ពលរដ្ឋ​ស្រុក​ជុំគិរី​ខេត្ត​កំពត​ព្រួយ​ខ្លាច​បាត់​ដី​ដោយ​មន្ត្រី​សុរិយោដី​ខេត្ត​វាស់​បំបាត់​ក្បាល​ដី

0:00 / 0:00

ប្រជាពលរដ្ឋ​ប្រហែល ៥០​គ្រួសារ នៅ​ភូមិ​អូរ និង​ភូមិ​តារាជ ឃុំ​ត្រពាំងរាំង ស្រុក​ជុំគិរី ខេត្ត​កំពត សម្ដែង​ការ​ព្រួយបារម្ភ​ខ្លាច​បាត់​ដី បង្កបង្កើន​ផល​របស់​ពួកគាត់ ដោយសារ​ការ​បំបាត់​ក្បាល​ដី នៅ​​ពេល​ដែល​​​​មន្ត្រី​សុរិយោដី​ខេត្ត បាន​ចុះ​ទៅ​វាស់វែង​ដី​ពួក​គាត់​ កាលពី​ដើមខែ​តុលា​កន្លងទៅ។

ប្រជាពលរដ្ឋ​ភូមិ​អូរ និង​ភូមិ​តារាជ នៅ​ថ្ងៃ​ទី​១៩ តុលា សម្ដែង​ការ​សង្ស័យ​ថា មាន​ការ​បន្លំ​ទំហំដីក្នុង​ពេល អាជ្ញាធរ​ចុះ​វាស់ដី​ពួក​គាត់​កាល​ពី​ដើម​ខែ តុលា កន្លងទៅ​ដើម្បី​បន្លំ​កាត់​យក​ដី​ពួក​គាត់​លក់​ឲ្យ​ឈ្មួញ។

ក្រុម​អ្នក​ភូមិ​ទាំង​នោះ​បញ្ជាក់​ថា ពួក​គាត់​សង្ស័យ​ដូច្នេះ ដោយសារ​ការ​ចុះ​វាស់​វែង​ដី​លើក​នេះ មិន​បាន​ប្រកាស​ឲ្យ​ប្រជាពលរដ្ឋ​ដឹង​មុន ហើយ​អ្វី​ដែល​ធ្វើ​ឲ្យ​ពួកគាត់​រឹតតែ​មន្ទិល​សង្ស័យ​ទៀត​នោះ គឺ​ក្រុម​វាស់​ដី​​កាល​ពី​ដើម​ខែ តុលា​ នោះ ​មិន​មាន​បោះ​ស្នាក់​ការ​ធ្វើការ ដូច​ដែល​ក្រុម​និស្សិត​ចុះ​វាស់​វែង​កន្លងមកទេ ៖ «សំឡេង​អ្នកភូមិ​តវ៉ា​រួមគ្នា»។

ក្រៅ​ពី​នេះ​អ្នក​ភូមិ​អូរ​ថា ក្រុម​វាស់​ដី​នោះ មាន​មន្ត្រី​សុរិយោដី​ខេត្ត​​តែ​ម្នាក់​ឈ្មោះ​លោក អ៊ុក ចន្ទ និង​អាជ្ញាធរ​ស្រុក​ឈូក​ម្នាក់​ដែល​គាត់​មិន​ស្គាល់​ឈ្មោះ រួម​ទាំង​តំណាង​សហគមន៍​ក្នុង​មូលដ្ឋាន​ម្នាក់​ឈ្មោះ លោក សែត សឿន ចុះ​ទៅ​វាស់​វែង​ប៉ុណ្ណោះ ដែល​អ្នកភូមិ​ថា បាន​​ចុះ​ទៅ​វាស់​ស្ងាត់ៗ ដូច​ជា​មាន​អាថកំបាំង​អ្វី​ម្យ៉ាង។

វិទ្យុ​អាស៊ី​សេរី​មិន​អាច​ទាក់ទង មន្ត្រី​សុរិយោដី អ៊ុក ចន្ទ បាន​ភ្លាម​ៗ​នៅ​រសៀល​ថ្ងៃ​ទី១៩ តុលា ដើម្បី​សុំ​ការ​ឆ្លើយ​តប​ទៅ​នឹង​ការ​តវ៉ា របស់​ប្រជា​ពល​រដ្ឋ​ភូមិ​អូរ។

