អគ្គនាយកនៃអគ្គនាយកដ្ឋានអន្តោប្រវេសន៍ ស្នើអោយអាជ្ញាធរតាមបណ្ដាខេត្ត ពង្រឹងវិធានការច្បាប់ដើម្បីទប់ស្កាត់លំហូរចូលនៃជនអន្តោប្រវេសន៍ខុសច្បាប់ ដែលភាគច្រើនជាជនជាតិវៀតណាម។ អង្គការសង្គមស៊ីវិល គាំទ្រចំពោះការពង្រឹងច្បាប់អន្តោប្រវេសន៍នេះ ព្រោះជនបរទេសដែលមករស់នៅមិនស្របច្បាប់ ធ្វើអោយកម្ពុជា បាត់បង់ផលប្រយោជន៍ជាច្រើន។
រដ្ឋាភិបាលទទួលស្គាល់ថា ការហូរចូលរបស់ជនបរទេសខុសច្បាប់មករស់នៅក្នុងប្រទេសកម្ពុជា នៅតែបន្តកើនឡើងគួរឲ្យកត់សម្គាល់ និងមានបញ្ហាស្មុគស្មាញក្នុងការគ្រប់គ្រងតាមនីតិវិធីលើក្រុមនេះ។
ទាក់ទិនបញ្ហានេះ អគ្គស្នងការរងនគរបាលជាតិ និងជាអគ្គនាយកនៃអគ្គនាយកដ្ឋានអន្តោប្រវេសន៍ លោក សុខ ផល ប្រាប់ឲ្យអភិបាលខេត្ត ព្រមទាំងស្នងការនគរបាល ពិសេសមេប៉ុស្តិ៍ប៉ូលិសតាមព្រំដែនត្រូវតែបន្តពង្រឹងការអនុវត្តច្បាប់អន្តោប្រវេសន៍ឱ្យបានម៉ឺងម៉ាត់ ដើម្បីគ្រប់គ្រងឱ្យបាននូវការចេញចូល និងស្នាក់អាស្រ័យរបស់ជនបរទេសដោយខុសច្បាប់នៅក្នុងប្រទេសកម្ពុជា៖ «ពង្រឹងការអនុវត្តច្បាប់ស្ដីពីអន្តោប្រវេសន៍ ចំពោះជនបរទេសណាដែលស្នាក់នៅក្នុងប្រទេសកម្ពុជា គ្មានឯកសារ ដោយកសាងសំណុំរឿងបញ្ជូនទៅតុលាការ ឬធ្វើការបណ្ដេញចេញតាមនីតិវិធីតបទៅលើការអនុវត្តច្បាប់ និងបទដ្ឋាននានាស្ដីពីសញ្ជាតិ អត្រានុកូលដ្ឋាន អត្តសញ្ញាណប័ណ្ណសញ្ជាតិខ្មែរ សៀវភៅស្នាក់នៅ សៀវភៅគ្រួសារ និងលិខិតឆ្លងដែន»។
លោក សុខ ផល ថ្លែងបែបនេះទៅកាន់អភិបាលខេត្ត ព្រមទាំងស្នងការនគរបាល ពិសេសមេប៉ុស្តិ៍ប៉ូលិសតាមព្រំដែនទូទាំងប្រទេសដែលមានវត្តមានក្នុងកិច្ចប្រជុំផ្សព្វផ្សាយផែនការបន្តអនុវត្តលើការគ្រប់គ្រងជនអន្តោប្រវេសន៍ដែលប្រារព្ធឡើងនៅក្រសួងមហាផ្ទៃ នៅថ្ងៃទី១ ខែកក្កដា។
ក្នុងឱកាសនោះដែរ លោក សុខ ផល ក៏បានប្រាប់ឲ្យអាជ្ញាធរមូលដ្ឋាន និងសមត្ថកិច្ចពាក់ព័ន្ធផ្សេងទៀត ត្រូវបញ្ឈប់ការផ្តល់ឯកសារបញ្ជាក់អត្តសញ្ញាណដល់ជនណាដែលពុំមានអត្តសញ្ញាណច្បាស់លាស់ ដូចជាការធ្វើសំបុត្រកំណើត សំបុត្របញ្ជាក់អាពាហ៍ពិពាហ៍ សៀវភៅគ្រួសារ និងអត្តសញ្ញាណប័ណ្ណខុសច្បាប់ជាដើម។
