កម្មករកម្មការិនីរោងចក្រ ជីន យី ហ្គាមេន (Cin Yi Garment) ប្រមាណជា ១ពាន់នាក់ នាំគ្នាដើរហែក្បួនការពារតំណាងសហព័ន្ធសហជីពស្មារតីកម្មករខ្មែរចំនួន ៦នាក់ ឲ្យគេចផុតពីការតាមចាប់ខ្លួនរបស់សមត្ថកិច្ចខេត្តកំពង់ឆ្នាំង កាលពីថ្ងៃទី២១ ខែសីហា។
ហេតុការណ៍នោះ បានកើតឡើងនៅពេលដែលក្រុមកម្មករបានស្រែកតវ៉ានៅខាងមុខរោងចក្រ ដោយមានកាន់រូបថតលោកនាយករដ្ឋមន្ត្រី ហ៊ុន សែន និងលោកស្រី ប៊ុន រ៉ានី ប៉ុន្តែមួយសន្ទុះក្រោយមក ស្រាប់តែមានសមត្ថកិច្ចព្យាយាមចាប់តំណាងសហជីពម្នាក់ក្នុងចំណោម ៦នាក់ដាក់ឡាន ទើបជំរុញឲ្យពួកគាត់ដើរអមដំណើរតំណាងសហជីពទាំង ៦នាក់ ឲ្យឡើងឡានទៅភ្នំពេញវិញ។
ក្រុមកម្មករអះអាងថា មិនសុខចិត្តចូលធ្វើការឡើយ ប្រសិនបើភាគីរោងចក្រមិនព្រមរក្សាអត្ថប្រយោជន៍ការងារនៅអំឡុងពេលនៃការធ្វើកូដកម្ម និងចាប់ផ្ដើមគិតគូរប្រាក់បុងឲ្យបានត្រឹមត្រូវឡើងវិញ ជាដើម។ កម្មករក៏បានរិះគន់សហជីពប្រចាំរោងចក្ររបស់ លោក ជា មុនី ថាបានបំផុសបំផុលឲ្យពួកគាត់ធ្វើកូដកម្ម ប៉ុន្តែក្រោយមកបានពុករលួយស៊ីលុយពីរោងចក្រ ហើយទុកកម្មករចោល ដោយទុកឲ្យនៅតវ៉ាជាមួយតំណាងសហជីពផ្សេងទៅវិញ៖ «សំឡេង»។
សមត្ថកិច្ចបានព្យាយាមតាមចាប់តំណាងសហព័ន្ធសហជីពស្មារតីកម្មករខ្មែរ បន្ទាប់ពីក្រុមកម្មករវាយបំបែកកញ្ចក់នៅខាងមុខរោងចក្រជាច្រើនផ្ទាំង។
កម្មកររោងចក្រ ជីន យី ស្ថិតនៅភូមិចម្ការស្វាយ ឃុំសេដ្ឋី ស្រុកសាមគ្គីមានជ័យ ខេត្តកំពង់ឆ្នាំង បានបិទផ្លូវជាតិ និងស្រែកតវ៉ានៅខាងរោងចក្រជាង ១០ថ្ងៃមកហើយ ដើម្បីទាមទារអត្ថប្រយោជន៍ចំនួន ១៧ចំណុច ប៉ុន្តែរហូតមកដល់ពេលនេះ មិនមិនទាន់មានដំណោះស្រាយសមស្របដែលកម្មករទទួលយកបាននៅឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។