ក៏ប៉ុន្តែ តំណាង​សហគមន៍​ក្នុង​មូលដ្ឋាន​នេះ លោក សែត សឿន ដែល​អ្នកភូមិ​អូរ សង្ស័យ​ថា បាន​រួម​គំនិត​បន្លំ​ដី​អ្នក​ភូមិ បាន​ប្រតិកម្ម​ទៅ​នឹង​ការ​សង្ស័យ​របស់​អ្នក​ភូមិ​អូរ ថា​ជា​ការយល់​ច្រឡំ​ចំពោះ​រូបលោក​នោះ ដោយ​បញ្ជាក់​ថា ​អាជ្ញាធរ​បាន​ជូនដំណឹង​ប្រជាពលរដ្ឋ​ឲ្យដឹង​ជាមុន មុន​ក្រុម​ការងារ​ចុះ​វាស់​វែង តែ​ប្រជាពលរដ្ឋ​ខ្លះ​មិន​បាន​ចូល​រួម ៖ « វាស់វែង​នេះ​ជា​រឿង​មួយ​ត្រឹមត្រូវ​ស្របច្បាប់ ពីព្រោះ​វាស់​ជូន​គាត់​ហើយ ​យើង​អំពាវនាវ​ហើយ​តើ។ តែ​មាន​បងប្អូន​មួយ​ចំនួន យើង​កំណត់​ថ្ងៃ​ឲ្យ​គាត់​ហើយ​តើ តែ​លោក​អ្នក​ដើម​បណ្ដឹង​ដែល​តំណាង​ប្រជាពលរដ្ឋ​នឹង មិនបាន​ប្រាប់​ប្រជាពលរដ្ឋ​មក​គ្រប់​ចំនួន​ផង »

ទាក់ទង​ទៅ​នឹង​រឿង​វាស់​ដី​នេះ អ្នកភូមិ​អូរ​ឲ្យដឹង​ថា ​កន្លងមក​ក្រុម​និស្សិត​បាន​ចុះ​វាស់ដី​ជូន​ពួក​គាត់​បាន​ចប់ ហើយ​បាន​ផ្អាក​ទៅវិញ ដោយសារ​មាន​ការ​បោះឆ្នោត​ជាតិ​ខែ​កក្កដា ឆ្នាំ​២០១៣។ ពួក​គាត់​ថា ការ​វាស់​ដី​របស់​ក្រុម​និស្សិត​កាល​នោះ បាន​ធ្វើ​ឲ្យ​ពួក​គាត់​បាត់​ដី​យ៉ាង​ហោច​ណាស់ ៣ ទៅ បួន ហិកតារ​ក្នុង​មួយ​គ្រួសារៗ ​ទៅ​ឈ្មោះ​អ្នក​ផ្សេង​ចំនួន​១១ គ្រួសារ ដែល​អ្នកភូមិ​មិន​ស្គាល់​ឈ្មោះ និង​មិន​ស្គាល់​មុខ។

អ្នក​សម្របសម្រួល​អង្គការ​លីកាដូ (Licadho) ប្រចាំ​ខេត្ត​កំពត លោក សេត វណ្ណៈ ដែល​បាន​តាម​ដាន​ទំនាស់​ដី​នេះ ឲ្យ​ដឹង​ដែរ​ថា ក្នុង​ចំណោម​ឈ្មោះ​អ្នក​ថ្មី មាន​ឈ្មោះ​ទទួល​ចំណែក​ដី​អ្នក​ភូមិ​អូរ​នោះ មាន​អ្នក​ខ្លះ​មក​ពី​ភ្នំពេញ ខ្លះ​មក​ពី​ខេត្ត​ក្រចេះ ហើយ​ពួកគាត់​បាន​ប្ដឹង​តវ៉ា រហូត​ទល់​សព្វថ្ងៃ នៅ​មិន​ទាន់​មាន​ដំណោះស្រាយ​នៅឡើយ។

ដោយឡែក អង្គការ​លីកាដូ បាន​ស្រាវជ្រាវ​ឃើញ​ថា ក្នុង​ចំណោម ១១ គ្រួសារ​នោះ មាន​ឈ្មោះ​ពីរ​គ្រួសារ​រស់នៅ​ភូមិ​ក្បែរ​នោះ តែ​សាមីខ្លួន​បាន​បដិសេធ​ថា មិនបាន​ពាក់ព័ន្ធ​នឹង​ការ​បន្លំ​ឈ្មោះ​យក​ដី​អ្នក​ភូមិ​អូរ ដូច​ដែល​ក្រុម​និស្សិត​ប្រកាស​លទ្ធផល​នោះ​ទេ លោក​ថា​រឿង​នេះ​ទំនង​មាន​អ្នក​ទីបី​លួច​ដាក់​ឈ្មោះ​អ្នក​ទាំង​ពីរ​គ្រួសារ​នោះ​ដោយ​មិន​ដឹងខ្លួន។

វិទ្យុ​អាស៊ី​សេរី មិន​អាច​ទាក់ទង​អភិបាល​ខេត្ត​រង លោក ជឹម ផល្លា ដែល​ទទួល​បន្ទុក​ដោះស្រាយ​ទំនាស់​ដីនេះ ដើម្បី​សុំ​ការ​បញ្ជាក់​អះអាង​​បន្ថែម​បាន​ទេ នៅ​ថ្ងៃ​ទី​១៩ តុលា ដោយ​លោក​មិន​លើក​ទូរស័ព្ទ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖

ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។