សហជីពអន្តរជាតិ និងក្រុមអ្នកបញ្ជាទិញព្រមានថា កម្ពុជា អាចនឹងមានផលអាក្រក់នៅពេលខាងមុខ ប្រសិនបើគាបសង្កត់កម្មករ ការចាប់កម្មករឃុំនៅតែបន្តកើតមាន ហើយមិនព្រមដោះស្រាយដូចពេលបច្ចុប្បន្ន។
ឆ្លើយតបបញ្ហានេះ មន្ត្រីជំនាញនៃក្រសួងការងារ និងបណ្ដុះបណ្ដាលវិជ្ជាជីវៈ វិញ ទទួលស្គាល់ថា គិតចាប់ពីមានបញ្ហាក្នុងរយៈពេល ២ខែចុងក្រោយនៃចុងឆ្នាំ២០១៣ និងដើមឆ្នាំ២០១៤ កម្ពុជា បានខាតបង់ការនាំចេញលើវិស័យវាយនភណ្ឌកាត់ដេរនេះជាង ៥០០លានដុល្លារសហរដ្ឋអាមេរិក។
នៅក្នុងជំនួបចុងក្រោយនៃកិច្ចប្រជុំលើកទីពីររបស់ក្រុមអ្នកបញ្ជាទិញម៉ាកល្បីៗនៅលើពិភពលោក និងសហជីពអន្តរជាតិ យល់ឃើញថា រដ្ឋាភិបាលកម្ពុជា គប្បីដោះស្រាយបញ្ហាដែលកំពុងកើតមានឲ្យបានឆាប់ ហើយត្រូវធានាថា សុវត្ថិភាពរបស់កម្មករ និងសហជីពក្នុងស្រុក ត្រូវប្រាកដថា មានការការពារដោយច្បាប់ ដែលកម្ពុជា ចាត់ទុកថាជាប្រទេសនីតិរដ្ឋនោះ។
លោក អាត់ ធន់ ប្រធានសម្ព័ន្ធសហជីពប្រជាធិបតេយ្យកម្មករកាត់ដេរកម្ពុជា ដែលបានចូលរួមប្រជុំដែរនោះ ឲ្យដឹងក្រោយកិច្ចប្រជុំនៅរសៀលថ្ងៃទី២៧ ឧសភា ថា ទាំងអ្នកបញ្ជាទិញ និងក្រុមសហជីពអន្តរជាតិ ព្រមានរដ្ឋាភិបាល ប្រសិនបើបណ្ដែតបណ្ដោយឲ្យស្ថានការណ៍នេះ បន្តញាំញីកម្មករ ដូចជាប្រាក់ខែតិច និងអ្នកជាប់ឃុំទាំង ២១នាក់ មិនត្រូវបានដោះស្រាយដោយយុត្តិធម៌ទេ កម្ពុជា អាចត្រូវបាត់បង់ឱកាសដ៏ធំរបស់ខ្លួនក្នុងការនាំចេញផលិតផលវិស័យកាត់ដេរ ទៅក្រៅប្រទេស៖ «បញ្ហាហ្នឹងរដ្ឋាភិបាលមិនអាចដោះស្រាយបាន ហើយមិនព្រមដោះស្រាយ គេថានឹងមានបញ្ហាធំមួយ បានន័យថា វាមានវិបត្តិមួយនៅប្រទេសកម្ពុជា។ វាមានន័យថា អាចថាក្រុមហ៊ុនទាំងអស់ហ្នឹង អាចនឹងពិចារណាការមិនបន្តគាំទ្រនៅស្រុកបន្តទៅទៀត។ នេះ គឺជាអ្វីដែលជាជំហររបស់គេ»។
កិច្ចប្រជុំលើកទីពីរដែលធ្វើឡើងដាច់ដោយឡែកពីគ្នា ក្នុងរយៈពេល២ថ្ងៃមកនេះរបស់ក្រុមអ្នកបញ្ជាទិញ និងសហជីពអន្តរជាតិ គឺផ្ដោតសំខាន់លើប្រាក់ខែអប្បបរមារបស់កម្មករ។ លើសពីនេះទៀត ពួកគេទាមទារឲ្យរដ្ឋាភិបាលធ្វើការដោយម៉ត់ចត់ និងពិចារណាក្នុងសំណុំរឿង លោក វ៉ន់ ពៅ និងកម្មករទាំង ២២នាក់ផ្សេងទៀត ដែលបានចាប់ខ្លួនកាលពីដើមខែមករា កន្លងទៅនេះ ដោយយកចិត្តទុកដាក់បំផុត។
