ភាពយឺតយ៉ាវក្នុងការប្រគល់សញ្ញាបត្រអោយនិស្សិតដែលបានបញ្ចប់ការសិក្សារបស់ខ្លួនជាយូរឆ្នាំមកហើយ បានធ្វើអោយនិស្សិតមួយចំនួននៅសាកលវិទ្យាល័យនីតិសាស្ត្រ និងវិទ្យាសាស្ត្រសេដ្ឋកិច្ច សម្ដែងការមិនសប្បាយចិត្ត និងងឿងឆ្ងល់។
និស្សិតថ្នាក់បរិញ្ញាបត្រជាន់ខ្ពស់ផ្នែកច្បាប់ម្នាក់ឈ្មោះ សិលា ដែលបានបញ្ចប់ការសិក្សារបស់ខ្លួនតាំងពីឆ្នាំ២០០៩ បានរអ៊ូរទាំថា រហូតមកទល់ពេលនេះ រូបគេនៅមិនទាន់បានសញ្ញាបត្រផ្លូវការនៅឡើយ។ សិលា ក៏បានចោទសួរខ្លួនឯងថា មិនដឹងជាមានមូលហេតុអ្វីបានជាមានការយឺតយ៉ាវយ៉ាងដូច្នេះ។ លោកថា ការយឺតយ៉ាវនេះ បានផ្តល់ផលវិបាកមួយចំនួនដល់និស្សិត មានដូចជា តម្រូវការសញ្ញាបត្រដើម្បីយកទៅដាក់ស្វែងរកការងារធ្វើ ហើយបើនិស្សិតជាមន្ត្រីរាជការវិញ គេត្រូវការសញ្ញាបត្របញ្ជាក់ដើម្បីធ្វើកម្មប្រាក់ជាដើម។
លោក សិលា៖ «កាលណាអត់មានសញ្ញាបត្រ យើងវាហាក់ដូចជាមានក្រេឌីត (Credit) ទាប ពេលដាក់ពាក្យកន្លែងណាមួយ យើងមានត្រឹមតែបរិញ្ញាបត្រ អត់មានអនុបណ្ឌិត កន្លែងខ្លះ គេមិនត្រឹមតែទាមទារអោយយើងបញ្ជាក់ថាបញ្ចប់អនុបណ្ឌិតទេ គឺគេត្រូវការសញ្ញាបត្រអនុបណ្ឌិតតែម្តង សញ្ញាបត្របណ្ដោះអាសន្នគេអត់យកទេ។ យើងត្រូវការសញ្ញាបត្រតែម្តង ដើម្បីយកទៅដំឡើងកម្មក្នុងមន្ត្រីរាជការ ឬក៏ត្រូវការសញ្ញាបត្រយើងដាក់នៅកន្លែងធ្វើការតែម្តង»។
បើទោះជា លោក សិលា មិនដឹងថាមូលហេតុយឺតយ៉ាវនេះបណ្ដាលមកពីសាកលវិទ្យាល័យ ឬពីក្រសួងអប់រំ យុវជន និងកីឡា ក៏ដោយ ក៏លោកសង្ឃឹមថា គណៈគ្រប់គ្រងសាកលវិទ្យាល័យនឹងធ្វើការជាមួយក្រសួងអប់រំ យុវជន និងកីឡា ដើម្បីពន្លឿនដំណើរការនេះ។ លោកក៏ជឿជាក់ថា រដ្ឋមន្ត្រីក្រសួងអប់រំថ្មី នឹងមានយន្តការថ្មី ដើម្បីដោះស្រាយបញ្ហាដល់និស្សិត។
សកលវិទ្យាធិការនៃសាកលវិទ្យាល័យនីតិសាស្ត្រ និងវិទ្យាសាស្ត្រសេដ្ឋកិច្ច លោក លុយ ចណ្ណា មានប្រសាសន៍ថា សាកលវិទ្យាល័យរបស់លោកបានបញ្ជូនសញ្ញាបត្រនិស្សិតទៅអោយក្រសួងអប់រំ យុវជន និងកីឡា ហើយក្រសួងក៏បានធ្វើការងារនេះជិតចប់ហើយដែរ។ លោក ចណ្ណា ថា សាលានឹងចែកសញ្ញាបត្រក្នុងពេលដ៏ខ្លីខាងមុខ។ តែទោះយ៉ាងណា លោកមិនបានអោយដឹងថា តើភាពយឺតយ៉ាវនោះបណ្ដាលមកពីសាកលវិទ្យាល័យរបស់លោក ឬពីក្រសួងអប់រំ យុវជន និងកីឡា ឡើយ។
លោក លុយ ចណ្ណា៖ «បញ្ហានេះដោយសារវាចេះតែគរៗពីមុនមក ឥឡូវស៊ីញេបានជំនាន់ ២០០៨-២០០៩ យើងស៊ីញេហើយនៅចាំតែមួយចំនួនតូចទៀតទេ នឹងរៀបចំចែកក្នុងពេលឆាប់ៗនេះហើយ»។
វិទ្យុអាស៊ីសេរី មិនអាចទាក់ទងមន្ត្រីក្រសួងអប់រំ យុវជន និងកីឡា ដែលទទួលបន្ទុកផ្នែកការងារនេះ ដើម្បីសុំការពន្យល់បានឡើយ នៅថ្ងៃទី២ ខែវិច្ឆិកា ឆ្នាំ២០១៣។
គេមិនដឹងថា តើភាពយឺតយ៉ាវក្នុងការប្រគល់សញ្ញាបត្រអោយនិស្សិតបណ្ដាលមកពីស្ថាប័នណាឡើយ តែអ្វីដែលគេធ្លាប់មើលឃើញជារឿយៗនោះ គឺសាកលវិទ្យាល័យមួយចំនួនមិនបានចែកសញ្ញាបត្រអោយនិស្សិតភ្លាមៗ បន្ទាប់ពីបញ្ចប់ការសិក្សាឡើយ។ ពេលខ្លះ សាកលវិទ្យាល័យមួយចំនួននៅពេលទទួលបានសញ្ញាបត្រពីក្រសួងអប់រំហើយ តែត្រូវនៅរង់ចាំរកពេលវេលាអោយសមស្របមួយ ដើម្បីអញ្ជើញថ្នាក់ដឹកនាំកំពូលចូលរួមចែកសញ្ញាបត្រទៀតផង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។