ក្រសួង​អប់រំ​សម្រេច​ឲ្យ​បេក្ខជន​ប្រឡង​បាក់ឌុប ៥រូប ធ្លាក់​ដោយ​ស្វ័យប្រវត្តិ

0:00 / 0:00

មន្ត្រី​ជាន់​ខ្ពស់​ក្រសួង​អប់រំ យុវជន និង​កីឡា បញ្ជាក់​ថា រយៈពេល​ពីរ​ថ្ងៃ​នៃ​ការ​ប្រឡង​សញ្ញាបត្រ​មធ្យម​សិក្សា​ទុតិយភូមិ ឬ​ហៅ​ថា បាក់​ឌុប ក្រសួង​អប់រំ សម្រេច​ឲ្យ​បេក្ខជន ៥​នាក់ ធ្លាក់​ដោយ​ស្វ័យ​ប្រវត្តិ។

ក្នុង​នោះ​មាន ៤​នាក់ គឺ​ជា​បេក្ខជន​ដែល​ឲ្យ​គេ​មក​ប្រឡង​ជំនួស កាល​ពី​ថ្ងៃ​ដំបូង​នៃ​ការ​ប្រឡង ហើយ​ពួក​គេ​មិន​អនុញ្ញាត​ឲ្យ​ដាក់​ពាក្យ​ប្រឡង​ពីរ​ឆ្នាំ​ជាប់​គ្នា។ រីឯ​ម្នាក់​ទៀត គឺ​ជា​បេក្ខជន​ប្រឡង​នៅ​មណ្ឌល​វិទ្យាល័យ ទួល ទំពូង ដែល​បាន​បង្ក​របួស​ស្នាម​ដល់​អ្នក​សង្កេតការណ៍​របស់​អង្គភាព​ប្រឆាំង​អំពើ​ពុក​រលួយ នៅ​ថ្ងៃ​ប្រឡង​ចុង​ក្រោយ ហើយ​បេក្ខជន​រូប​នោះ ក៏​ត្រូវ​លុប​ឈ្មោះ​ចេញ​ពី​គ្រឹះស្ថាន​សិក្សា​របស់​ខ្លួន​ដែរ។

សមាគម​គ្រូបង្រៀន​កម្ពុជា​ឯករាជ្យ ដែល​ឃ្លាំ​មើល​ព្រឹត្តិការណ៍​នៃ​ការ​ប្រឡង​នេះ គិត​ថា វិញ្ញាសា​ប្រឡង​លើក​នេះ មិន​ពិបាក​ជាង​រាល់​ឆ្នាំ​ទេ តែ​ចំនួន​សិស្ស​ដែល​ជាប់​នៃ​ការ​ប្រឡង​លើក​នេះ អាច​មាន​តិច​ជាង​រាល់​ដង។

ប្រធាន​សមាគម​គ្រូបង្រៀន​កម្ពុជា​ឯករាជ្យ លោក រ៉ុង ឈុន គិត​ថា មាន​បេក្ខជន​ប្រឡង​ប្រមាណ ៣០ ទៅ ៤០​ភាគរយ ដែល​អាច​មាន​ឱកាស​ជាប់​ក្នុង​ការ​ប្រឡង​បាក់​ឌុប​នៅ​ឆ្នាំ​នេះ។

បេក្ខជន​ប្រឡង​សរុប​ទូទាំង​ប្រទេស​មាន​ចំនួន​ជាង ៩​ម៉ឺន​នាក់ (៩៣.៤៥៦​នាក់)។ បើ​ដូច​អ្វី​ដែល​ខាង​សមាគម​គិត​មែន​នោះ គឺ​មាន​ន័យ​ថា អាច​មាន​បេក្ខជន​ជិត ៣​ម៉ឺន​នាក់ ជាប់​នៅ​ឆ្នាំ​នេះ។

