសាធារណៈ កាស៊ីណូ ក្លឹបកម្សាន្ត ផ្សារទំនើប និងតាមភោជនីយដ្ឋាននានា ដែលភាគច្រើនមានម្ចាស់ជាជនជាតិចិន បើកធ្វើអាជីវកម្ម ហើយអតិថិជនរបស់គេគឺជាជនជាតិចិន គ្នាឯង។
អ្នកឃ្លាំមើលការអភិវឌ្ឍសង្គម អ្នកស្រី ជៀប សុធារី មានប្រសាសន៍ថា វត្តមានអ្នកវិនិយោគទុនចិន គឺមិនមានផលប្រយោជន៍ច្រើន ឬមិនបានចម្រើនដល់ការរកប្រាក់ចំណូលរបស់ប្រជាពលរដ្ឋ ឬប្រតិបត្តិករបម្រើវិស័យទេសចរណ៍តូចតាចនាខេត្តទេសចរណ៍ជាប់ឆ្នេរសមុទ្រមួយនេះទេ។
អ្នកស្រី ជៀប សុធារី អ្នកសម្របសម្រួលសមាគមអាដហុក (ADHOC) ប្រចាំខេត្តព្រះសីហនុ ឲ្យដឹងថា វត្តមានអ្នកវិនិយោគទុនចិន ទាំងនោះ ពួកគេបានមករកស៊ី និងវេចលុយត្រឡប់ទៅកាន់ស្រុកគេវិញ ដែលខុសប្លែកពីភ្ញៀវទេសចរមកពីសហគមន៍អឺរ៉ុប ហើយបានយកលុយមកចាយនៅស្រុកខ្មែរ និងបានចំណេញដល់អាជីវករ ឬប្រជាពលរដ្ឋមានរបរខ្នាតតូចនាមូលដ្ឋាន សម្រាប់ទ្រទ្រង់ជីវភាពគ្រួសារប្រចាំថ្ងៃ។
អ្នកស្រីបន្តថា វត្តមានអ្នកវិនិយោគទុនចិន មកកម្ពុជា ឬមកធ្វើវិនិយោគនាមូលដ្ឋានខេត្តព្រះសីហនុ បានទទួលផលប្រយោជន៍ភាគច្រើនតែទៅលើម្ចាស់ ឬអ្នកមានសំណង់អគារធំៗ មានផ្ទះសំណាក់ សណ្ឋាគារ និងក្លឹបកម្សាន្ត សម្រាប់ដាក់ជួលឲ្យចិន តែប៉ុណ្ណោះ ប៉ុន្តែសម្រាប់ប្រតិបត្តិករទេសចរ ឬអាជីវករប្រកបរបរតូចតាច មិនទទួលបានផលប្រយោជន៍ពីវត្តមានអ្នកជំនួញចិន និងភ្ញៀវទេសចរចិន មកវិនិយោគ ឬមកទេសចរណ៍នាខេត្តព្រះសីហនុ នោះទេ៖ « ពីមុនយើងឃើញមានវត្តមានជនបរទេសចម្រុះជាតិសាសន៍ ប៉ុន្តែក្នុងរយៈពេល ២ឆ្នាំចុងក្រោយនេះ គឺមានជនជាតិចិន មានចំនួនច្រើនបង្ហាញខ្លួននាខេត្តព្រះសីហនុ ជាពិសេសនៅឆ្នាំ២០១៧ នេះ។ ហើយជនជាតិចិន ទាំងនោះ គាត់បានមកប្រកបមុខរបររកស៊ីច្រើន ដូច្នេះទាំងការបើកបរ ទាំងការផឹកស៊ី ដែលខ្ញុំធ្លាប់ស៊ើបសួរព័ត៌មានពីអាជីវកររករបរទទួលទានផ្សេងៗ ជាពិសេសនៅតាមភោជនីយដ្ឋានហ្នឹង គឺមានហាងម៉ាស្សា ខារ៉ាអូខេជាដើមហ្នឹង គឺមានជនជាតិចិន ច្រើនណាស់ ហើយអចលនទ្រព្យមានអគារ ដីធ្លី សណ្ឋាគារ ផ្ទះសំណាក់ ជាដើម គឺភាគច្រើនត្រូវចិន ជួលធ្វើអាជីវកម្មអស់ហើយ » ។
