ក្រសួងការងារជួបប្រជុំសហជីពនិងតំណាងរោងចក្រពិភាក្សាពីប្រាក់ខែគោល
2014.10.17
រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ បានរៀបចំកិច្ចប្រជុំដាច់ដោយឡែកពីគ្នាក្នុងថ្ងៃតែមួយជាមួយភាគីពាក់ព័ន្ធក្នុងវិស័យកាត់ដេរ នៅថ្ងៃទី១៦ ខែតុលា។
ការរៀបចំឲ្យមានកិច្ចពិគ្រោះយោបល់ជាលក្ខណៈទ្វេភាគីនៅពេលនេះ គឺដើម្បីស្ទង់មតិ និងសិក្សាពីគោលជំហររបស់ភាគីនីមួយៗ ជុំវិញរឿងកំណត់ប្រាក់ខែគោលរបស់កម្មករ មុននឹងកិច្ចប្រជុំត្រីភាគីចាប់ផ្ដើម។ កិច្ចប្រជុំនោះមានតំណាងរដ្ឋាភិបាល សហជីព និងភាគីនិយោជកចូលរួមផង។
ក្រុមសហជីពចាត់ទុកកិច្ចប្រជុំដើម្បីរកដំណោះស្រាយក្នុងរឿងប្រាក់ខែគោលលើវិស័យកាត់ដេរនៅពេលនេះ ថាគឺជាផ្នែកមួយដែលពុំធ្លាប់មាន ហើយក៏ជាដំណើរមួយដែលអាចជំរុញឲ្យការខ្វែងគំនិតលើប្រាក់ឈ្នួល សម្រាប់ឧស្សាហកម្មវាយនភណ្ឌកាត់ដេរនេះ អាចរកចំណុចរួមបានក្នុងពេលឆាប់ៗនេះដែរ។
លោករដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ មានជំនឿថា កិច្ចប្រជុំដែលធ្វើឡើងដាច់ដោយឡែកនេះ នឹងរកឃើញគោលការណ៍រួមបាន ជាពិសេសការខ្វែងគំនិតគ្នាលើការកំណត់ប្រាក់ខែគោលរបស់កម្មករនេះ អាចនឹងត្រូវបញ្ចប់។
លោក ប៉ាវ ស៊ីណា ប្រធានសម្ព័ន្ធសហជីពចលនាកម្មករ ឲ្យដឹងក្រោយបញ្ចប់កិច្ចប្រជុំកាលពីព្រឹកថ្ងៃទី១៦ ខែតុលា ថា នេះជាលើកទីមួយហើយដែលស្ថាប័នជំនាញរបស់រដ្ឋាភិបាល បង្កើតគណៈកម្មការចរចារឿងប្រាក់ខែគោលរបស់កម្មករមកពីគ្រប់វិស័យ ដោយរួមទាំងសហជីព សមាគមរោងចក្រកាត់ដេរនៅកម្ពុជា ឬហៅថា ជីម៉ាក់ (GMAC) និងពីខាងរដ្ឋាភិបាលផង។
«ជំហរខាងសហជីពរបស់យើងដែលជាក្រុមការងារសហព័ន្ធឯករាជ្យហ្នឹង គឺយើងមានជំហរ បើសិនជាមិនបានជោគជ័យទេ យើងនឹងធ្វើកូដកម្មបន្តទៀត។ បើសិនជាប្រាក់ឈ្នួលឡើងមិនបានសមរម្យ»។
លោកក៏មានជំនឿដែរថា កិច្ចប្រជុំធំដែលគ្រោងនឹងធ្វើ៤ថ្ងៃខាងមុខទៀតនេះ អាចនឹងរកចំណុចរួមមួយបាន ដើម្បីទម្លាយការខ្វែងគំនិតគ្នានេះ។ បើទោះជាបែបណា លោក ប៉ាវ ស៊ីណា នៅតែព្រមានថា បើច្រកចេញក្នុងពេល៤ថ្ងៃទៀតនេះ គឺប្រាក់ខែគោលរបស់កម្មករនៅទាបជាងអ្វីដែលក្រុមសហជីពចង់បាននោះ បាតុកម្មប្រឆាំងសេចក្ដីសម្រេចនេះនឹងផ្ទុះឡើងជាថ្មីទៀត៖ «អ៊ីចឹង គឺជំហរយើង គឺនៅតែរក្សា ១៥០ ដដែល។ ប៉ុន្តែភាគីនិយោជកគេឡើងថា ឥឡូវ ១២០ ឬក៏ ១១៥ ១២៥ មានន័យថា សហជីពយើងនឹងប្រកាសជំហរចុងក្រោយថាកម្រិតណា? បាទ! ហើយបើកម្រិតនោះ បើក្រសួងការងារ មិនប្រកាសកម្រិតរបស់យើងទេ មានន័យថា បង្កើតគណៈកម្មការថ្មី គឺឥតន័យ»។