យ៉ាង​ណា រដ្ឋមន្ត្រី​ក្រសួង​អប់រំ លោក ហង់ ជួនណារ៉ុន នៅ​មិន​ទាន់​អាច​ប៉ាន់ស្មាន​ពី​ចំនួន​បេក្ខជន​ដែល​អាច​ជាប់​ក្នុង​ការ​ប្រឡង​លើក​នេះ​បាន​នៅ​ឡើយ​ទេ។ តែ​លោក​គិត​ថា ការ​ធានា​មិន​ឲ្យ​បេក្ខជន​លួច​ចម្លង​គ្នា​ពី​មួយ​ទៅ​មួយ និង​លួច​ចម្លង​សំណៅ​វិញ្ញាសា​នោះ អាច​ជា​មេរៀន​ឲ្យ​ក្រសួង​អប់រំ ដឹង​ថា សិស្ស​ខ្សោយ​មុខ​វិជ្ជា​ណា ហើយ​ក្រសួង​ខ្លួន​ឯង​ក៏​អាច​ដឹង​ថា ត្រូវ​ពង្រឹង​ផ្នែក​អី​សំខាន់​ជា​ចម្បង ដើម្បី​ធ្វើ​កំណែ​ទម្រង់​វិស័យ​អប់រំ​បន្ត​ទៀត៖ «ព័ត៌មាន​ដែល​បាន​ពី​ការ​ប្រឡង​នេះ នឹង​យក​ដើម្បី​ដាក់​ជា​ធាតុ​ចូល​សម្រាប់​ជា​គោល​នយោបាយ​ក្នុង​ការ​ពង្រឹង និង​កែ​ទម្រង់​វិស័យ​អប់រំ​បន្ត​ទៀត ព្រោះ​យើង​អត់​ដឹង​ថា តើ​អ្នក​ជំងឺ​ឈឺ​អី​ផង អ៊ីចឹង​មិន​ដឹង​ថា ថ្នាំ​អី​ត្រូវ​ទេ»

យ៉ាង​ណា លោក រ៉ុង ឈុន គិត​ថា ប្រសិន​បើ​សិស្ស​ជាប់​តិច​នោះ អាច​ជា​វិបត្តិ​មួយ​ប៉ះពាល់​ដល់​សតិ​អារម្មណ៍ និង​ការ​បាក់​ទឹក​ចិត្ត​ដល់​សិស្សានុសិស្ស ហើយ​រូបមន្ត​នៃ​កំណែ​ទម្រង់​វិស័យ​អប់រំ​មាន​គុណភាព​នោះ គឺ​មិន​មែន​ចាប់​ផ្ដើម​កែ​ទម្រង់​នៃ​ការ​ប្រឡង​ទេ គឺ​ត្រូវ​ពិនិត្យ​មើល​តាំង​ពី​ថ្នាក់​បឋម​សិក្សា រហូត​ដល់​ថ្នាក់​ឧត្តម​សិក្សា។

លោក​បន្ត​ថា បើ​ការ​ប្រឡង​លើក​នេះ​មាន​ការ​កែ​ត្រឹមត្រូវ ហើយ​ក្រសួង​មិន​ទម្លាក់​ពិន្ទុ​មធ្យម​ភាគ​ទេ​នោះ មាន​បេក្ខជន​ប្រឡង​ជាច្រើន​ត្រូវ​ធ្លាក់​នៅ​ឆ្នាំ​នេះ។ យ៉ាង​ណា លោក​កត់​សម្គាល់​ថា ជា​រៀង​រាល់​ឆ្នាំ នៅ​ពេល​ដែល​ក្រសួង​ឃើញ​មាន​សិស្ស​ជាប់​តិច​ជាង​ផែនការ​កំណត់​នោះ ក្រសួង​តែង​ទម្លាក់​ពិន្ទុ​មធ្យម​ភាគ ដើម្បី​យោង​ឲ្យ​បេក្ខជន​ប្រឡង​ជាប់​ឲ្យ​បាន​ច្រើន៖ «បើ​សិន​យើង​អនុវត្ត​បែប​ហ្នឹង​ហើយ គឺ​ត្រូវ​តែ​អ្នក​ដែល​អាច​ជាប់​មធ្យម​ភាគ គឺ​ជាប់ អ្នក​ដែល​ធ្លាក់ គឺ​ធ្លាក់​តែ​ម្តង ប៉ុន្តែ​ក្រសួង​អប់រំ តែ​យក​ទៅ​តាម​ផែនការ»

