Opens in new windowមន្ត្រីយោធិនពិការក្នុងសមរភូមិជាច្រើននាក់នៅស្រុកសំឡូត ខេត្តបាត់ដំបង អំពាវនាវឲ្យមន្ត្រីដែលទទួលបន្ទុកយោធិនពិការចូលនិវត្តន៍ និងមន្ត្រីពាក់ព័ន្ធ ដាក់បញ្ចូលឈ្មោះពួកគាត់ក្នុងបញ្ជីជានិវត្តជនឲ្យបានឆាប់ៗ។ អ្នកភូមិបញ្ជាក់ថា ពួកគាត់ជួបការលំបាកក្នុងជីវភាពរស់នៅជាខ្លាំង និងបានស្វះស្វែងដាក់ឈ្មោះជាមន្ត្រីសោធននិវត្តន៍អស់ជាច្រើនលើកច្រើនសាមកហើយ តែពុំទទួលបានលទ្ធផលទេ។
មន្ត្រីយោធិនពិការនៅស្រុកសំឡូត កំពុងទន្ទឹងរង់ចាំសមត្ថកិច្ចពាក់ព័ន្ធ ដាក់បញ្ចូលឈ្មោះរបស់ពួកគាត់ទៅជានិវត្តជន ដើម្បីទទួលបានប្រាក់ខែយកទៅដោះស្រាយជីវភាពរស់នៅប្រចាំថ្ងៃ។
មន្ត្រីយោធិនពិការម្នាក់ គឺលោក អ៊ុន នួន រស់នៅភូមិឆករកា ឃុំសំឡូត ស្រុកសំឡូត ខេត្តបាត់ដំបង ថ្លែងនៅថ្ងៃទី៩ កញ្ញា ថា លោកជាអតីតមន្ត្រីយោធាកងពលធំលេខ១៧ ប្រចាំការនៅភ្នំវាយចាប ស្រុករតនមណ្ឌល ខេត្តបាត់ដំបង។ លោកអះអាងថា កាលពីឆ្នាំ១៩៩២ លោកត្រូវអំបែងគ្រាប់បែក ខណៈប្រយុទ្ធក្នុងសមរភូមិ បណ្ដាលឲ្យរងរបួសជើងខាងឆ្វេង ហើយតាំងពីពេលនោះមក រូបលោកធ្វើការងារអ្វីមិនបានដូចកាលពីពុំទាន់រងរបួសនោះឡើយ។ ដោយសារបញ្ហានេះ រូបលោកត្រូវបានអង្គភាពផ្ដាច់ប្រាក់ខែតាំងពីឆ្នាំ២០០០ រហូតមក៖ «ខ្ញុំជំពាក់គេច្រើនណាស់ ដោយសារខ្ញុំមិនអាចធ្វើការរកប្រាក់ទៅសងគេបាន។ សូមឲ្យរដ្ឋាភិបាលជួយខ្ញុំឲ្យបានចូលជាមន្ត្រីយោធិនពិការនិវត្តជនផង»។
មន្ត្រីយោធិនពិការម្នាក់ទៀតនៅឃុំសំឡូត គឺអ្នកស្រី ឡាយ សារឿន ថ្លែងថា ដើមឡើយអ្នកស្រីក៏ជាមន្ត្រីយោធានៅអង្គភាពកងពលធំលេខ១៧ ប្រចាំការនៅភ្នំវាយចាប នោះដែរ។ អ្នកស្រីអះអាងថា រូបគាត់ត្រូវអំបែងគ្រាប់កាំភ្លើងធំនៅជើងខាងស្ដាំក្នុងសមរភូមិ បណ្ដាលឲ្យស្វិតជើងស្ដាំពុំអាចធ្វើការងារអ្វីធ្ងន់បាននោះទេ៖ «ខ្ញុំជាអ្នកតស៊ូការពារប្រទេសជាតិមួយរូបដែរ តែមិនត្រូវបានគេដាក់បញ្ចូលឈ្មោះខ្ញុំជាមន្ត្រីសោធននិវត្តន៍ទេ»។
