បន្ទាប់ពីរោងចក្រកាត់ដេរសម្លៀកបំពាក់ ឆាង ស៊ឹង (Chang Sheng) ឆេះអស់ទាំងស្រុងកាលពីថ្ងៃទី២៨ កក្កដា រួចមក កម្មករជិត ១ពាន់នាក់ កំពុងស្ថិតនៅតែលតោលគ្មានការងារធ្វើ។ អង្គការសង្គមស៊ីវិល ដែលធ្វើការផ្នែកសិទ្ធិការងារ គិតថា ក្រុមហ៊ុនត្រូវផ្តល់សំណងដល់កម្មករដូចមានចែងនៅក្នុងច្បាប់ការងារ។ រីឯក្រុមហ៊ុន នៅមិនច្បាស់ថាត្រូវដោះស្រាយយ៉ាងម៉េចជាមួយកម្មករ។
កម្មកររោងចក្រ ឆាង ស៊ឹង ជិត ១ពាន់នាក់ កំពុងប្រមូលស្នាមមេដៃដាក់ពាក្យបណ្ដឹងទៅស្ថាប័នពាក់ព័ន្ធ ឲ្យជួយអន្តរាគមន៍ពីរឿងអត្ថប្រយោជន៍ពួកគេ ក្រោយពេលរោងចក្រឆេះ។ មកទល់ពេលនេះ មិនទាន់មានការសម្រេចយ៉ាងណានៅឡើយទេ ពីព្រោះគេមិនទាន់ដឹងអំពីមូលហេតុបណ្ដាលឲ្យឆេះរោងចក្រនេះនៅឡើយ។
ប្រធានសហជីពប្រជាធិបតេយ្យកម្មករកាត់ដេរកម្ពុជា ប្រចាំរោងចក្រ ឆាង ស៊ឹង លោកស្រី ហុង ចាន់ថន ឲ្យដឹងថា ក្រុមហ៊ុននៅមិនទាន់ប្រាប់ថា តើពួកគេនឹងមានសំណងអ្វីដល់កម្មករនៅឡើយទេ។ លោកស្រីបន្តថា ថៅកែក្រុមហ៊ុនកំពុងនៅក្រៅប្រទេសនៅឡើយ។ ដោយឡែកឃើញតែអតីតថៅកែរោងចក្រចាស់ ដែលជាមិត្តជិតស្និទ្ធនឹងប្រធានក្រុមហ៊ុននេះ មកជួបជាមួយកម្មករ កាលពីព្រឹកថ្ងៃទី២៩ កក្កដា និងបានផ្តល់ប្រាក់ឲ្យកម្មករខ្ចីក្នុងម្នាក់ៗ ១០០ដុល្លារ ដើម្បីដោះទ័លមួយគ្រា នៅពេលដែលកម្មករត្រូវការលុយទូទាត់ថ្លៃផ្ទះ ថ្លៃអាហារ និងការចំណាយផ្សេងៗ៖ «យើងធ្វើកិច្ចព្រមព្រៀងជាមួយគាត់មួយ មិនមែនជាសំណងទេ ឬក៏ទូទាត់លុយបំណាច់អីឲ្យកម្មករទេ ជាប្រាក់ដែលយើងខ្ចីគាត់សិន»។
លោកស្រីបន្តថា កម្មករកំពុងតែព្រួយបារម្ភថា ពួកគេអាចនឹងមិនបានទទួលប្រាក់សំណងផ្សេងៗ ខណៈដែលករណីអគ្គិភ័យនេះទំនងជាស្ថិតក្នុងករណីប្រធានស័ក្តិ ដែលតម្រូវឲ្យក្រុមហ៊ុនរួចផុតពីការទទួលខុសត្រូវ។ ករណីប្រធានស័ក្តិ គឺសំដៅទៅលើព្រឹត្តិការណ៍ណាមួយដែលកើតឡើងដោយមិនមែនជាសកម្មភាពរបស់មនុស្សមិនអាចគ្រប់គ្រង ឬទប់ទល់បាន ដូចជា ករណីរញ្ជួយដី បន្ទុះភ្នំភ្លើង ទឹកជំនន់ និងករណីសង្គ្រាម ជាដើម។
