សមាគមនិយោជកធ្វើពាណិជ្ជកម្មនៅកម្ពុជា បានផ្សាយចេញរបាយការណ៍មួយបង្ហាញឲ្យឃើញថា កម្លាំងកម្មករនៅកម្ពុជា ធ្វើការលើវិស័យកាត់ដេរមានចំនួនច្រើន ប៉ុន្តែនៅមានជំនាញទាប។ ស្របគ្នានេះ អំពើពុករលួយបានកើតមានធ្វើឲ្យរាំងស្ទះការរីកចម្រើនលើវិស័យកាត់ដេរនេះ។
សហព័ន្ធនិយោជក និងសមាគមពាណិជ្ជកម្មកម្ពុជា បានធ្វើការស្ទាបស្ទង់មតិ និងរកឃើញថា ការងារវិស័យកាត់ដេរនៅកម្ពុជា មានបញ្ហាជាច្រើនដែលរដ្ឋាភិបាល កម្មករ និងថៅកែរោងចក្រត្រូវរួមគ្នាដោះស្រាយ។
លោក វ៉ាន់ ស៊ូអៀង ប្រធានសហព័ន្ធនិយោជក និងសមាគមពាណិជ្ជកម្មកម្ពុជា និងជាប្រធានសមាគមនិយោជកកាត់ដេរកម្ពុជា មានប្រសាសន៍កាលពីថ្ងៃទី១២ មីនា ក្នុងឱកាសផ្សព្វផ្សាយរបាយការណ៍ស្រាវជ្រាវរបស់សហព័ន្ធនិយោជក និងសមាគមពាណិជ្ជកម្មកម្ពុជា និងរបាយការណ៍របស់អង្គការការងារអន្តរជាតិ ថា ប្រជាជនកម្ពុជា ចំនួន ៣២% មានអាយុក្រោម ១៥ឆ្នាំ ហើយមានយុវវ័យប្រមាណពី ៣០ម៉ឺន ទៅ ៤០ម៉ឺននាក់ បានចូលធ្វើការក្នុងទីផ្សារការងារជារៀងរាល់ឆ្នាំ និងប្រទេសកម្ពុជា មានទីតាំងភូមិសាស្ត្រនៅចំកណ្ដាលតំបន់មួយ ដែលមានការរីកចម្រើនលូតលាស់បំផុតលើពិភពលោក។ ប៉ុន្តែ ទាក់ទិនជាមួយជំនាញការងារ របាយការណ៍សិក្សារកឃើញថា ការអប់រំ និងបណ្ដុះបណ្ដាលវិជ្ជាជីវៈមុខជំនាញដល់ពលករទាំងនោះ មិនទាន់ឆ្លើយតបបានតាមសេចក្តីត្រូវការរបស់សហគមន៍ពាណិជ្ជកម្មនៅឡើយទេ។
ក្រៅពីពលករមានការខ្វះខាតបទពិសោធន៍ និងជំនាញលើការងារ លោក វ៉ាន់ ស៊ូអៀង បានបន្ថែមទៀតថា ការសិក្សាស្រាវជ្រាវបានរកឃើញថា អំពើពុករលួយបានកើតមាន និងនៅតែជាឧបសគ្គសំខាន់ចំពោះការងារពាណិជ្ជកម្ម៖ «ការសិក្សាស្រាវជ្រាវរបស់យើងលើផលវិបាកនៃការបដិសេធមិនបង់ប្រាក់ សម្រួលការងារ បានធ្វើឲ្យក្រុមហ៊ុន ៧០% ទទួលបានសេវាកម្មយឺតយ៉ាវ ឬពុំទទួលបានទាល់តែសោះ។ ចំណុចនេះ មិនអាចទទួលយកបានទេ។ ទោះបីមានវឌ្ឍនភាពប៉ុន្មានឆ្នាំថ្មីៗនេះក៏ដោយ ជាពិសេសតាមរយៈការងាររបស់អង្គភាពប្រឆាំងអំពើពុករលួយ ក៏ប៉ុន្តែអំពើពុករលួយនៅតែជាឧបសគ្គសំខាន់សម្រាប់ពាណិជ្ជកម្ម»។