អ្នកឃ្លាំមើលសង្គម និងអាណាព្យាបាល បានកត់សម្គាល់ថា ភ្ញៀវជនជាតិចិន ភាគច្រើនមកទេសចរណ៍នៅខែត្រព្រះសីហនុ ពួកគេហាក់បង្ហាញអត្តចរិតកោងកាច ឬមានចរិតជាអ្នកលេង មានបក្សពួកដូចក្រុមបងតូចបងធំ ជាដើម។
អ្នកស្រី ជៀប សុធារី បានកត់សម្គាល់ថា ការបើកបររបស់ជនបរទេស ពិសេសជនជាតិចិន តែងបង្កគ្រោះថ្នាក់ចរាចរណ៍បុកអ្នកធ្វើដំណើរជាជនជាតិខ្មែរស្ទើររាល់ថ្ងៃ ប៉ុន្តែជនជាតិចិន ដែលបង្កល្មើសទាំងនោះ ភាគច្រើនមានបុគ្គលជាមន្ត្រីនគរបាលនៃស្នងការដ្ឋាននគរបាលខេត្តព្រះសីហនុ ជាដើម បានសម្របសម្រួលនៅពេលជនជាតិចិន ទាំងនោះ បើកបរបុកអ្នកដំណើរ ឬគ្រោះថ្នាក់ចរាចរណ៍អ្វីមួយកើតឡើងនៅតាមផ្លូវសាធារណៈ ជាដើម។
ប្រតិបត្តិករទេសចរ និងអាណាព្យាបាលភាគច្រើនមិនពេញចិត្តចំពោះឥរិយាបថបើកបររបស់ជនជាតិចិន ដែលការបើកបររបស់ពួកគេនៅតាមផ្លូវសាធារណៈក្នុងក្រុងភាគច្រើន បើកបរក្នុងក្រុងល្បឿនលឿន និងមិនគោរពច្បាប់ចរាចរណ៍ទេ។
អាណាព្យាបាលសំណូមពរដល់លោកឧបនាយករដ្ឋមន្ត្រី ស ខេង រដ្ឋមន្ត្រីក្រសួងមហាផ្ទៃ ជួយចេញបទបញ្ជា ឬមានវិធានការទប់ស្កាត់អ្នកបើកបររថយន្តជនជាតិចិន ដែលមានសិទ្ធិបើកបររថយន្តដោយខ្លួនឯងក្នុងល្បឿនលឿន មានអាការស្រវឹង មិនគោរពច្បាប់ចរាចរណ៍ផ្លូវគោក ឬភ្លើងសញ្ញាបញ្ជាចរាចរណ៍ បង្កភាពអនាធិបតេយ្យតាមផ្លូវសាធារណៈ និងបង្កគ្រោះថ្នាក់ស្ទើរជារៀងរាល់យប់ថ្ងៃកន្លងមកនេះឲ្យបានឆាប់ផង។
ស្នងការរងនគរបាលខេត្តព្រះសីហនុ លោក អ៊ី សុខា ទទួលបន្ទុកចរាចរណ៍ផ្លូវគោក បានឲ្យដឹងថា សមត្ថកិច្ចមិនព្រងើយកន្តើយលើការងារចុះពង្រឹងការអនុវត្តច្បាប់ចរាចរណ៍នៅតាមគោលដៅនានានោះទេ។ លោកថា គ្រប់ជនបរទេស និងជនជាតិខ្មែរជាដើម គឺរាល់ការបើកបរត្រូវមានប័ណ្ណបើកបរឲ្យបានទាំងអស់គ្នា ហើយករណីជនជាតិចិន ដែលបើកបរដោយខ្លួនឯងនេះ សមត្ថកិច្ចនឹងរឹតបន្តឹងការត្រួតពិនិត្យជាបន្តទៀតនាថ្ងៃខាងមុខ៖ « ជនជាតិចិន នៅខេត្តព្រះសីហនុ នេះ ភាគច្រើនគឺមានអ្នកបើកបរ ឬតៃកុងឡានសម្រាប់បើកបរ ហើយទំនងជានៅពេលយប់ព្រលប់ ពេលតៃកុងឡានឈប់សម្រាក ទំនងជាគាត់បានបើកផឹកស៊ីហួសម៉ោងម្តងម្កាលដែរ ប៉ុន្តែសមត្ថកិច្ចយើងមិនបានធ្វេសប្រហែសទេនៅម៉ោងចន្លោះប្រហោងនេះ។ ហើយពេលខ្លះការបើកបរឡាននៅពេលយប់នេះ គឺសមត្ថកិច្ចលោកមិនបានដឹងថាជនជាតិចិន ជាអ្នកបើកបរដោយផ្ទាល់ទេ ព្រោះជាពេលយប់ផង។ បើសិនជាមានករណីល្មើសច្បាប់ចរាចរណ៍ផ្លូវគោក អាហ្នឹងបានជាយើងឆែកឆេរអនុវត្តតាមនីតិវិធីចរាចរណ៍ផ្លូវគោក។ បច្ចុប្បន្ននេះ សមត្ថកិច្ចស្ថាប័ននេះបានសំណូមពរដល់រដ្ឋបាលខេត្ត និងផ្នែកពាក់ព័ន្ធ ស្នើសុំគោលការណ៍មួយដើម្បីអនុវត្តច្បាប់ចរាចរណ៍ផ្លូវគោកទៅលើជនបរទេស ពិសេសជនជាតិចិន មិនឲ្យបើកបរទេ ដោយត្រូវមានចេញច្បាប់មួយជាគោល ដើម្បីឲ្យសមត្ថកិច្ចពួកខ្ញុំចុះអនុវត្តតាមដងផ្លូវនានាឲ្យមានប្រសិទ្ធភាព » ។
អាណាព្យាបាលចោទថា រាល់ថ្ងៃនេះ សមត្ថកិច្ចស្ថាប័នពាក់ព័ន្ធមួយចំនួន ពិសេសមន្ត្រីនគរបាលចរាចរណ៍ផ្លូវគោកនៃស្នងការដ្ឋាននគរបាលខេត្តព្រះសីហនុ ហាក់គ្មានចំណាត់ការទៅលើអ្នកបើកបរជនជាតិចិន ដែលមិនគោរពច្បាប់ចរាចរណ៍នេះទេ។ ផ្ទុយទៅវិញ មានពេលខ្លះឃើញបុគ្គលជាមន្ត្រីនគរបាលមានតួនាទីខ្ពស់មួយចំនួន តែងបានចេញមុខជួយសម្របសម្រួល ឬកាងបទល្មើសផ្សេងៗជួយសម្រួលដល់ជនជាតិចិន ពេលពួកគេបង្កបទល្មើសអ្វីមួយ ឬបង្កគ្រោះថ្នាក់ចរាចរណ៍ ជាដើម។
ប្រធានមន្ទីរទេសចរណ៍ខេត្តព្រះសីហនុ លោក តាំង សុចិត្រគ្រឹស្នា ទទួលស្គាល់ថា បច្ចុប្បន្ន ទាំងអ្នកវិនិយោគទុន និងភ្ញៀវទេសចរជនជាតិចិន បានឈរនៅលំដាប់លេខរៀងទី១ ក្នុងចំណោមភ្ញៀវទេសចរ ឬអ្នកវិនិយោគទុនមកពីបរទេស មានដូចជា រុស្ស៊ី អាមេរិក វៀតណាម និងមកពីប្រទេសអង់គ្លេស ជាដើម។
ទោះយ៉ាងណា លោក តាំង សុចិត្រគ្រឹស្នា មិនទាន់មានតួលេខនៃចំនួនជនជាតិចិន ឬអ្នកវិនិយោគទុនចិន ដែលចូលមកដល់ខេត្តព្រះសីហនុ ទាំងទេសចរណ៍ និងមកវិនិយោគ មានចំនួនប៉ុន្មាននាក់ ឬប៉ុន្មានក្រុមហ៊ុនឲ្យពិតប្រាកដទេ ដោយគ្រាន់តែបញ្ជាក់ថា អ្នកវិនិយោគទុនចិន ភាគច្រើន គឺចាប់យកវិស័យសណ្ឋាគារ កាស៊ីណូ ភោជនីយដ្ឋាន និងក្លឹបកម្សាន្ត សម្រាប់ការធ្វើជំនួញរបស់ពួកគេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។