អគ្គលេខាធិការនៃសហជីពអន្តរជាតិ IndustriAll លោក ស៊ីរីគី រ៉ៃណា (Jyrki Raina) មានជំនឿថា ការដំឡើងប្រាក់ខែដល់កម្មករ វាមិនពិបាកសោះឡើយ បើផ្អែកលើវិស័យនេះអាចស្រូបកម្លាំងពលកម្មបានរហូតដល់ ១០ម៉ឺនការងារនៃការនាំចេញពីវិស័យឧស្សាហកម្មកាត់ដេរនេះ។ លោកបន្តថា គេមានបទពិសោធន៍រួចមកហើយដូចគ្នា ទៅនឹងប្រទេសបង់ក្លាដេស ហើយនៅនាទីចុងក្រោយ បញ្ហាត្រូវដោះស្រាយបានដោយងាយ។ លោកសង្ឃឹមថា និន្នាការនេះសម្រាប់ប្រទេសកម្ពុជា ក៏នឹងអាចមានដំណើរការល្អដូចគ្នាដែរ ហើយលោកសន្យាថានឹងតាមដានបញ្ហានេះ ដោយយកចិត្តទុកដាក់បំផុត៖ «ខ្ញុំនឹងតាមដានស្ថានការណ៍នៅពេលនេះ ដោយយកចិត្តទុកដាក់បំផុត។ នេះ គឺបញ្ហាដ៏ចម្បងមួយក្នុងចំណោមបញ្ហាផ្សេងទៀត ដែលត្រូវដោះស្រាយជាបន្ទាន់។ យើងពិតជាត្រូវយន្តការជាច្រើន ដើម្បីដោះស្រាយបញ្ហានេះនៅទីនេះ។ វាពុំមែនត្រឹមជាដំណាក់កាលក្នុងការដោះស្រាយលើប្រាក់ខែគោលប៉ុណ្ណោះទេ តែថែមទាំងជាទំនាក់ទំនងល្អលើវិស័យឧស្សាហកម្មនេះដែរ នៅកម្ពុជា»។
ក្រៅពីជួបជាមួយតំណាងសហជីពមាន លោក រ៉ុង ឈុន លោក បាវ ស៊ីណា អ្នកស្រី កេន ឆេងឡាង និងមេដឹកនាំសហជីពមួយចំនួនទៀតនៅសណ្ឋាគារសាន់វេ ក្នុងថ្ងៃតែមួយនេះ ក្រុមអ្នកបញ្ជាទិញ និងសហជីពអន្តរជាតិ ក៏បានជួបប្រជុំផងដែរជាមួយសមាគមរោងចក្រកាត់ដេរនៅកម្ពុជា ហៅថា GMAC។ របៀបវារៈសំខាន់នៃជំនួបទាំងជាមួយមន្ត្រីរដ្ឋាភិបាលនៅមានសន្តិភាព កាលពីថ្ងៃទី២៦ និងពេញមួយថ្ងៃនៅថ្ងៃទី២៧ ឧសភា ផ្ដោតលើប្រាក់ខែអប្បបរមារបស់កម្មករ និងដំណោះស្រាយក្នុងសំណុំរឿងអ្នកទាំង ២៣នាក់។
នេះជាកិច្ចប្រជុំលើកទីពីរហើយរបស់សហជីពអន្តរជាតិ និងក្រុមអ្នកបញ្ជាទិញជាមួយរដ្ឋាភិបាល ព្រមទាំងភាគីពាក់ព័ន្ធលើវិស័យកាត់ដេរនៅកម្ពុជា នេះ។ ជំនួបលើកទីមួយដែលប្រព្រឹត្តទៅកាលពីថ្ងៃទី១៩ ខែកុម្ភៈ គឺពិនិត្យមើលស្ថានការណ៍ក្រោយហេតុការណ៍បាញ់បង្ក្រាបប្រឆាំងកម្មករនៅផ្លូវវ៉េងស្រេង និងហិង្សានៅរោងចក្រ យ៉ាក ជីន។
ក្រៅពីនេះ ចំពោះជំហររបស់រដ្ឋាភិបាលវិញឲ្យដឹងក្រោយកិច្ចប្រជុំ កាលពីថ្ងៃទី២៦ ឧសភា ដោយបញ្ជាក់ម្តងហើយម្តងទៀតថា ចាប់តាំងពីលោកនាយករដ្ឋមន្ត្រី ហ៊ុន សែន ជួបជាមួយតំណាងអ្នករាយការណ៍អង្គការសហប្រជាជាតិ គឺសន្យាធានាសេវាយុត្តិធម៌សម្រាប់អ្នកជាប់ឃុំទាំង ២៣នាក់ ហើយជំហរនេះនឹងមិនកែប្រែទេ។ ពាក់ព័ន្ធប្រាក់ខែអប្បបរមារបស់កម្មករវិញ រដ្ឋាភិបាលនឹងចេញរបាយការណ៍មួយនៅពាក់កណ្ដាលខែមិថុនា ខាងមុខនេះ។ ចំណែកក្រោយកិច្ចប្រជុំបិទទ្វារជាង ២ម៉ោងនៅវិមានសន្តិភាពកាលពីថ្ងៃទី២៦ ឧសភា លោក ហេង សួរ អ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈ ទទួលស្គាល់ថា ព្រោះតែវិវាទកើតពីការទាមទារប្រាក់ឈ្នួលអប្បបរមានេះ បណ្ដាលឲ្យកម្ពុជា ត្រូវខាតបង់ការនាំចេញប្រមាណជាង ៥០០លានដុល្លារសហរដ្ឋអាមេរិក ក្នុងរយៈពេល ២ខែចុងក្រោយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។