Opens in new windowប្រជាពលរដ្ឋជនជាតិដើមភាគតិចព្នង ឃុំដាក់ដាំ ស្រុកអូររាំង ខេត្តមណ្ឌលគិរី សម្ដែងទុទ្ទិដ្ឋិនិយមចំពោះសមត្ថកិច្ចប៉ូលិសប៉ុស្តិ៍ ដែលមិនបានបំពេញភារៈបម្រើរាស្ត្រស្របតាមគោលនយោបាយភូមិ-ឃុំមានសុវត្ថិភាព ខណៈប្រជាពលរដ្ឋជួបគ្រោះអាសន្នដោយសារចោរលួចគោ ហើយប្រជាពលរដ្ឋស្នើសុំឲ្យសមត្ថកិច្ចប៉ូលិសជួយបង្ក្រាប ប៉ុន្តែសមត្ថកិច្ចប៉ូលិសបែរជាគេចវេស។
ប្រជាពលរដ្ឋរស់នៅឃុំដាក់ដាំ អំពាវនាវសុំឲ្យស្នងការប៉ូលិសខេត្តមណ្ឌលគិរី ត្រួតពិនិត្យ និងប្ដូរតួនាទីនាយនគរបាលប៉ុស្តិ៍ដាក់ដាំ ដោយសារតែមន្ត្រីនគរបាលរូបនេះ អសកម្មមិនបំពេញភារកិច្ចរបស់ខ្លួនបានត្រឹមត្រូវ។
ការអំពាវនាវនេះ ធ្វើឡើងបន្ទាប់ពីអ្នកភូមិរកឃើញគោពីរក្បាល នៅថ្ងៃទី៤ ខែតុលា ដែលចោរបានលួចយកទៅចងទុកក្នុងព្រៃ ប៉ុន្តែអ្នកភូមិបានរាយការណ៍សុំកិច្ចអន្តរាគមន៍ពីប៉ូលិសប៉ុស្តិ៍ ដើម្បីឃ្លាំចាប់ចោរលួចគោ ប៉ុន្តែប៉ូលិសមិនបានបំពេញតួនាទីតាមសំណើពលរដ្ឋនោះទេ។
តំណាងសហគមន៍ លោក ទើយ ធី បញ្ជាក់ថា នាយនគរបាលប៉ូលិសបានណែនាំឲ្យអ្នកភូមិពួនឃ្លាំមើលសកម្មភាពក្រុមចោរមកយកគោ ដើម្បីផ្តល់ដំណឹងមកប៉ូលិសដាក់កម្លាំងបង្ក្រាប ប៉ុន្តែនៅពេលប្រជាពលរដ្ឋប្រទះឃើញក្រុមចោរ ហើយទូរស័ព្ទសុំកងប៉ូលិសមកជួយ បែរជាប៉ូលិសគេចវេសបណ្តែតបណ្តោយឲ្យក្រុមចោរគេចខ្លួនចោលគោនៅក្នុងព្រៃ។ លោកថា ប្រជាពលរដ្ឋចាត់ទុកទង្វើរបស់សមត្ថកិច្ចប៉ូលិសប៉ុស្តិ៍ ថាមិនបានបំពេញតួនាទីបម្រើរាស្ត្រនោះឡើយ៖ «មេប៉ុស្តិ៍អត់យកចិត្តទុកដាក់សោះ ប្រជាពលរដ្ឋរាយការណ៍ចោរលួចគោក្របី។ ដល់ឃើញគោ ប្រជាពលរដ្ឋហៅប៉ូលិសអត់ទៅទៀត អ៊ីចឹងគាត់អត់សុខចិត្ត ធ្វើម៉េចដកមេប៉ុស្តិ៍។ សំណូមពរមកខ្ញុំ ខ្ញុំថាអត់ចេះដោះស្រាយទេ ឲ្យប្រជាពលរដ្ឋទៅនិយាយជាមួយអាជ្ញាធរឃុំទៅ»។