ទាក់ទងបញ្ហានេះដែរ ប្រធានលេខាធិការដ្ឋាននៃគណៈកម្មាធិការប្រព្រឹត្តិកម្មការពារសិទ្ធិមនុស្សកម្ពុជា លោក សួន ប៊ុនសក្តិ គាំទ្រចំពោះការពង្រឹងការអនុវត្តច្បាប់អន្តោប្រវេសន៍នេះ។ លោកមើលឃើញថា កន្លងមកកម្ពុជា នៅខ្សោយផ្នែករដ្ឋបាលក្នុងគ្រប់គ្រងជនអន្តោប្រវេសន៍ ដែលអាចធ្វើឱ្យប៉ះពាល់ដល់សន្តិសុខជាតិ និងប៉ះពាល់ដល់ផលប្រយោជន៍ជាតិជាច្រើនទៀត៖ «ឧទាហរណ៍ថា យើងត្រូវមានឱកាសរកស៊ីទទួលទាន យើងត្រូវមានឱកាសធ្វើការដែលឱកាសនឹងត្រូវបានប្រើប្រាស់ដោយជាតិយើងជាអាទិភាព ប៉ុន្តែវាមិនអ៊ីចឹងទេ វាត្រូវបានជាតិដទៃទៀតមកជ្រៀតជ្រែក មកដណ្ដើមយកការងារសាមញ្ញអស់ទៅ»។
តាមរបាយការណ៍ជំរឿនជនបរទេសអន្តោប្រវេសន៍ក្នុងឆ្នាំ២០១៤ បានបង្ហាញថា ជនបរទេសដែលមករស់នៅខុសច្បាប់នៅកម្ពុជា នៅឆ្នាំ២០០២ មានប្រមាណ ៧ម៉ឺននាក់ នៅឆ្នាំ២០១០ កើនឡើងដល់ប្រមាណ ១០ម៉ឺននាក់ ហើយនៅចុងឆ្នាំ២០១៤ មានការកើនឡើងដល់ជាង ១៦ម៉ឺននាក់។ តួលេខនេះ សមត្ថកិច្ចទើបនឹងធ្វើជំរឿនបានតែ ៧០ភាគរយប៉ុណ្ណោះ ក្នុងចំណោមជនអន្តោប្រវេសន៍ទូទាំងប្រទេសកម្ពុជា ក្នុងនោះមានជនជាតិវៀតណាម ប្រមាណ ៩៥%ភាគរយ។
អគ្គនាយកដ្ឋានអន្តោប្រវេសន៍បង្ហាញដែរថា គិតត្រឹម ៨ខែចុងឆ្នាំ២០១៤ មានជនអន្តោប្រវេសន៍ដែលគ្មានលិខិតស្នាមត្រឹមចំនួន ១.៨០០នាក់ ក្នុងនោះមានជនជាតិវៀតណាម ១.៥០០នាក់ ត្រូវបានបណ្ដេញពីកម្ពុជា ហើយនៅដើមឆ្នាំ២០១៥ នេះ អគ្គនាយកដ្ឋានអន្តោប្រវេសន៍ បានបណ្ដេញចេញជនបរទេសខុសច្បាប់ ១.២០០នាក់ បន្ថែមទៀត ក្នុងនោះ ៩៥% ទៅ ៩៨% ជាជនជាតិវៀតណាម។
ដោយឡែកចំពោះជនបរទេសដែលមកធ្វើការនៅប្រទេសកម្ពុជា ដោយគ្មានឯកសារត្រឹមត្រូវវិញនោះ ក៏ត្រូវអគ្គនាយកដ្ឋានអន្តោប្រវេសន៍ ចាត់វិធានការជាបន្តបន្ទាប់ដែរ ដោយផាកពិន័យរឿងគ្មានប័ណ្ណការងារប្រមាណជាង ៥ពាន់នាក់។ តាមរបាយការណ៍របស់ក្រសួងការងារ ឲ្យដឹងថា ជនបរទេសដែលធ្វើការងារនៅកម្ពុជា បានទៅចុះឈ្មោះសុំប័ណ្ណការងារ កើនឡើងពី ៤ពាន់នាក់ដល់ជិត ៣ម៉ឺននាក់។
ទោះជាបែបនេះក្តី លោក សុខ ផល អះអាងថា សព្វថ្ងៃនេះមានជនអន្តោប្រវេសន៍គ្រប់ប្រភេទ ជាពិសេសជនជាតិវៀតណាម ប្រមាណ ២០-៣០ភាគរយ នៅតែបន្តឆ្លងចូលតាមប៉ុស្តិ៍ព្រំដែន និងតាមច្រករបៀងផ្សេងដោយខុសច្បាប់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។