យ៉ាង​ណា រដ្ឋមន្ត្រី​ក្រសួង​អប់រំ គិត​ថា ប្រសិន​បើ​ក្រសួង​បណ្តោយ​ឲ្យ​បេក្ខជន​បើក​ចម្លង គឺ​ស្មើ​នឹង​ការ​លើក​ទឹក​ចិត្ត​មិន​ឲ្យ​សិស្ស​រៀន ហើយ​ធ្វើ​ឲ្យ​សិស្ស​ខ្លះ​មិន​គោរព​គ្រូ ដោយសារ​តែ​គ្រូ​គ្មាន​ឥទ្ធិពល​អ្វី​ទៅ​លើ​សិស្ស ដោយ​សិស្ស​អាង​បង់​លុយ​សម្រាប់​ជាប់។ លោក​ទទួល​ស្គាល់​ថា មាន​មជ្ឈដ្ឋាន​ជាច្រើន ពិសេស​បេក្ខជន​ប្រឡង​តែ​ម្តង រិះគន់​ក្រសួង​អប់រំ ចំពោះ​ការ​រឹត​បន្តឹង​នេះ ដោយ​ថា វា​ជា​របត់​លឿន​ពេក​ដែល​មិន​អាច​ទទួល​យក​បាន។ ប៉ុន្តែ លោក​សង្ឃឹម​ថា នៅ​ឆ្នាំ​ក្រោយ អ្នក​រិះគន់​ទាំង​នោះ​នឹង​យល់​ពី​ទឹក​ចិត្ត​របស់​លោក ដែល​ចង់​ឲ្យ​សិស្ស​ចេះ​ពិត​ប្រាកដ និង​ខំ​រៀន ដើម្បី​ប្រឡង​ជាប់៖ «អ្វី​ដែល​យើង​ចង់​បាន​នៅ​ពេល​នេះ គឺ​ថា ដើម្បី​អាច​ឲ្យ​សិស្ស​រៀន​ចេះ​ពិត​ប្រាកដ មាន​ជំនាញ​ពិត​ប្រាកដ ដើម្បី​បង្កើត​ការងារ​ធ្វើ រក​ការងារ​ធ្វើ​ពិត​ប្រាកដ ទាល់​តែ​យើង​ត្រូវ​ជ្រើស​រើស​ជម្រើស​មួយ ដែល​តម្រូវ​ឲ្យ​ប្រឡង​ជាប់​ដោយ​សមត្ថភាព​ដោយ​ខ្លួន​ឯង។ ចំពោះ​អ្នក​តិះដៀល​មួយ​ចំនួន យើង​សួរ​ថា ចុះ​បើ​បាន​សញ្ញាបត្រ ហើយ​រក​ការងារ​ធ្វើ​មិន​បាន តើ​ធ្វើ​យ៉ាង​ម៉េច?»

យុវតី អាយ ភាលី ដែល​ប្រឡង​នៅ​វិទ្យាល័យ​ទួល​ស្វាយព្រៃ គិត​ថា ការ​ប្រឡង​នៅ​ឆ្នាំ​នេះ​គ្រូ​រឹត​បន្តឹង​ខ្លាំង ហើយ​ជា​ឆ្នាំ​ស៊យ​ដែល​នាង​ត្រូវ​ប្រឡង​នៅ​ឆ្នាំ​នេះ ដោយ​ឆ្នាំ​មុនៗ​គ្រូ​បើក​សេរី​ឲ្យ​ចាក់​អ៊ុត ហើយ​ប្រ៊ុយយ៉ុង​យក​ចូល​បាន​តាម​ចិត្ត។

បុរស​វ័យ​កណ្ដាល​ម្នាក់​ដែល​ចាំ​ទទួល​យក​កូន​ចេញ​ពី​ប្រឡង រអ៊ូរទាំ​ថា ការ​រឹត​បន្តឹង​របស់​ក្រសួង​នៅ​ពេល​នេះ ជា​ការ​ប្រសើរ​សម្រាប់​យុវជន​ជំនាន់​ក្រោយ តែ​កូន​ស្រី​របស់​គាត់​គ្មាន​សង្ឃឹម​ថា​ជាប់​ទេ។

ប្រធាន​អង្គភាព​ប្រឆាំង​អំពើ​ពុក​រលួយ លោក ឱម យ៉ិនទៀង ប្រាប់​កាសែត​ក្នុង​ស្រុក​ថា ខាង​អង្គភាព​ប្រឆាំង​អំពើ​ពុក​រលួយ សម្រេច​បញ្ជូន​យុវជន ៤​នាក់​ទៅ​តុលាការ នៅ​ថ្ងៃ​ទី​៥ សីហា នេះ ពាក់ព័ន្ធ​នឹង​ការ​បន្លំ​មក​ប្រឡង​ជំនួស​បេក្ខជន។

រដ្ឋមន្ត្រី​ក្រសួង​អប់រំ លោក ហង់ ជួនណារ៉ុន ប្រាប់​ថា នេះ គឺ​ជា​នីតិវិធី​របស់​សមត្ថកិច្ច និង​ខាង​អង្គភាព​ប្រឆាំង​អំពើ​ពុក​រលួយ ចំណែក​ឯ​ខាង​ក្រសួង មិន​បាន​ដាក់​ទោស​ទណ្ឌ​ចំពោះ​ជន​ដែល​បន្លំ​ប្រឡង​ជំនួស​នោះ​ទេ តែ​បាន​ដាក់​ពិន័យ​បេក្ខជន ៤​នាក់ ដែល​ឲ្យ​គេ​ប្រឡង​ជំនួស គឺ​ពួក​គេ​ត្រូវ​ធ្លាក់​ដោយ​ស្វ័យ​ប្រវត្តិ និង​មិន​ឲ្យ​ដាក់​ពាក្យ​ប្រឡង​សញ្ញាបត្រ​បាក់​ឌុប ២​ឆ្នាំ​ជាប់​គ្នា៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖

ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។