មន្ត្រីយោធិនអះអាងថា មន្ត្រីយោធិនពិការនៅស្រុកសំឡូត ប្រមាណ ៣០០នាក់ កំពុងមានជីវភាពខ្វះខាត ហើយកន្លងមកធ្លាប់ស្នើសុំឲ្យអាជ្ញាធរពាក់ព័ន្ធ ដាក់បញ្ចូលឈ្មោះរបស់ពួកគាត់ជានិវត្តជនដែរ ប៉ុន្តែពុំទទួលបានលទ្ធផលនោះទេ។
វិទ្យុអាស៊ីសេរី ពុំអាចទាក់ទងមន្ត្រីយោធាភូមិភាគ៥ ទទួលបន្ទុកផ្នែកយោធិនពិការចូលនិវត្តន៍ ដើម្បីអត្ថាធិប្បាយជុំវិញបញ្ហានេះបានទេនៅថ្ងៃទី៩ កញ្ញា។
ប៉ុន្តែ ជំទប់ទី១ ឃុំសំឡូត និងតំណាងឲ្យអាជ្ញាធរឃុំ ក្នុងការពិនិត្យឈ្មោះប្រជាពលរដ្ឋជាមន្ត្រីយោធិននិវត្តជន លោក ធឹម ព្រឿន មានប្រសាសន៍ថា ពុំមែនអាជ្ញាធរមិនគិតគូរកាត់ឈ្មោះប្រជាពលរដ្ឋជានិវត្តជននោះទេ។ លោកអះអាងថា បញ្ហានេះ ដោយសារប្រជាពលរដ្ឋទាំង ៣០០នាក់នោះ មួយចំនួនធំមិនគ្រប់លក្ខណៈសម្បត្តិដែលអាចចាត់ចូលជានិវត្តជនបាន៖ «ពេទ្យធ្វើការវាយតម្លៃប្រភេទមួយដល់ប្រភេទ៣ បានមន្ត្រីយោធិនពិការតែ ៨៨នាក់ទេ ដែលមានគុណសម្បត្តិអាចកាត់ឈ្មោះចូលជាមន្ត្រីនិវត្តជនបាននោះ។ ចំពោះប្រជាពលរដ្ឋផ្សេងទៀត គ្រូពេទ្យបានពិនិត្យអស់លទ្ធភាពហើយ តែមិនអាចកាត់ឈ្មោះចូលបាននោះទេ»។
ទាក់ទងនឹងបញ្ហានេះដែរ ប្រធានអង្គការជនពិការកម្ពុជា លោក ងិន សៅរ័ត្ន មានប្រសាសន៍ថា ករណីនេះសមត្ថកិច្ចពាក់ព័ន្ធគួរពិចារណា និងយកចិត្តទុកដាក់ជួយដល់មន្ត្រីយោធិនពិការឲ្យបានខ្ពស់បំផុត ដើម្បីផ្ដល់កម្លាំងចិត្តដល់ពួកគាត់ ដែលធ្លាប់ប្រយុទ្ធការពារប្រទេសជាតិនៅក្នុងសមរភូមិនោះ៖ «បើសិនក្នុងករណីគាត់មិនបានទទួល យើងគួរសិក្សារកមូលហេតុនោះឲ្យបានច្បាស់លាស់ជាមុនសិន ថាតើគាត់ខ្វះខាងចំណុចណាខ្លះ? ពីព្រោះការជួយជនពិការ គឺជាកាតព្វកិច្ចរបស់រដ្ឋតាមច្បាប់ ដែលមិនអាចគេចវេសបាននោះទេ»។
លោកពន្យល់ថា បញ្ហានេះមន្ត្រីយោធិនពិការដែលពុំមានឈ្មោះជានិវត្តជនទាំងនោះ ត្រូវធ្វើការទាក់ទងទៅខាងក្រសួងសង្គមកិច្ច អតីតយុទ្ធជន និងយុវនីតិសម្បទា ឬរដ្ឋាភិបាល ដើម្បីពិនិត្យ និងដោះស្រាយបញ្ហានេះឲ្យបានឆាប់រហ័ស៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។