ក្នុងកិច្ចប្រជុំកាលពីពេលកន្លងទៅនេះ ខាងភាគីនិយោជកអះអាងថា ខ្លួនអាចមានលទ្ធភាពដំឡើងបានត្រឹម ១៥ដុល្លារបន្ថែមលើប្រាក់ឈ្នួលគោល ១០០ដុល្លារសព្វថ្ងៃប៉ុណ្ណោះ ស្របពេលដែលខាងភាគីសហជីពបានដំឡើងតួលេខរហូតដល់ ១៧៧ដុល្លារក្នុងមួយខែ។ ការខ្វែងគំនិតគ្នានេះ បានរុញច្រានឲ្យនិយោជកទម្លាក់តម្លៃពី ១៥ដុល្លារមកនៅត្រឹម ១០ដុល្លារវិញ។ សរុបសេចក្ដីមក បើដូចអ្វីដែលខាងនិយោជកបានផ្ដល់តួលេខថ្មីនេះ គឺប្រាក់ខែគោលក្នុងវិស័យកាត់ដេររបស់កម្មករ ទទួលបាន ១១០ដុល្លារសម្រាប់ឆ្នាំ២០១៥។
ភ្ជាប់រឿងនេះ ប្រធានសហព័ន្ធសហជីពមិត្តភាពកម្មករ លោក សៀង សម្បត្តិ ក៏ព្រមានដែរថា ប្រសិនបើការទាមទារនេះនៅតែមិនអាចទៅរួចទេ ចលនាបាតុកម្មប្រឆាំងប្រាក់ខែគោលនេះនឹងកើតឡើងសាជាថ្មីទៀត៖ «ជំហរខាងសហជីពរបស់យើងដែលជាក្រុមការងារសហព័ន្ធឯករាជ្យហ្នឹង គឺយើងមានជំហរ បើសិនជាមិនបានជោគជ័យទេ យើងនឹងធ្វើកូដកម្មបន្តទៀត។ បើសិនជាប្រាក់ឈ្នួលឡើងមិនបានសមរម្យ»។
បើទោះជាបែបណា លោក អ៊ិត សំហេង រដ្ឋមន្ត្រីក្រសួងការងារ អះអាងដោយមុតមាំថា យ៉ាងណាក៏ដោយ ការកំណត់ប្រាក់ខែគោលរបស់កម្មករនៅក្នុងឆ្នាំ២០១៥ នេះ នឹងអាចទៅរួច។ លោកបន្ថែមថា ដោយឡែករឿងតួលេខដែលភាគីធ្លាប់ខ្វែងគំនិតគ្នាក្នុងពេលកន្លងទៅ អាចនឹងរកចំណុចរួមបាន៖ «ក្រុមការងារនឹងបន្តពិភាក្សាគ្នាចាប់ពីថ្ងៃទី២០ រហូតទៅដល់ការស្រុះស្រួលគ្នា។ ធ្វើយ៉ាងណាឲ្យលេខហ្នឹងវាខិតចូលជិតគ្នា ហើយដើម្បីធ្វើឲ្យយើងសម្រេចចុងក្រោយ»។
បើតាមលោករដ្ឋមន្ត្រីក្រសួងការងារ កិច្ចប្រជុំនៅថ្ងៃទី១៦ ខែតុលា ធ្វើឡើងពីរពេលដាច់ដោយឡែកពីគ្នា គឺពេលព្រឹក ប្រជុំជាមួយក្រុមមេដឹកនាំសហជីព និងពេលល្ងាចវិញប្រជុំជាមួយសមាគមរោងចក្រកាត់ដេរនៅកម្ពុជា ជីម៉ាក់។
ចាប់ពីថ្ងៃទី២០ ខែតុលា ខាងមុខនេះ កិច្ចប្រជុំត្រីភាគីដើម្បីទម្លាយការជាប់គាំងរឿងដំឡើងប្រាក់ខែក្នុងឆ្នាំ២០១៥ សម្រាប់កម្មករ នឹងត្រូវចាប់ផ្ដើម។ កិច្ចប្រជុំដែលគ្រោងរៀបចំនោះ មានសមាសភាពមកពីសហជីព និយោជក និងមកពីខាងភាគីរដ្ឋាភិបាល។
រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ អះអាងក្រោយពីបញ្ចប់កិច្ចប្រជុំទ្វេភាគីនៅក្រសួងការងារ កាលពីព្រឹកថ្ងៃទី១៦ ខែតុលា ថា ដើម្បីបន្ធូរបន្ថយភាពតានតឹងក្នុងវិស័យកាត់ដេរនេះ លោកនឹងសម្របសម្រួលជាមួយភាគីពាក់ព័ន្ធ ដើម្បីស្នើឲ្យទម្លាក់បទចោទទាំងឡាយណាប្រឆាំងសហជីពនៅតុលាការក្នុងពេលដ៏ខ្លីខាងមុខនេះ។
លោក អ៊ិត សំហេង ថ្លែងប្រាប់ក្រុមអ្នករាយការណ៍ព័ត៌មានថា លោកនឹងធ្វើកិច្ចការបន្ទាន់មួយជាមួយនឹងក្រសួងយុត្តិធម៌ ដើម្បីភាពស្ងប់ស្ងាត់ក្នុងវិស័យកាត់ដេរ។ បើទោះជាលោករដ្ឋមន្ត្រីបានសន្យាថា នឹងអន្តរាគមន៍បញ្ចប់បណ្ដឹងនៅតុលាការក៏ដោយ ក៏លោកមិនបានបញ្ជាក់ពីពេលវេលាជាក់លាក់ថា នឹងត្រូវអនុវត្តនៅពេលណានោះនៅឡើយដែរ៕