យ៉ាងណា តំណាងកម្មកររូបនេះគិតថា អគ្គិភ័យរោងចក្រ ឆាង ស៊ឹង មិនស្ថិតក្នុងករណីប្រធានស័ក្តិទេ តែវាជាការធ្វេសប្រហែសរបស់ក្រុមហ៊ុនច្រើនជាង។ ជំហររបស់កម្មករ គឺចង់ឲ្យក្រុមហ៊ុនផ្តល់សំណង ៥ចំណុចដល់ពួកគេ ក្នុងនោះរួមមាន ប្រាក់ជូនដំណឹង ប្រាក់បណ្ដេញចេញ ប្រាក់ជំងឺចិត្ត ប្រាក់បន្ទាប់បន្សំ និងប្រាក់ចុងក្រោយ។ លោកស្រីបន្តថា កម្មករកំពុងប្រមូលស្នាមមេដៃ ដើម្បីភ្ជាប់ជាមួយពាក្យបណ្ដឹងប្ដឹងទៅក្រសួងការងារ និងស្ថាប័នពាក់ព័ន្ធ ឲ្យជួយអន្តរាគមន៍ពីរឿងនេះ៖ «ឆេះរោងចក្រ ហើយអ្នកខ្លះគិតថា គាត់អត់មានបានអី គាត់ទៅខេត្ត អ្នកខ្លះកំពុងដើរធ្វើតេស្ដការងារ យើងកំពុងផ្តល់ព័ត៌មានតាមរយៈតៗគ្នា ដើម្បីឲ្យពួកគាត់មកផ្ដិតស្នាមមេដៃទាំងអស់គ្នា យើងនឹងរៀបចំដាក់ទៅតែចំពោះឯកសារខ្លះយើងបានដាក់ទៅរួចហើយ»។
ប្រធានផ្នែកកម្មវិធីការងារនៃមជ្ឈមណ្ឌលអប់រំច្បាប់ សម្រាប់សហគមន៍ លោក មឿន តុលា គិតថា ក្រុមហ៊ុន ឆាង ស៊ឹង គួរយករូបមន្តដោះស្រាយឲ្យកម្មករដូចករណីអគ្គិភ័យនៅរោងចក្រ ជូន តិចថាយស៍ (June Textiles Co., Ltd. Cambodia) ឬរោងចក្រ មិថុនា កាលពីឆ្នាំ២០១១។
ដំបូងឡើយ ខាងរោងចក្រ មិថុនា បានច្រានចោលការទទួលខុសត្រូវលើកម្មករជាង ៤ពាន់នាក់ ដោយអះអាងថា ការឆេះរោងចក្រនោះ គឺជាករណីប្រធានស័ក្តិ។ ប៉ុន្តែខាងក្រុមប្រឹក្សាអាជ្ញាកណ្ដាល សម្រេចថារូបភាព និងស្ថានភាពនៃថ្ងៃកើតហេតុ មិនស្ថិតក្នុងករណីប្រធានស័ក្តិទេ។ ដូច្នេះ បានបង្គាប់ឲ្យក្រុមហ៊ុននេះផ្តល់សំណងដល់កម្មករ ៤ចំណុចនៃច្បាប់ការងារ។ លោក មឿន តុលា បន្តថា ករណីអគ្គិភ័យនៅរោងចក្រ ឆាង ស៊ឹង នេះក៏មិនទាន់អាចចាត់ចូលថាជាករណីប្រធានស័ក្តិបានដែរ គឺវាអាស្រ័យទៅលើក្រុមប្រឹក្សាអាជ្ញាកណ្ដាលជាអ្នកសម្រេចថា អង្គហេតុនៃអគ្គិភ័យនោះ ជាករណីប្រធានស័ក្តិ ឬក៏អត់។
លោក មឿន តុលា ផ្តល់គំនិតថា ក្នុងករណីនេះ កម្មករអាចដាក់ពាក្យបណ្ដឹងទៅក្រសួងការងារ និងដាក់ទៅក្រុមប្រឹក្សាអាជ្ញាកណ្ដាលឲ្យស្រាវជ្រាវ និងដោះស្រាយពីរឿងនេះ៖ «ប្រសិនបើក្រសួងការងារ ថារឿងនេះជាប្រធានស័ក្តិ ខ្ញុំជឿថា កម្មករមិនទាន់ជឿដែរ សំខាន់ទាល់តែអង្គភាពណាមានសិទ្ធិក្នុងការបកស្រាយច្បាប់ហ្នឹង។ កន្លងមកគេបញ្ជូនរឿងនេះទៅក្រុមប្រឹក្សាអាជ្ញាកណ្ដាលឲ្យក្រុមប្រឹក្សាអាជ្ញាកណ្ដាលជាអ្នកសម្រេច តើអង្គហេតុបង្ហាញមកហ្នឹងជាករណីប្រធានស័ក្តិដែរឬអត់ បើប្រធានស័ក្តិ កម្មករទទួលបានតែប្រាក់ខែចុងក្រោយ»។