របាយការណ៍របស់អង្គការអន្តរជាតិខាងការងារ ហៅកាត់ថា អាយឡូ (ILO) ស្ដីពី "បរិយាកាសអំណោយផលដើម្បីធ្វើឲ្យសហគ្រាសមានចីរភាពក្នុងប្រទេសកម្ពុជា" បានបង្ហាញឲ្យដឹងថា អំពើពុករលួយ គឺជាឧបសគ្គធំបំផុតនៅក្នុងការធ្វើជំនួញនៅកម្ពុជា ហើយគេបានប៉ាន់ស្មានថា ប្រហែល ១០% នៃផលទុនក្នុងស្រុកសរុប ជី.ឌី.ភី (GDP) ប្រចាំឆ្នាំ បានបាត់បង់ដោយសារអំពើពុករលួយ។
ឆ្លើយតបចំពោះចំណុចលើកឡើងក្នុងរបាយការណ៍របស់សហព័ន្ធនិយោជក និងសមាគមពាណិជ្ជកម្មកម្ពុជា និងអង្គការអន្តរជាតិខាងការងារ លោក អ៊ិត សំហេង រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ មានប្រសាសន៍ថា រដ្ឋាភិបាលបានប្រឹងប្រែងបង្កើតគម្រោងអប់រំបណ្ដុះបណ្ដាលបច្ចេកទេស និងវិជ្ជាជីវៈ ដើម្បីសម្រួលការធ្វើសមាហរណកម្មយុវជនចូលទីផ្សារការងារ ដោយបង្កើតជំនាញអនុវត្តជាក់ស្តែង។ ហើយចំពោះការប្រឆាំងតបដើម្បីបំបាត់អំពើពុករលួយ រដ្ឋាភិបាលបានបង្កើតច្បាប់ប្រឆាំងអំពើពុករលួយ និងបង្កើតអង្គភាពប្រឆាំងអំពើពុករលួយ ដើម្បីជួយកាត់បន្ថយ និងទប់ស្កាត់អំពើពុករលួយក្នុងជួររាជរដ្ឋាភិបាល៖ «បាទ! នេះជាការត្រឹមត្រូវណាស់ ព្រោះវាស្របជាមួយគោលនយោបាយរបស់រាជរដ្ឋាភិបាល ព្រោះឥឡូវនេះបរិយាកាសនៃវិនិយោគនៃអាជីវកម្ម ត្រូវតែធានាតម្លាភាព ទើបធានាបានវិនិយោគ។ ដូចនេះ ការចូលរួមបំបាត់អំពើពុករលួយនេះ គឺស្វាគមន៍ និងជាការមួយត្រឹមត្រូវ»។
លោក អ៊ិត សំហេង បានអំពាវនាវឲ្យវិស័យឯកជន កម្មករនិយោជិត ដៃគូជាតិ និងអន្តរជាតិ ចូលរួមចំណែកសហការដោះស្រាយជាបន្តទៀត បញ្ហាចម្បងជាច្រើនដែលកើតមាន និងកំពុងប្រឈម ដូចជា បញ្ហាខ្វះជំនាញដែលប៉ះពាល់ការរីកចម្រើនរបស់ក្រុមហ៊ុន។
របាយការណ៍ការសិក្សារបស់សហព័ន្ធនិយោជក និងសមាគមពាណិជ្ជកម្មកម្ពុជា និងរបាយការណ៍សិក្សារបស់អង្គការអន្តរជាតិខាងការងារ ស្ដីពីបរិយាកាសអំណោយផលដើម្បីធ្វើឲ្យសហគ្រាសមានចីរភាពក្នុងប្រទេសកម្ពុជា បានផ្សព្វផ្សាយជាសាធារណៈ កាលពីថ្ងៃទី១២ មីនា ដោយមានការចូលរួមពីមន្ត្រីរដ្ឋាភិបាល តំណាងស្ថានទូតបរទេសនៅកម្ពុជា និងអ្នកវិនិយោគជាច្រើននាក់។
លទ្ធផលរបាយការណ៍នេះបានមកពីការស្ទាបស្ទង់មតិថ្នាក់ជាតិ ជាមួយកម្មករនិយោជិតចំនួន ២០០នាក់ និងតំណាងក្រុមហ៊ុនចំនួន ៣០០នាក់នៅទូទាំងប្រទេសកម្ពុជា និងបានមកពីការពិភាក្សាតាមក្រុម និងសិក្ខាសាលាថ្នាក់ជាតិ ជាមួយឥស្សរជនជាន់ខ្ពស់ផ្នែកពាណិជ្ជកម្មផង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។