អតីតកម្មកររោងចក្រហ៊ុយចៀន (Huey Chuen) ប្រមាណ ៥០០នាក់ បានហែក្បួនតាមរថយន្ត ទៅតវ៉ានៅក្រសួងការងារនិងបណ្ដុះបណ្ដាលវិជ្ជាជីវៈ ព្រួយខ្លាចថៅកែរោងចក្រមិនបើកប្រាក់អតីតភាពការងារឲ្យពួកគាត់ នៅពេលដឹងថា តែថៅកែរោងចក្របានប្ដូរឈ្មោះរោងចក្រពីឈ្មោះហ៊ុយចៀនទៅ ចៀនឡឹ (Jian Le) វិញ។ រោងចក្រហ៊ុយចៀនស្ថិតក្នុងភូមិជ្រោយអំពិល សង្កាត់ក្បាលកោះ ខណ្ឌច្បារអំពៅ រាជធានីភ្នំពេញ។
បើគិតតាំងពីថ្ងៃទី១៥ កញ្ញា មកទល់ពេលនេះ មានរយៈពេលកន្លះខែហើយ ដែលអតីតកម្មកររោងចក្រហ៊ុយចៀន ដែលបច្ចុប្បន្នប្ដូរឈ្មោះមក ជារោងចក្រចៀនឡឹ បានតវ៉ាទាមទារបើកប្រាក់ឈ្នួលអតីតភាព និងសុំឲ្យថៅកែរោងចក្រទទួលយកតំណាងកម្មករម្នាក់ ដែលត្រូវបានព្យួរការងារ ចូលធ្វើការវិញ។
តំណាងកម្មករ និងជាប្រធានសម្ព័ន្ធសហជីពជាតិ លោក ហ្វា សាលី បញ្ជាក់ ថា នៅពេលកម្មករព្រួយខ្លាចបាត់បង់ប្រាក់អតីតភាព ថៅកែរោងចក្រចេះតែបង្ខំឲ្យកម្មករចូលធ្វើការ ដោយបានបិទបទបញ្ជានានា ឬបិទដីកាអាជ្ញារបស់តុលាការនៅមុខរោងចក្រជំរុញឲ្យកម្មករចូលធ្វើការ តែកម្មករមិនព្រម ដោយទាមទារឲ្យថៅកែគិតគូរប្រាក់អតីតភាពជូនកម្មករសរុបចំនួន ១,២០០ នាក់ជាមុនសិន ៖ « បើតាមការពិតទៅ ក្រុមហ៊ុននឹងចង់បានអ្នកបញ្ជាទិញថ្មីៗ ហើយទី២ គឺ រដ្ឋាភិបាលមានការលើកលែងអនុគ្រោះពន្ធ នាំចេញនាំចូលចំពោះអ្នកវិនិយោគថ្មីៗ ដូច្នេះរោងចក្រនេះគាត់បើកយូរឆ្នាំហើយដែរ ហើយរោងចក្រមួយចំនួនទៀត ក៏មានការដូរឈ្មោះដូចគ្នាដើម្បីឲ្យបានរួចពន្ធនាំចេញនាំចូល នេះជាបញ្ហាដែលក្រុមហ៊ុននីមួយៗតែងប្រើគ្រប់កលល្បិចគ្រប់វិធីដើម្បីបំបាត់នូវអតីតភាពការងាររបស់កម្មករ។ កម្មករតែងទទួលការរងគ្រោះគ្រប់បែបយ៉ាង ឃើញថាមួយចំនួននឹងមានបាតុកម្ម កូដកម្មកើតឡើងមកដោយសារតែរោងចក្របិទទ្វារហើយរត់ចោលកម្មករ។ ហ្នឹងហើយជាកង្វល់របស់កម្មករ ដែលគេកេងប្រវ័ញ្ចគាត់ »។
កម្មករបានរំសាយទៅវិញនៅថ្ងៃដដែល បន្ទាប់ពីមន្ត្រីក្រសួងការងារបណ្ដុះបណ្ដាលវិជ្ជាជីវៈព្រមទទួលញត្តិទាមទាររបស់ពួកគាត់។
ឆ្លើយតបទៅនឹងការទាមទាររបស់កម្មករនេះ លោក វង់ សុវណ្ណ អគ្គលេខាធិការរង នៃគណៈកម្មការសម្រាប់ដោះស្រាយកូដកម្ម បាតុកម្ម នៃក្រសួងការងារបណ្ដុះបណ្ដាលវិជ្ជាជីវៈ បញ្ជាក់ថា ខាងភាគីរោងចក្របានសន្យាជាមួយកម្មករ និងមន្ត្រីក្រសួងការងាររបស់លោកហើយថា ភាគីរោងចក្រនឹងគោរពតាមច្បាប់ការងារ ដោយរក្សាប្រាក់អតីតការងារជូនកម្មករដដែល បើទោះណា ថៅកែប្ដូរឈ្មោះរោងចក្រក៏ដោយ។ ក៏ប៉ុន្តែលោកថា ភាគីកម្មករនៅតែមិនទុកចិត្ត ដោយយល់ឃើញដូច្នេះ លោក វង់ សុវណ្ណ បានសម្រេចថា នឹងកោះហៅភាគីរោងចក្រ និងភាគីតំណាងកម្មករ មកជួបគ្នានៅថ្ងៃទី៣០ កញ្ញា ដើម្បីដោះស្រាយបញ្ចប់បញ្ហា៖ « សំខាន់នឹងគឺថៅកែ គេមានចេញសេចក្ដីជូនដំណឹងមួយថា គេនឹងរក្សាអតីតភាពជូនកម្មករនិយោជិកចាស់របស់គេ។ មួយទៀតគេថា គេនឹងអនុវត្តទៅតាមច្បាប់ គោលការណ៍ច្បាប់ តាមក្រុមប្រឹក្សាអាជ្ញាកណ្ដាល និយាយរួមឲ្យតាមផ្លូវច្បាប់គេគោរពតាមនឹង។ មកដល់ព្រឹកមិញនេះខ្ញុំក៏បានទទួលញត្តិបងប្អូនយើងគាត់នៅតែស្នើឲ្យមានការធ្វើយ៉ាងណាឲ្យមានការសម្របសម្រួល ឲ្យទូទាត់ប្រាក់អតីតភាពឲ្យបងប្អូនយើងគាត់បារម្ភថា ក្រែងលោមានការផ្លាស់ប្ដូរថ្ងៃក្រោយទៅក្រែងលោមិនទុកចិត្តគ្នា »។
រោងចក្រ ហ៊ុយ ចៀន ត្រូវបានថៅកែរោងចក្រប្ដូរឈ្មោះ ជារោងចក្រ ចៀនឡឹ វិញ កាលពីខែសីហាកន្លងទៅ។ រោងចក្រនេះ ផលិតស្បែកជើងម៉ាកពូម៉ា (PUMA)៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។