ខាងក្រសួងការងារ និងបណ្តុះបណ្តាលវិជ្ជាជីវៈ បានឲ្យមន្ត្រីជំនាញចុះទៅស្រាវជ្រាវពីរឿងនេះហើយ កាលពីថ្ងៃដែលមានអគ្គិភ័យនៅរោងចក្រ ឆាង ស៊ឹង ភ្លាមៗ។
រដ្ឋលេខាធិការក្រសួងការងារ លោក អ៊ំ មាន ប្រាប់ថា លោកនៅមិនទាន់ដឹងពីលទ្ធផលនៃការស្រាវជ្រាវនៅឡើយទេ តែខាងក្រសួងបានយកចិត្តទុកដាក់ពីរឿងនេះ។
ខាងរោងចក្រ ឆាង ស៊ឹង មិនបានទម្លាយពីទំហំខូចខាតជាទឹកប្រាក់របស់ក្រុមហ៊ុនទេ ប៉ុន្តែមន្ត្រីរដ្ឋបាលរោងចក្រនេះប្រាប់ថា ក្រុមហ៊ុនបានទិញប័ណ្ណធានារ៉ាប់រងអាជីវកម្មពីក្រុមហ៊ុនឯកជនមួយ។
ប្រធានរដ្ឋបាលរោងចក្រ ឆាង ស៊ឹង អ្នកនាង ហ៊ែល ផល្លា ប្រាប់ថា រោងចក្របានខាតបង់ច្រើន ហើយមិនដឹងថាបានអ្វីនឹងផ្តល់សំណងឲ្យកម្មករនោះទេ។ យ៉ាងណា ខាងក្រុមហ៊ុនរង់ចាំការចុះវាយតម្លៃ និងប្រាក់សំណងពីក្រុមហ៊ុនធានារ៉ាប់រងជាមុនសិន ទើបអាចដោះស្រាយសំណងទូទាត់ឲ្យកម្មករបាន៖ «មិនដឹងថាក្រសួងចុះដោះស្រាយពេលណា គាត់ទទួលសំណងអីខ្លះ អ៊ីចឹងបញ្ហាដែលគាត់ (កម្មករ) ត្រូវប្រឈមមានច្រើនណាស់ សូម្បីតែបុគ្គលិកដូចពួកខ្ញុំអីក៏សង្ឃឹមទៅលើប្រាក់ខែហ្នឹងដែរ ដល់ពេលឆេះអស់អ៊ីចឹង ពួកខ្ញុំក៏ប្រឈមដូចតែកម្មករដែរ»។
ប្រធានរដ្ឋបាលរោងចក្រនេះបញ្ជាក់ថា ក្រុមហ៊ុននៅមិនទាន់សម្រេចថានឹងត្រូវផ្តល់សំណងឲ្យកម្មករយ៉ាងណានៅឡើយ ដោយសារតែថៅកែក្រុមហ៊ុនកំពុងមានបញ្ហាសុខភាព និងស្ថិតនៅក្រៅប្រទេស។
អ្នកស្រីបន្តថា រហូតមកដល់រសៀលថ្ងៃទី២៩ កក្កដា នេះ ភ្លើងនៅក្នុងរោងចក្រនៅឆេះហុយតិចៗនៅឡើយ ដែលមិនទាន់អាចឲ្យក្រុមសមត្ថកិច្ចធ្វើកោសល្យវិច័យរកមូលហេតុបង្កឲ្យមានអគ្គិភ័យបាននៅឡើយ។ ខាងក្រុមហ៊ុនសង្ឃឹមថា កម្មករនឹងរក្សាភាពអត់ធ្មត់ និងទុកពេកខ្លះឲ្យក្រុមហ៊ុនដោះស្រាយពីរឿងនេះ។
រោងចក្រកាត់ដេរ ឆាង ស៊ឹង ស្ថិតនៅភូមិទួលពង្រ សង្កាត់ចោមចៅ ខណ្ឌពោធិ៍សែនជ័យ ត្រូវបានភ្លើងឆេះទាំងស្រុងកាលពីវេលាម៉ោង ៤ភ្លឺ ថ្ងៃទី២៨ កក្កដា។ អគ្គិភ័យនេះ បណ្ដាលឲ្យបុរសជនជាតិចិន ម្នាក់ស្លាប់ និង ៣នាក់ផ្សេងទៀតរបួសស្រាល៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។