ដូចគ្នានេះដែរ ប្រជាពលរដ្ឋរស់នៅភូមិពូនរ៉ែង គឺលោក ជុច ក្វែត ជាម្ចាស់គោចំនួនពីរក្បាលដែលចោរបានលួច សម្ដែងទុទ្ទិដ្ឋិនិយម ទាមទារឲ្យស្នងការប៉ូលិស ពិនិត្យ និងផ្ទេរភារៈមន្ត្រីប៉ូលិសចេញពីមូលដ្ឋាន ហើយចាត់តាំងមន្ត្រីប៉ូលិសថ្មីមកធ្វើការបម្រើរាស្ត្រ បង្កើនជំនឿចិត្តពីពលរដ្ឋឡើងវិញ។ លោកបន្តថា សូម្បីមេឃុំបានអន្តរាគមន៍សុំកងប៉ូលិសឲ្យជួយបង្ក្រាបក្រុមចោរ ក៏មន្ត្រីប៉ូលិសមិនយកចិត្តទុកដាក់ជួយប្រជាពលរដ្ឋដូចគ្នា៖ «គេអត់អើពើជួយរកទៀត ឲ្យប្រជាពលរដ្ឋតាមដាន តាមដានម៉េចកើត»។
ចាប់ពីខែសីហា រហូតដល់ខែតុលា នេះ គោចំនួន ៥ក្បាលរបស់ប្រជាពលរដ្ឋនៅភូមិពូនរ៉ែង និងភូមិពូលៈ ត្រូវចោរលួច ក្នុងនោះគោពីរក្បាលត្រូវបានអ្នកភូមិដណ្ដើមបានពីក្រុមចោរវិញ។
នាយនគរបាលប៉ុស្តិ៍ដាក់ដាំ លោក ផង់ ហៀក បដិសេធមិនអធិប្បាយជុំវិញការចោទប្រកាន់របស់ពលរដ្ឋនោះទេ នៅថ្ងៃទី១៤ ខែតុលា ដោយលោកអះអាងថា ជាប់រវល់បំពេញភារកិច្ច។
ទោះជាយ៉ាងនេះក្តី មន្ត្រីឃ្លាំមើលសិទ្ធិមនុស្សនៃសមាគមអាដហុក (ADHOC) ខេត្តមណ្ឌលគិរី លោក សុក រដ្ឋា កត់សម្គាល់ថា គោលនយោបាយភូមិ-ឃុំមានសុវត្ថិភាព មានសារសំខាន់ណាស់ក្នុងកិច្ចការពារប្រជាពលរដ្ឋនៅមូលដ្ឋាន ជាពិសេសការចូលរួមរបស់សមត្ថកិច្ចក្នុងការបម្រើរាស្ត្របង្ក្រាបបទល្មើសទូទៅ។ លើសពីនេះទៀត ប្រសិនសមត្ថកិច្ចខកខាន ឬមានបំណងគេចវេសមិនបំពេញតួនាទីនេះបានល្អប្រសើរជូនរាស្ត្រនោះ នឹងធ្វើឲ្យរាស្ត្រអស់ជំនឿលើមន្ត្រីមូលដ្ឋាន៖ «មន្ត្រីមានសមត្ថកិច្ច ឬអាជ្ញាធរមូលដ្ឋានមិនយកចិត្តទុកដាក់លើបញ្ហាពួកគាត់ ហើយលែងអើពើពួកគាត់ ហើយពួកគាត់អាចធ្វើពាក្យប្ដឹង ឬញត្តិដើម្បីប្ដឹងមន្ត្រីនោះទៅថ្នាក់លើរបស់គាត់ ដើម្បីថ្នាក់លើគាត់ចាត់វិធានការផ្លូវច្បាប់ទៅលើមន្ត្រីអសកម្មនៅមូលដ្ឋាន»។
សេចក្តីរាយការណ៍របស់សហគមន៍ដាក់ដាំ ឲ្យដឹងថា នាយនគរបាលប៉ុស្តិ៍ អសកម្មបង្ក្រាបបទល្មើសមួយចំនួនទៀត ដូចជាបទល្មើសព្រៃឈើ បទល្មើសចរាចរណ៍ ជាដើម។ តាមការគ្រោងទុក ប្រជាពលរដ្ឋឃុំដាក់ដាំ នឹងប្រមូលស្នាមមេដៃដាក់ជូនអាជ្ញាធរឃុំនៅសប្ដាហ៍ក្រោយ ដើម្បីអន្តរាគមន៍ទៅស្នងការប៉ូលិស ឲ្យពិនិត្យ និងសុំប្ដូរតួនាទីនាយនគរបាលប៉ុស្តិ៍ដែលមិនបានអនុវត្តគោលនយោបាយភូមិ-ឃុំមានសុវត្ថិភាពជូនប្រជាពលរដ្ឋ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។