កម្មកររោងចក្រជីនយី (Jiun Yi) ជាង ២០០នាក់ ដែលឡើងមកតវ៉ានៅក្រសួងការងារនិងបណ្ដុះបណ្ដាលវិជ្ជាជីវៈ នៅភ្នំពេញ ថ្ងៃទី២៥ សីហា បាននាំគ្នាត្រឡប់ទៅខេត្តកំពង់ឆ្នាំង វិញទាំងយប់នៅថ្ងៃដដែល នៅពេលដែលមន្ត្រីក្រសួងការងារសន្យាថា នឹងចុះទៅដោះស្រាយជម្លោះនេះជាមួយតំណាងរោងចក្រនៅថ្ងៃទី២៦ សីហា។ ក៏ប៉ុន្តែក្រុមកម្មករហាក់ដូចជាគ្មានជំនឿថា នឹងអាចដោះស្រាយបញ្ហាបាន។
តំណាងកម្មករតវ៉ានៃរោងចក្រជីនយី លោក សួស សុខា ដែលបានចូលជួបមន្ត្រីផ្នែកដោះស្រាយវិវាទការងារនៅក្រសួងការងារបណ្ដុះបណ្ដាលនិងវិជ្ជាជីវៈ នៅរសៀលថ្ងៃទី២៥ សីហា បានសម្ដែងមន្ទិលថា ការតវ៉ារបស់កម្មករនៅមុខក្រសួង នឹងមិនបានផលដូចការរំពឹងទុកទេ នៅពេលដែលមន្ត្រីក្រសួងសុំឲ្យកម្មករត្រឡប់ទៅផ្ទះវិញ ហើយសន្យាថា នឹងជួយដោះស្រាយតាមក្រោយ។
លោកថា នៅពេលនេះកម្មករបានសម្រេចវិលទៅខេត្តកំពង់ឆ្នាំងវិញ ដោយមិនអស់ចិត្ត រង់ចាំមើលលទ្ធផលនៃការដោះស្រាយនៅថ្ងៃទី២៦ សីហា ហើយប្រសិនជាមិនមានលទ្ធផលល្អទេ កម្មករនឹងឡើងមកតវ៉ានៅភ្នំពេញ បន្តទៀត ព្រោះថា កម្មករលែងទុកចិត្តអាជ្ញាធរ និងតុលាការខេត្តកំពង់ឆ្នាំង ទៀតហើយ៖ « ព្រោះបើឲ្យគាត់រង់ចាំដំណោះស្រាយខាងក្រុមហ៊ុន ឬក៏អាជ្ញាធរពាក់ព័ន្ធ ឬក៏មន្ត្រីមន្ទីរការងារខេត្តកំពង់ឆ្នាំង គាត់អត់មានសង្ឃឹមទៀតទេ។ ព្រោះមើលទៅហាក់ដូចជាគេរៀបចំការងារនឹងមិនឲ្យផុតពីកណ្ដាប់ដៃពួកគាត់ ទាំងថ្នាក់មន្ទីរការងារ ក៏ដូចជា តុលាការ និងសមត្ថកិច្ចអីផ្សេងៗ គេតែងដាក់កម្លាំងដើម្បីត្រៀមនឹងចាប់ អ្នកណា ដែលហ៊ាននិយាយពន្យល់កម្មករអី ជាពិសេសខ្ញុំតែម្ដង ថ្ងៃមុនត្រូវគេរកព័ទ្ធចាប់ដូចគ្នា ប៉ុន្តែបានបងប្អូនកម្មករគាត់សាមគ្គីគ្នា អ៊ីចឹងធ្វើឲ្យសមត្ថកិច្ចរៀងញ៉ាកបន្តិចដែរ » ។
កម្មកររោងចក្រជីនយី បានតវ៉ាទាមទារចំនួន១៧ចំណុច ដែលចំណុចសំខាន់ៗនោះ មានដូចជា សុំបន្ថែមប្រាក់រង្វាន់ទៀងទាត់ ៥ដុល្លារ សុំថែមលុយបាយ ២ពាន់រៀល ពេលណាកម្មករតម្រូវឲ្យធ្វើការថែមម៉ោង សុំឲ្យក្រុមហ៊ុនគិតប្រាក់តាមកម្លាំងដែលកម្មករដេរបាន នៅពេលដែលកម្មករដេរបានតម្លៃលើសពីប្រាក់ឈ្នួលគោលកំណត់ ១៣០ដុល្លារ សុំកុំឲ្យក្រុមហ៊ុនកាត់ប្រាក់អត្ថប្រយោជន៍ពេលកម្មករធ្វើកូដកម្មកន្លងមក និងសុំឲ្យក្រុមហ៊ុនបើកប្រាក់ឈ្នួលសរុប ៣ខែមុនឲ្យកម្មករដែលសុំច្បាប់សម្រាលកូនជាដើម។
ក៏ប៉ុន្តែប្រធានរដ្ឋបាលរោងចក្រជីនយី លោក ង៉ែត រស្មី បញ្ជាក់ថា ភាគីរោងចក្របានដោះស្រាយតាមសំណើរបស់កម្មករបានខ្លះហើយ ចំណែកកម្មករចំនួន ៩០ភាគរយក្នុងចំណោមកម្មករសរុបប្រហែល ៣.៣០០នាក់ បានព្រមចូលធ្វើការវិញដែរ នៅថ្ងៃទី២៥ សីហា មានតែកម្មករប្រហែល ២០០នាក់ទេ បានបន្តឡើងមកតវ៉ានៅភ្នំពេញ។
នៅពេលសួរថា តើភាគីរោងចក្រនឹងព្រមចូលខ្លួនដោះស្រាយជាមួយភាគីកម្មករនិងមន្ត្រីក្រសួងការងារនៅថ្ងៃទី២៦ សីហា នេះទេ? លោក ង៉ែត រស្មី ឆ្លើយថា ភាគីរោងចក្រនឹងមិនចូលជួបដោះស្រាយទេ បើភាគីកម្មករទាំងនោះមិនព្រមចូលធ្វើការសិននៅថ្ងៃទី២៦ សីហា តាមការកណត់របស់ក្រុមប្រឹក្សាអាជ្ញាកណ្ដាលដែលបានសម្រេចកន្លងមក៖ «សំឡេង»។
ចំណែកតំណាងភាគីកម្មករតវ៉ាវិញ លោក សួស សុខា បញ្ជាក់ជំហរថា កម្មករដែលមកតវ៉ានៅភ្នំពេញ ថ្ងៃទី២៥ សីហា នឹងមិនចូលធ្វើការតាមបញ្ជាក្រុមប្រឹក្សាអាជ្ញាកណ្ដាលដាច់ខាត ដោយយល់ថា ការសម្រេចនោះមិនយុត្តិធម៌។ ទោះយ៉ាងណាលោកថា លោកនឹងរង់ចាំអ៊ុតមើលលទ្ធផលនៃការដោះស្រាយដែលក្រសួងការងារចុះទៅរោងចក្រនៅថ្ងៃទី២៦ សីហា សិន។
រោងចក្រ ជីនយី ដែលស្ថិតនៅភូមិចម្ការស្វាយ ឃុំសេដ្ឋី ស្រុកសាមគ្គីមានជ័យ ខេត្តកំពង់ឆ្នាំង បានតវ៉ានៅមុខរោងចក្រជាង ១០ថ្ងៃមកហើយ តែមិនទាន់មានដំណោះស្រាយសមស្របដែលកម្មករទទួលយកបាននៅឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។